৬৩. উপসম্পদাৱিধি

১২৫. তেন খো পন সমযেন উপসম্পন্না দিস্সন্তি কুট্ঠিকাপি গণ্ডিকাপি কিলাসিকাপি সোসিকাপি অপমাৰিকাপি. ভগৱতো এতমত্থং আৰোচেসুং. অনুজানামি, ভিক্খৱে, উপসম্পাদেন্তেন তেৰস [তস্স (ক.)] অন্তৰাযিকে ধম্মে পুচ্ছিতুং. এৱঞ্চ পন, ভিক্খৱে, পুচ্ছিতব্বো – ‘‘সন্তি তে এৱৰূপা আবাধা – কুট্ঠং, গণ্ডো, কিলাসো, সোসো, অপমাৰো? মনুস্সোসি? পুৰিসোসি? ভুজিস্সোসি? অণণোসি? নসি ৰাজভটো? অনুঞ্ঞাতোসি মাতাপিতূহি? পৰিপুণ্ণৱীসতিৱস্সোসি? পৰিপুণ্ণং তে পত্তচীৱৰং? কিংনামোসি? কোনামো তে উপজ্ঝাযো’’তি?

তেন খো পন সমযেন ভিক্খূ অননুসিট্ঠে উপসম্পদাপেক্খে অন্তৰাযিকে ধম্মে পুচ্ছন্তি. উপসম্পদাপেক্খা ৱিত্থাযন্তি, মঙ্কূ হোন্তি, ন সক্কোন্তি ৱিস্সজ্জেতুং. ভগৱতো এতমত্থং আৰোচেসুং. অনুজানামি, ভিক্খৱে, পঠমং অনুসাসিত্ৱা পচ্ছা অন্তৰাযিকে ধম্মে পুচ্ছিতুন্তি.

তত্থেৱ সঙ্ঘমজ্ঝে অনুসাসন্তি. উপসম্পদাপেক্খা তথেৱ ৱিত্থাযন্তি, মঙ্কূ হোন্তি, ন সক্কোন্তি ৱিস্সজ্জেতুং. ভগৱতো এতমত্থং আৰোচেসুং. অনুজানামি, ভিক্খৱে, একমন্তং অনুসাসিত্ৱা সঙ্ঘমজ্ঝে অন্তৰাযিকে ধম্মে পুচ্ছিতুং. এৱঞ্চ পন, ভিক্খৱে, অনুসাসিতব্বো –

১২৬. পঠমং উপজ্ঝং গাহাপেতব্বো. উপজ্ঝং গাহাপেত্ৱা পত্তচীৱৰং আচিক্খিতব্বং – অযং তে পত্তো, অযং সঙ্ঘাটি, অযং উত্তৰাসঙ্গো, অযং অন্তৰৱাসকো. গচ্ছ, অমুম্হি ওকাসে তিট্ঠাহীতি.

বালা অব্যত্তা অনুসাসন্তি. দুৰনুসিট্ঠা উপসম্পদাপেক্খা ৱিত্থাযন্তি, মঙ্কূ হোন্তি, ন সক্কোন্তি ৱিস্সজ্জেতুং. ভগৱতো এতমত্থং আৰোচেসুং. ন, ভিক্খৱে, বালেন অব্যত্তেন অনুসাসিতব্বো. যো অনুসাসেয্য, আপত্তি দুক্কটস্স. অনুজানামি, ভিক্খৱে, ব্যত্তেন ভিক্খুনা পটিবলেন অনুসাসিতুন্তি.

অসম্মতা অনুসাসন্তি. ভগৱতো এতমত্থং আৰোচেসুং. ন, ভিক্খৱে, অসম্মতেন অনুসাসিতব্বো. যো অনুসাসেয্য, আপত্তি দুক্কটস্স. অনুজানামি, ভিক্খৱে, সম্মতেন অনুসাসিতুং. এৱঞ্চ পন, ভিক্খৱে, সম্মন্নিতব্বো [সম্মনিতব্বো (ক.)] – অত্তনা ৱা [অত্তনাৱ (স্যা.)] অত্তানং সম্মন্নিতব্বং, পৰেন ৱা পৰো সম্মন্নিতব্বো.

কথঞ্চ অত্তনাৱ অত্তানং সম্মন্নিতব্বং? ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, অহং ইত্থন্নামং অনুসাসেয্য’’ন্তি. এৱং অত্তনাৱ অত্তানং সম্মন্নিতব্বং.

কথঞ্চ পন পৰেন পৰো সম্মন্নিতব্বো? ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, ইত্থন্নামো ইত্থন্নামং অনুসাসেয্যা’’তি. এৱং পৰেন পৰো সম্মন্নিতব্বো.

