১০. সুভসুত্তৱণ্ণনা

সুভমাণৱকৱত্থুৱণ্ণনা

৪৪৪. এৱং পোট্ঠপাদসুত্তং সংৱণ্ণেত্ৱা ইদানি সুভসুত্তং সংৱণ্ণেন্তো যথানুপুব্বং সংৱণ্ণনোকাসস্স পত্তভাৱং ৱিভাৱেতুং, পোট্ঠপাদসুত্তস্সানন্তৰং সঙ্গীতস্স সুত্তস্স সুভসুত্তভাৱং ৱা পকাসেতুং ‘‘এৱং মে সুতং…পে… সাৱত্থিযন্তি সুভসুত্ত’’ন্তি আহ. অনুনাসিকলোপেন ‘‘অচিৰ পৰিনিব্বুতে’’তি ৱুত্তন্তি দস্সেতি ‘‘অচিৰং পৰিনিব্বুতে’’তি ইমিনা যথা পোট্ঠপাদসুত্তে ‘‘অপ্পাটিহীৰক তং ভাসিতং সম্পজ্জতী’’তি, অচিৰং পৰিনিব্বুতস্স অস্সাতি ৱা অচিৰপৰিনিব্বুতো যথা ‘‘অচিৰপক্কন্তো, মাসজাতো’’তি. অত্থমত্তং পন দস্সেতুং এৱং ৱুত্তং. অচিৰপৰিনিব্বুতেতি চ সত্থু পৰিনিব্বুতভাৱস্স চিৰকালতাপটিক্খেপেন আসন্নতামত্তং দস্সিতং, কালপৰিচ্ছেদো পন ন দস্সিতোতি তং দস্সেন্তো ‘‘পৰিনিব্বানতো’’তিআদিমাহ. ৱিসাখপুণ্ণমিতো উদ্ধং যাৱ জেট্ঠপুণ্ণমী, তাৱ কালং সন্ধায ‘‘মাসমত্তে’’তি ৱুত্তং. মত্তসদ্দেন পন তস্স কালস্স কিঞ্চি অসম্পুণ্ণতং জোতেতি. তুদিসঞ্ঞিতো গামো নিৱাসো এতস্সাতি তোদেয্যো. তং পনেস যস্মা সোণদণ্ডো (দী. নি. ১.৩০০) ৱিয চম্পং, কূটদন্তো (দী. নি. ১.৩২৩) ৱিয চ খাণুমতং অজ্ঝাৱসতি, তস্মা ৱুত্তং ‘‘তস্স অধিপতিত্তা’’তি, ইস্সৰভাৱতোতি অত্থো. অযম্পি হি ৰঞ্ঞো পসেনদিকোসলস্স পুৰোহিতব্ৰাহ্মণো. পুত্তম্পি আহাতি সুভং মাণৱম্পি ওৱদন্তো আহ.

অঞ্জনানন্তি অক্খিঅঞ্জনত্থায ঘংসিতঅঞ্জনানং. ৱম্মিকানন্তি কিমিসমাহটৱম্মিকানং সঞ্চযং দিস্ৱাতি সম্বন্ধো. মধূনন্তি মক্খিকমধূনং. সমাহাৰন্তি মকৰন্দসন্নিচযং. পণ্ডিতো ঘৰমাৱসেতি যস্মা অপ্পতৰপ্পতৰেপি গয্হমানে ভোগা খীযন্তি, অপ্পতৰপ্পতৰেপি চ সঞ্চিযমানে ৱড্ঢন্তি, তস্মা যথাৱুত্তমুপমত্তযং পঞ্ঞায দিস্ৱা ৱিঞ্ঞুজাতিকো কিঞ্চিপি ৱযমকত্ৱা আযমেৱ উপ্পাদেন্তো ঘৰেৱসে ঘৰাৱাসমনুতিট্ঠেয্যাতি লোভাদেসিতপটিপত্তিং উপদিসতি.

