৭. পব্বজ্জাকথা

২৫. তেন খো পন সমযেন বাৰাণসিযং যসো নাম কুলপুত্তো সেট্ঠিপুত্তো সুখুমালো হোতি. তস্স তযো পাসাদা হোন্তি – একো হেমন্তিকো, একো গিম্হিকো, একো ৱস্সিকো. সো ৱস্সিকে পাসাদে চত্তাৰো মাসে [ৱস্সিকে পাসাদে ৱস্সিকে চত্তাৰো মাসে (সী.)] নিপ্পুৰিসেহি তূৰিযেহি পৰিচাৰযমানো ন হেট্ঠাপাসাদং ওৰোহতি. অথ খো যসস্স কুলপুত্তস্স পঞ্চহি কামগুণেহি সমপ্পিতস্স সমঙ্গীভূতস্স পৰিচাৰযমানস্স পটিকচ্চেৱ [পটিগচ্চেৱ (সী.)] নিদ্দা ওক্কমি, পৰিজনস্সপি নিদ্দা ওক্কমি, সব্বৰত্তিযো চ তেলপদীপো ঝাযতি. অথ খো যসো কুলপুত্তো পটিকচ্চেৱ পবুজ্ঝিত্ৱা অদ্দস সকং পৰিজনং সুপন্তং – অঞ্ঞিস্সা কচ্ছে ৱীণং, অঞ্ঞিস্সা কণ্ঠে মুদিঙ্গং, অঞ্ঞিস্সা কচ্ছে আড়ম্বৰং, অঞ্ঞং ৱিকেসিকং, অঞ্ঞং ৱিক্খেড়িকং, অঞ্ঞা ৱিপ্পলপন্তিযো, হত্থপ্পত্তং সুসানং মঞ্ঞে. দিস্ৱানস্স আদীনৱো পাতুৰহোসি, নিব্বিদায চিত্তং সণ্ঠাসি. অথ খো যসো কুলপুত্তো উদানং উদানেসি – ‘‘উপদ্দুতং ৱত ভো, উপস্সট্ঠং ৱত ভো’’তি.

অথ খো যসো কুলপুত্তো সুৱণ্ণপাদুকাযো আৰোহিত্ৱা যেন নিৱেসনদ্ৱাৰং তেনুপসঙ্কমি. অমনুস্সা দ্ৱাৰং ৱিৱৰিংসু – মা যসস্স কুলপুত্তস্স কোচি অন্তৰাযমকাসি অগাৰস্মা অনগাৰিযং পব্বজ্জাযাতি. অথ খো যসো কুলপুত্তো যেন নগৰদ্ৱাৰং তেনুপসঙ্কমি. অমনুস্সা দ্ৱাৰং ৱিৱৰিংসু – মা যসস্স কুলপুত্তস্স কোচি অন্তৰাযমকাসি অগাৰস্মা অনগাৰিযং পব্বজ্জাযাতি. অথ খো যসো কুলপুত্তো যেন ইসিপতনং মিগদাযো তেনুপসঙ্কমি.

২৬. তেন খো পন সমযেন ভগৱা ৰত্তিযা পচ্চূসসমযং পচ্চুট্ঠায অজ্ঝোকাসে চঙ্কমতি. অদ্দসা খো ভগৱা যসং কুলপুত্তং দূৰতোৱ আগচ্ছন্তং, দিস্ৱান চঙ্কমা ওৰোহিত্ৱা পঞ্ঞত্তে আসনে নিসীদি. অথ খো যসো কুলপুত্তো ভগৱতো অৱিদূৰে উদানং উদানেসি – ‘‘উপদ্দুতং ৱত ভো, উপস্সট্ঠং ৱত ভো’’তি. অথ খো ভগৱা যসং কুলপুত্তং এতদৱোচ – ‘‘ইদং খো, যস, অনুপদ্দুতং, ইদং অনুপস্সট্ঠং. এহি যস, নিসীদ, ধম্মং তে দেসেস্সামী’’তি. অথ খো যসো কুলপুত্তো – ইদং কিৰ অনুপদ্দুতং, ইদং অনুপস্সট্ঠন্তি হট্ঠো উদগ্গো সুৱণ্ণপাদুকাহি ওৰোহিত্ৱা যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নস্স খো যসস্স কুলপুত্তস্স ভগৱা অনুপুব্বিং কথং কথেসি, সেয্যথিদং – দানকথং সীলকথং সগ্গকথং, কামানং আদীনৱং ওকাৰং সংকিলেসং, নেক্খম্মে আনিসংসং পকাসেসি. যদা ভগৱা অঞ্ঞাসি যসং কুলপুত্তং কল্লচিত্তং, মুদুচিত্তং, ৱিনীৱৰণচিত্তং, উদগ্গচিত্তং, পসন্নচিত্তং, অথ যা বুদ্ধানং সামুক্কংসিকা ধম্মদেসনা তং পকাসেসি – দুক্খং, সমুদযং, নিৰোধং, মগ্গং. সেয্যথাপি নাম সুদ্ধং ৱত্থং অপগতকাড়কং সম্মদেৱ ৰজনং পটিগ্গণ্হেয্য, এৱমেৱ যসস্স কুলপুত্তস্স তস্মিংযেৱ আসনে ৱিৰজং ৱীতমলং ধম্মচক্খুং উদপাদি – যং কিঞ্চি সমুদযধম্মং, সব্বং তং নিৰোধধম্মন্তি.

