১২. লোহিচ্চসুত্তৱণ্ণনা

লোহিচ্চব্ৰাহ্মণৱত্থুৱণ্ণনা

৫০১. এৱং কেৱট্টসুত্তং সংৱণ্ণেত্ৱা ইদানি লোহিচ্চসুত্তং সংৱণ্ণেন্তো যথানুপুব্বং সংৱণ্ণনোকাসস্স পত্তভাৱং ৱিভাৱেতুং, কেৱট্টসুত্তস্সানন্তৰং সঙ্গীতস্স সুত্তস্স লোহিচ্চসুত্তভাৱং ৱা পকাসেতুং ‘‘এৱং মে সুতং…পে… কোসলেসূতি লোহিচ্চসুত্ত’’ন্তি আহ. সালৱতিকাতি কাৰণমন্তৰেন ইত্থিলিঙ্গৱসেন তস্স গামস্স নামং. গামণিকাভাৱেনাতি কেচি. ৱতিযাতি কণ্টকসাখাদিৱতিযা. লোহিতো নাম তস্স কুলে পুব্বপুৰিসো, তব্বংসৱসেন লোহিতস্স অপচ্চং লোহিচ্চোতি ব্ৰাহ্মণস্স গোত্ততো আগতনামং.

৫০২. ‘‘কিঞ্হি পৰো পৰস্স কৰিস্সতী’’তি পৰানুকম্পা ৱিৰহিতত্তা লামকং. ন তু উচ্ছেদসস্সতানং অঞ্ঞতৰস্সাতি আহ ‘‘ন পনা’’তিআদি. দিট্ঠিগতন্তি হি লদ্ধিমত্তং অধিপ্পেতং, অঞ্ঞথা উচ্ছেদসস্সতগ্গাহৱিনিমুত্তো কোচি দিট্ঠিগ্গাহো নাম নত্থীতি তেসমঞ্ঞতৰং সিযা. ‘‘উপ্পন্নং হোতী’’তি ইদং মনসি, ৱচসি চ উপ্পন্নতাসাধাৰণৱচনন্তি দস্সেতি ‘‘ন কেৱলঞ্চা’’তিআদিনা. সো কিৰ…পে… ভাসতিযেৱাতি চ তস্সা লদ্ধিযা লোকে পাকটভাৱং ৱদতি. যস্মা পন অত্ততো অঞ্ঞো পৰো হোতি, তস্মা যথা অনুসাসকতো অনুসাসিতব্বো পৰো, এৱং অনুসাসিতব্বতোপি অনুসাসকোতি দস্সেতুং ‘‘পৰো’’তিআদি ৱুত্তং. কিং-সদ্দাপেক্খায চেত্থ ‘‘কৰিস্সতী’’তি অনাগতকালৱচনং, অনাগতেপি ৱা তেন তস্স কাতব্বং নত্থীতি দস্সনত্থং. কুসলং ধম্মন্তি অনৱজ্জধম্মং নিক্কিলেসধম্মং, ৱিমোক্খধম্মন্তি অত্থো. ‘‘পৰেসং ধম্মং কথেস্সামী’’তি তেহি অত্তানং পৰিৱাৰাপেত্ৱা ৱিচৰণং কিমত্থিযং, আসযৱুদ্ধস্সপি অনুৰোধেন ৱিনা তং ন হোতি, তস্মা অত্তনা…পে… ৱিহাতব্বন্তি ৱদতি. তেনাহ ‘‘এৱংসম্পদমিদং পাপকং লোভধম্মং ৱদামী’’তি.

৫০৪. ‘‘ইত্থিলিঙ্গৱসেনা’’তি ইমিনা পুল্লিঙ্গিকস্সপি অত্থস্স ইত্থিলিঙ্গসমঞ্ঞাতি দস্সেতি. সোতি লোহিচ্চব্ৰাহ্মণো. ভাৰোতি ভগৱতো পৰিসবাহুল্লত্তা, অত্তনো চ বহুকিচ্চকৰণীযত্তা গৰু দুক্কৰং.