অদানমেৱ সিক্খাপেত্ৱা সিক্খাপনহেতু লোভাভিভূততায তস্মিংযেৱ ঘৰে সুনখো হুত্ৱা নিব্বত্তি. লোভৱসিকস্স হি দুগ্গতি পাটিকঙ্খা, ‘‘জনৱসভো নাম যক্খো হুত্ৱা নিব্বত্তী’’তি (দী. নি. অট্ঠ. ১.১৫০) এত্থ ৱুত্তনযেন অত্থো ৱেদিতব্বো. পুব্বপৰিচযেন অতিৱিয পিযাযতি. ৱুত্তঞ্হি ‘‘পুব্বেৱ সন্নিৱাসেনা’’তিআদি (জা. ১.২.১৭৪). নিক্খন্তেতি কেনচিদেৱ কৰণীযেন বহি নিগ্গতে. সুভং মাণৱং অনুগ্গণ্হিতুকামো এককোৱ ভগৱা পিণ্ডায পাৱিসি. ভুক্কাৰন্তি ‘‘ভু ভূ’’তি সুনখসদ্দকৰণং. ‘‘ভো ভো’’তি ব্ৰাহ্মণসমুদাচাৰেন পৰিভৱিত্ৱা পৰিভৱনহেতু. ‘‘ভোৱাদি নাম সো হোতি, সচে হোতি সকিঞ্চনো’’তি (ধ. প. ৩৯৬; সু. নি. ৬২৫) হি ৱুত্তং. ননু চ হেট্ঠা ‘‘অদানমেৱ সিক্খাপেত্ৱা সুনখো হুত্ৱা নিব্বত্তো’’তি আহ, কস্মা পনেত্থ ‘‘পুব্বেপি মং ‘ভো ভো’তি পৰিভৱিত্ৱা সুনখো জাতো’’তি ৱদতীতি? তথা নিব্বত্তিযা তদুভযসাধাৰণফলত্তা. আনিসংসফলঞ্হি সাধাৰণকম্মেনপি জাতং, ন ৱিপাকফলং ৱিয এককম্মেনেৱাতি দট্ঠব্বং. অৱীচিং গমিস্সসি কতোকাসস্স কম্মস্স পটিবাহিতুমসক্কুণেয্যভাৱতো. ‘‘জানাতি মং সমণো গোতমো’’তি ৱিপ্পটিসাৰী হুত্ৱা. উদ্ধনন্তৰেতি চুল্লিকন্তৰে. নন্তি সুনখং.

তং পৱত্তিন্তি ভগৱতা যথাৱুত্তকাৰণং. ব্ৰাহ্মণচাৰিত্তস্স অপৰিহাপিততং সন্ধায, তথা পিতৰং উক্কংসেন্তো ‘‘ব্ৰহ্মলোকে নিব্বত্তো’’তি আহ. মুখাৰুড়্হন্তি সযংপটিভানৱসেন মুখমাৰুড়্হং. তং পৱত্তিং পুচ্ছীতি ‘‘সুতমেতং ভো গোতম ময্হং পিতা সুনখো হুত্ৱা নিব্বত্তো’’তি তুম্হেহি ৱুত্তং, ‘‘কিমিদং সচ্চং ৱা অসচ্চং ৱা’’তি পুচ্ছি. তথেৱ ৱত্ৱাতি যথা পুব্বে সুনখস্স ৱুত্তং, তথেৱ ৱত্ৱা. অৱিসংৱাদনত্থন্তি সচ্চাপনত্থং, ‘‘তোদেয্যব্ৰাহ্মণো সুনখো হুত্ৱা নিব্বত্তো’’তি ৱচনস্স অৱিসংৱাদনেন অত্তনো অৱিসংৱাদিভাৱদস্সনত্থন্তি ৱুত্তং হোতি. অপ্পোদকন্তি অপ্পকেন উদকেন সম্পাদিতং. মধুপাযাসন্তি সাদুৰসং, মধুযোজিতং ৱা পাযাসং. তথা অকাসি, যথা ভগৱতা ৱুত্তং. ‘‘সব্বং দস্সেসীতি বুদ্ধানুভাৱেন সো সুনখো তং সব্বং নেত্ৱা দস্সেসি, ন জাতিস্সৰতায. ভগৱন্তং দিস্ৱা ভুক্কৰণং পন পুৰিমজাতিসিদ্ধৱাসনাৱসেনা’’তি (দী. নি. টী. ১.৪৪৪) এৱং আচৰিযেন ৱুত্তং. উপৰিপণ্ণাসকে পন চূড়কম্মৱিভঙ্গসুত্তট্ঠকথাযং ‘‘সুনখো ‘ঞাতোম্হি ইমিনা’তি ৰোদিত্ৱা ‘হুং হু’ন্তি কৰোন্তো ধননিধানট্ঠানং গন্ত্ৱা পাদেন পথৱিং খণিত্ৱা সঞ্ঞং অদাসী’’তি (ম. নি. অট্ঠ. ৩.২৮৯) জাতিস্সৰাকাৰমাহ, ৱীমংসিত্ৱা গহেতব্বং.

