৪১. ৰাহুলৱত্থু

১০৫. অথ খো ভগৱা ৰাজগহে যথাভিৰন্তং ৱিহৰিত্ৱা যেন কপিলৱত্থু তেন চাৰিকং পক্কামি. অনুপুব্বেন চাৰিকং চৰমানো যেন কপিলৱত্থু তদৱসৰি. তত্ৰ সুদং ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন সুদ্ধোদনস্স সক্কস্স নিৱেসনং তেনুপসঙ্কমি, উপসঙ্কমিত্ৱা পঞ্ঞত্তে আসনে নিসীদি. অথ খো ৰাহুলমাতা দেৱী ৰাহুলং কুমাৰং এতদৱোচ – ‘‘এসো তে, ৰাহুল, পিতা. গচ্ছস্সু [গচ্ছস্স (স্যা.)], দাযজ্জং যাচাহী’’তি. অথ খো ৰাহুলো কুমাৰো যেন ভগৱা তেনুপসঙ্কমি, উপসঙ্কমিত্ৱা ভগৱতো পুৰতো, অট্ঠাসি – ‘‘সুখা তে, সমণ, ছাযা’’তি. অথ খো ভগৱা উট্ঠাযাসনা পক্কামি. অথ খো ৰাহুলো কুমাৰো ভগৱন্তং পিট্ঠিতো পিট্ঠিতো অনুবন্ধি – ‘‘দাযজ্জং মে, সমণ, দেহি; দাযজ্জং মে, সমণ, দেহী’’তি. অথ খো ভগৱা আযস্মন্তং সাৰিপুত্তং আমন্তেসি – ‘‘তেন হি ত্ৱং, সাৰিপুত্ত, ৰাহুলং কুমাৰং পব্বাজেহী’’তি. ‘‘কথাহং, ভন্তে, ৰাহুলং কুমাৰং পব্বাজেমী’’তি? অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, তীহি সৰণগমনেহি সামণেৰপব্বজ্জং. এৱঞ্চ পন, ভিক্খৱে, পব্বাজেতব্বো – পঠমং কেসমস্সুং ওহাৰাপেত্ৱা কাসাযানি ৱত্থানি অচ্ছাদাপেত্ৱা একংসং উত্তৰাসঙ্গং কাৰাপেত্ৱা ভিক্খূনং পাদে ৱন্দাপেত্ৱা উক্কুটিকং নিসীদাপেত্ৱা অঞ্জলিং পগ্গণ্হাপেত্ৱা এৱং ৱদেহীতি ৱত্তব্বো – বুদ্ধং সৰণং গচ্ছামি, ধম্মং সৰণং গচ্ছামি, সঙ্ঘং সৰণং গচ্ছামি; দুতিযম্পি বুদ্ধং সৰণং গচ্ছামি, দুতিযম্পি ধম্মং সৰণং গচ্ছামি, দুতিযম্পি সঙ্ঘং সৰণং গচ্ছামি; ততিযম্পি বুদ্ধং সৰণং গচ্ছামি, ততিযম্পি ধম্মং সৰণং গচ্ছামি, ততিযম্পি সঙ্ঘং সৰণং গচ্ছামীতি. অনুজানামি, ভিক্খৱে, ইমেহি তীহি সৰণগমনেহি সামণেৰপব্বজ্জ’’ন্তি. অথ খো আযস্মা সাৰিপুত্তো ৰাহুলং কুমাৰং পব্বাজেসি.

অথ খো সুদ্ধোদনো সক্কো যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো সুদ্ধোদনো সক্কো ভগৱন্তং এতদৱোচ – ‘‘একাহং, ভন্তে, ভগৱন্তং ৱৰং যাচামী’’তি. ‘‘অতিক্কন্তৱৰা খো, গোতম, তথাগতা’’তি. ‘‘যঞ্চ, ভন্তে, কপ্পতি, যঞ্চ অনৱজ্জ’’ন্তি. ‘‘ৱদেহি, গোতমা’’তি. ‘‘ভগৱতি মে, ভন্তে, পব্বজিতে অনপ্পকং দুক্খং অহোসি, তথা নন্দে, অধিমত্তং ৰাহুলে. পুত্তপেমং, ভন্তে, ছৱিং ছিন্দতি, ছৱিং ছেত্ৱা চম্মং ছিন্দতি, চম্মং ছেত্ৱা মংসং ছিন্দতি, মংসং ছেত্ৱা ন্হাৰুং ছিন্দতি, ন্হাৰুং ছেত্ৱা অট্ঠিং ছিন্দতি, অট্ঠিং ছেত্ৱা অট্ঠিমিঞ্জং আহচ্চ তিট্ঠতি. সাধু, ভন্তে, অয্যা অননুঞ্ঞাতং মাতাপিতূহি পুত্তং ন পব্বাজেয্যু’’ন্তি. অথ খো ভগৱা সুদ্ধোদনং সক্কং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো সুদ্ধোদনো সক্কো ভগৱতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা ভগৱন্তং অভিৱাদেত্ৱা পদক্খিণং কত্ৱা পক্কামি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, অননুঞ্ঞাতো মাতাপিতূহি পুত্তো পব্বাজেতব্বো. যো পব্বাজেয্য, আপত্তি দুক্কটস্সা’’তি.

অথ খো ভগৱা কপিলৱত্থুস্মিং যথাভিৰন্তং ৱিহৰিত্ৱা যেন সাৱত্থি তেন চাৰিকং পক্কামি. অনুপুব্বেন চাৰিকং চৰমানো যেন সাৱত্থি তদৱসৰি. তত্ৰ সুদং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মতো সাৰিপুত্তস্স উপট্ঠাককুলং আযস্মতো সাৰিপুত্তস্স সন্তিকে দাৰকং পাহেসি – ‘‘ইমং দাৰকং থেৰো পব্বাজেতূ’’তি. অথ খো আযস্মতো সাৰিপুত্তস্স এতদহোসি – ‘‘ভগৱতা পঞ্ঞত্তং ‘ন একেন দ্ৱে সামণেৰা উপট্ঠাপেতব্বা’তি. অযঞ্চ মে ৰাহুলো সামণেৰো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসি. অনুজানামি, ভিক্খৱে, ব্যত্তেন ভিক্খুনা পটিবলেন একেন দ্ৱে সামণেৰে উপট্ঠাপেতুং, যাৱতকে ৱা পন উস্সহতি ওৱদিতুং অনুসাসিতুং তাৱতকে উপট্ঠাপেতুন্তি.

ৰাহুলৱত্থু নিট্ঠিতং.