৭. পাপিকায দিট্ঠিযা অপ্পটিনিস্সগ্গে উক্খেপনীযকম্মং

৬৫. [ইদং ৱত্থু পাচি. ৪১৭; ম. নি. ২৩৪ আদযো] তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অৰিট্ঠস্স নাম ভিক্খুনো গদ্ধবাধিপুব্বস্স [গন্ধবাধিপুব্বস্স (ক.)] এৱৰূপং পাপকং দিট্ঠিগতং উপ্পন্নং হোতি – ‘‘তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি. অস্সোসুং খো সম্বহুলা ভিক্খূ অৰিট্ঠস্স নাম কিৰ ভিক্খুনো গদ্ধবাধিপুব্বস্স এৱৰূপং পাপকং দিট্ঠিগতং উপ্পন্নং – ‘‘তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি. অথ খো তে ভিক্খূ যেন অৰিট্ঠো ভিক্খু গদ্ধবাধিপুব্বো তেনুপসঙ্কমিংসু. উপসঙ্কমিত্ৱা অৰিট্ঠং ভিক্খুং গদ্ধবাধিপুব্বং এতদৱোচুং – ‘‘সচ্চং কিৰ তে, আৱুসো অৰিট্ঠ, এৱৰূপং পাপকং দিট্ঠিগতং উপ্পন্নং – তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি? ‘‘এৱংব্যা খো অহং, আৱুসো, ভগৱতা ধম্মং দেসিতং আজানামি, যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি.

‘‘মাৱুসো অৰিট্ঠ, এৱং অৱচ. মা ভগৱন্তং অব্ভাচিক্খি. ন হি সাধু ভগৱতো অব্ভক্খানং [অব্ভাচিক্খনং (ক.)]. ন হি ভগৱা এৱং ৱদেয্য. অনেকপৰিযাযেনাৱুসো অৰিট্ঠ, অন্তৰাযিকা ধম্মা অন্তৰাযিকা ৱুত্তা ভগৱতা. অলঞ্চ পন তে পটিসেৱতো অন্তৰাযায. অপ্পস্সাদা কামা ৱুত্তা ভগৱতা, বহুদুক্খা বহুপাযাসা [বহূপাযাসা (সী. স্যা.)], আদীনৱো এত্থ ভিয্যো. অট্ঠিকঙ্কলূপমা কামা ৱুত্তা ভগৱতা, বহুদুক্খা বহূপাযাসা, আদীনৱো এত্থ ভিয্যো. মংসপেসূপমা কামা ৱুত্তা ভগৱতা…পে… তিণুক্কূপমা কামা ৱুত্তা ভগৱতা…পে… অঙ্গাৰকাসূপমা কামা ৱুত্তা ভগৱতা… সুপিনকূপমা কামা ৱুত্তা ভগৱতা… যাচিতকূপমা কামা ৱুত্তা ভগৱতা… ৰুক্খফলূপমা কামা ৱুত্তা ভগৱতা… অসিসূনূপমা কামা ৱুত্তা ভগৱতা… সত্তিসূলূপমা কামা ৱুত্তা ভগৱতা… সপ্পসিৰূপমা কামা ৱুত্তা ভগৱতা, বহুদুক্খা বহূপাযাসা, আদীনৱো এত্থ ভিয্যো’’তি.

এৱম্পি খো অৰিট্ঠো ভিক্খু গদ্ধবাধিপুব্বো তেহি ভিক্খূহি ৱুচ্চমানো তথেৱ তং পাপকং দিট্ঠিগতং থামসা পৰামাসা অভিনিৱিস্স ৱোহৰতি – ‘‘এৱংব্যা খো অহং, আৱুসো, ভগৱতা ধম্মং দেসিতং আজানামি, যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি. যতো চ খো তে ভিক্খূ নাসক্খিংসু অৰিট্ঠং ভিক্খুং গদ্ধবাধিপুব্বং এতস্মা পাপকা দিট্ঠিগতা ৱিৱেচেতুং, অথ খো তে ভিক্খূ যেন ভগৱা তেনুপসঙ্কমিংসু, উপসঙ্কমিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা অৰিট্ঠং ভিক্খুং গদ্ধবাধিপুব্বং পটিপুচ্ছি – ‘‘সচ্চং কিৰ তে, অৰিট্ঠ, এৱৰূপং পাপকং দিট্ঠিগতং উপ্পন্নং – তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি? ‘‘এৱংব্যা খো অহং, ভন্তে, ভগৱতা ধম্মং দেসিতং আজানামি, যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযা’’তি.