‘‘ভৱপটিচ্ছন্নং নাম এৱৰূপং সুনখপটিসন্ধিঅন্তৰং পাকটং সমণস্স গোতমস্স, অদ্ধা এস সব্বঞ্ঞূ’’তি ভগৱতি পসন্নচিত্তো. অঙ্গৱিজ্জাপাঠকো কিৰেস. তেনস্স এতদহোসি ‘‘ইমং ধম্মপণ্ণাকাৰং কত্ৱা সমণং গোতমং পঞ্হং পুচ্ছিস্সামী’’তি, ততো সো চুদ্দস পঞ্হে অভিসঙ্খৰিত্ৱা ভগৱন্তং পুচ্ছি. তেন ৱুত্তং ‘‘চুদ্দস পঞ্হে পুচ্ছিত্ৱা’’তি. তত্থ চুদ্দস পঞ্হেতি ‘‘দিস্সন্তি হি ভো গোতম মনুস্সা অপ্পাযুকা, দিস্সন্তি দীঘাযুকা. দিস্সন্তি বৱ্হাবাধা, অপ্পাবাধা. দুব্বণ্ণা, ৱণ্ণৱন্তো. অপ্পেসক্খা, মহেসক্খা. অপ্পভোগা, মহাভোগা. নীচকুলীনা, উচ্চাকুলীনা. দিস্সন্তি দুপ্পঞ্ঞা, দিস্সন্তি পঞ্ঞৱন্তো. কো নু খো ভো গোতম হেতু কো পচ্চযো, যেন মনুস্সানংযেৱ সতং মনুস্সভূতানং দিস্সন্তি হীনপণীততা’’তি (ম. নি. ৩.২৮৯) ইমে চূড়কম্মৱিভঙ্গসুত্তে আগতে চুদ্দস পঞ্হে. ‘‘কম্মস্সকা মাণৱ সত্তা কম্মদাযাদা’’তিআদিনা (ম. নি. ৩.২৮৯) সঙ্খেপতো, ৱিত্থাৰতো চ ৱিস্সজ্জনপৰিযোসানে ভগৱন্তং সৰণং গতো. অঙ্গসুভতায ‘‘সুভো’’ তিস্স নামং. মাণৱোতি পন মহল্লককালেপি তৰুণৱোহাৰেন নং ৱোহৰতি. অত্তনো ভোগগামতোতি তুদিগামতো আগন্ত্ৱা তঙ্খণিকং ৱসতি. তেনেৱ পাড়িযং ‘‘কেনচিদেৱ কৰণীযেনা’’তি ৱুত্তং.

