১৬. সদ্ধিৱিহাৰিকৱত্তকথা

৬৭. [চূড়ৱ. ৩৭৮ আদযো] ‘‘উপজ্ঝাযেন, ভিক্খৱে, সদ্ধিৱিহাৰিকম্হি সম্মা ৱত্তিতব্বং. তত্ৰাযং সম্মাৱত্তনা –

‘‘উপজ্ঝাযেন, ভিক্খৱে, সদ্ধিৱিহাৰিকো সঙ্গহেতব্বো অনুগ্গহেতব্বো উদ্দেসেন পৰিপুচ্ছায ওৱাদেন অনুসাসনিযা. সচে উপজ্ঝাযস্স পত্তো হোতি, সদ্ধিৱিহাৰিকস্স পত্তো ন হোতি, উপজ্ঝাযেন সদ্ধিৱিহাৰিকস্স পত্তো দাতব্বো, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স পত্তো উপ্পজ্জিযেথাতি. সচে উপজ্ঝাযস্স চীৱৰং হোতি, সদ্ধিৱিহাৰিকস্স চীৱৰং ন হোতি, উপজ্ঝাযেন সদ্ধিৱিহাৰিকস্স চীৱৰং দাতব্বং, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স চীৱৰং উপ্পজ্জিযেথাতি. সচে উপজ্ঝাযস্স পৰিক্খাৰো হোতি, সদ্ধিৱিহাৰিকস্স পৰিক্খাৰো ন হোতি, উপজ্ঝাযেন সদ্ধিৱিহাৰিকস্স পৰিক্খাৰো দাতব্বো, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স পৰিক্খাৰো উপ্পজ্জিযেথাতি.

‘‘সচে সদ্ধিৱিহাৰিকো গিলানো হোতি, কালস্সেৱ উট্ঠায দন্তকট্ঠং দাতব্বং, মুখোদকং দাতব্বং, আসনং পঞ্ঞপেতব্বং. সচে যাগু হোতি, ভাজনং ধোৱিত্ৱা যাগু উপনামেতব্বা. যাগুং পীতস্স উদকং দত্ৱা ভাজনং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা পটিসামেতব্বং. সদ্ধিৱিহাৰিকম্হি ৱুট্ঠিতে আসনং উদ্ধৰিতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে সদ্ধিৱিহাৰিকো গামং পৱিসিতুকামো হোতি, নিৱাসনং দাতব্বং, পটিনিৱাসনং পটিগ্গহেতব্বং, কাযবন্ধনং দাতব্বং, সগুণং কত্ৱা সঙ্ঘাটিযো দাতব্বা, ধোৱিত্ৱা পত্তো সোদকো দাতব্বো. এত্তাৱতা নিৱত্তিস্সতীতি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৱা পত্তচীৱৰং পটিগ্গহেতব্বং, পটিনিৱাসনং দাতব্বং, নিৱাসনং পটিগ্গহেতব্বং. সচে চীৱৰং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৱৰং নিদহিতব্বং; চীৱৰং সঙ্ঘৰিতব্বং, চীৱৰং সঙ্ঘৰন্তেন চতুৰঙ্গুলং কণ্ণং উস্সাৰেত্ৱা চীৱৰং সঙ্ঘৰিতব্বং – মা মজ্ঝে ভঙ্গো অহোসীতি. ওভোগে কাযবন্ধনং কাতব্বং.

‘‘সচে পিণ্ডপাতো হোতি, সদ্ধিৱিহাৰিকো চ ভুঞ্জিতুকামো হোতি, উদকং দত্ৱা পিণ্ডপাতো উপনামেতব্বো. সদ্ধিৱিহাৰিকো পানীযেন পুচ্ছিতব্বো. ভুত্তাৱিস্স উদকং দত্ৱা পত্তং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা ৱোদকং কত্ৱা মুহুত্তং উণ্হে ওতাপেতব্বো, ন চ উণ্হে পত্তো নিদহিতব্বো. পত্তচীৱৰং নিক্খিপিতব্বং. পত্তং নিক্খিপন্তেন একেন হত্থেন পত্তং গহেত্ৱা একেন হত্থেন হেট্ঠামঞ্চং ৱা হেট্ঠাপীঠং ৱা পৰামসিত্ৱা পত্তো নিক্খিপিতব্বো. ন চ অনন্তৰহিতায ভূমিযা পত্তো নিক্খিপিতব্বো. চীৱৰং নিক্খিপন্তেন একেন হত্থেন চীৱৰং গহেত্ৱা একেন হত্থেন চীৱৰৱংসং ৱা চীৱৰৰজ্জুং ৱা পমজ্জিত্ৱা পাৰতো অন্তং ওৰতো ভোগং কত্ৱা চীৱৰং নিক্খিপিতব্বং. সদ্ধিৱিহাৰিকম্হি ৱুট্ঠিতে আসনং উদ্ধৰিতব্বং, পাদোদকং পাদপীঠং পাদকথলিকং পটিসামেতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে সদ্ধিৱিহাৰিকো নহাযিতুকামো হোতি, নহানং পটিযাদেতব্বং. সচে সীতেন অত্থো হোতি, সীতং পটিযাদেতব্বং. সচে উণ্হেন অত্থো হোতি, উণ্হং পটিযাদেতব্বং.

‘‘সচে সদ্ধিৱিহাৰিকো জন্তাঘৰং পৱিসিতুকামো হোতি, চুণ্ণং সন্নেতব্বং, মত্তিকা তেমেতব্বা, জন্তাঘৰপীঠং আদায গন্ত্ৱা জন্তাঘৰপীঠং দত্ৱা চীৱৰং পটিগ্গহেত্ৱা একমন্তং নিক্খিপিতব্বং, চুণ্ণং দাতব্বং, মত্তিকা দাতব্বা. সচে উস্সহতি, জন্তাঘৰং পৱিসিতব্বং. জন্তাঘৰং পৱিসন্তেন মত্তিকায মুখং মক্খেত্ৱা পুৰতো চ পচ্ছতো চ পটিচ্ছাদেত্ৱা জন্তাঘৰং পৱিসিতব্বং. ন থেৰে ভিক্খূ অনুপখজ্জ নিসীদিতব্বং. ন নৱা ভিক্খূ আসনেন পটিবাহিতব্বা. জন্তাঘৰে সদ্ধিৱিহাৰিকস্স পৰিকম্মং কাতব্বং. জন্তাঘৰা নিক্খমন্তেন জন্তাঘৰপীঠং আদায পুৰতো চ পচ্ছতো চ পটিচ্ছাদেত্ৱা জন্তাঘৰা নিক্খমিতব্বং.

‘‘উদকেপি সদ্ধিৱিহাৰিকস্স পৰিকম্মং কাতব্বং. নহাতেন পঠমতৰং উত্তৰিত্ৱা অত্তনো গত্তং ৱোদকং কত্ৱা নিৱাসেত্ৱা সদ্ধিৱিহাৰিকস্স গত্ততো উদকং পমজ্জিতব্বং, নিৱাসনং দাতব্বং, সঙ্ঘাটি দাতব্বা. জন্তাঘৰপীঠং আদায পঠমতৰং আগন্ত্ৱা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং. সদ্ধিৱিহাৰিকো পানীযেন পুচ্ছিতব্বো.

‘‘যস্মিং ৱিহাৰে সদ্ধিৱিহাৰিকো ৱিহৰতি, সচে সো ৱিহাৰো উক্লাপো হোতি, সচে উস্সহতি, সোধেতব্বো. ৱিহাৰং সোধেন্তেন পঠমং পত্তচীৱৰং নীহৰিত্ৱা একমন্তং নিক্খিপিতব্বং; নিসীদনপচ্চত্থৰণং নীহৰিত্ৱা একমন্তং নিক্খিপিতব্বং; ভিসিবিব্বোহনং নীহৰিত্ৱা একমন্তং নিক্খিপিতব্বং; মঞ্চো নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, নীহৰিত্ৱা একমন্তং নিক্খিপিতব্বো; পীঠং নীচং কত্ৱা সাধুকং অপ্পটিঘংসন্তেন অসঙ্ঘট্টেন্তেন কৱাটপিট্ঠং নীহৰিত্ৱা একমন্তং নিক্খিপিতব্বং; মঞ্চপটিপাদকা নীহৰিত্ৱা একমন্তং নিক্খিপিতব্বা; খেড়মল্লকো নীহৰিত্ৱা একমন্তং নিক্খিপিতব্বো; অপস্সেনফলকং নীহৰিত্ৱা একমন্তং নিক্খিপিতব্বং; ভূমত্থৰণং যথাপঞ্ঞত্তং সল্লক্খেত্ৱা নীহৰিত্ৱা একমন্তং নিক্খিপিতব্বং. সচে ৱিহাৰে সন্তানকং হোতি, উল্লোকা পঠমং ওহাৰেতব্বং, আলোকসন্ধিকণ্ণভাগা পমজ্জিতব্বা. সচে গেৰুকপৰিকম্মকতা ভিত্তি কণ্ণকিতা হোতি, চোড়কং তেমেত্ৱা পীড়েত্ৱা পমজ্জিতব্বা. সচে কাড়ৱণ্ণকতা ভূমি কণ্ণকিতা হোতি, চোড়কং তেমেত্ৱা পীড়েত্ৱা পমজ্জিতব্বা. সচে অকতা হোতি ভূমি, উদকেন পৰিপ্ফোসিত্ৱা সম্মজ্জিতব্বা – মা ৱিহাৰো ৰজেন উহঞ্ঞীতি. সঙ্কাৰং ৱিচিনিত্ৱা একমন্তং ছড্ডেতব্বং.

