৬৬. আপত্তিযা অদস্সনে উক্খিত্তকৱত্থূনি

১৩০. তেন খো পন সমযেন অঞ্ঞতৰো ভিক্খু আপত্তিযা অদস্সনে উক্খিত্তকো ৱিব্ভমি. সো পুন পচ্চাগন্ত্ৱা ভিক্খূ উপসম্পদং যাচি. ভগৱতো এতমত্থং আৰোচেসুং.

ইধ পন, ভিক্খৱে, ভিক্খু আপত্তিযা অদস্সনে উক্খিত্তকো ৱিব্ভমতি. সো পুন পচ্চাগন্ত্ৱা ভিক্খূ উপসম্পদং যাচতি. সো এৱমস্স ৱচনীযো – ‘‘পস্সিস্সসি তং আপত্তি’’ন্তি? সচাহং পস্সিস্সামীতি, পব্বাজেতব্বো. সচাহং ন পস্সিস্সামীতি, ন পব্বাজেতব্বো. পব্বাজেত্ৱা ৱত্তব্বো – ‘‘পস্সিস্সসি তং আপত্তি’’ন্তি? সচাহং পস্সিস্সামীতি, উপসম্পাদেতব্বো. সচাহং ন পস্সিস্সামীতি, ন উপসম্পাদেতব্বো. উপসম্পাদেত্ৱা ৱত্তব্বো – ‘‘পস্সিস্সসি তং আপত্তি’’ন্তি? সচাহং পস্সিস্সামীতি, ওসাৰেতব্বো. সচাহং ন পস্সিস্সামীতি, ন ওসাৰেতব্বো. ওসাৰেত্ৱা ৱত্তব্বো – ‘‘পস্সসি [পস্সাহি (সী.)] তং আপত্তি’’ন্তি? সচে পস্সতি, ইচ্চেতং কুসলং. নো চে পস্সতি, লব্ভমানায সামগ্গিযা পুন উক্খিপিতব্বো. অলব্ভমানায সামগ্গিযা অনাপত্তি সম্ভোগে সংৱাসে.

ইধ পন, ভিক্খৱে, ভিক্খু আপত্তিযা অপ্পটিকম্মে উক্খিত্তকো ৱিব্ভমতি. সো পুন পচ্চাগন্ত্ৱা ভিক্খূ উপসম্পদং যাচতি. সো এৱমস্স ৱচনীযো – ‘‘পটিকৰিস্সসি তং আপত্তি’’ন্তি? সচাহং পটিকৰিস্সামীতি, পব্বাজেতব্বো. সচাহং ন পটিকৰিস্সামীতি, ন পব্বাজেতব্বো. পব্বাজেত্ৱা ৱত্তব্বো – ‘‘পটিকৰিস্সসি তং আপত্তি’’ন্তি? সচাহং পটিকৰিস্সামীতি, উপসম্পাদেতব্বো. সচাহং ন পটিকৰিস্সামীতি, ন উপসম্পাদেতব্বো. উপসম্পাদেত্ৱা ৱত্তব্বো – ‘‘পটিকৰিস্সসি তং আপত্তি’’ন্তি? সচাহং পটিকৰিস্সামীতি, ওসাৰেতব্বো. সচাহং ন পটিকৰিস্সামীতি, ন ওসাৰেতব্বো. ওসাৰেত্ৱা ৱত্তব্বো – ‘‘পটিকৰোহি তং আপত্তি’’ন্তি. সচে পটিকৰোতি, ইচ্চেতং কুসলং. নো চে পটিকৰোতি লব্ভমানায সামগ্গিযা পুন উক্খিপিতব্বো. অলব্ভমানায সামগ্গিযা অনাপত্তি সম্ভোগে সংৱাসে.

ইধ পন, ভিক্খৱে, ভিক্খু পাপিকায দিট্ঠিযা অপ্পটিনিস্সগ্গে উক্খিত্তকো ৱিব্ভমতি. সো পুন পচ্চাগন্ত্ৱা ভিক্খূ উপসম্পদং যাচতি. সো এৱমস্স ৱচনীযো – ‘‘পটিনিস্সজ্জিস্সসি তং পাপিকং দিট্ঠি’’ন্তি? সচাহং পটিনিস্সজ্জিস্সামীতি, পব্বাজেতব্বো. সচাহং ন পটিনিস্সজ্জিস্সামীতি, ন পব্বাজেতব্বো. পব্বাজেত্ৱা ৱত্তব্বো – ‘‘পটিনিস্সজ্জিস্সসি তং পাপিকং দিট্ঠি’’ন্তি? সচাহং পটিনিস্সজ্জিস্সামীতি, উপসম্পাদেতব্বো. সচাহং ন পটিনিস্সজ্জিস্সামীতি, ন উপসম্পাদেতব্বো. উপসম্পাদেত্ৱা ৱত্তব্বো – ‘‘পটিনিস্সজ্জিস্সসি তং পাপিকং দিট্ঠি’’ন্তি? সচাহং পটিনিস্সজ্জিস্সামীতি, ওসাৰেতব্বো. সচাহং ন পটিনিস্সজ্জিস্সামীতি, ন ওসাৰেতব্বো. ওসাৰেত্ৱা ৱত্তব্বো – ‘‘পটিনিস্সজ্জেহি তং পাপিকং দিট্ঠি’’ন্তি. সচে পটিনিস্সজ্জতি, ইচ্চেতং কুসলং. নো চে পটিনিস্সজ্জতি, লব্ভমানায সামগ্গিযা পুন উক্খিপিতব্বো. অলব্ভমানায সামগ্গিযা অনাপত্তি সম্ভোগে সংৱাসেতি.

মহাখন্ধকো পঠমো.