‘‘কস্স নু খো নাম ত্ৱং, মোঘপুৰিস, মযা এৱং ধম্মং দেসিতং আজানাসি? ননু মযা, মোঘপুৰিস, অনেকপৰিযাযেন অন্তৰাযিকা ধম্মা অন্তৰাযিকা ৱুত্তা? অলঞ্চ পন তে পটিসেৱতো অন্তৰাযায. অপ্পস্সাদা কামা ৱুত্তা মযা, বহুদুক্খা বহুপাযাসা, আদীনৱো এত্থ ভিয্যো. অট্ঠিকঙ্কলূপমা কামা ৱুত্তা মযা, বহুদুক্খা বহুপাযাসা, আদীনৱো এত্থ ভিয্যো. মংসপেসূপমা কামা ৱুত্তা মযা…পে… তিণুক্কূপমা কামা ৱুত্তা মযা… অঙ্গাৰকাসূপমা কামা ৱুত্তা মযা… সুপিনকূপমা কামা ৱুত্তা মযা…পে… যাচিতকূপমা কামা ৱুত্তা মযা… ৰুক্খফলূপমা কামা ৱুত্তা মযা… অসিসূনূপমা কামা ৱুত্তা মযা… সত্তিসূলূপমা কামা ৱুত্তা মযা… সপ্পসিৰূপমা কামা ৱুত্তা মযা, বহুদুক্খা বহুপাযাসা, আদীনৱো এত্থ ভিয্যো. অথ চ পন ত্ৱং, মোঘপুৰিস, অত্তনা দুগ্গহিতেন [দুগ্গহিতেন দিট্ঠিগতেন (স্যা.)] অম্হে চেৱ অব্ভাচিক্খসি, অত্তানঞ্চ খণসি, বহুঞ্চ অপুঞ্ঞং পসৱসি. তঞ্হি তে, মোঘপুৰিস, ভৱিস্সতি দীঘৰত্তং অহিতায দুক্খায. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – তেন হি, ভিক্খৱে, সঙ্ঘো অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰোতু – অসম্ভোগং সঙ্ঘেন. এৱঞ্চ পন ভিক্খৱে কাতব্বং – পঠমং অৰিট্ঠো ভিক্খু চোদেতব্বো, চোদেত্ৱা সাৰেতব্বো, সাৰেত্ৱা আপত্তিং আৰোপেতব্বো, আপত্তিং আৰোপেত্ৱা ব্যত্তেন ভিক্খুনা পটিবলেন সঙ্ঘো ঞাপেতব্বো –

৬৬. ‘‘সুণাতু মে, ভন্তে, সঙ্ঘো. অৰিট্ঠস্স ভিক্খুনো গদ্ধবাধিপুব্বস্স এৱৰূপং পাপকং দিট্ঠিগতং উপ্পন্নং – তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযাতি. সো তং দিট্ঠিং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য – অসম্ভোগং সঙ্ঘেন. এসা ঞত্তি.

‘‘সুণাতু মে, ভন্তে, সঙ্ঘো. অৰিট্ঠস্স ভিক্খুনো গদ্ধবাধিপুব্বস্স এৱৰূপং পাপকং দিট্ঠিগতং উপ্পন্নং – তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযাতি. সো তং দিট্ঠিং ন পটিনিস্সজ্জতি. সঙ্ঘো অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰোতি – অসম্ভোগং সঙ্ঘেন. যস্সাযস্মতো খমতি অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স কৰণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. অৰিট্ঠস্স ভিক্খুনো গদ্ধবাধিপুব্বস্স এৱৰূপং পাপকং দিট্ঠিগতং উপ্পন্নং – তথাহং ভগৱতা ধম্মং দেসিতং আজানামি যথা যেমে অন্তৰাযিকা ধম্মা ৱুত্তা ভগৱতা তে পটিসেৱতো নালং অন্তৰাযাযাতি. সো তং দিট্ঠিং ন পটিনিস্সজ্জতি. সঙ্ঘো অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰোতি – অসম্ভোগং সঙ্ঘেন. যস্সাযস্মতো খমতি অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স কৰণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য.

‘‘কতং সঙ্ঘেন অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং – অসম্ভোগং সঙ্ঘেন. খমতি সঙ্ঘস্স, তস্মা তুণ্হী, এৱমেতং ধাৰযামীতি.

‘‘আৱাসপৰম্পৰঞ্চ, ভিক্খৱে, সংসথ – ‘অৰিট্ঠো ভিক্খু গদ্ধবাধিপুব্বো, সঙ্ঘেন পাপিকায [গদ্ধবাধিপুব্বো পাপিকায (সী. ক.)] দিট্ঠিযা অপ্পটিনিস্সগ্গে, উক্খেপনীযকম্মকতো – অসম্ভোগং সঙ্ঘেনা’’’তি.

অধম্মকম্মদ্ৱাদসকং

৬৭. ‘‘তীহি, ভিক্খৱে, অঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ. অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ.

‘‘অপৰেহিপি, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ. অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে… অচোদেত্ৱা কতং হোতি, অসাৰেত্ৱা কতং হোতি, আপত্তিং অনাৰোপেত্ৱা কতং হোতি…পে… অসম্মুখা কতং হোতি, অধম্মেন কতং হোতি, ৱগ্গেন কতং হোতি…পে… অপ্পটিপুচ্ছা কতং হোতি, অধম্মেন কতং হোতি, ৱগ্গেন কতং হোতি…পে… অপ্পটিঞ্ঞায কতং হোতি, অধম্মেন কতং হোতি, ৱগ্গেন কতং হোতি…পে… অনাপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… অদেসনাগামিনিযা আপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… দেসিতায আপত্তিযা কতং হোতি, অধম্মেন কতং হোতি, ৱগ্গেন কতং হোতি…পে… অচোদেত্ৱা কতং হোতি, অধম্মেন কতং হোতি, ৱগ্গেন কতং হোতি…পে… অসাৰেত্ৱা কতং হোতি, অধম্মেন কতং হোতি, ৱগ্গেন কতং হোতি…পে… আপত্তিং অনাৰোপেত্ৱা কতং হোতি, অধম্মেন কতং হোতি, ৱগ্গেন কতং হোতি – ইমেহি খো, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৱিনযকম্মঞ্চ, দুৱূপসন্তঞ্চ.

পাপিকায দিট্ঠিযা অপ্পটিনিস্সগ্গে উক্খেপনীযকম্মে

অধম্মকম্মদ্ৱাদসকং নিট্ঠিতং.

ধম্মকম্মদ্ৱাদসকং

৬৮. ‘‘তীহি, ভিক্খৱে, অঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ. সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ.

‘‘অপৰেহিপি, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ. আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে… চোদেত্ৱা কতং হোতি, সাৰেত্ৱা কতং হোতি, আপত্তিং আৰোপেত্ৱা কতং হোতি…পে… সম্মুখা কতং হোতি, ধম্মেন কতং হোতি, সমগ্গেন কতং হোতি…পে… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে… চোদেত্ৱা কতং হোতি, ধম্মেন কতং হোতি, সমগ্গেন কতং হোতি…পে… সাৰেত্ৱা কতং হোতি, ধম্মেন কতং হোতি, সমগ্গেন কতং হোতি…পে… আপত্তিং আৰোপেত্ৱা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৱে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৱিনযকম্মঞ্চ, সুৱূপসন্তঞ্চ.