৪৪৫. ‘‘একা চ মে কঙ্খা অত্থী’’তি ইমিনা উপৰি পুচ্ছিযমানস্স পঞ্হস্স পগেৱ তেন অভিসঙ্খতভাৱং দস্সেতি. মাণৱকন্তি খুদ্দকমাণৱং ‘‘একপুত্তকো, (ম. নি. ২.২৯৬, ৩৫৩; পাৰা. ২৬) পিযপুত্তকো’’তিআদীসু ৱিয ক-সদ্দস্স খুদ্দকত্থে পৱত্তনতো. ৱিসভাগৱেদনাতি দুক্খৱেদনা. সা হি কুসলকম্মনিব্বত্তে অত্তভাৱে উপ্পজ্জনকসুখৱেদনাপটিপক্খভাৱতো ‘‘ৱিসভাগৱেদনা’’তি চ কাযং গাড়্হা হুত্ৱা বাধনতো পীড়নতো ‘‘আবাধো’’তি চ ৱুচ্চতি. কীদিসা পন সাতি আহ ‘‘যা একদেসে’’তিআদি. একদেসে উপ্পজ্জিত্ৱাতি সৰীৰেকদেসে উট্ঠহিত্ৱাপি অপৰিৱত্তিভাৱকৰণতো অযপট্টেন আবন্ধিত্ৱা ৱিয গণ্হাতি, ইমিনা বলৱৰোগো আবাধো নামাতি দস্সেতি. কিচ্ছজীৱিতকৰোতি অসুখজীৱিতাৱহো, ইমিনা দুব্বলো অপ্পমত্তকো ৰোগো আতঙ্কো নামাতি দস্সেতি. উট্ঠানন্তি সযননিসজ্জাদিতো উট্ঠহনং, তেন যথা তথা অপৰাপৰং সৰীৰস্স পৰিৱত্তনং ৱদতি. গৰুকন্তি ভাৰিযং অকিচ্চসিদ্ধিকং. গিলানস্সেৱ কাযে বলং ন হোতীতি সম্বন্ধো. লহুট্ঠানেন চেত্থ গেলঞ্ঞাভাৱো পুচ্ছিতো. হেট্ঠা চতূহি পদেহি অফাসুৱিহাৰাভাৱং পুচ্ছিত্ৱাপি ইদানি পুন ফাসুৱিহাৰভাৱং পুচ্ছতি, তেন সৱিসেসো এত্থ ফাসুৱিহাৰো পুচ্ছিতোতি ৱিঞ্ঞাযতি. অসতিপি হি অতিসযত্থজোতনে সদ্দে অত্থাপত্তিতো অতিসযত্থো লব্ভতেৱ যথা ‘‘অভিৰূপস্স কঞ্ঞা দাতব্বা’’তি. তেনাহ ‘‘গমনট্ঠানা’’তিআদি. পুৰিমং আণাপনৱচনং, ইদং পন পুচ্ছিতব্বাকাৰদস্সনন্তি অযমিমেসং ৱিসেসোতি দস্সেতি ‘‘অথস্সা’’তিআদিনা.

৪৪৭. কালো নাম উপসঙ্কমনস্স যুত্তপত্তকালো, সমযো নাম তস্সেৱ পচ্চযসামগ্গী, অত্থতো পনেস তজ্জং সৰীৰবলঞ্চেৱ তপ্পচ্চযপৰিস্সযাভাৱো চ. উপাদানং নাম ঞাণেন তেসং গহণং সল্লক্খণন্তি আহ ‘‘পঞ্ঞাযা’’তিআদি. ‘‘স্ৱে গমনকালো ভৱিস্সতী’’তি ইমিনা কালং, ‘‘কাযে’’তিআদিনা সমযঞ্চ সৰূপতো দস্সেতি. ফৰিস্সতীতি ফৰণৱসেন ঠস্সতি.