৫০৮. কথাফাসুকত্থন্তি কথাসুখত্থং, সুখেন কথং কথেতুঞ্চেৱ সোতুঞ্চাতি অত্থো. অযং উপাসকোতি ৰোসিকন্হাপিতং আহ. অপ্পেৱ নাম সিযাতি এত্থ পীতিৱসেন আমেডিতং দট্ঠব্বং. তথা হি তং ‘‘বুদ্ধগজ্জিত’’ন্তি ৱুচ্চতি. ভগৱা হি ঈদিসেসু ঠানেসু ৱিসেসতো পীতিসোমনস্সজাতো হোতি, তস্মা পীতিৱসেন পঠমং গজ্জতি, দুতিযম্পি অনুগজ্জতি. কিং ৱিসেসং গজ্জনমনুগজ্জনন্তি ৱুত্তং ‘‘অয’’ন্তিআদি. আদো ভাসনং অল্লাপো, সঞ্ঞোগে পৰে ৰস্সো. তদুত্তৰি সহ ভাসনং সল্লাপো.

লোহিচ্চব্ৰাহ্মণানুযোগৱণ্ণনা

৫০৯. সমুদযসঞ্জাতীতি আযুপ্পাদোতি আহ ‘‘ভোগুপ্পাদো’’তি. ততোতি সালৱতিকায. লাভন্তৰাযকৰোতি ধনধঞ্ঞলাভস্স অন্তৰাযকৰো. অনুপুব্বো কপি-সদ্দো আকঙ্খনত্থোতি দস্সেতি ‘‘ইচ্ছতী’’তি ইমিনা. অযং অট্ঠকথাতো অপৰো নযো – সাতিসযেন হিতেন অনুকম্পকো অনুগ্গণ্হনকো হিতানুকম্পীতি. সম্পজ্জতীতি আসেৱনলাভেন নিপ্পজ্জতি, বলৱতী হোতি অৱগ্গহাতি অত্থো. তেন ৱুত্তং ‘‘নিযতা হোতী’’তি.

৫১০-৫১১. দুতিযং উপপত্তিন্তি ‘‘ননু ৰাজা পসেনদিকোসলো’’তিআদিনা ৱুত্তং দুতিযং উপপত্তিং ঠানং যুত্তিং. কাৰণঞ্হি ভগৱা উপমামুখেন দস্সেতি, ইমায চ উপপত্তিযা তুম্হে চেৱ অঞ্ঞে চাতি লোহিচ্চম্পি অন্তোকত্ৱা সংৱেজনং কতং হোতি. যে চ ইমে কুলপুত্তা দিব্বা গব্ভা পৰিপাচেন্তীতি যোজনা. উপনিস্সযসম্পত্তিযা, ঞাণপৰিপাকস্স ৱা অভাৱেন অসক্কোন্তা. কম্মপদেন অতুল্যাধিকৰণত্তা পৰিপাচেন্তি কিৰিযায ৱিভত্তিৱিপল্লাসেন উপযোগত্থে পচ্চত্তৱচনং. যে পন ‘‘পৰিপচ্চন্তী’’তি কম্মৰূপেন পঠন্তি, তেসং মতে ৱিভত্তিৱিপল্লাসেন পযোজনং নত্থি কম্মকত্তুভাৱতো, অত্থো পনস্স দুতিযৱিকপ্পে ৱুত্তনযেন দানাদিপুঞ্ঞৱিসেসো ৱেদিতব্বো. অহিতানুকম্পাদিতা চ তস্স তংসমঙ্গীসত্তৱসেন হোতি. দিৱি ভৱাতি দিব্বা. গব্ভেন্তি পৰিপচ্চনৱসেন অত্তনি পবন্ধেন্তীতি গব্ভা, দেৱলোকা. ‘‘ছন্নং দেৱলোকান’’ন্তি নিদস্সনৱচনমেতং. ব্ৰহ্মলোকস্সাপি হি দিব্বগব্ভভাৱো লব্ভতেৱ দিব্বৱিহাৰহেতুকত্তা. এৱঞ্চ কত্ৱা ‘‘ভাৱনং ভাৱযমানা’’তি ইদম্পি ৱচনং সমত্থিতং হোতি. ‘‘দেৱলোকগামিনিং পটিপদং পূৰযমানা’’তি ৱত্ৱা তং পটিপদং সৰূপতো দস্সেতুং ‘‘দানং দদমানা’’তিআদি ৱুত্তং. ভৱন্তি এত্থ যথাৰুচি সুখসমপ্পিতাতি ভৱা, ৱিমানানি. দেৱভাৱাৱহত্তা দিব্বা. ৱুত্তনযেনেৱ গব্ভা.দানাদযো দেৱলোকসংৱত্তনিক পুঞ্ঞৱিসেসা. দিব্বা ভৱাতি ইধ দেৱলোকপৰিযাপন্না উপপত্তিভৱা অধিপ্পেতা. তদাৱহো হি কম্মভৱো পুব্বে গহিতোতি আহ ‘‘দেৱলোকে ৱিপাকক্খন্ধা’’তি.

