১২৩. ঞাতকাদিগ্গহণকথা

২১৪. তেন খো পন সমযেন অঞ্ঞতৰং ভিক্খুং তদহু পৱাৰণায ঞাতকা গণ্হিংসু. ভগৱতো এতমত্থং আৰোচেসুং. ইধ পন, ভিক্খৱে, ভিক্খুং তদহু পৱাৰণায ঞাতকা গণ্হন্তি. তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৱাযং ভিক্খু পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৱাযং ভিক্খু পৱাৰণং দেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৱ সঙ্ঘো পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, ন ত্ৱেৱ ৱগ্গেন সঙ্ঘেন পৱাৰেতব্বং. পৱাৰেয্য চে, আপত্তি দুক্কটস্স.

ইধ পন, ভিক্খৱে, ভিক্খুং তদহু পৱাৰণায ৰাজানো গণ্হন্তি…পে… চোৰা গণ্হন্তি … ধুত্তা গণ্হন্তি… ভিক্খুপচ্চত্থিকা গণ্হন্তি. তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৱাযং ভিক্খু পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৱাযং ভিক্খু পৱাৰণং দেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৱ সঙ্ঘো পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, ন ত্ৱেৱ ৱগ্গেন সঙ্ঘেন পৱাৰেতব্বং. পৱাৰেয্য চে, আপত্তি দুক্কটস্সাতি.

ঞাতকাদিগ্গহণকথা নিট্ঠিতা.