৪৪৮. চেতিযৰট্ঠেতি চেতিৰট্ঠে. য-কাৰেন হি পদং ৱড্ঢেত্ৱা এৱং ৱুত্তং. ‘‘চেতিৰট্ঠতো অঞ্ঞং ৱিসুংযেৱেকং ৰট্ঠ’’ন্তিপি ৱদন্তি. ‘‘যস্মা মৰণং নাম তাদিসানং দসবলানং ৰোগৱসেনেৱ হোতি, তস্মা যেন ৰোগেন তং জাতং, তস্স সৰূপপুচ্ছা, কাৰণপুচ্ছা, মৰণহেতুকচিত্তসন্তাপপুচ্ছা, তস্স চ সন্তাপস্স সব্বলোকসাধাৰণতা, তথা মৰণস্স চ অপ্পটিকৰণতা’’তি এৱমাদিনা মৰণপটিসঞ্ঞুত্তং সম্মোদনীযং কথং কথেসীতি দস্সেতুং ‘‘ভো আনন্দা’’তিআদি ৱুত্তং. ‘‘কো নামা’’তিআদিনা হি ৰোগং পুচ্ছতি, ‘‘কিং ভগৱা পৰিভুঞ্জী’’তি ইমিনা কাৰণং, ‘‘অপিচা’’তিআদিনা চিত্তসন্তাপং, ‘‘সত্থা নামা’’তিআদিনা তস্স সব্বলোকসাধাৰণতং, ‘‘একা দানী’’তিআদিনা মৰণস্স অপ্পটিকৰণতং দস্সেতীতি দট্ঠব্বং. মহাজানীতি মহাহানি. যত্ৰাতি যেন কাৰণেন পৰিনিব্বুতো, তেন কো দানি অঞ্ঞো মৰণা মুচ্চিস্সতীতিআদিনা যোজেতব্বং. ইদানীতি চ অত্তনো মনসিকাৰং পতি ৱোহাৰমত্তেন ৱুত্তং. লজ্জিস্সতীতি লজ্জা ৱিয ভৱিস্সতি, ৱিজ্জিস্সতীতি অত্থো. পীতভেসজ্জানুৰূপং আহাৰভোজনং পোৰাণাচিণ্ণন্তি আহ ‘‘পীত…পে… দত্ৱা’’তি.

হুত্ৱাতি পাঠসেসো সন্তিকাৱচৰভাৱস্স ৱিসেসনতো. মাৰো পাপিমা ৱিয ন ৰন্ধগৱেসী, উত্তৰমাণৱো ৱিয চ ন ৱীমংসনাধিপ্পাযো, অপি তু খলু উপট্ঠাকো হুত্ৱা সন্তিকাৱচৰোতি হি ৱিসেসেতি. ন ৰন্ধগৱেসীতি ন ছিদ্দগৱেসী. যেসু ধম্মেসূতি ৱিমোক্খুপাযেসু নিয্যানিকধম্মেসু. ধৰন্তীতি অধুনা তিট্ঠন্তি, পৱত্তন্তীতি অত্থো.

৪৪৯. অত্থতো পযুত্ততায সদ্দপযোগস্স সদ্দপবন্ধলক্খণানি তীণি পিটকানি তদত্থভূতেহি সীলাদীহি তীহি ধম্মক্খন্ধেহি সঙ্গয্হন্তীতি ৱুত্তং ‘‘তীণি পিটকানি তীহি খন্ধেহি সঙ্গহেত্ৱা’’তি. সঙ্খিত্তেন কথিতন্তি ‘‘তিণ্ণং খো মাণৱ খন্ধান’’ন্তি এৱং গণনতো, সামঞ্ঞতো চ সঙ্খেপেনেৱ কথিতং. ‘‘কতমেসং তিণ্ণ’’ন্তি অযং অদিট্ঠজোতনাপুচ্ছাযেৱ, ন কথেতুকম্যতাপুচ্ছা. মাণৱস্সেৱ হি অযং পুচ্ছা, ন থেৰস্সাতি আহ ‘‘মাণৱো’’তিআদি. অঞ্ঞত্থ পন ঈদিসেসু ঠানেসু কথেতুকম্যতাপুচ্ছাযেৱ দিস্সতি, ন অদিট্ঠজোতনাপুচ্ছা. ইধ পন অট্ঠকথাযং এৱং ৱুত্তং, তদেতং অট্ঠকথাপমাণতো পচ্চেতব্বং. তদা পৱত্তমানঞ্হি পচ্চক্খং কত্ৱা অট্ঠকথম্পি সঙ্গহমাৰোপিংসু. কথেতুকম্যতাপুচ্ছাভাৱে পনস্স থেৰস্সেৱ ৱচনতা সিযা.