তেন সম্মতেন ভিক্খুনা উপসম্পদাপেক্খো উপসঙ্কমিত্ৱা এৱমস্স ৱচনীযো – ‘‘সুণসি, ইত্থন্নাম, অযং তে সচ্চকালো ভূতকালো. যং জাতং তং সঙ্ঘমজ্ঝে পুচ্ছন্তে সন্তং অত্থীতি ৱত্তব্বং, অসন্তং নত্থী’’তি ৱত্তব্বং. মা খো ৱিত্থাযি, মা খো মঙ্কু অহোসি. এৱং তং পুচ্ছিস্সন্তি – ‘‘সন্তি তে এৱৰূপা আবাধা – কুট্ঠং, গণ্ডো, কিলাসো, সোসো, অপমাৰো? মনুস্সোসি? পুৰিসোসি? ভুজিস্সোসি? অণণোসি? নসি ৰাজভটো? অনুঞ্ঞাতোসি মাতাপিতূহি? পৰিপুণ্ণৱীসতিৱস্সোসি? পৰিপুণ্ণং তে পত্তচীৱৰং? কিংনামোসি? কোনামো তে উপজ্ঝাযো’’তি?

একতো আগচ্ছন্তি. ন, ভিক্খৱে, একতো আগন্তব্বং. অনুসাসকেন পঠমতৰং আগন্ত্ৱা সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো. ইত্থন্নামো ইত্থন্নামস্স আযস্মতো উপসম্পদাপেক্খো. অনুসিট্ঠো সো মযা. যদি সঙ্ঘস্স পত্তকল্লং, ইত্থন্নামো আগচ্ছেয্যা’’তি. আগচ্ছাহীতি ৱত্তব্বো.

একংসং উত্তৰাসঙ্গং কাৰাপেত্ৱা ভিক্খূনং পাদে ৱন্দাপেত্ৱা উক্কুটিকং নিসীদাপেত্ৱা অঞ্জলিং পগ্গণ্হাপেত্ৱা উপসম্পদং যাচাপেতব্বো – ‘‘সঙ্ঘং, ভন্তে, উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদায. দুতিযম্পি, ভন্তে, সঙ্ঘং উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদায. ততিযম্পি, ভন্তে, সঙ্ঘং উপসম্পদং যাচামি. উল্লুম্পতু মং, ভন্তে, সঙ্ঘো অনুকম্পং উপাদাযা’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো. যদি সঙ্ঘস্স পত্তকল্লং, অহং ইত্থন্নামং অন্তৰাযিকে ধম্মে পুচ্ছেয্য’’ন্তি? সুণসি, ইত্থন্নাম, অযং তে সচ্চকালো ভূতকালো. যং জাতং তং পুচ্ছামি. সন্তং অত্থীতি ৱত্তব্বং, অসন্তং নত্থীতি ৱত্তব্বং. সন্তি তে এৱৰূপা আবাধা – কুট্ঠং গণ্ডো কিলেসো সোসো অপমাৰো, মনুস্সোসি, পুৰিসোসি, ভুজিস্সোসি, অণণোসি, নসি ৰাজভটো, অনুঞ্ঞাতোসি মাতাপিতূহি, পৰিপুণ্ণৱীসতিৱস্সোসি, পৰিপুণ্ণং তে পত্তচীৱৰং, কিংনামোসি, কোনামো তে উপজ্ঝাযোতি? ব্যত্তেন ভিক্খুনা পটিবলেন সঙ্ঘো ঞাপেতব্বো –

১২৭. ‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পৰিসুদ্ধো অন্তৰাযিকেহি ধম্মেহি, পৰিপুণ্ণস্স পত্তচীৱৰং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. যদি সঙ্ঘস্স পত্তকল্লং, সঙ্ঘো ইত্থন্নামং উপসম্পাদেয্য ইত্থন্নামেন উপজ্ঝাযেন. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পৰিসুদ্ধো অন্তৰাযিকেহি ধম্মেহি, পৰিপুণ্ণস্স পত্তচীৱৰং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি – সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পৰিসুদ্ধো অন্তৰাযিকেহি ধম্মেহি, পৰিপুণ্ণস্স পত্তচীৱৰং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘ততিযম্পি এতমত্থং ৱদামি – সুণাতু মে, ভন্তে, সঙ্ঘো. অযং ইত্থন্নামো ইত্থন্নামস্স আযস্মতো উপসম্পদাপেক্খো, পৰিসুদ্ধো অন্তৰাযিকেহি ধম্মেহি, পৰিপুণ্ণস্স পত্তচীৱৰং. ইত্থন্নামো সঙ্ঘং উপসম্পদং যাচতি ইত্থন্নামেন উপজ্ঝাযেন. সঙ্ঘো ইত্থন্নামং উপসম্পাদেতি ইত্থন্নামেন উপজ্ঝাযেন. যস্সাযস্মতো খমতি ইত্থন্নামস্স উপসম্পদা ইত্থন্নামেন উপজ্ঝাযেন, সো তুণ্হস্স; যস্স নক্খমতি, সো ভাসেয্য.

‘‘উপসম্পন্নো সঙ্ঘেন ইত্থন্নামো ইত্থন্নামেন উপজ্ঝাযেন. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

উপসম্পদাকম্মং নিট্ঠিতং.