২১. বালঅব্যত্তৱত্থু

৮২. তেন খো পন সমযেন ভিক্খূ, দসৱস্সম্হা দসৱস্সম্হাতি, বালা অব্যত্তা নিস্সযং দেন্তি. দিস্সন্তি আচৰিযা বালা, অন্তেৱাসিকা পণ্ডিতা. দিস্সন্তি আচৰিযা অব্যত্তা, অন্তেৱাসিকা ব্যত্তা. দিস্সন্তি আচৰিযা অপ্পস্সুতা, অন্তেৱাসিকা বহুস্সুতা. দিস্সন্তি আচৰিযা দুপ্পঞ্ঞা, অন্তেৱাসিকা পঞ্ঞৱন্তো. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ, দসৱস্সম্হা দসৱস্সম্হাতি, বালা অব্যত্তা নিস্সযং দস্সন্তি. দিস্সন্তি আচৰিযা বালা অন্তেৱাসিকা পণ্ডিতা, দিস্সন্তি আচৰিযা অব্যত্তা অন্তেৱাসিকা ব্যত্তা, দিস্সন্তি আচৰিযা অপ্পস্সুতা অন্তেৱাসিকা বহুস্সুতা, দিস্সন্তি আচৰিযা দুপ্পঞ্ঞা অন্তেৱাসিকা পঞ্ঞৱন্তো’’তি. অথ খো তে ভিক্খূ ভগৱতো এতমত্থং আৰোচেসুং…পে… সচ্চং কিৰ, ভিক্খৱে, ভিক্খূ, দসৱস্সম্হা দসৱস্সম্হাতি, বালা অব্যত্তা নিস্সযং দেন্তি…পে… সচ্চং, ভগৱাতি. ৱিগৰহি বুদ্ধো ভগৱা…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, বালেন অব্যত্তেন নিস্সযো দাতব্বো. যো দদেয্য, আপত্তি দুক্কটস্স. অনুজানামি, ভিক্খৱে, ব্যত্তেন ভিক্খুনা পটিবলেন দসৱস্সেন ৱা অতিৰেকদসৱস্সেন ৱা নিস্সযং দাতু’’ন্তি.

বালঅব্যত্তৱত্থু নিট্ঠিতং.