সীলক্খন্ধৱণ্ণনা

৪৫০-৪৫৩. সীলক্খন্ধস্সাতি এত্থ পদত্থৱিপল্লাসকাৰী ইতিসদ্দো লুত্তো, অত্থনিদ্দেসো ৱিয সদ্দনিদ্দেসো ৱা, যথাৰুতো চ ইতিসদ্দো আদ্যত্থো, পকাৰত্থো ৱা, তেন ‘‘অৰিযস্স সমাধিক্খন্ধস্স…পে… পতিট্ঠপেসী’’তি অযং পাঠো গহিতোতি দট্ঠব্বং. তেন ৱুত্তং ‘‘তেসু দস্সিতেসূ’’তি, তেসু তীসু খন্ধেসু উদ্দেসৱসেন দস্সিতেসূতি অত্থো. ভগৱতা ৱুত্তনযেনেৱাতি সামঞ্ঞফলাদীসু (দী. নি. ১.১৯৪) দেসিতনযেনেৱ, তেন ইমস্স সুত্তস্স বুদ্ধভাসিতভাৱং দস্সেতীতি ৱেদিতব্বং. সাসনে ন সীলমেৱ সাৰোতি অৰিযমগ্গসাৰে ভগৱতো সাসনে যথাদস্সিতং সীলং সাৰো এৱ ন হোতি সাৰৱতো মহতো ৰুক্খস্স পপটিকট্ঠানিকত্তা. অট্ঠানপযুত্তো হি এৱসদ্দো যথাঠানে ন যোজেতব্বো. যজ্জেৱং কস্মা তমিধ গহিতন্তি আহ ‘‘কেৱল’’ন্তিআদি. ঝানাদিউত্তৰিমনুস্সধম্মে অধিগন্তুকামস্স অধিট্ঠানমত্তং তত্থ অপ্পতিট্ঠিতস্স তেসমসম্ভৱতো. ৱুত্তঞ্হি ‘‘সীলে পতিট্ঠায নৰো সপঞ্ঞো’’তিআদি (সং. নি. ১.২৩, ১৯২; পেটকো. ২২) অথ ৱা সাসনে ন সীলমেৱ সাৰোতি কামঞ্চেত্থ সাসনে মগ্গফলসীলসঙ্খাতং লোকুত্তৰসীলম্পি সাৰমেৱ, তথাপি ন সীলক্খন্ধো এৱ সাৰো হোতি, অথ খো সমাধিক্খন্ধোপি পঞ্ঞাক্খন্ধোপি সাৰো এৱাতি এৱম্পেত্থ যথাপযুত্তেন এৱসদ্দেন অত্থো ৱেদিতব্বো, পুৰিমোযেৱ পনত্থো যুত্ততৰো. তথা হি ৱুত্তং ‘‘ইতো উত্তৰী’’তিআদি. অঞ্ঞম্পি কত্তব্বন্তি সেসখন্ধদ্ৱযং.

