১২৭. সভাগাপত্তিপটিকম্মৱিধি

২২১. তেন খো পন সমযেন অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগং আপত্তিং আপন্নো হোতি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘ন সভাগা আপত্তি দেসেতব্বা, ন সভাগা আপত্তি পটিগ্গহেতব্বা’তি. অযঞ্চ সব্বো সঙ্ঘো সভাগং আপত্তিং আপন্নো. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগং আপত্তিং আপন্নো হোতি. তেহি, ভিক্খৱে, ভিক্খূহি একো ভিক্খু সামন্তা আৱাসা সজ্জুকং পাহেতব্বো – গচ্ছাৱুসো, তং আপত্তিং পটিকৰিত্ৱা আগচ্ছ, মযং তে সন্তিকে তং আপত্তিং পটিকৰিস্সামাতি. এৱঞ্চেতং লভেথ, ইচ্চেতং কুসলং. নো চে লভেথ, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগং আপত্তিং আপন্নো. যদা অঞ্ঞং ভিক্খুং সুদ্ধং অনাপত্তিকং পস্সিস্সতি তদা তস্স সন্তিকে তং আপত্তিং পটিকৰিস্সতী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বো.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগায আপত্তিযা ৱেমতিকো হোতি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগায আপত্তিযা ৱেমতিকো. যদা নিব্বেমতিকো ভৱিস্সতি তদা তং আপত্তিং পটিকৰিস্সতী’’তি ৱত্ৱা, পৱাৰেতব্বং, ন ত্ৱেৱ তপ্পচ্চযা পৱাৰণায অন্তৰাযো কাতব্বোতি.

সভাগাপত্তিপটিকম্মৱিধি নিট্ঠিতা.

পঠমভাণৱাৰো নিট্ঠিতো.