২২. নিস্সযপটিপ্পস্সদ্ধিকথা

৮৩. তেন খো পন সমযেন ভিক্খূ আচৰিযুপজ্ঝাযেসু পক্কন্তেসুপি ৱিব্ভন্তেসুপি কালঙ্কতেসুপি পক্খসঙ্কন্তেসুপি নিস্সযপটিপ্পস্সদ্ধিযো ন জানন্তি. ভগৱতো এতমত্থং আৰোচেসুং.

‘‘পঞ্চিমা, ভিক্খৱে, নিস্সযপটিপ্পস্সদ্ধিযো উপজ্ঝাযম্হা – উপজ্ঝাযো পক্কন্তো ৱা হোতি, ৱিব্ভন্তো ৱা, কালঙ্কতো ৱা, পক্খসঙ্কন্তো ৱা, আণত্তিযেৱ পঞ্চমী. ইমা খো, ভিক্খৱে, পঞ্চ নিস্সযপটিপ্পস্সদ্ধিযো উপজ্ঝাযম্হা.

‘‘ছযিমা, ভিক্খৱে, নিস্সযপটিপ্পস্সদ্ধিযো আচৰিযম্হা – আচৰিযো পক্কন্তো ৱা হোতি, ৱিব্ভন্তো ৱা, কালঙ্কতো ৱা, পক্খসঙ্কন্তো ৱা, আণত্তিযেৱ পঞ্চমী, উপজ্ঝাযেন ৱা সমোধানগতো হোতি. ইমা খো, ভিক্খৱে, ছ নিস্সযপটিপ্পস্সদ্ধিযো আচৰিযম্হা’’.

নিস্সপটিপ্পস্সদ্ধিকথা নিট্ঠিতা.