৬. আপত্তিযা অপ্পটিকম্মে উক্খেপনীযকম্মং

৫৬. তেন সমযেন বুদ্ধো ভগৱা কোসম্বিযং ৱিহৰতি ঘোসিতাৰামে. তেন খো পন সমযেন আযস্মা ছন্নো আপত্তিং আপজ্জিত্ৱা ন ইচ্ছতি আপত্তিং পটিকাতুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা ছন্নো আপত্তিং আপজ্জিত্ৱা ন ইচ্ছিস্সতি আপত্তিং পটিকাতু’’ন্তি? অথ খো তে ভিক্খূ ভগৱতো এতমত্থং আৰোচেসুং.

অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘সচ্চং কিৰ, ভিক্খৱে, ছন্নো ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতু’’ন্তি? ‘‘সচ্চং ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং…পে… কথঞ্হি নাম সো, ভিক্খৱে, মোঘপুৰিসো আপত্তিং আপজ্জিত্ৱা ন ইচ্ছিস্সতি আপত্তিং পটিকাতুং. নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – তেন হি, ভিক্খৱে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং কৰোতু – অসম্ভোগং সঙ্ঘেন. এৱঞ্চ পন, ভিক্খৱে, কাতব্বং – পঠমং ছন্নো ভিক্খু চোদেতব্বো, চোদেত্ৱা সাৰেতব্বো, সাৰেত্ৱা আপত্তিং আৰোপেতব্বো, আপত্তিং আৰোপেত্ৱা ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতুং. যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং কৰেয্য – অসম্ভোগং সঙ্ঘেন. এসা ঞত্তি.

‘‘সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতুং. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং কৰোতি – অসম্ভোগং সঙ্ঘেন. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স কৰণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. অযং ছন্নো ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতুং. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং কৰোতি – অসম্ভোগং সঙ্ঘেন. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স কৰণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘কতং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং – অসম্ভোগং সঙ্ঘেন. খমতি সঙ্ঘস্স, তস্মা তুণ্হী, এৱমেতং ধাৰযামীতি.

‘‘আৱাসপৰম্পৰঞ্চ, ভিক্খৱে, সংসথ – ‘ছন্নো ভিক্খু, সঙ্ঘেন আপত্তিযা [ছন্নো ভিক্খু আপত্তিযা (সী. ক.)] অপ্পটিকম্মে, উক্খেপনীযকম্মকতো – অসম্ভোগং সঙ্ঘেনা’তি.

অধম্মকম্মদ্ৱাদসকং

৫৭. ‘‘তীহি, ভিক্খৱে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ. অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ.

‘‘অপৰেহিপি, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ. অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে… অচোদেত্ৱা কতং হোতি, অসাৰেত্ৱা কতং হোতি, আপত্তিং অনাৰোপেত্ৱা কতং হোতি…পে… অসম্মুখা কতং হোতি, অধম্মেন কতং হোতি, ৱগ্গেন কতং হোতি…পে… অপ্পটিপুচ্ছা কতং হোতি, অধম্মেন কতং হোতি, ৱগ্গেন কতং হোতি…পে… অপ্পটিঞ্ঞায কতং হোতি, অধম্মেন কতং হোতি, ৱগ্গেন কতং হোতি…পে… অনাপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… অদেসনাগামিনিযা আপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… দেসিতায আপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… অচোদেত্ৱা কতং হোতি, অধম্মেন কতং হোতি, ৱগ্গেন কতং হোতি…পে… অসাৰেত্ৱা কতং হোতি, অধম্মেন কতং হোতি, ৱগ্গেন কতং হোতি…পে… আপত্তিং অনাৰোপেত্ৱা কতং হোতি, অধম্মেন কতং হোতি, ৱগ্গেন কতং হোতি – ইমেহি খো, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ.

আপত্তিযা অপ্পটিকম্মে উক্খেপনীযকম্মে

অধম্মকম্মদ্ৱাদসকং নিট্ঠিতং.

ধম্মকম্মদ্ৱাদসকং

৫৮. ‘‘তীহি, ভিক্খৱে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ. সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ.