তযোচোদনাৰহৱণ্ণনা

৫১৩. অনিযামিতেনেৱাতি অনিযমিতেনেৱ, ‘‘ত্ৱং এৱং দিট্ঠিকো, এৱং সত্তানং অনত্থস্স কাৰকো’’তি এৱং অনুদ্দেসিকেনেৱ. সব্বলোকপত্থটায লদ্ধিযা সমুপ্পজ্জনতো যাৱ ভৱগ্গা উগ্গতং. মানন্তি ‘‘অহমেতং জানামি, অহমেতং পস্সামী’’তি এৱং পৱত্তং পণ্ডিতমানং. ভিন্দিত্ৱাতি ৱিধমেত্ৱা, জহাপেত্ৱাতি অত্থো. তযো সত্থাৰেতি অসম্পাদিতঅত্তহিতো অনোৱাদকৰসাৱকো চ অসম্পাদিতঅত্তহিতো ওৱাদকৰসাৱকো চ সম্পাদিতঅত্তহিতো অনোৱাদকৰসাৱকো চেতি ইমে তযো সত্থাৰে. চতুত্থো পন সম্মাসম্বুদ্ধো ন চোদনাৰহো, তস্মা ‘‘তং তেন পুচ্ছিতো এৱ কথেস্সামী’’তি চোদনাৰহেৱ তযো সত্থাৰে পঠমং দস্সেতি, পচ্ছা চতুত্থং সত্থাৰং. কামঞ্চেত্থ চতুত্থো সত্থা একো অদুতিযো অনঞ্ঞসাধাৰণো, তথাপি সো যেসং উত্তৰিমনুস্সধম্মানং ৱসেন ‘‘ধম্মমযো কাযো’’তি ৱুচ্চতি, তেসং সমুদাযভূতোপি তে গুণাৱযৱে সত্থুট্ঠানিযে কত্ৱা দস্সেন্তো ভগৱা ‘‘অযম্পি খো লোহিচ্চ সত্থা’’তি অভাসি.