পাপিকায দিট্ঠিযা অপ্পটিনিস্সগ্গে উক্খেপনীযকম্মে

ধম্মকম্মদ্ৱাদসকং নিট্ঠিতং.

আকঙ্খমানছক্কং

৬৯. [পৰি. ৩২৩] ‘‘তীহি, ভিক্খৱে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৱিহৰতি অননুলোমিকেহি গিহিসংসগ্গেহি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য.

‘‘অপৰেহিপি, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. অধিসীলে সীলৱিপন্নো হোতি, অজ্ঝাচাৰে আচাৰৱিপন্নো হোতি, অতিদিট্ঠিযা দিট্ঠিৱিপন্নো হোতি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য.

‘‘অপৰেহিপি, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি – ইমেহি খো, ভিক্খৱে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য.

‘‘তিণ্ণং, ভিক্খৱে, ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. একো ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৱিহৰতি অননুলোমিকেহি গিহিসংসগ্গেহি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য.

‘‘অপৰেসম্পি, ভিক্খৱে, তিণ্ণং ভিক্খূনং, আকঙ্কমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. একো অধিসীলে সীলৱিপন্নো হোতি, একো অজ্ঝাচাৰে আচাৰৱিপন্নো হোতি, একো অতিদিট্ঠিযা দিট্ঠিৱিপন্নো হোতি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য.

‘‘অপৰেসম্পি, ভিক্খৱে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কৰেয্য. একো বুদ্ধস্স অৱণ্ণং ভাসতি, একো ধম্মস্স অৱণ্ণং ভাসতি, একো সঙ্ঘস্স অৱণ্ণং ভাসতি – ইমেসং খো, ভিক্খৱে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগে, উক্খেপনীযকম্মং কৰেয্য.

পাপিকায দিট্ঠিযা অপ্পটিনিস্সগে উক্খেপনীযকম্মে

আকঙ্খমানছক্কং নিট্ঠিতং.

তেচত্তালীসৱত্তং

৭০. ‘‘পাপিকায দিট্ঠিযা অপ্পটিনিস্সগ্গে উক্খেপনীযকম্মকতেন, ভিক্খৱে, ভিক্খুনা সম্মা ৱত্তিতব্বং. তত্ৰাযং সম্মাৱত্তনা – ন উপসম্পাদেতব্বং, ন নিস্সযো দাতব্বো, ন সামণেৰো উপট্ঠাপেতব্বো, ন ভিক্খুনোৱাদকসম্মুতি সাদিতব্বা, সম্মতেনপি ভিক্খুনিযো ন ওৱদিতব্বা. যায আপত্তিযা সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৱা তাদিসিকা, ততো ৱা পাপিট্ঠতৰা; কম্মং ন গৰহিতব্বং, কম্মিকা ন গৰহিতব্বা…পে… ন পকতত্তস্স ভিক্খুনো উপোসথো ঠপেতব্বো, ন পৱাৰণা ঠপেতব্বা, ন সৱচনীযং কাতব্বং, ন অনুৱাদো পট্ঠপেতব্বো, ন ওকাসো কাৰেতব্বো, ন চোদেতব্বো, ন সাৰেতব্বো, ন ভিক্খূহি সম্পযোজেতব্ব’’ন্তি.

পাপিকায দিট্ঠিযা অপ্পটিনিস্সগ্গে উক্খেপনীযকম্মে

তেচত্তালীসৱত্তং নিট্ঠিতং.

৭১. অথ খো সঙ্ঘো অৰিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অকাসি – অসম্ভোগং সঙ্ঘেন. সো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৱিব্ভমি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অৰিট্ঠো ভিক্খু গদ্ধবাধিপুব্বো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৱিব্ভমিস্সতী’’তি? অথ খো তে ভিক্খূ ভগৱতো এতমত্থং আৰোচেসুং.

অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘সচ্চং কিৰ, ভিক্খৱে, অৰিট্ঠো ভিক্খু গদ্ধবাধিপুব্বো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৱিব্ভমতী’’তি [ৱিব্ভমীতি (সী. ক.)]? ‘‘সচ্চং ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং…পে… কথঞ্হি নাম সো, ভিক্খৱে, মোঘপুৰিসো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৱিব্ভমিস্সতি? নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘তেন হি, ভিক্খৱে, সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতু.

নপ্পটিপ্পস্সম্ভেতব্বতেচত্তালীসকং

৭২. ‘‘পঞ্চহি, ভিক্খৱে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং. উপসম্পাদেতি, নিস্সযং দেতি, সামণেৰং উপট্ঠাপেতি, ভিক্খুনোৱাদকসম্মুতিং সাদিযতি, সম্মতোপি ভিক্খুনিযো ওৱদতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগে, উক্খেপনীযকম্মং নপ্পটিপ্পস্সম্ভেতব্বং.

[পৰি. ৪২০] ‘‘অপৰেহিপি, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং. যায আপত্তিযা সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৱা তাদিসিকং, ততো ৱা পাপিট্ঠতৰং; কম্মং গৰহতি, কম্মিকে গৰহতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং…পে….

‘‘অট্ঠহি, ভিক্খৱে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং. পকতত্তস্স ভিক্খুনো উপোসথং ঠপেতি, পৱাৰণং ঠপেতি, সৱচনীযং কৰোতি, অনুৱাদং পট্ঠপেতি, ওকাসং কাৰেতি, চোদেতি, সাৰেতি, ভিক্খূহি সম্পযোজেতি – ইমেহি খো, ভিক্খৱে, অট্ঠহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং.

পাপিকায দিট্ঠিযা অপ্পটিনিস্সগ্গে উক্খেপনীযকম্মে

নপ্পটিপ্পস্সম্ভেতব্বতেচত্তালীসকং নিট্ঠিতং.

পটিপ্পস্সম্ভেতব্বতেচত্তালীসকং

৭৩. ‘‘পঞ্চহি, ভিক্খৱে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং. ন উপসম্পাদেতি, ন নিস্সযং দেতি, ন সামণেৰং উপট্ঠাপেতি, ন ভিক্খুনোৱাদকসম্মুতিং সাদিযতি, সম্মতোপি ভিক্খুনিযো ন ওৱদতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং.

‘‘অপৰেহিপি, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং. যায আপত্তিযা সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৱা তাদিসিকং, ততো ৱা পাপিট্ঠতৰং; কম্মং ন গৰহতি, কম্মিকে ন গৰহতি – ইমেহি খো, ভিক্খৱে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং…পে….

‘‘অট্ঠহি, ভিক্খৱে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং. ন পকতত্তস্স ভিক্খুনো উপোসথং ঠপেতি, ন পৱাৰণং ঠপেতি, ন সৱচনীযং কৰোতি, ন অনুৱাদং পট্ঠপেতি, ন ওকাসং কাৰেতি, ন চোদেতি, ন সাৰেতি, ন ভিক্খূহি সম্পযোজেতি – ইমেহি খো, ভিক্খৱে, অট্ঠহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং’’.

পাপিকায দিট্ঠিযা অপ্পটিনিস্সগ্গে উক্খেপনীযকম্মে

পটিপ্পস্সম্ভেতব্বতেচত্তালীসকং নিট্ঠিতং.

৭৪. ‘‘এৱঞ্চ পন, ভিক্খৱে, পটিপ্পস্সম্ভেতব্বং. তেন, ভিক্খৱে, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘অহং, ভন্তে, সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৱত্তামি, লোমং পাতেমি, নেত্থাৰং ৱত্তামি, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পাপিকায দিট্ঠিযা অপ্পটিনিস্সগ্গে উক্খেপনীযস্স কম্মস্স পটিপ্পস্সদ্ধিং যাচতি. সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতি. যস্সাযস্মতো খমতি ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য.

‘‘পটিপ্পস্সদ্ধং সঙ্ঘেন ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

পাপিকায দিট্ঠিযা অপ্পটিনিস্সগ্গে উক্খেপনীযকম্মং নিট্ঠিতং সত্তমং.