২৭. অথ খো যসস্স কুলপুত্তস্স মাতা পাসাদং অভিৰুহিত্ৱা যসং কুলপুত্তং অপস্সন্তী যেন সেট্ঠি গহপতি তেনুপসঙ্কমি, উপসঙ্কমিত্ৱা সেট্ঠিং গহপতিং এতদৱোচ – ‘‘পুত্তো তে, গহপতি, যসো ন দিস্সতী’’তি. অথ খো সেট্ঠি গহপতি চতুদ্দিসা অস্সদূতে উয্যোজেত্ৱা সামংযেৱ যেন ইসিপতনং মিগদাযো তেনুপসঙ্কমি. অদ্দসা খো সেট্ঠি গহপতি সুৱণ্ণপাদুকানং নিক্খেপং, দিস্ৱান তংযেৱ অনুগমাসি [অনুগমা (সী. স্যা.)]. অদ্দসা খো ভগৱা সেট্ঠিং গহপতিং দূৰতোৱ আগচ্ছন্তং, দিস্ৱান ভগৱতো এতদহোসি – ‘‘যংনূনাহং তথাৰূপং ইদ্ধাভিসঙ্খাৰং অভিসঙ্খৰেয্যং যথা সেট্ঠি গহপতি ইধ নিসিন্নো ইধ নিসিন্নং যসং কুলপুত্তং ন পস্সেয্যা’’তি. অথ খো ভগৱা তথাৰূপং ইদ্ধাভিসঙ্খাৰং অভিসঙ্খৰেসি. অথ খো সেট্ঠি গহপতি যেন ভগৱা তেনুপসঙ্কমি, উপসঙ্কমিত্ৱা ভগৱন্তং এতদৱোচ – ‘‘অপি, ভন্তে, ভগৱা যসং কুলপুত্তং পস্সেয্যা’’তি? তেন হি, গহপতি, নিসীদ, অপ্পেৱ নাম ইধ নিসিন্নো ইধ নিসিন্নং যসং কুলপুত্তং পস্সেয্যাসীতি. অথ খো সেট্ঠি গহপতি – ইধেৱ কিৰাহং নিসিন্নো ইধ নিসিন্নং যসং কুলপুত্তং পস্সিস্সামীতি হট্ঠো উদগ্গো ভগৱন্তং অভিৱাদেত্ৱা একমন্তং নিসীদি. একমন্তং নিসিন্নস্স খো সেট্ঠিস্স গহপতিস্স ভগৱা অনুপুব্বিং কথং কথেসি, সেয্যথিদং – দানকথং সীলকথং সগ্গকথং, কামানং আদীনৱং ওকাৰং সংকিলেসং, নেক্খম্মে আনিসংসং পকাসেসি. যদা ভগৱা অঞ্ঞাসি সেট্ঠিং গহপতিং কল্লচিত্তং, মুদুচিত্তং, ৱিনীৱৰণচিত্তং, উদগ্গচিত্তং, পসন্নচিত্তং, অথ যা বুদ্ধানং সামুক্কংসিকা ধম্মদেসনা, তং পকাসেসি – দুক্খং, সমুদযং, নিৰোধং, মগ্গং. সেয্যথাপি নাম সুদ্ধং ৱত্থং অপগতকাড়কং সম্মদেৱ ৰজনং পটিগ্গণ্হেয্য এৱমেৱ সেট্ঠিস্স গহপতিস্স তস্মিংযেৱ আসনে ৱিৰজং ৱীতমলং ধম্মচক্খুং উদপাদি – যং কিঞ্চি সমুদযধম্মং, সব্বং তং নিৰোধধম্মন্তি. অথ খো সেট্ঠি গহপতি দিট্ঠধম্মো পত্তধম্মো ৱিদিতধম্মো পৰিযোগাড়্হধম্মো তিণ্ণৱিচিকিচ্ছো ৱিগতকথংকথো ৱেসাৰজ্জপ্পত্তো অপৰপ্পচ্চযো সত্থুসাসনে ভগৱন্তং এতদৱোচ – ‘‘অভিক্কন্তং, ভন্তে, অভিক্কন্তং, ভন্তে, সেয্যথাপি, ভন্তে, নিক্কুজ্জিতং [নিকুজ্জিতং (ক.)] ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য – চক্খুমন্তো ৰূপানি দক্খন্তীতি – এৱমেৱং ভগৱতা অনেকপৰিযাযেন ধম্মো পকাসিতো. এসাহং, ভন্তে, ভগৱন্তং সৰণং গচ্ছামি, ধম্মঞ্চ, ভিক্খুসঙ্ঘঞ্চ. উপাসকং মং ভগৱা ধাৰেতু অজ্জতগ্গে পাণুপেতং সৰণং গত’’ন্তি. সোৱ লোকে পঠমং উপাসকো অহোসি তেৱাচিকো.