‘‘ভূমত্থৰণং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. মঞ্চপটিপাদকা ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বা. মঞ্চো ওতাপেত্ৱা সোধেত্ৱা পপ্ফোটেত্ৱা নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, অতিহৰিত্ৱা যথাপঞ্ঞত্তং পঞ্ঞপেতব্বো. পীঠং ওতাপেত্ৱা সোধেত্ৱা পপ্ফোটেত্ৱা নীচং কত্ৱা সাধুকং অপ্পটিঘংসন্তেন, অসঙ্ঘট্টেন্তেন কৱাটপিট্ঠং, অতিহৰিত্ৱা যথাপঞ্ঞত্তং পঞ্ঞপেতব্বং. ভিসিবিব্বোহনং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. নিসীদনপচ্চত্থৰণং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞপেতব্বং. খেড়মল্লকো ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বো. অপস্সেনফলকং ওতাপেত্ৱা পমজ্জিত্ৱা অতিহৰিত্ৱা যথাঠানে ঠপেতব্বং. পত্তচীৱৰং নিক্খিপিতব্বং. পত্তং নিক্খিপন্তেন একেন হত্থেন পত্তং গহেত্ৱা একেন হত্থেন হেট্ঠামঞ্চং ৱা হেট্ঠাপীঠং ৱা পৰামসিত্ৱা পত্তো নিক্খিপিতব্বো. ন চ অনন্তৰহিতায ভূমিযা পত্তো নিক্খিপিতব্বো. চীৱৰং নিক্খিপন্তেন একেন হত্থেন চীৱৰং গহেত্ৱা একেন হত্থেন চীৱৰৱংসং ৱা চীৱৰৰজ্জুং ৱা পমজ্জিত্ৱা পাৰতো অন্তং ওৰতো ভোগং কত্ৱা চীৱৰং নিক্খিপিতব্বং.

‘‘সচে পুৰত্থিমা সৰজা ৱাতা ৱাযন্তি, পুৰত্থিমা ৱাতপানা থকেতব্বা. সচে পচ্ছিমা সৰজা ৱাতা ৱাযন্তি, পচ্ছিমা ৱাতপানা থকেতব্বা. সচে উত্তৰা সৰজা ৱাতা ৱাযন্তি, উত্তৰা ৱাতপানা থকেতব্বা. সচে দক্খিণা সৰজা ৱাতা ৱাযন্তি, দক্খিণা ৱাতপানা থকেতব্বা. সচে সীতকালো হোতি, দিৱা ৱাতপানা ৱিৱৰিতব্বা, ৰত্তিং থকেতব্বা. সচে উণ্হকালো হোতি, দিৱা ৱাতপানা থকেতব্বা, ৰত্তিং ৱিৱৰিতব্বা.

‘‘সচে পৰিৱেণং উক্লাপং হোতি, পৰিৱেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে উপট্ঠানসালা উক্লাপা হোতি, উপট্ঠানসালা সম্মজ্জিতব্বা. সচে অগ্গিসালা উক্লাপা হোতি, অগ্গিসালা সম্মজ্জিতব্বা. সচে ৱচ্চকুটি উক্লাপা হোতি, ৱচ্চকুটি সম্মজ্জিতব্বা. সচে পানীযং ন হোতি, পানীযং উপট্ঠাপেতব্বং. সচে পৰিভোজনীযং ন হোতি, পৰিভোজনীযং উপট্ঠাপেতব্বং. সচে আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং.

