৯৪. সভাগাপত্তিপটিকম্মৱিধি

১৭১. তেন খো পন সমযেন অঞ্ঞতৰস্মিং আৱাসে তদহুপোসথে সব্বো সঙ্ঘো সভাগং আপত্তিং আপন্নো হোতি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘ন সভাগা আপত্তি দেসেতব্বা, ন সভাগা আপত্তি পটিগ্গহেতব্বা’তি. অযঞ্চ সব্বো সঙ্ঘো সভাগং আপত্তিং আপন্নো. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহুপোসথে সব্বো সঙ্ঘো সভাগং আপত্তিং আপন্নো হোতি. তেহি, ভিক্খৱে, ভিক্খূহি একো ভিক্খু সামন্তা আৱাসা সজ্জুকং পাহেতব্বো – গচ্ছাৱুসো, তং আপত্তিং পটিকৰিত্ৱা আগচ্ছ; মযং তে সন্তিকে আপত্তিং পটিকৰিস্সামাতি. এৱঞ্চেতং লভেথ, ইচ্চেতং কুসলং. নো চে লভেথ, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগং আপত্তিং আপন্নো. যদা অঞ্ঞং ভিক্খুং সুদ্ধং অনাপত্তিকং পস্সিস্সতি, তদা তস্স সন্তিকে তং আপত্তিং পটিকৰিস্সতী’’তি ৱত্ৱা উপোসথো কাতব্বো, পাতিমোক্খং উদ্দিসিতব্বং, ন ত্ৱেৱ তপ্পচ্চযা উপোসথস্স অন্তৰাযো কাতব্বো.

ইধ পন, ভিক্খৱে, অঞ্ঞতৰস্মিং আৱাসে তদহুপোসথে সব্বো সঙ্ঘো সভাগায আপত্তিযা ৱেমতিকো হোতি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগায আপত্তিযা ৱেমতিকো. যদা নিব্বেমতিকো ভৱিস্সতি, তদা তং আপত্তিং পটিকৰিস্সতী’’তি ৱত্ৱা উপোসথো কাতব্বো, পাতিমোক্খং উদ্দিসিতব্বং; ন ত্ৱেৱ তপ্পচ্চযা উপোসথস্স অন্তৰাযো কাতব্বো.

ইধ পন, ভিক্খৱে, অঞ্ঞতৰস্মিং আৱাসে ৱস্সূপগতো সঙ্ঘো সভাগং আপত্তিং আপন্নো হোতি. তেহি, ভিক্খৱে, ভিক্খূহি একো ভিক্খু সামন্তা আৱাসা সজ্জুকং পাহেতব্বো – গচ্ছাৱুসো, তং আপত্তিং পটিকৰিত্ৱা আগচ্ছ; মযং তে সন্তিকে তং আপত্তিং পটিকৰিস্সামাতি. এৱঞ্চেতং লভেথ, ইচ্চেতং কুসলং. নো চে লভেথ, একো ভিক্খু সত্তাহকালিকং পাহেতব্বো – গচ্ছাৱুসো, তং আপত্তিং পটিকৰিত্ৱা আগচ্ছ; মযং তে সন্তিকে তং আপত্তিং পটিকৰিস্সামাতি.