২৮. অথ খো যসস্স কুলপুত্তস্স পিতুনো ধম্মে দেসিযমানে যথাদিট্ঠং যথাৱিদিতং ভূমিং পচ্চৱেক্খন্তস্স অনুপাদায আসৱেহি চিত্তং ৱিমুচ্চি. অথ খো ভগৱতো এতদহোসি – ‘‘যসস্স খো কুলপুত্তস্স পিতুনো ধম্মে দেসিযমানে যথাদিট্ঠং যথাৱিদিতং ভূমিং পচ্চৱেক্খন্তস্স অনুপাদায আসৱেহি চিত্তং ৱিমুত্তং. অভব্বো খো যসো কুলপুত্তো হীনাযাৱত্তিত্ৱা কামে পৰিভুঞ্জিতুং, সেয্যথাপি পুব্বে অগাৰিকভূতো; যংনূনাহং তং ইদ্ধাভিসঙ্খাৰং পটিপ্পস্সম্ভেয্য’’ন্তি. অথ খো ভগৱা তং ইদ্ধাভিসঙ্খাৰং পটিপ্পস্সম্ভেসি. অদ্দসা খো সেট্ঠি গহপতি যসং কুলপুত্তং নিসিন্নং, দিস্ৱান যসং কুলপুত্তং এতদৱোচ – ‘‘মাতা তে তাত, যস, পৰিদেৱ [পৰিদেৱী (ক.)] সোকসমাপন্না, দেহি মাতুযা জীৱিত’’ন্তি. অথ খো যসো কুলপুত্তো ভগৱন্তং উল্লোকেসি. অথ খো ভগৱা সেট্ঠিং গহপতিং এতদৱোচ – ‘‘তং কিং মঞ্ঞসি, গহপতি, যস্স সেক্খেন ঞাণেন সেক্খেন দস্সনেন ধম্মো দিট্ঠো ৱিদিতো সেয্যথাপি তযা? তস্স যথাদিট্ঠং যথাৱিদিতং ভূমিং পচ্চৱেক্খন্তস্স অনুপাদায আসৱেহি চিত্তং ৱিমুত্তং. ভব্বো নু খো সো, গহপতি, হীনাযাৱত্তিত্ৱা কামে পৰিভুঞ্জিতুং সেয্যথাপি পুব্বে অগাৰিকভূতো’’তি? ‘‘নো হেতং, ভন্তে’’. ‘‘যসস্স খো, গহপতি, কুলপুত্তস্স সেক্খেন ঞাণেন সেক্খেন দস্সনেন ধম্মো দিট্ঠো ৱিদিতো সেয্যথাপি তযা. তস্স যথাদিট্ঠং যথাৱিদিতং ভূমিং পচ্চৱেক্খন্তস্স অনুপাদায আসৱেহি চিত্তং ৱিমুত্তং. অভব্বো খো, গহপতি, যসো কুলপুত্তো হীনাযাৱত্তিত্ৱা কামে পৰিভুঞ্জিতুং সেয্যথাপি পুব্বে অগাৰিকভূতো’’তি. ‘‘লাভা, ভন্তে, যসস্স কুলপুত্তস্স, সুলদ্ধং, ভন্তে, যসস্স কুলপুত্তস্স, যথা যসস্স কুলপুত্তস্স অনুপাদায আসৱেহি চিত্তং ৱিমুত্তং. অধিৱাসেতু মে, ভন্তে, ভগৱা অজ্জতনায ভত্তং যসেন কুলপুত্তেন পচ্ছাসমণেনা’’তি. অধিৱাসেসি ভগৱা তুণ্হীভাৱেন. অথ খো সেট্ঠি গহপতি ভগৱতো অধিৱাসনং ৱিদিত্ৱা উট্ঠাযাসনা ভগৱন্তং অভিৱাদেত্ৱা পদক্খিণং কত্ৱা পক্কামি. অথ খো যসো কুলপুত্তো অচিৰপক্কন্তে সেট্ঠিম্হি গহপতিম্হি ভগৱন্তং এতদৱোচ – ‘‘লভেয্যাহং, ভন্তে, ভগৱতো সন্তিকে পব্বজ্জং, লভেয্যং উপসম্পদ’’ন্তি. ‘‘এহি ভিক্খূ’’তি ভগৱা অৱোচ – ‘‘স্ৱাক্খাতো ধম্মো, চৰ ব্ৰহ্মচৰিযং সম্মা দুক্খস্স অন্তকিৰিযাযা’’তি. সাৱ তস্স আযস্মতো উপসম্পদা অহোসি. তেন খো পন সমযেন সত্ত লোকে অৰহন্তো হোন্তি.

