৪. পদট্ঠানহাৰসম্পাতৱিভাৱনা

৬৬. যেন যেন যুত্তিহাৰসম্পাতেন সুত্তপ্পদেসত্থানং যুত্তিভাৱো আচৰিযেন ৱিভাৱিতো, অম্হেহি চ ঞাতো, সো যুত্তিহাৰসম্পাতো পৰিপুণ্ণো, ‘‘কতমো পদট্ঠানহাৰসম্পাতো’’তি পুচ্ছিতব্বত্তা ‘‘তত্থ কতমো পদট্ঠানো হাৰসম্পাতো’’তি পুচ্ছতি.

পুচ্ছিত্ৱা যস্মিং সুত্তপ্পদেসে ৱুত্তানি পদট্ঠানানি নীহৰিতানি, তং সুত্তপ্পদেসং নীহৰিতুং ‘‘তস্মা ৰক্খিতচিত্তস্স, সম্মাসঙ্কপ্পগোচৰোতি গাথা’’তি ৱুত্তা. গাথাত্থো ৱুত্তোৱ. ‘‘কতমে গাথাত্থা কতমেসং ধম্মানং পদট্ঠানানী’’তি পুচ্ছিতব্বত্তা ‘‘তস্মা ৰক্খিতচিত্তস্সা’’তিআদি ৱুত্তং. ‘‘তস্মা ৰক্খিতচিত্তস্সা’’তি সুত্তপ্পদেসস্স অত্থভূতা ইন্দ্ৰিযেসু গুত্তদ্ৱাৰতা তিণ্ণং সুচৰিতানং পদট্ঠানং নাম সুচৰিতপাৰিপূৰিযা আসন্নকাৰণত্তা. ‘‘সম্মাসঙ্কপ্পগোচৰো’’তি সুত্তপ্পদেসস্স অত্থভূতা নেক্খম্মসঙ্কপ্পাদযো সম্মাসঙ্কপ্পা সমথস্স পদট্ঠানং নাম কামচ্ছন্দআদিনীৱৰণৱিক্খম্ভনস্স আসন্নকাৰণত্তা. ‘‘সম্মাদিট্ঠিপুৰেক্খাৰো’’তি সুত্তপ্পদেসস্স অত্থভূতা কম্মস্সকতাসম্মাদিট্ঠি চ সপ্পচ্চযনামৰূপদস্সনসম্মাদিট্ঠি চ ৱিপস্সনায পদট্ঠানং নাম অনিচ্চানুপস্সনাদীনং ৱিসেসকাৰণত্তা. ‘‘ঞত্ৱান উদযব্বয’’ন্তি সুত্তপ্পদেসস্স অত্থভূতা উদযব্বযানুপস্সনাপঞ্ঞা দস্সনভূমিযা পদট্ঠানং নাম পঠমমগ্গাধিগমস্স আসন্নকাৰণত্তা. ‘‘থিনমিদ্ধাভিভূ ভিক্খূ’’তি সুত্তপ্পদেসস্স অত্থভূতং থিনমিদ্ধাভিভৱনং ৱীৰিযস্স পদট্ঠানং নাম আসন্নকাৰণত্তা. ‘‘সব্বা দুগ্গতিযো জহে’’তি সুত্তপ্পদেসস্স অত্থভূতা পহাতব্বজহনভাৱনায অৰিযমগ্গভাৱনায পদট্ঠানং নাম পহাতব্বপ্পহানেন অৰিযমগ্গভাৱনাপাৰিপূৰিসম্ভৱতো.

‘‘এত্তকোৱ পদট্ঠানহাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো পদট্ঠানো হাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন পদট্ঠানহাৰসম্পাতভূতেন সুত্তপ্পদেসত্থানি পদট্ঠানানি নীহৰিতানি, সো সো সংৱণ্ণনাৱিসেসভূতো পদট্ঠানহাৰসম্পাতো নিযুত্তো যথাৰহং নিদ্ধাৰেত্ৱা যুজ্জিতব্বোতি অত্থো গহেতব্বোতি.

ইতি পদট্ঠানহাৰসম্পাতে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন…পে… গহেতব্বোতি.