১২৪. সঙ্ঘপৱাৰণাদিপ্পভেদা

২১৫. তেন খো পন সমযেন অঞ্ঞতৰস্মিং আৱাসে তদহু পৱাৰণায পঞ্চ ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘সঙ্ঘেন পৱাৰেতব্ব’ন্তি. মযঞ্চম্হা পঞ্চ জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, পঞ্চন্নং সঙ্ঘে পৱাৰেতুন্তি.

২১৬. তেন খো পন সমযেন অঞ্ঞতৰস্মিং আৱাসে তদহু পৱাৰণায চত্তাৰো ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুন্তি. মযঞ্চম্হা চত্তাৰো জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, চতুন্নং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তো. অজ্জ পৱাৰণা. যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

তেন খো পন সমযেন অঞ্ঞতৰস্মিং আৱাসে তদহু পৱাৰণায তযো ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং. মযঞ্চম্হা তযো জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, তিণ্ণং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তা. অজ্জ পৱাৰণা. যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামী’’তি.

২১৭. তেন খো পন সমযেন অঞ্ঞতৰস্মিং আৱাসে তদহু পৱাৰণায দ্ৱে ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং, তিণ্ণং অঞ্ঞমঞ্ঞং পৱাৰেতুং. মযঞ্চম্হা দ্ৱে জনা. কথং নু খো অম্হেহি পৱাৰেতব্ব’’ন্তি. ভগৱতো এতমত্থং আৰোচেসুং. অনুজানামি, ভিক্খৱে, দ্ৱিন্নং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা নৱো ভিক্খু এৱমস্স ৱচনীযো – ‘‘অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা থেৰো ভিক্খু এৱমস্স ৱচনীযো – ‘‘অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামী’’তি.

২১৮. তেন খো পন সমযেন অঞ্ঞতৰস্মিং আৱাসে তদহু পৱাৰণায একো ভিক্খু ৱিহৰতি. অথ খো তস্স ভিক্খুনো এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং, তিণ্ণং অঞ্ঞমঞ্ঞং পৱাৰেতুং, দ্ৱিন্নং অঞ্ঞমঞ্ঞং পৱাৰেতুং. অহঞ্চম্হি এককো. কথং নু খো মযা পৱাৰেতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায একো ভিক্খু ৱিহৰতি. তেন, ভিক্খৱে, ভিক্খুনা যত্থ ভিক্খূ পটিক্কমন্তি উপট্ঠানসালায ৱা মণ্ডপে ৱা ৰুক্খমূলে ৱা, সো দেসো সম্মজ্জিত্ৱা পানীযং পৰিভোজনীযং উপট্ঠাপেত্ৱা আসনং পঞ্ঞপেত্ৱা পদীপং কত্ৱা নিসীদিতব্বং. সচে অঞ্ঞে ভিক্খূ আগচ্ছন্তি, তেহি সদ্ধিং পৱাৰেতব্বং; নো চে আগচ্ছন্তি, ‘অজ্জ মে পৱাৰণা’তি অধিট্ঠাতব্বং. নো চে অধিট্ঠেয্য, আপত্তি দুক্কটস্স.

তত্ৰ, ভিক্খৱে, যত্থ পঞ্চ ভিক্খূ ৱিহৰন্তি, ন একস্স পৱাৰণং আহৰিত্ৱা

চতূহি সঙ্ঘে পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ চত্তাৰো ভিক্খূ ৱিহৰন্তি, ন একস্স পৱাৰণং আহৰিত্ৱা তীহি অঞ্ঞমঞ্ঞং পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ তযো ভিক্খূ ৱিহৰন্তি, ন একস্স পৱাৰণং আহৰিত্ৱা দ্ৱীহি অঞ্ঞমঞ্ঞং পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ দ্ৱে ভিক্খূ ৱিহৰন্তি, ন একস্স পৱাৰণং আহৰিত্ৱা একেন অধিট্ঠাতব্বং. অধিট্ঠেয্য চে, আপত্তি দুক্কটস্সাতি.

সঙ্ঘপৱাৰণাদিপ্পভেদা নিট্ঠিতা.