যসস্স পব্বজ্জা নিট্ঠিতা.

২৯. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায আযস্মতা যসেন পচ্ছাসমণেন যেন সেট্ঠিস্স গহপতিস্স নিৱেসনং তেনুপসঙ্কমি, উপসঙ্কমিত্ৱা পঞ্ঞত্তে আসনে নিসীদি. অথ খো আযস্মতো যসস্স মাতা চ পুৰাণদুতিযিকা চ যেন ভগৱা তেনুপসঙ্কমিংসু, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. তাসং ভগৱা অনুপুব্বিং কথং কথেসি, সেয্যথিদং – দানকথং সীলকথং সগ্গকথং, কামানং আদীনৱং ওকাৰং সংকিলেসং, নেক্খম্মে আনিসংসং পকাসেসি. যদা তা ভগৱা অঞ্ঞাসি কল্লচিত্তা, মুদুচিত্তা, ৱিনীৱৰণচিত্তা, উদগ্গচিত্তা, পসন্নচিত্তা, অথ যা বুদ্ধানং সামুক্কংসিকা ধম্মদেসনা তং পকাসেসি – দুক্খং, সমুদযং, নিৰোধং, মগ্গং. সেয্যথাপি নাম সুদ্ধং ৱত্থং অপগতকাড়কং সম্মদেৱ ৰজনং পটিগ্গণ্হেয্য, এৱমেৱ তাসং তস্মিংযেৱ আসনে ৱিৰজং ৱীতমলং ধম্মচক্খুং উদপাদি – যং কিঞ্চি সমুদযধম্মং, সব্বং তং নিৰোধধম্মন্তি. তা দিট্ঠধম্মা পত্তধম্মা ৱিদিতধম্মা পৰিযোগাড়্হধম্মা তিণ্ণৱিচিকিচ্ছা ৱিগতকথংকথা ৱেসাৰজ্জপ্পত্তা অপৰপ্পচ্চযা সত্থুসাসনে ভগৱন্তং এতদৱোচুং – ‘‘অভিক্কন্তং, ভন্তে, অভিক্কন্তং, ভন্তে…পে… এতা মযং, ভন্তে, ভগৱন্তং সৰণং গচ্ছাম, ধম্মঞ্চ, ভিক্খুসঙ্ঘঞ্চ. উপাসিকাযো নো ভগৱা ধাৰেতু অজ্জতগ্গে পাণুপেতা সৰণং গতা’’তি. তা চ লোকে পঠমং উপাসিকা অহেসুং তেৱাচিকা.

