৫১. পিতুঘাতকৱত্থু

১১৩. তেন খো পন সমযেন অঞ্ঞতৰো মাণৱকো পিতৰং জীৱিতা ৱোৰোপেসি. সো তেন পাপকেন কম্মেন অট্টীযতি হৰাযতি জিগুচ্ছতি. অথ খো তস্স মাণৱকস্স এতদহোসি ‘‘কেন নু খো অহং উপাযেন ইমস্স পাপকস্স কম্মস্স নিক্খন্তিং কৰেয্য’’ন্তি. অথ খো তস্স মাণৱকস্স এতদহোসি ‘‘ইমে খো সমণা সক্যপুত্তিযা ধম্মচাৰিনো সমচাৰিনো ব্ৰহ্মচাৰিনো সচ্চৱাদিনো সীলৱন্তো কল্যাণধম্মা, সচে খো অহং সমণেসু সক্যপুত্তিযেসু পব্বজেয্যং, এৱাহং ইমস্স পাপকস্স কম্মস্স নিক্খন্তিং কৰেয্য’’ন্তি. অথ খো সো মাণৱকো ভিক্খূ উপসঙ্কমিত্ৱা পব্বজ্জং যাচি. ভিক্খূ আযস্মন্তং উপালিং এতদৱোচুং – ‘‘পুব্বেপি খো, আৱুসো উপালি, নাগো মাণৱকৱণ্ণেন ভিক্খূসু পব্বজিতো, ইঙ্ঘাৱুসো, উপালি, ইমং মাণৱকং অনুযুঞ্জাহী’’তি. অথ খো সো মাণৱকো আযস্মতা উপালিনা অনুযুঞ্জীযমানো এতমত্থং আৰোচেসি. আযস্মা উপালি ভিক্খূনং এতমত্থং আৰোচেসি. ভিক্খূ ভগৱতো এতমত্থং আৰোচেসুং. পিতুঘাতকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি.