৯২. আপত্তিপটিকম্মৱিধি

১৬৯. তেন খো পন সমযেন অঞ্ঞতৰো ভিক্খু তদহুপোসথে আপত্তিং আপন্নো হোতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন সাপত্তিকেন উপোসথো কাতব্বো’তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ইধ পন, ভিক্খৱে, ভিক্খু তদহুপোসথে আপত্তিং আপন্নো হোতি. তেন, ভিক্খৱে, ভিক্খুনা একং ভিক্খুং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, আৱুসো, ইত্থন্নামং আপত্তিং আপন্নো, তং পটিদেসেমী’’তি. তেন ৱত্তব্বো – ‘‘পস্সসী’’তি. ‘‘আম পস্সামী’’তি. ‘‘আযতিং সংৱৰেয্যাসী’’তি.

ইধ পন, ভিক্খৱে, ভিক্খু তদহুপোসথে আপত্তিযা ৱেমতিকো হোতি. তেন, ভিক্খৱে, ভিক্খুনা একং ভিক্খুং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, আৱুসো, ইত্থন্নামায আপত্তিযা ৱেমতিকো; যদা নিব্বেমতিকো ভৱিস্সামি, তদা তং আপত্তিং পটিকৰিস্সামী’’তি ৱত্ৱা উপোসথো কাতব্বো, পাতিমোক্খং সোতব্বং, ন ত্ৱেৱ তপ্পচ্চযা উপোসথস্স অন্তৰাযো কাতব্বোতি.

তেন খো পন সমযেন ছব্বগ্গিযা ভিক্খূ সভাগং আপত্তিং দেসেন্তি. ভগৱতো এতমত্থং আৰোচেসুং. ন, ভিক্খৱে, সভাগা আপত্তি দেসেতব্বা. যো দেসেয্য, আপত্তি দুক্কটস্সাতি.

তেন খো পন সমযেন ছব্বগ্গিযা ভিক্খূ সভাগং আপত্তিং পটিগ্গণ্হন্তি. ভগৱতো এতমত্থং আৰোচেসুং. ন, ভিক্খৱে, সভাগা আপত্তি পটিগ্গহেতব্বা. যো পটিগ্গণ্হেয্য, আপত্তি দুক্কটস্সাতি.