‘‘অপৰেহিপি, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ. আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে… চোদেত্ৱা কতং হোতি, সাৰেত্ৱা কতং হোতি, আপত্তিং আৰোপেত্ৱা কতং হোতি…পে… সম্মুখা কতং হোতি, ধম্মেন কতং হোতি, সমগ্গেন কতং হোতি…পে… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… চোদেত্ৱা কতং হোতি, ধম্মেন কতং হোতি, সমগ্গেন কতং হোতি…পে… সাৰেত্ৱা কতং হোতি, ধম্মেন কতং হোতি, সমগ্গেন কতং হোতি…পে… আপত্তিং আৰোপেত্ৱা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৱে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ.

আপত্তিযা অপ্পটিকম্মে উক্খেপনীযকম্মে

ধম্মকম্মদ্ৱাদসকং নিট্ঠিতং.

আকঙ্খমানছক্কং

৫৯. [পৰি. ৩২৩] ‘‘তীহি, ভিক্খৱে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৱিহৰতি অননুলোমিকেহি গিহিসংসগ্গেহি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

‘‘অপৰেহিপি, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

‘‘অপৰেহিপি, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

‘‘তিণ্ণং, ভিক্খৱে, ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. একো ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৱিহৰতি অননুলোমিকেহি গিহিসংসগ্গেহি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

‘‘অপৰেসম্পি, ভিক্খৱে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. একো অধিসীলে সীলৱিপন্নো হোতি, একো অজ্ঝাচাৰে আচাৰৱিপন্নো হোতি, একো অতিদিট্ঠিযা দিট্ঠিৱিপন্নো হোতি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

‘‘অপৰেসম্পি, ভিক্খৱে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য. একো বুদ্ধস্স অৱণ্ণং ভাসতি, একো ধম্মস্স অৱণ্ণং ভাসতি, একো সঙ্ঘস্স অৱণ্ণং ভাসতি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং কৰেয্য.

আপত্তিযা অপ্পটিকম্মে উক্খেপনীযকম্মে

আকঙ্খমানছক্কং নিট্ঠিতং.

তেচত্তালীসৱত্তং

৬০. ‘‘আপত্তিযা অপ্পটিকম্মে উক্খেপনীযকম্মকতেন, ভিক্খৱে, ভিক্খুনা সম্মা ৱত্তিতব্বং. তত্ৰাযং সম্মাৱত্তনা – ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো, ন ভিক্খুনোৱাদকসম্মুতি সাদিতব্বা, সম্মতেনপি ভিক্খুনিযো ন ওৱদিতব্বা. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৱা তাদিসিকা, ততো ৱা পাপিট্ঠতৰা; কম্মং ন গৰহিতব্বং, কম্মিকা ন গৰহিতব্বা. ন পকতত্তস্স ভিক্খুনো অভিৱাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহাৰো, সেয্যাভিহাৰো, পাদোদকং পাদপীঠং, পাদকথলিকং, পত্তচীৱৰপ্পটিগ্গহণং, নহানে পিট্ঠিপৰিকম্মং সাদিতব্বং. ন পকতত্তো ভিক্খু সীলৱিপত্তিযা অনুদ্ধংসেতব্বো, ন আচাৰৱিপত্তিযা অনুদ্ধংসেতব্বো, ন দিট্ঠিৱিপত্তিযা অনুদ্ধংসেতব্বো, ন আজীৱৱিপত্তিযা অনুদ্ধংসেতব্বো, ন ভিক্খু ভিক্খূহি ভেদেতব্বো. ন গিহিদ্ধজো ধাৰেতব্বো, ন তিত্থিযদ্ধজো ধাৰেতব্বো, ন তিত্থিযা সেৱিতব্বা; ভিক্খূ সেৱিতব্বা, ভিক্খুসিক্খায সিক্খিতব্বং. ন পকতত্তেন ভিক্খুনা সদ্ধিং একচ্ছন্নে আৱাসে ৱত্থব্বং, ন একচ্ছন্নে অনাৱাসে ৱত্থব্বং, ন একচ্ছন্নে আৱাসে ৱা অনাৱাসে ৱা ৱত্থব্বং, পকতত্তং ভিক্খুং দিস্ৱা আসনা ৱুট্ঠাতব্বং, ন পকতত্তো ভিক্খু আসাদেতব্বো অন্তো ৱা বহি ৱা. ন পকতত্তস্স ভিক্খুনো উপোসথো ঠপেতব্বো, ন পৱাৰণা ঠপেতব্বা, ন সৱচনীযং কাতব্বং, ন অনুৱাদো পট্ঠপেতব্বো, ন ওকাসো কাৰেতব্বো, ন চোদেতব্বো, ন সাৰেতব্বো, ন ভিক্খূহি সম্পযোজেতব্ব’’ন্তি.