‘‘সচে সদ্ধিৱিহাৰিকস্স অনভিৰতি উপ্পন্না হোতি, উপজ্ঝাযেন ৱূপকাসেতব্বো, ৱূপকাসাপেতব্বো, ধম্মকথা ৱাস্স কাতব্বা. সচে সদ্ধিৱিহাৰিকস্স কুক্কুচ্চং উপ্পন্নং হোতি, উপজ্ঝাযেন ৱিনোদেতব্বং, ৱিনোদাপেতব্বং, ধম্মকথা ৱাস্স কাতব্বা. সচে সদ্ধিৱিহাৰিকস্স দিট্ঠিগতং উপ্পন্নং হোতি, উপজ্ঝাযেন ৱিৱেচেতব্বং, ৱিৱেচাপেতব্বং, ধম্মকথা ৱাস্স কাতব্বা. সচে সদ্ধিৱিহাৰিকো গৰুধম্মং অজ্ঝাপন্নো হোতি পৰিৱাসাৰহো, উপজ্ঝাযেন উস্সুক্কং কাতব্বং – কিন্তি নু খো সঙ্ঘো সদ্ধিৱিহাৰিকস্স পৰিৱাসং দদেয্যাতি. সচে সদ্ধিৱিহাৰিকো মূলায পটিকস্সনাৰহো হোতি, উপজ্ঝাযেন উস্সুক্কং কাতব্বং – কিন্তি নু খো সঙ্ঘো সদ্ধিৱিহাৰিকং মূলায পটিকস্সেয্যাতি. সচে সদ্ধিৱিহাৰিকো মানত্তাৰহো হোতি, উপজ্ঝাযেন উস্সুক্কং কাতব্বং – কিন্তি নু খো সঙ্ঘো সদ্ধিৱিহাৰিকস্স মানত্তং দদেয্যাতি. সচে সদ্ধিৱিহাৰিকো অব্ভানাৰহো হোতি, উপজ্ঝাযেন উস্সুক্কং কাতব্বং – কিন্তি নু খো সঙ্ঘো সদ্ধিৱিহাৰিকং অব্ভেয্যাতি. সচে সঙ্ঘো সদ্ধিৱিহাৰিকস্স কম্মং কত্তুকামো হোতি, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, উপজ্ঝাযেন উস্সুক্কং কাতব্বং – কিন্তি নু খো সঙ্ঘো সদ্ধিৱিহাৰিকস্স কম্মং ন কৰেয্য, লহুকায ৱা পৰিণামেয্যাতি. কতং ৱা পনস্স হোতি সঙ্ঘেন কম্মং, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, উপজ্ঝাযেন উস্সুক্কং কাতব্বং – কিন্তি নু খো সদ্ধিৱিহাৰিকো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যাতি.

‘‘সচে সদ্ধিৱিহাৰিকস্স চীৱৰং ধোৱিতব্বং হোতি, উপজ্ঝাযেন আচিক্খিতব্বং এৱং ধোৱেয্যাসীতি, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স চীৱৰং ধোৱিযেথাতি. সচে সদ্ধিৱিহাৰিকস্স চীৱৰং কাতব্বং হোতি, উপজ্ঝাযেন আচিক্খিতব্বং এৱং কৰেয্যাসীতি, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স চীৱৰং কৰিযেথাতি. সচে সদ্ধিৱিহাৰিকস্স ৰজনং পচিতব্বং হোতি, উপজ্ঝাযেন আচিক্খিতব্বং এৱং পচেয্যাসীতি, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স ৰজনং পচিযেথাতি. সচে সদ্ধিৱিহাৰিকস্স চীৱৰং ৰজিতব্বং হোতি, উপজ্ঝাযেন আচিক্খিতব্বং, এৱং ৰজেয্যাসীতি, উস্সুক্কং ৱা কাতব্বং – কিন্তি নু খো সদ্ধিৱিহাৰিকস্স চীৱৰং ৰজিযেথাতি. চীৱৰং ৰজন্তেন সাধুকং সম্পৰিৱত্তকং সম্পৰিৱত্তকং ৰজিতব্বং. ন চ অচ্ছিন্নে থেৱে পক্কমিতব্বং. সচে সদ্ধিৱিহাৰিকো গিলানো হোতি, যাৱজীৱং উপট্ঠাতব্বো, ৱুট্ঠানমস্স আগমেতব্ব’’ন্তি.

সদ্ধিৱিহাৰিকৱত্তং নিট্ঠিতং.