৬৪. চত্তাৰো নিস্সযা

১২৮. তাৱদেৱ ছাযা মেতব্বা, উতুপ্পমাণং আচিক্খিতব্বং, দিৱসভাগো আচিক্খিতব্বো, সঙ্গীতি আচিক্খিতব্বা, চত্তাৰো নিস্সযা আচিক্খিতব্বা [আচিক্খিতব্বা, চত্তাৰি অকৰণীযানি আচিক্খিতব্বানি. (ক.)] –

‘‘পিণ্ডিযালোপভোজনং নিস্সায পব্বজ্জা. তত্থ তে যাৱজীৱং উস্সাহো কৰণীযো. অতিৰেকলাভো – সঙ্ঘভত্তং, উদ্দেসভত্তং, নিমন্তনং, সলাকভত্তং, পক্খিকং, উপোসথিকং, পাটিপদিকং.

‘‘পংসুকূলচীৱৰং নিস্সায পব্বজ্জা. তত্থ তে যাৱজীৱং উস্সাহো কৰণীযো. অতিৰেকলাভো – খোমং, কপ্পাসিকং, কোসেয্যং, কম্বলং, সাণং, ভঙ্গং.

‘‘ৰুক্খমূলসেনাসনং নিস্সায পব্বজ্জা. তত্থ তে যাৱজীৱং উস্সাহো কৰণীযো. অতিৰেকলাভো – ৱিহাৰো, অড্ঢযোগো, পাসাদো, হম্মিযং, গুহা.

‘‘পূতিমুত্তভেসজ্জং নিস্সায পব্বজ্জা. তত্থ তে যাৱজীৱং উস্সাহো কৰণীযো. অতিৰেকলাভো – সপ্পি, নৱনীতং, তেলং, মধু, ফাণিত’’ন্তি.

চত্তাৰো নিস্সযা নিট্ঠিতা.