আপত্তিযা অপ্পটিকম্মে উক্খেপনীযকম্মে

তেচত্তালীসৱত্তং নিট্ঠিতং.

৬১. অথ খো সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং অকাসি – অসম্ভোগং সঙ্ঘেন. সো সঙ্ঘেন, আপত্তিযা অপ্পটিকম্মে, উক্খেপনীযকম্মকতো তম্হা আৱাসা অঞ্ঞং আৱাসং অগমাসি. তত্থ ভিক্খূ নেৱ অভিৱাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্কৰিংসু, ন গৰুং কৰিংসু, ন মানেসুং, ন পূজেসুং. সো ভিক্খূহি অসক্কৰিযমানো অগৰুকৰিযমানো অমানিযমানো অপূজিযমানো অসক্কাৰপকতো তম্হাপি আৱাসা অঞ্ঞং আৱাসং অগমাসি. তত্থপি ভিক্খূ নেৱ অভিৱাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্কৰিংসু, ন গৰুং কৰিংসু, ন মানেসুং, ন পূজেসুং. সো ভিক্খূহি অসক্কৰিযমানো অগৰুকৰিযমানো অমানিযমানো অপূজিযমানো অসক্কাৰপকতো তম্হাপি আৱাসা অঞ্ঞং আৱাসং অগমাসি. তত্থপি ভিক্খূ নেৱ অভিৱাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্কৰিংসু, ন গৰুং কৰিংসু, ন মানেসুং, ন পূজেসুং. সো ভিক্খূহি অসক্কৰিযমানো অগৰুকৰিযমানো অমানিযমানো অপূজিযমানো অসক্কাৰপকতো পুনদেৱ কোসম্বিং পচ্চাগঞ্ছি. সো সম্মা ৱত্ততি, লোমং পাতেতি, নেত্থাৰং ৱত্ততি, ভিক্খূ উপসঙ্কমিত্ৱা এৱং ৱদেতি – ‘‘অহং, আৱুসো, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৱত্তামি, লোমং পাতেমি, নেত্থাৰং ৱত্তামি. কথং নু খো মযা পটিপজ্জিতব্ব’’ন্তি? ভিক্খূ ভগৱতো এতমত্থং আৰোচেসুং…পে…. ‘‘তেন হি, ভিক্খৱে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতু.

নপ্পটিপ্পস্সম্ভেতব্বতেচত্তালীসকং

৬২. ‘‘পঞ্চহি, ভিক্খৱে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. উপসম্পাদেতি, নিস্সযং দেতি, সামণেৰং উপট্ঠাপেতি, ভিক্খুনোৱাদকসম্মুতিং সাদিযতি, সম্মতোপি ভিক্খুনিযো ওৱদতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

[পৰি. ৪২০] ‘‘অপৰেহিপি, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৱা তাদিসিকং, ততো ৱা পাপিট্ঠতৰং; কম্মং গৰহতি, কম্মিকে গৰহতি…পে… পকতত্তস্স ভিক্খুনো অভিৱাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহাৰং সাদিযতি…পে… পকতত্তস্স ভিক্খুনো সেয্যাভিহাৰং, পাদোদকং পাদপীঠং, পাদকথলিকং, পত্তচীৱৰপ্পটিগ্গহণং, নহানে পিট্ঠিপৰিকম্মং সাদিযতি…পে… পকতত্তং ভিক্খুং সীলৱিপত্তিযা অনুদ্ধংসেতি, আচাৰৱিপত্তিযা অনুদ্ধংসেতি, দিট্ঠিৱিপত্তিযা অনুদ্ধংসেতি, আজীৱৱিপত্তিযা অনুদ্ধংসেতি, ভিক্খুং ভিক্খূহি ভেদেতি…পে… গিহিদ্ধজং ধাৰেতি, তিত্থিযদ্ধজং ধাৰেতি, তিত্থিযে সেৱতি, ভিক্খূ ন সেৱতি, ভিক্খুসিক্খায ন সিক্খতি…পে… পকতত্তেন ভিক্খুনা সদ্ধিং একচ্ছন্নে আৱাসে ৱসতি, একচ্ছন্নে অনাৱাসে ৱসতি, একচ্ছন্নে আৱাসে ৱা অনাৱাসে ৱা ৱসতি, পকতত্তং ভিক্খুং দিস্ৱা আসনা ন ৱুট্ঠাতি, পকতত্তং ভিক্খুং আসাদেতি অন্তো ৱা বহি ৱা – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

