৪০. নিস্সযমুচ্চনককথা

১০৩. অথ খো ভগৱা দক্খিণাগিৰিস্মিং যথাভিৰন্তং ৱিহৰিত্ৱা পুনদেৱ ৰাজগহং পচ্চাগচ্ছি. অথ খো ভগৱা আযস্মন্তং আনন্দং আমন্তেসি – ‘‘কিং নু খো, আনন্দ, তথাগতো ওগণেন ভিক্খুসঙ্ঘেন দক্খিণাগিৰিং চাৰিকং পক্কন্তো’’তি? অথ খো আযস্মা আনন্দো ভগৱতো এতমত্থং আৰোচেসি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ব্যত্তেন ভিক্খুনা পটিবলেন পঞ্চৱস্সানি নিস্সায ৱত্থুং, অব্যত্তেন যাৱজীৱং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. ন অসেক্খেন সীলক্খন্ধেন সমন্নাগতো হোতি ন অসেক্খেন সমাধিক্খন্ধেন, ন অসেক্খেন পঞ্ঞাক্খন্ধেন ন অসেক্খেন ৱিমুত্তিক্খন্ধেন ন অসেক্খেন ৱিমুত্তিঞাণদস্সনক্খন্ধেন সমন্নাগতো হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. অসেক্খেন সীলক্খন্ধেন সমন্নাগতো হোতি অসেক্খেন সমাধিক্খন্ধেন. অসেক্খেন পঞ্ঞাক্খন্ধেন… অসেক্খেন ৱিমুত্তিক্খন্ধেন… অসেক্খেন ৱিমুত্তিঞাণদস্সনক্খন্ধেন সমন্নাগতো হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. অস্সদ্ধো হোতি, অহিৰিকো হোতি, অনোত্তপ্পী হোতি, কুসীতো হোতি, মুট্ঠস্সতি হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. সদ্ধো হোতি, হিৰিমা হোতি, ওত্তপ্পী হোতি, আৰদ্ধৱীৰিযো হোতি, উপট্ঠিতস্সতি হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি, অপ্পস্সুতো হোতি, দুপ্পঞ্ঞো হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. ন অধিসীলে সীলৱিপন্নো হোতি, ন অজ্ঝাচাৰে আচাৰৱিপন্নো হোতি, ন অতিদিট্ঠিযা দিট্ঠিৱিপন্নো হোতি, বহুস্সুতো হোতি, পঞ্ঞৱা হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. আপত্তিং ন জানাতি, অনাপত্তিং ন জানাতি, লহুকং আপত্তিং ন জানাতি, গৰুকং আপত্তিং ন জানাতি, উভযানি খো পনস্স পাতিমোক্খানি ৱিত্থাৰেন ন স্ৱাগতানি হোন্তি ন সুৱিভত্তানি ন সুপ্পৱত্তীনি ন সুৱিনিচ্ছিতানি সুত্তসো অনুব্যঞ্জনসো – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. আপত্তিং ন জানাতি, অনাপত্তিং ন জানাতি, লহুকং আপত্তিং ন জানাতি, গৰুকং আপত্তিং ন জানাতি, ঊনপঞ্চৱস্সো হোতি – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘পঞ্চহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, পঞ্চৱস্সো ৱা হোতি অতিৰেক পঞ্চৱস্সো ৱা – ইমেহি খো, ভিক্খৱে, পঞ্চহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

নিস্সযমুচ্চনককথা নিট্ঠিতা.

পঞ্চকদসৱাৰো নিট্ঠিতো.

১০৪. ‘‘ছহি, ভিক্খৱে, অঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. ন অসেক্খেন সীলক্খন্ধেন সমন্নাগতো হোতি, ন অসেক্খেন সমাধিক্খন্ধেন, ন অসেক্খেন পঞ্ঞাক্খন্ধেন, ন অসেক্খেন ৱিমুত্তিক্খন্ধেন, ন অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, ঊনপঞ্চৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘ছহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. অসেক্খেন সীলক্খন্ধেন সমন্নাগতো হোতি, অসেক্খেন সমাধিক্খন্ধেন, অসেক্খেন পঞ্ঞাক্খন্ধেন, অসেক্খেন ৱিমুত্তিক্খন্ধেন, অসেক্খেন ৱিমুত্তিঞাণদস্সনক্খন্ধেন সমন্নাগতো হোতি, পঞ্চৱস্সো ৱা হোতি অতিৰেকপঞ্চৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. অস্সদ্ধো হোতি, অহিৰিকো হোতি, অনোত্তপ্পী হোতি, কুসীতো হোতি, মুট্ঠস্সতি হোতি, ঊনপঞ্চৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘ছহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. সদ্ধো হোতি, হিৰিমা হোতি, ওত্তপ্পী হোতি, আৰদ্ধৱীৰিযো হোতি, উপট্ঠিতস্সতি হোতি, পঞ্চৱস্সো ৱা হোতি অতিৰেকপঞ্চৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি, অপ্পস্সুতো হোতি, দুপ্পঞ্ঞো হোতি, ঊনপঞ্চৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘ছহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. ন অধিসীলে সীলৱিপন্নো হোতি, ন অজ্ঝাচাৰে আচাৰৱিপন্নো হোতি, ন অতিদিট্ঠিযা দিট্ঠিৱিপন্নো হোতি, বহুস্সুতো হোতি, পঞ্ঞৱা হোতি, পঞ্চৱস্সো ৱা হোতি অতিৰেকপঞ্চৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা অনিস্সিতেন ৱত্থব্বং.

‘‘অপৰেহিপি, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং. আপত্তিং ন জানাতি, অনাপত্তিং ন জানাতি, লহুকং আপত্তিং ন জানাতি, গৰুকং আপত্তিং ন জানাতি, উভযানি খো পনস্স পাতিমোক্খানি ৱিত্থাৰেন ন স্ৱাগতানি হোন্তি ন সুৱিভত্তানি ন সুপ্পৱত্তীনি ন সুৱিনিচ্ছিতানি সুত্তসো অনুব্যঞ্জনসো, ঊনপঞ্চৱস্সো হোতি – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা ন অনিস্সিতেন ৱত্থব্বং.

‘‘ছহি, ভিক্খৱে, অঙ্গেহি সমন্নাগতেন ভিক্খুনা অনিস্সিতেন ৱত্থব্বং. আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো, পঞ্চৱস্সো ৱা হোতি অতিৰেকপঞ্চৱস্সো ৱা – ইমেহি খো, ভিক্খৱে, ছহঙ্গেহি সমন্নাগতেন ভিক্খুনা অনিস্সিতেন ৱত্থব্ব’’ন্তি.

অভযূৱৰভাণৱাৰো নিট্ঠিতো অট্ঠমো.

অট্ঠমভাণৱাৰো.