১২৬. আপত্তিআৱিকৰণৱিধি

২২০. তেন খো পন সমযেন অঞ্ঞতৰো ভিক্খু পৱাৰযমানো আপত্তিং সৰতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন সাপত্তিকেন পৱাৰেতব্ব’ন্তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, ভিক্খু পৱাৰযমানো আপত্তিং সৰতি. তেন, ভিক্খৱে, ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামং আপত্তিং আপন্নো. ইতো ৱুট্ঠহিত্ৱা তং আপত্তিং পটিকৰিস্সামী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বো.

ইধ পন, ভিক্খৱে, ভিক্খু পৱাৰযমানো আপত্তিযা ৱেমতিকো হোতি. তেন, ভিক্খৱে,

ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামায আপত্তিযা ৱেমতিকো; যদা নিব্বেমতিকো ভৱিস্সামি তদা তং আপত্তিং পটিকৰিস্সামী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বোতি.

আপত্তি আৱিকৰণৱিধি নিট্ঠিতা.