‘‘অট্ঠহি, ভিক্খৱে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং. পকতত্তস্স ভিক্খুনো উপোসথং ঠপেতি, পৱাৰণং ঠপেতি, সৱচনীযং কৰোতি, অনুৱাদং পট্ঠপেতি, ওকাসং কাৰেতি, চোদেতি, সাৰেতি, ভিক্খূহি সম্পযোজেতি – ইমেহি খো, ভিক্খৱে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং.

আপত্তিযা অপ্পটিকম্মে উক্খেপনীযকম্মে

নপ্পটিপ্পস্সম্ভেতব্বতেচত্তালীসকং নিট্ঠিতং.

পটিপ্পস্সম্ভেতব্বতেচত্তালীসকং

৬৩. ‘‘পঞ্চহি, ভিক্খৱে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. ন উপসম্পাদেতি, ন নিস্সযং দেতি, ন সামণেৰং উপট্ঠাপেতি, ন ভিক্খুনোৱাদকসম্মুতিং সাদিযতি, সম্মতোপি ভিক্খুনিযো ন ওৱদতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৱা তাদিসিকং, ততো ৱা পাপিট্ঠতৰং; কম্মং ন গৰহতি, কম্মিকে ন গৰহতি…পে… ন পকতত্তস্স ভিক্খুনো অভিৱাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহাৰং সাদিযতি…পে… ন পকতত্তস্স ভিক্খুনো সেয্যাভিহাৰং, পাদোদকং পাদপীঠং, পাদকথলিকং, পত্তচীৱৰপ্পটিগ্গহণং, নহানে পিট্ঠিপৰিকম্মং সাদিযতি…পে… ন পকতত্তং ভিক্খুং সীলৱিপত্তিযা অনুদ্ধংসেতি, ন আচাৰৱিপত্তিযা অনুদ্ধংসেতি, ন দিট্ঠিৱিপত্তিযা অনুদ্ধংসেতি, ন আজীৱৱিপত্তিযা অনুদ্ধংসেতি, ন ভিক্খুং ভিক্খূহি ভেদেতি…পে… ন গিহিদ্ধজং ধাৰেতি, ন তিত্থিযদ্ধজং ধাৰেতি, ন তিত্থিযে সেৱতি, ভিক্খূ সেৱতি, ভিক্খুসিক্খায সিক্খতি…পে… ন পকতত্তেন ভিক্খুনা সদ্ধিং একচ্ছন্নে আৱাসে ৱসতি, ন একচ্ছন্নে অনাৱাসে ৱসতি, ন একচ্ছন্নে আৱাসে ৱা অনাৱাসে ৱা ৱসতি, পকতত্তং ভিক্খুং দিস্ৱা আসনা ৱুট্ঠাতি, ন পকতত্তং ভিক্খুং আসাদেতি অন্তো ৱা বহি ৱা – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

‘‘অট্ঠহি, ভিক্খৱে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং. ন পকতত্তস্স ভিক্খুনো উপোসথং ঠপেতি, ন পৱাৰণং ঠপেতি, ন সৱচনীযং কৰোতি, ন অনুৱাদং পট্ঠপেতি, ন ওকাসং কাৰেতি, ন চোদেতি, ন সাৰেতি, ন ভিক্খূহি সম্পযোজেতি – ইমেহি খো, ভিক্খৱে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং.

আপত্তিযা অপ্পটিকম্মে উক্খেপনীযকম্মে

পটিপ্পস্সম্ভেতব্বতেচত্তালীসকং নিট্ঠিতং.

৬৪. ‘‘এৱঞ্চ পন, ভিক্খৱে, পটিপ্পস্সম্ভেতব্বং. তেন ভিক্খৱে, ছন্নেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘অহং, ভন্তে, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৱত্তামি, লোমং পাতেমি, নেত্থাৰং ৱত্তামি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘পটিপ্পস্সদ্ধং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

আপত্তিযা অপ্পটিকম্মে উক্খেপনীযকম্মং নিট্ঠিতং ছট্ঠং.