৯৩. আপত্তিআৱিকৰণৱিধি

১৭০. তেন খো পন সমযেন অঞ্ঞতৰো ভিক্খু পাতিমোক্খে উদ্দিস্সমানে আপত্তিং সৰতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন সাপত্তিকেন উপোসথো কাতব্বো’তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, ভিক্খু পাতিমোক্খে উদ্দিস্সমানে আপত্তিং সৰতি. তেন, ভিক্খৱে, ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামং আপত্তিং আপন্নো. ইতো ৱুট্ঠহিত্ৱা তং আপত্তিং পটিকৰিস্সামী’’তি ৱত্ৱা উপোসথো কাতব্বো, পাতিমোক্খং সোতব্বং, ন ত্ৱেৱ তপ্পচ্চযা উপোসথস্স অন্তৰাযো কাতব্বো.

ইধ পন, ভিক্খৱে, ভিক্খু পাতিমোক্খে উদ্দিস্সমানে আপত্তিযা ৱেমতিকো হোতি. তেন, ভিক্খৱে, ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামায আপত্তিযা ৱেমতিকো. যদা নিব্বেমতিকো ভৱিস্সামি, তদা তং আপত্তিং পটিকৰিস্সামী’’তি ৱত্ৱা উপোসথো কাতব্বো, পাতিমোক্খং সোতব্বং; ন ত্ৱেৱ তপ্পচ্চযা উপোসথস্স অন্তৰাযো কাতব্বোতি.