কম্মক্খন্ধকো পঠমো.

ইমম্হি খন্ধকে ৱত্থূ সত্ত.

তস্সুদ্দানং –

পণ্ডুলোহিতকা ভিক্খূ, সযং ভণ্ডনকাৰকা;

তাদিসে উপসঙ্কম্ম, উস্সহিংসু চ ভণ্ডনে.

অনুপ্পন্নাপি জাযন্তি [অনুপ্পন্নানি জাযন্তি (সী. স্যা.)], উপ্পন্নানিপি ৱড্ঢৰে [উপ্পন্নানি পৱড্ঢৰে (সী.), উপ্পন্নাপি পৱড্ঢন্তি (ক.)];

অপ্পিচ্ছা পেসলা ভিক্খূ, উজ্ঝাযন্তি পদস্সতো [পৰীসতো (স্যা.), পৰস্সতো (সী.)].

সদ্ধম্মট্ঠিতিকো বুদ্ধো, সযম্ভূ অগ্গপুগ্গলো;

আণাপেসি তজ্জনীযকম্মং সাৱত্থিযং জিনো.

অসম্মুখাপ্পটিপুচ্ছাপ্পটিঞ্ঞায কতঞ্চ যং;

অনাপত্তি অদেসনে, দেসিতায কতঞ্চ যং.

অচোদেত্ৱা অসাৰেত্ৱা, অনাৰোপেত্ৱা চ যং কতং;

অসম্মুখা অধম্মেন, ৱগ্গেন চাপি [ৱগ্গেনাপি চ (সী. স্যা.)] যং কতং.

অপ্পটিপুচ্ছা অধম্মেন, পুন ৱগ্গেন [ৱগ্গেনাপি চ (সী. স্যা.)] যং কতং;

অপ্পটিঞ্ঞায অধম্মেন, ৱগ্গেন চাপি [ৱগ্গেনাপি চ (সী. স্যা.)] যং কতং.

অনাপত্তি [অনাপত্তিযা (সী. স্যা.)] অধম্মেন, ৱগ্গেন

চাপি [ৱগ্গেনাপি চ (সী. স্যা.)] যং কতং.

অদেসনাগামিনিযা, অধম্মৱগ্গমেৱ চ.

দেসিতায অধম্মেন, ৱগ্গেনাপি তথেৱ চ;

অচোদেত্ৱা অধম্মেন, ৱগ্গেনাপি তথেৱ চ.

অসাৰেত্ৱা অধম্মেন, ৱগ্গেনাপি তথেৱ চ;

অনাৰোপেত্ৱা অধম্মেন, ৱগ্গেনাপি তথেৱ চ.

কণ্হৱাৰনযেনেৱ, সুক্কৱাৰং ৱিজানিযা;

সঙ্ঘো আকঙ্খমানো চ যস্স তজ্জনিযং কৰে.

ভণ্ডনং বালো সংসট্ঠো, অধিসীলে অজ্ঝাচাৰে;

অতিদিট্ঠিৱিপন্নস্স, সঙ্ঘো তজ্জনিযং কৰে.

বুদ্ধধম্মস্স সঙ্ঘস্স, অৱণ্ণং যো চ ভাসতি;

তিণ্ণন্নম্পি চ ভিক্খূনং, সঙ্ঘো তজ্জনিযং কৰে.

ভণ্ডনং কাৰকো একো, বালো সংসগ্গনিস্সিতো;

অধিসীলে অজ্ঝাচাৰে, তথেৱ অতিদিট্ঠিযা.

বুদ্ধধম্মস্স সঙ্ঘস্স, অৱণ্ণং যো চ ভাসতি;

তজ্জনীযকম্মকতো, এৱং সম্মানুৱত্তনা.

উপসম্পদনিস্সযা, সামণেৰং উপট্ঠনা;

ওৱাদসম্মতেনাপি, ন কৰে তজ্জনীকতো.

নাপজ্জে তঞ্চ আপত্তিং, তাদিসঞ্চ ততো পৰং;

কম্মঞ্চ কম্মিকে চাপি, ন গৰহে তথাৱিধো.

