৩৯. আহুন্দৰিকৱত্থু

১০২. তেন খো পন সমযেন ভগৱা তত্থেৱ ৰাজগহে ৱস্সং ৱসি, তত্থ হেমন্তং, তত্থ গিম্হং. মনুস্সা উজ্ঝাযন্তি খিয্যন্তি ৱিপাচেন্তি – ‘‘আহুন্দৰিকা সমণানং সক্যপুত্তিযানং দিসা অন্ধকাৰা, ন ইমেসং দিসা পক্খাযন্তী’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা আযস্মন্তং আনন্দং আমন্তেসি – ‘‘গচ্ছানন্দ, অৱাপুৰণং [অপাপুৰণং (ক.)] আদায অনুপৰিৱেণিযং ভিক্খূনং আৰোচেহি – ‘‘ইচ্ছতাৱুসো ভগৱা দক্খিণাগিৰিং চাৰিকং পক্কমিতুং. যস্সাযস্মতো অত্থো, সো আগচ্ছতূ’’তি. এৱং, ভন্তে, তি খো আযস্মা আনন্দো ভগৱতো পটিস্সুণিত্ৱা অৱাপুৰণং আদায অনুপৰিৱেণিযং ভিক্খূনং আৰোচেসি – ‘ইচ্ছতাৱুসো ভগৱা দক্খিণাগিৰিং চাৰিকং পক্কমিতুং. যস্সাযস্মতো অত্থো, সো আগচ্ছতূ’’’তি. ভিক্খূ এৱমাহংসু – ‘‘ভগৱতা, আৱুসো আনন্দ, পঞ্ঞত্তং দসৱস্সানি নিস্সায ৱত্থুং, দসৱস্সেন নিস্সযং দাতুং. তত্থ চ নো গন্তব্বং ভৱিস্সতি, নিস্সযো চ গহেতব্বো ভৱিস্সতি, ইত্তৰো চ ৱাসো ভৱিস্সতি, পুন চ পচ্চাগন্তব্বং ভৱিস্সতি, পুন চ নিস্সযো গহেতব্বো ভৱিস্সতি. সচে অম্হাকং আচৰিযুপজ্ঝাযা গমিস্সন্তি, মযম্পি গমিস্সাম; নো চে অম্হাকং আচৰিযুপজ্ঝাযা গমিস্সন্তি, মযম্পি ন গমিস্সাম. লহুচিত্তকতা নো, আৱুসো আনন্দ, পঞ্ঞাযিস্সতী’’তি. অথ খো ভগৱা ওগণেন ভিক্খুসঙ্ঘেন দক্খিণাগিৰিং চাৰিকং পক্কামি.

আহুন্দৰিকৱত্থু নিট্ঠিতং.