১. বলকথাৱণ্ণনা

৩৫৪. নিদ্দেসতোতি ‘‘অট্ঠানমেতং অনৱকাসো’’তিআদিনা নিদ্দিট্ঠপ্পকাৰতো. সো পন যস্মা ৱিত্থাৰো হোতি, তস্মা ৱুত্তং ‘‘ৱিত্থাৰতো’’তি. সব্বং কিলেসাৱৰণাদিং, তমেৱ পচ্চেকং পৱত্তিআকাৰভেদতো সব্বাকাৰং. ‘‘সব্ব’’ন্তি হি ইদং সৰূপতো গহণং, ‘‘সব্বাকাৰতো’’তি পৱত্তিআকাৰভেদতো. ভগৱা হি ধম্মে জানন্তো তেসং আকাৰভেদে অনৱসেসেত্ৱাৱ জানাতি. যথাহ ‘‘সব্বে ধম্মা সব্বাকাৰতো বুদ্ধস্স ভগৱতো ঞাণমুখে আপাথং আগচ্ছন্তী’’তি (মহানি. ১৫৬; চূড়নি. মোঘৰাজমাণৱপুচ্ছানিদ্দেস ৮৫; পটি. ম. ৩.৫). উদ্দেসতোতি একদেসতো. একদেসো চ ৱিত্থাৰো ন হোতীতি আহ ‘‘সঙ্খেপতো’’তি. যথা জানন্তীতি সম্বন্ধো. উদ্দেসমত্তেনপীতি দিট্ঠিগতযথাভূতঞাণাদিপ্পভেদানং আসযাদীনং উদ্দেসমত্তেনপি. তেনাহ ‘‘ইন্দ্ৰিযানং তিক্খমুদুভাৱজাননমত্তং সন্ধাযা’’তি. থেৰেনাতি অনুৰুদ্ধত্থেৰেন. এৱমেৱাতি উদ্দেসতো ঠানাদিমত্তজাননাকাৰেনেৱ. স্ৱাযমত্থো সকৱাদিনাপি ইচ্ছিতোযেৱাতি আহ ‘‘কথমযং চোদেতব্বো সিযা’’তি.

৩৫৬. সেসেসূতি ইন্দ্ৰিযপৰোপৰিযত্তঞাণতো সেসেসু. পটিক্খেপোতি অসাধাৰণতাপটিক্খেপো. ননু চ সেসানং অসাধাৰণতাপি অত্থীতি চোদনং সন্ধাযাহ ‘‘ঠানা…পে… অধিপ্পাযো’’তি.

বলকথাৱণ্ণনা নিট্ঠিতা.