উপোসথং পৱাৰণং, পকতত্তস্স নট্ঠপে;

সৱচনিং [ন সৱচনিযং (সী. স্যা.)] অনুৱাদো, ওকাসো চোদনেন চ.

সাৰণং সম্পযোগঞ্চ, ন কৰেয্য তথাৱিধো;

উপসম্পদনিস্সযা, সামণেৰং উপট্ঠনা.

ওৱাদসম্মতেনাপি, পঞ্চহঙ্গেহি [পঞ্চঅঙ্গো (ক.)] ন সম্মতি;

তঞ্চাপজ্জতি আপত্তিং, তাদিসঞ্চ ততো পৰং.

কম্মঞ্চ কম্মিকে চাপি, গৰহন্তো ন সম্মতি;

উপোসথং পৱাৰণং, সৱচনীযা চ নোৱাদো.

ওকাসো চোদনঞ্চেৱ, সাৰণা সম্পযোজনা;

ইমেহট্ঠঙ্গেহি যো যুত্তো, তজ্জনানুপসম্মতি.

কণ্হৱাৰনযেনেৱ, সুক্কৱাৰং ৱিজানিযা;

বালো আপত্তিবহুলো, সংসট্ঠোপি চ সেয্যসো.

নিযস্সকম্মং সম্বুদ্ধো, আণাপেসি মহামুনি;

কীটাগিৰিস্মিং দ্ৱে ভিক্খূ, অস্সজিপুনব্বসুকা.

অনাচাৰঞ্চ ৱিৱিধং, আচৰিংসু অসঞ্ঞতা;

পব্বাজনীযং সম্বুদ্ধো, কম্মং সাৱত্থিযং জিনো;

মচ্ছিকাসণ্ডে সুধম্মো, চিত্তস্সাৱাসিকো অহু.

জাতিৱাদেন খুংসেতি, সুধম্মো চিত্তুপাসকং;

পটিসাৰণীযকম্মং, আণাপেসি তথাগতো.

কোসম্বিযং ছন্নং ভিক্খুং, নিচ্ছন্তাপত্তিং পস্সিতুং;

অদস্সনে উক্খিপিতুং, আণাপেসি জিনুত্তমো.

ছন্নো তংযেৱ আপত্তিং, পটিকাতুং ন ইচ্ছতি;

উক্খেপনাপ্পটিকম্মে, আণাপেসি ৱিনাযকো.

পাপদিট্ঠি অৰিট্ঠস্স, আসি অঞ্ঞাণনিস্সিতা;

দিট্ঠিযাপ্পটিনিস্সগ্গে [দিট্ঠিঅপ্পটিনিস্সগ্গে (ক.)], উক্খেপং জিনভাসিতং.

নিযস্সকম্মং পব্বজ্জং [পব্বাজং (ক.)], তথেৱ পটিসাৰণী;

অদস্সনাপ্পটিকম্মে, অনিস্সগ্গে চ দিট্ঠিযা.

দৱানাচাৰূপঘাতি, মিচ্ছাআজীৱমেৱ চ;

পব্বাজনীযকম্মম্হি, অতিৰেকপদা ইমে.

অলাভাৱণ্ণা দ্ৱে পঞ্চ, দ্ৱে পঞ্চকাতি নামকা [দ্ৱে পঞ্চকোতি নামকো (ক.)];

পটিসাৰণীযকম্মম্হি, অতিৰেকপদা ইমে.

তজ্জনীযং নিযস্সঞ্চ, দুৱে কম্মাপি সাদিসা [কম্মেসু সদিসং (ক.)];

পব্বজ্জা [পব্বাজা (ক.)] পটিসাৰী চ, অত্থি পদাতিৰিত্ততা.

তযো উক্খেপনা কম্মা, সদিসা তে ৱিভত্তিতো;

তজ্জনীযনযেনাপি, সেসকম্মং ৱিজানিযাতি.

কম্মক্খন্ধকং নিট্ঠিতং.