তেন খো পন সমযেন অঞ্ঞতৰস্মিং আৱাসে সব্বো সঙ্ঘো সভাগং আপত্তিং আপন্নো হোতি. সো ন জানাতি তস্সা আপত্তিযা নামগোত্তং. তত্থ অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ব্যত্তো মেধাৱী লজ্জী কুক্কুচ্চকো সিক্খাকামো. তমেনং অঞ্ঞতৰো ভিক্খু যেন সো ভিক্খু তেনুপসঙ্কমি, উপসঙ্কমিত্ৱা তং ভিক্খুং এতদৱোচ – ‘‘যো নু খো, আৱুসো, এৱঞ্চেৱঞ্চ কৰোতি, কিং নাম সো আপত্তিং আপজ্জতী’’তি? সো এৱমাহ – ‘‘যো খো, আৱুসো, এৱঞ্চেৱঞ্চ কৰোতি, ইমং নাম সো আপত্তিং আপজ্জতি. ইমং নাম ত্ৱং, আৱুসো, আপত্তিং আপন্নো; পটিকৰোহি তং আপত্তি’’ন্তি. সো এৱমাহ – ‘‘ন খো অহং, আৱুসো, একোৱ ইমং আপত্তিং আপন্নো; অযং সব্বো সঙ্ঘো ইমং আপত্তিং আপন্নো’’তি. সো এৱমাহ – ‘‘কিং তে, আৱুসো, কৰিস্সতি পৰো আপন্নো ৱা অনাপন্নো ৱা. ইঙ্ঘ, ত্ৱং, আৱুসো, সকায আপত্তিযা ৱুট্ঠাহী’’তি. অথ খো সো ভিক্খু তস্স ভিক্খুনো ৱচনেন তং আপত্তিং পটিকৰিত্ৱা যেন তে ভিক্খূ তেনুপসঙ্কমি, উপসঙ্কমিত্ৱা তে ভিক্খূ এতদৱোচ – ‘‘যো কিৰ, আৱুসো, এৱঞ্চেৱঞ্চ কৰোতি, ইমং নাম সো আপত্তিং আপজ্জতি. ইমং নাম তুম্হে, আৱুসো, আপত্তিং আপন্না; পটিকৰোথ তং আপত্তি’’ন্তি. অথ খো তে ভিক্খূ ন ইচ্ছিংসু তস্স ভিক্খুনো ৱচনেন তং আপত্তিং পটিকাতুং. ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে সব্বো সঙ্ঘো সভাগং আপত্তিং আপন্নো হোতি. সো ন জানাতি তস্সা আপত্তিযা নামগোত্তং. তত্থ অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ব্যত্তো মেধাৱী লজ্জী কুক্কুচ্চকো সিক্খাকামো. তমেনং অঞ্ঞতৰো ভিক্খু যেন সো ভিক্খু তেনুপসঙ্কমি, উপসঙ্কমিত্ৱা তং ভিক্খুং এৱং ৱদেতি – ‘‘যো নু খো, আৱুসো, এৱঞ্চেৱঞ্চ কৰোতি, কিং নাম সো আপত্তিং আপজ্জতী’’তি? সো এৱং ৱদেতি – ‘‘যো খো, আৱুসো, এৱঞ্চেৱঞ্চ কৰোতি, ইমং নাম সো আপত্তিং আপজ্জতি. ইমং নাম ত্ৱং, আৱুসো, আপত্তিং আপন্নো; পটিকৰোহি তং আপত্তি’’ন্তি. সো এৱং ৱদেতি – ‘‘ন খো অহং, আৱুসো, একোৱ ইমং আপত্তিং আপন্নো. অযং সব্বো সঙ্ঘো ইমং আপত্তিং আপন্নো’’তি. সো এৱং ৱদেতি – ‘‘কিং তে, আৱুসো, কৰিস্সতি পৰো আপন্নো ৱা অনাপন্নো ৱা. ইঙ্ঘ, ত্ৱং, আৱুসো, সকায আপত্তিযা ৱুট্ঠাহী’’তি. সো চে, ভিক্খৱে, ভিক্খু তস্স ভিক্খুনো ৱচনেন তং আপত্তিং পটিকৰিত্ৱা যেন তে ভিক্খূ তেনুপসঙ্কমি, উপসঙ্কমিত্ৱা তে ভিক্খূ এৱং ৱদেতি – ‘‘যো কিৰ, আৱুসো, এৱঞ্চেৱঞ্চ কৰোতি ইমং নাম সো আপত্তিং আপজ্জতি, ইমং নাম তুম্হে আৱুসো আপত্তিং আপন্না, পটিকৰোথ তং আপত্তি’’ন্তি. তে চে, ভিক্খৱে, ভিক্খূ তস্স ভিক্খুনো ৱচনেন তং আপত্তিং পটিকৰেয্যুং, ইচ্চেতং কুসলং. নো চে পটিকৰেয্যুং, ন তে, ভিক্খৱে, ভিক্খূ তেন ভিক্খুনা অকামা ৱচনীযাতি.

চোদনাৱত্থুভাণৱাৰো নিট্ঠিতো দুতিযো.