অথ খো আযস্মতো যসস্স মাতা চ পিতা চ পুৰাণদুতিযিকা চ ভগৱন্তঞ্চ আযস্মন্তঞ্চ যসং পণীতেন খাদনীযেন ভোজনীযেন সহত্থা সন্তপ্পেত্ৱা সম্পৱাৰেত্ৱা, ভগৱন্তং ভুত্তাৱিং ওনীতপত্তপাণিং, একমন্তং নিসীদিংসু. অথ খো ভগৱা আযস্মতো যসস্স মাতৰঞ্চ পিতৰঞ্চ পুৰাণদুতিযিকঞ্চ ধম্মিযা কথায সন্দস্সেত্ৱা সমাদপেত্ৱা সমুত্তেজেত্ৱা সম্পহংসেত্ৱা উট্ঠাযাসনা পক্কামি.

৩০. অস্সোসুং খো আযস্মতো যসস্স চত্তাৰো গিহিসহাযকা বাৰাণসিযং সেট্ঠানুসেট্ঠীনং কুলানং পুত্তা – ৱিমলো, সুবাহু, পুণ্ণজি, গৱম্পতি – যসো কিৰ কুলপুত্তো কেসমস্সুং ওহাৰেত্ৱা কাসাযানি ৱত্থানি অচ্ছাদেত্ৱা অগাৰস্মা অনগাৰিযং পব্বজিতোতি. সুত্ৱান নেসং এতদহোসি – ‘‘ন হি নূন সো ওৰকো ধম্মৱিনযো, ন সা ওৰকা পব্বজ্জা, যত্থ যসো কুলপুত্তো কেসমস্সুং ওহাৰেত্ৱা কাসাযানি ৱত্থানি অচ্ছাদেত্ৱা অগাৰস্মা অনগাৰিযং পব্বজিতো’’তি. তে [তে চত্তাৰো জনা (ক.)] যেনাযস্মা যসো তেনুপসঙ্কমিংসু, উপসঙ্কমিত্ৱা আযস্মন্তং যসং অভিৱাদেত্ৱা একমন্তং অট্ঠংসু. অথ খো আযস্মা যসো তে চত্তাৰো গিহিসহাযকে আদায যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা যসো ভগৱন্তং এতদৱোচ – ‘‘ইমে মে, ভন্তে, চত্তাৰো গিহিসহাযকা বাৰাণসিযং সেট্ঠানুসেট্ঠীনং কুলানং পুত্তা – ৱিমলো, সুবাহু, পুণ্ণজি, গৱম্পতি. ইমে [ইমে চত্তাৰো (ক.)] ভগৱা ওৱদতু অনুসাসতূ’’তি. তেসং ভগৱা অনুপুব্বিং কথং কথেসি, সেয্যথিদং – দানকথং সীলকথং সগ্গকথং কামানং আদীনৱং ওকাৰং সংকিলেসং নেক্খম্মে আনিসংসং পকাসেসি, যদা তে ভগৱা অঞ্ঞাসি কল্লচিত্তে মুদুচিত্তে ৱিনীৱৰণচিত্তে উদগ্গচিত্তে পসন্নচিত্তে, অথ যা বুদ্ধানং সামুক্কংসিকা ধম্মদেসনা, তং পকাসেসি দুক্খং সমুদযং নিৰোধং মগ্গং, সেয্যথাপি নাম সুদ্ধং ৱত্থং অপগতকাড়কং সম্মদেৱ ৰজনং পটিগ্গণ্হেয্য, এৱমেৱ তেসং তস্মিংযেৱ আসনে ৱিৰজং ৱীতমলং ধম্মচক্খুং উদপাদি ‘‘যং কিঞ্চি সমুদযধম্মং, সব্বং তং নিৰোধধম্ম’’ন্তি. তে দিট্ঠধম্মা পত্তধম্মা ৱিদিতধম্মা পৰিযোগাড়্হধম্মা তিণ্ণৱিচিকিচ্ছা ৱিগতকথংকথা ৱেসাৰজ্জপ্পত্তা অপৰপ্পচ্চযা সত্থুসাসনে ভগৱন্তং এতদৱোচুং – ‘‘লভেয্যাম মযং, ভন্তে, ভগৱতো সন্তিকে পব্বজ্জং, লভেয্যাম উপসম্পদ’’ন্তি. ‘‘এথ ভিক্খৱো’’তি ভগৱা অৱোচ – ‘‘স্ৱাক্খাতো ধম্মো, চৰথ ব্ৰহ্মচৰিযং সম্মা দুক্খস্স অন্তকিৰিযাযা’’তি. সাৱ তেসং আযস্মন্তানং উপসম্পদা অহোসি. অথ খো ভগৱা তে ভিক্খূ ধম্মিযা কথায ওৱদি অনুসাসি. তেসং ভগৱতা ধম্মিযা কথায ওৱদিযমানানং অনুসাসিযমানানং অনুপাদায আসৱেহি চিত্তানি ৱিমুচ্চিংসু. তেন খো পন সমযেন একাদস লোকে অৰহন্তো হোন্তি.

চতুগিহিসহাযকপব্বজ্জা নিট্ঠিতা.

৩১. অস্সোসুং খো আযস্মতো যসস্স পঞ্ঞাসমত্তা গিহিসহাযকা জানপদা পুব্বানুপুব্বকানং কুলানং পুত্তা – যসো কিৰ কুলপুত্তো কেসমস্সুং ওহাৰেত্ৱা কাসাযানি ৱত্থানি অচ্ছাদেত্ৱা অগাৰস্মা অনগাৰিযং পব্বজিতোতি. সুত্ৱান নেসং এতদহোসি – ‘‘ন হি নূন সো ওৰকো ধম্মৱিনযো, ন সা ওৰকা পব্বজ্জা, যত্থ যসো কুলপুত্তো কেসমস্সুং ওহাৰেত্ৱা কাসাযানি ৱত্থানি অচ্ছাদেত্ৱা অগাৰস্মা অনগাৰিযং পব্বজিতো’’তি. তে যেনাযস্মা যসো তেনুপসঙ্কমিংসু, উপসঙ্কমিত্ৱা আযস্মন্তং যসং অভিৱাদেত্ৱা একমন্তং অট্ঠংসু. অথ খো আযস্মা যসো তে পঞ্ঞাসমত্তে গিহিসহাযকে আদায যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা যসো ভগৱন্তং এতদৱোচ – ‘‘ইমে মে, ভন্তে, পঞ্ঞাসমত্তা গিহিসহাযকা জানপদা পুব্বানুপুব্বকানং কুলানং পুত্তা. ইমে ভগৱা ওৱদতু অনুসাসতূ’’তি. তেসং ভগৱা অনুপুব্বিং কথং কথেসি, সেয্যথিদং – দানকথং সীলকথং সগ্গকথং কামানং আদীনৱং ওকাৰং সংকিলেসং নেক্খম্মে আনিসংসং পকাসেসি. যদা তে ভগৱা অঞ্ঞাসি কল্লচিত্তে মুদুচিত্তে ৱিনীৱৰণচিত্তে উদগ্গচিত্তে পসন্নচিত্তে, অথ যা বুদ্ধানং সামুক্কংসিকা ধম্মদেসনা, তং পকাসেসি দুক্খং সমুদযং নিৰোধং মগ্গং, সেয্যথাপি নাম সুদ্ধং ৱত্থং অপগতকাড়কং সম্মদেৱ ৰজনং পটিগ্গণ্হেয্য, এৱমেৱ তেসং তস্মিংযেৱ আসনে ৱিৰজং ৱীতমলং ধম্মচক্খুং উদপাদি যং কিঞ্চি সমুদযধম্মং, সব্বং তং নিৰোধধম্মন্তি. তে দিট্ঠধম্মা পত্তধম্মা ৱিদিতধম্মা পৰিযোগাড়্হধম্মা তিণ্ণৱিচিকিচ্ছা ৱিগতকথংকথা ৱেসাৰজ্জপ্পত্তা অপৰপ্পচ্চযা সত্থুসাসনে ভগৱন্তং এতদৱোচুং – ‘‘লভেয্যাম মযং, ভন্তে, ভগৱতো সন্তিকে পব্বজ্জং, লভেয্যাম উপসম্পদ’’ন্তি. ‘‘এথ ভিক্খৱো’’তি ভগৱা অৱোচ – ‘‘স্ৱাক্খাতো ধম্মো, চৰথ ব্ৰহ্মচৰিযং সম্মা দুক্খস্স অন্তকিৰিযাযা’’তি. সাৱ তেসং আযস্মন্তানং উপসম্পদা অহোসি. অথ খো ভগৱা তে ভিক্খূ ধম্মিযা কথায ওৱদি অনুসাসি. তেসং ভগৱতা ধম্মিযা কথায ওৱদিযমানানং অনুসাসিযমানানং অনুপাদায আসৱেহি চিত্তানি ৱিমুচ্চিংসু. তেন খো পন সমযেন একসট্ঠি লোকে অৰহন্তো হোন্তি.

পঞ্ঞাসগিহিসহাযকপব্বজ্জা নিট্ঠিতা.

নিট্ঠিতা চ পব্বজ্জাকথা.