৬৭. তস্সুদ্দানং

১৩১. ৱিনযম্হি মহত্থেসু, পেসলানং সুখাৱহে;

নিগ্গহানঞ্চ পাপিচ্ছে, লজ্জীনং পগ্গহেসু চ.

সাসনাধাৰণে চেৱ, সব্বঞ্ঞুজিনগোচৰে;

অনঞ্ঞৱিসযে খেমে, সুপঞ্ঞত্তে অসংসযে.

খন্ধকে ৱিনযে চেৱ, পৰিৱাৰে চ মাতিকে;

যথাত্থকাৰী কুসলো, পটিপজ্জতি যোনিসো.

যো গৱং ন ৱিজানাতি, ন সো ৰক্খতি গোগণং;

এৱং সীলং অজানন্তো, কিং সো ৰক্খেয্য সংৱৰং.

পমুট্ঠম্হি চ সুত্তন্তে, অভিধম্মে চ তাৱদে;

ৱিনযে অৱিনট্ঠম্হি, পুন তিট্ঠতি সাসনং.

তস্মা সঙ্গাহণাহেতুং [সঙ্গাহনাহেতুং (ক.)], উদ্দানং অনুপুব্বসো;

পৱক্খামি যথাঞাযং, সুণাথ মম ভাসতো.

ৱত্থু নিদানং আপত্তি, নযা পেয্যালমেৱ চ;

দুক্কৰং তং অসেসেতুং, নযতো তং ৱিজানথাতি.

বোধি ৰাজাযতনঞ্চ, অজপালো সহম্পতি;

ব্ৰহ্মা আড়াৰো উদকো, ভিক্খু চ উপকো ইসি.

কোণ্ডঞ্ঞো ৱপ্পো ভদ্দিযো, মহানামো চ অস্সজি;

যসো চত্তাৰো পঞ্ঞাস, সব্বে পেসেসি সো দিসা.

ৱত্থু মাৰেহি তিংসা চ, উৰুৱেলং তযো জটী;

অগ্যাগাৰং মহাৰাজা, সক্কো ব্ৰহ্মা চ কেৱলা.

পংসুকূলং পোক্খৰণী, সিলা চ ককুধো সিলা;

জম্বু অম্বো চ আমলো, পাৰিপুপ্ফঞ্চ আহৰি.

ফালিযন্তু উজ্জলন্তু, ৱিজ্ঝাযন্তু চ কস্সপ;

নিমুজ্জন্তি মুখী মেঘো, গযা লট্ঠি চ মাগধো.

উপতিস্সো কোলিতো চ, অভিঞ্ঞাতা চ পব্বজুং;

দুন্নিৱত্থা পণামনা, কিসো লূখো চ ব্ৰাহ্মণো.

অনাচাৰং আচৰতি, উদৰং মাণৱো গণো;

ৱস্সং বালেহি পক্কন্তো, দস ৱস্সানি নিস্সযো.

ন ৱত্তন্তি পণামেতুং, বালা পস্সদ্ধি পঞ্চ ছ;

যো সো অঞ্ঞো চ নগ্গো চ, অচ্ছিন্নজটিলসাকিযো.

মগধেসু পঞ্চাবাধা, একো ৰাজা [ভটো চোৰো (স্যা.)] চ অঙ্গুলি;

মাগধো চ অনুঞ্ঞাসি, কাৰা লিখি কসাহতো.

লক্খণা ইণা দাসো চ, ভণ্ডুকো উপালি অহি;

সদ্ধং কুলং কণ্টকো চ, আহুন্দৰিকমেৱ চ.

ৱত্থুম্হি দাৰকো সিক্খা, ৱিহৰন্তি চ কিং নু খো;

সব্বং মুখং উপজ্ঝাযে, অপলাড়ন কণ্টকো.

পণ্ডকো থেয্যপক্কন্তো, অহি চ মাতৰী পিতা;

অৰহন্তভিক্খুনীভেদা, ৰুহিৰেন চ ব্যঞ্জনং.

অনুপজ্ঝাযসঙ্ঘেন, গণপণ্ডকপত্তকো;

অচীৱৰং তদুভযং, যাচিতেনপি যে তযো.

হত্থা পাদা হত্থপাদা, কণ্ণা নাসা তদূভযং;

অঙ্গুলিঅড়কণ্ডৰং, ফণং খুজ্জঞ্চ ৱামনং.

গলগণ্ডী লক্খণা চেৱ, কসা লিখিতসীপদী;

পাপপৰিসদূসী চ, কাণং কুণি তথেৱ চ.

খঞ্জং পক্খহতঞ্চেৱ, সচ্ছিন্নইৰিযাপথং;

জৰান্ধমূগবধিৰং, অন্ধমূগঞ্চ যং তহিং.

অন্ধবধিৰং যং ৱুত্তং, মূগবধিৰমেৱ চ;

অন্ধমূগবধিৰঞ্চ, অলজ্জীনঞ্চ নিস্সযং.

ৱত্থব্বঞ্চ তথাদ্ধানং, যাচমানেন লক্খণা [পেক্খনা (সব্বত্থ)];

আগচ্ছতু ৱিৱদন্তি, একুপজ্ঝাযেন কস্সপো.

দিস্সন্তি উপসম্পন্না, আবাধেহি চ পীড়িতা;

অননুসিট্ঠা ৱিত্থেন্তি, তত্থেৱ অনুসাসনা.

সঙ্ঘেপি চ অথো বালা, অসম্মতা চ একতো;

উল্লুম্পতুপসম্পদা, নিস্সযো এককো তযোতি.

ইমম্হি খন্ধকে ৱত্থূনি একসতঞ্চ দ্ৱাসত্ততি.

মহাখন্ধকো নিট্ঠিতো.