অঞ্ঞাতি য-কাৰলোপনিদ্দেসো ‘‘সযং অভিঞ্ঞা’’তিআদীসু (দী. নি. ১.২৮, ৩৭; ম. নি. ১.১৫৪, ৪৪৪) ৱিয, তদত্থে চেতং সম্পদানৱচনন্তি দস্সেতি ‘‘অঞ্ঞাযা’’তিআদিনা. সাৱকত্তং পটিজানিত্ৱা ঠিতত্তা একদেসেনস্স সাসনং কৰোন্তীতি আহ ‘‘নিৰন্তৰং তস্স সাসনং অকত্ৱা’’তি. উক্কমিত্ৱা উক্কমিত্ৱাতি কদাচি তথা কৰণং, কদাচি তথা অকৰণঞ্চ সন্ধায ৱিচ্ছাৱচনং, যদিচ্ছিতং কৰোন্তীতি অধিপ্পাযো. পটিক্কমন্তিযাতি অনভিৰতিযা অগাৰৱেন অপগচ্ছন্তিযা. তেন ৱুত্তং ‘‘অনিচ্ছন্তিযা’’তিআদি. একাযাতি অদুতিযায ইত্থিযা, সম্পযোগন্তি মেথুনধম্মসমাযোগং. একো ইচ্ছেয্যাতি অদুতিযো পুৰিসো সম্পযোগং ইচ্ছেয্যাতি আনেত্ৱা সম্বন্ধো. ওসক্কনাদিমুখেন ইত্থিপুৰিসসম্বন্ধনিদস্সনং গেহস্সিতাগেহস্সিতঅপেক্খৱসেন তস্স সত্থুনো সাৱকেসু পটিপত্তিদস্সনত্থং. অতিৱিৰত্তভাৱতো দট্ঠুম্পি অনিচ্ছমানং পৰম্মুখিং ঠিতং ইত্থিং. লোভেনাতি পৰিৱাৰং নিস্সায উপ্পজ্জনকলাভসক্কাৰলোভেন. ঈদিসোতি এৱংসভাৱো সত্থা. যেনাতি লোভধম্মেন. তত্থ সম্পাদেহীতি তস্মিং পটিপত্তিধম্মে পতিট্ঠিতং কত্ৱা সম্পাদেহি. কাযৱঙ্কাদিৱিগমেন উজুং কৰোহি.

৫১৪. সস্সৰূপকানি তিণানীতি সস্সসদিসানি নীৱাৰাদিতিণানি.

৫১৫. এৱং চোদনং অৰহতীতি ৱুত্তনযেন সাৱকেসু অপ্পোস্সুক্কভাৱাপাদনে নিযোজনৱসেন চোদনং অৰহতি, ন পঠমো ৱিয ‘‘এৱৰূপো তৱ লোভধম্মো’’তিআদিনা, ন চ দুতিযো ৱিয ‘‘অত্তানমেৱ তাৱ তত্থ সম্পাদেহী’’তিআদিনা. কস্মা? সম্পাদিতঅত্তহিততায ততিযস্স.

নচোদনাৰহসত্থুৱণ্ণনা

৫১৬. ন চোদনাৰহোতি এত্থ যস্মা চোদনাৰহতা নাম সত্থুৱিপ্পটিপত্তিযা ৱা সাৱকৱিপ্পটিপত্তিযা ৱা উভযৱিপ্পটিপত্তিযা ৱা হোতি, তযিদং সব্বম্পি ইমস্মিং সত্থৰি নত্থি, তস্মা ন চোদনাৰহোতি ইমমত্থং দস্সেতুং ‘‘অযঞ্হী’’তিআদি ৱুত্তং. অস্সৱাতি পটিস্সৱা.

৫১৭. মযা গহিতায দিট্ঠিযাতি সব্বসো অনৱজ্জে অনুপৱজ্জে সম্মাপটিপন্নে, পৰেসঞ্চ সম্মদেৱ সম্মাপটিপত্তিং দস্সেন্তে সত্থৰি অভূতদোসাৰোপনৱসেন মিচ্ছাগহিতায নিৰযগামিনিযা পাপদিট্ঠিযা. নৰকপপাতন্তি নৰকসঙ্খাতং মহাপপাতং. পপতন্তি এত্থাতি হি পপাতো. ধম্মদেসনাহত্থেনাতি ধম্মদেসনাসঙ্খাতেন হত্থেন. সগ্গমগ্গথলেতি সগ্গগামিমগ্গভূতে পুঞ্ঞধম্মথলে, চাতুমহাৰাজিকাদিসগ্গসোতাপত্তিআদিমগ্গসঙ্খাতে ৱা থলে. সেসং সুৱিঞ্ঞেয্যমেৱ.

ইতি সুমঙ্গলৱিলাসিনিযা দীঘনিকাযট্ঠকথায পৰমসুখুমগম্ভীৰদুৰনুবোধত্থপৰিদীপনায সুৱিমলৱিপুলপঞ্ঞাৱেয্যত্তিযজননায সাধুৱিলাসিনিযা নাম লীনত্থপকাসনিযা লোহিচ্চসুত্তৱণ্ণনায লীনত্থপকাসনা.

লোহিচ্চসুত্তৱণ্ণনা নিট্ঠিতা.