৪৭. পণ্ডকৱত্থু

১০৯. তেন খো পন সমযেন অঞ্ঞতৰো পণ্ডকো ভিক্খূসু পব্বজিতো হোতি. সো দহৰে দহৰে ভিক্খূ উপসঙ্কমিত্ৱা এৱং ৱদেতি – ‘‘এথ, মং আযস্মন্তো দূসেথা’’তি. ভিক্খূ অপসাদেন্তি – ‘‘নস্স, পণ্ডক, ৱিনস্স, পণ্ডক, কো তযা অত্থো’’তি. সো ভিক্খূহি অপসাদিতো মহন্তে মহন্তে মোড়িগল্লে সামণেৰে উপসঙ্কমিত্ৱা এৱং ৱদেতি – ‘‘এথ, মং আৱুসো দূসেথা’’তি. সামণেৰা অপসাদেন্তি – ‘‘নস্স, পণ্ডক, ৱিনস্স, পণ্ডক, কো তযা অত্থো’’তি. সো সামণেৰেহি অপসাদিতো হত্থিভণ্ডে অস্সভণ্ডে উপসঙ্কমিত্ৱা এৱং ৱদেতি – ‘‘এথ, মং, আৱুসো, দূসেথা’’তি. হত্থিভণ্ডা অস্সভণ্ডা দূসেসুং. তে উজ্ঝাযন্তি খিয্যন্তি ৱিপাচেন্তি – ‘‘পণ্ডকা ইমে সমণা সক্যপুত্তিযা. যেপি ইমেসং ন পণ্ডকা, তেপি ইমে পণ্ডকে দূসেন্তি. এৱং ইমে সব্বেৱ অব্ৰহ্মচাৰিনো’’তি. অস্সোসুং খো ভিক্খূ তেসং হত্থিভণ্ডানং অস্সভণ্ডানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. পণ্ডকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বোতি.