৬৫. চত্তাৰি অকৰণীযানি

১২৯. তেন খো পন সমযেন ভিক্খূ অঞ্ঞতৰং ভিক্খুং উপসম্পাদেত্ৱা এককং ওহায পক্কমিংসু. সো পচ্ছা এককোৱ আগচ্ছন্তো অন্তৰামগ্গে পুৰাণদুতিযিকায সমাগঞ্ছি. সা এৱমাহ – ‘‘কিংদানি পব্বজিতোসী’’তি? ‘‘আম, পব্বজিতোম্হী’’তি. ‘‘দুল্লভো খো পব্বজিতানং মেথুনো ধম্মো; এহি, মেথুনং ধম্মং পটিসেৱা’’তি. সো তস্সা মেথুনং ধম্মং পটিসেৱিত্ৱা চিৰেন অগমাসি. ভিক্খূ এৱমাহংসু – ‘‘কিস্স ত্ৱং, আৱুসো, এৱং চিৰং অকাসী’’তি? অথ খো সো ভিক্খু ভিক্খূনং এতমত্থং আৰোচেসি. ভিক্খূ ভগৱতো এতমত্থং আৰোচেসুং. অনুজানামি, ভিক্খৱে, উপসম্পাদেত্ৱা দুতিযং দাতুং, চত্তাৰি চ অকৰণীযানি আচিক্খিতুং –

‘‘উপসম্পন্নেন ভিক্খুনা মেথুনো ধম্মো ন পটিসেৱিতব্বো, অন্তমসো তিৰচ্ছানগতাযপি. যো ভিক্খু মেথুনং ধম্মং পটিসেৱতি, অস্সমণো হোতি অসক্যপুত্তিযো. সেয্যথাপি নাম পুৰিসো সীসচ্ছিন্নো অভব্বো তেন সৰীৰবন্ধনেন জীৱিতুং, এৱমেৱ ভিক্খু মেথুনং ধম্মং পটিসেৱিত্ৱা অস্সমণো হোতি অসক্যপুত্তিযো. তং তে যাৱজীৱং অকৰণীযং.

‘‘উপসম্পন্নেন ভিক্খুনা অদিন্নং থেয্যসঙ্খাতং ন আদাতব্বং, অন্তমসো তিণসলাকং উপাদায. যো ভিক্খু পাদং ৱা পাদাৰহং ৱা অতিৰেকপাদং ৱা অদিন্নং থেয্যসঙ্খাতং আদিযতি, অস্সমণো হোতি অসক্যপুত্তিযো. সেয্যথাপি নাম পণ্ডুপলাসো বন্ধনা পমুত্তো অভব্বো হৰিতত্থায, এৱমেৱ ভিক্খু পাদং ৱা পাদাৰহং ৱা অতিৰেকপাদং ৱা অদিন্নং থেয্যসঙ্খাতং আদিযিত্ৱা অস্সমণো হোতি অসক্যপুত্তিযো. তং তে যাৱজীৱং অকৰণীযং.

‘‘উপসম্পন্নেন ভিক্খুনা সঞ্চিচ্চ পাণো জীৱিতা ন ৱোৰোপেতব্বো, অন্তমসো কুন্থকিপিল্লিকং উপাদায. যো ভিক্খু সঞ্চিচ্চ মনুস্সৱিগ্গহং জীৱিতা ৱোৰোপেতি, অন্তমসো গব্ভপাতনং উপাদায, অস্সমণো হোতি অসক্যপুত্তিযো. সেয্যথাপি নাম পুথুসিলা দ্ৱেধা ভিন্না অপ্পটিসন্ধিকা হোতি, এৱমেৱ ভিক্খু সঞ্চিচ্চ মনুস্সৱিগ্গহং জীৱিতা ৱোৰোপেত্ৱা অস্সমণো হোতি অসক্যপুত্তিযো. তং তে যাৱজীৱং অকৰণীযং.

‘‘উপসম্পন্নেন ভিক্খুনা উত্তৰিমনুস্সধম্মো ন উল্লপিতব্বো, অন্তমসো ‘সুঞ্ঞাগাৰে অভিৰমামী’তি. যো ভিক্খু পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপতি ঝানং ৱা ৱিমোক্খং ৱা সমাধিং ৱা সমাপত্তিং ৱা মগ্গং ৱা ফলং ৱা, অস্সমণো হোতি অসক্যপুত্তিযো. সেয্যথাপি নাম তালো মত্থকচ্ছিন্নো অভব্বো পুন ৱিৰুড়্হিযা, এৱমেৱ ভিক্খু পাপিচ্ছো ইচ্ছাপকতো অসন্তং অভূতং উত্তৰিমনুস্সধম্মং উল্লপিত্ৱা অস্সমণো হোতি অসক্যপুত্তিযো. তং তে যাৱজীৱং অকৰণীয’’ন্তি.

চত্তাৰি অকৰণীযানি নিট্ঠিতানি.