সমাধিক্খন্ধৱণ্ণনা

৪৫৪. কস্মা পনেত্থ থেৰো সমাধিক্খন্ধং পুট্ঠোপি ইন্দ্ৰিযসংৱৰাদিকে ৱিস্সজ্জেসি, ননু এৱং সন্তে অঞ্ঞং পুট্ঠো অঞ্ঞং ব্যাকৰোন্তো অম্বং পুট্ঠো লবুজং ব্যাকৰোন্তো ৱিয হোতীতি ঈদিসী চোদনা ইধ অনোকাসাতি দস্সেন্তো ‘‘কথঞ্চ…পে… আৰভী’’তি আহ, তেনেত্থ ইন্দ্ৰিযসংৱৰাদযোপি সমাধিউপকাৰকতং উপাদায সমাধিক্খন্ধপক্খিকভাৱেন উদ্দিট্ঠাতি দস্সেতি. যে তে ইন্দ্ৰিযসংৱৰাদযোতি সম্বন্ধো. ৰূপাৱচৰচতুত্থজ্ঝানদেসনানন্তৰং অভিঞ্ঞাদেসনায অৱসৰোতি কত্ৱা ৰূপজ্ঝানানেৱ আগতানি,ন অৰূপজ্ঝানানি. ৰূপাৱচৰচতুত্থজ্ঝানপাদিকা হি সপৰিভণ্ডা ছপি অভিঞ্ঞাযো. যস্মা পন লোকিযাভিঞ্ঞাযো ইজ্ঝমানা অট্ঠসু সমাপত্তীসু চুদ্দসৱিধেন চিত্তপৰিদমনেন ৱিনা ন ইজ্ঝন্তি, তস্মা অভিঞ্ঞাসু দেসিযমানাসু অৰূপজ্ঝানানিপি দেসিতানেৱ হোন্তি নানন্তৰিকভাৱতো. তেনাহ ‘‘আনেত্ৱা পন দীপেতব্বানী’’তি, ৱুত্তনযেন দেসিতানেৱ কত্ৱা সংৱণ্ণকেহি পকাসেতব্বানীতি অত্থো. অট্ঠকথাযং পন ‘‘চতুত্থজ্ঝানং উপসম্পজ্জ ৱিহৰতী’’তি ইমিনাৱ অৰূপজ্ঝানম্পি সঙ্গহিতন্তি দস্সেতুং ‘‘চতুত্থজ্ঝানেন হী’’তিআদি ৱুত্তং. চতুত্থজ্ঝানমেৱ হি ৰূপৱিৰাগভাৱনাৱসেন পৱত্তং ‘‘অৰূপজ্ঝান’’ন্তি ৱুচ্চতি.

৪৭১-৪৮০. ন চিত্তেকগ্গতামত্তকেনেৱাতি এত্থ হেট্ঠা ৱুত্তনযানুসাৰেন ঠানাঠানপযুত্তস্স এৱসদ্দস্সানুৰূপমত্থো ৱেদিতব্বো. লোকিযসমাধিক্খন্ধস্স পন অধিপ্পেতত্তা ‘‘ন চিত্তেকগ্গতা…পে… অত্থী’’তি ৱুত্তং. অৰিযো সমাধিক্খন্ধোতি এত্থ হি অৰিযসদ্দো সুদ্ধমত্তপৰিযাযোৱ, ন লোকুত্তৰপৰিযাযো. যথা চেত্থ, তথা অৰিযো সীলক্খন্ধোতি এত্থাপি. ইতোতি পঞ্ঞাক্খন্ধতো, সো চ উক্কট্ঠতো অৰহত্তফলপৰিযাপন্নো এৱাতি আহ ‘‘অৰহত্তপৰিযোসান’’ন্তিআদি. লোকিযাভিঞ্ঞাপটিসম্ভিদাহি ৱিনাপি হি অৰহত্তে অধিগতে ‘‘নত্থেৱ উত্তৰিকৰণীয’’ন্তি সক্কা ৱত্তুং যদত্থং ভগৱতি ব্ৰহ্মচৰিযং ৱুস্সতি, তস্স সিদ্ধত্তা. ইধ পন লোকিযাভিঞ্ঞাযোপি আগতাযেৱ. সেসমেত্থ সুৱিঞ্ঞেয্যং.

ইতি সুমঙ্গলৱিলাসিনিযা দীঘনিকাযট্ঠকথায পৰমসুখুমগম্ভীৰদুৰনুবোধত্থপৰিদীপনায সুৱিমলৱিপুলপঞ্ঞাৱেয্যত্তিযজননায সাধুৱিলাসিনিযা নাম লীনত্থপকাসনিযা সুভসুত্তৱণ্ণনায লীনত্থপকাসনা.

সুভসুত্তৱণ্ণনা নিট্ঠিতা.