২. অৰিযন্তিকথাৱণ্ণনা

৩৫৭. সঙ্খাৰে সন্ধায পটিজানন্তস্সাতি দিট্ঠিযা পৰিকপ্পিতেন সত্তেন সুঞ্ঞে সঙ্খাৰে সন্ধায ‘‘সুঞ্ঞতঞ্চ মনসি কৰোতী’’তি পুচ্ছায ‘‘আমন্তা’’তি পটিজানন্তস্স. দ্ৱিন্নং ফস্সানং সমোধানং কথং আপজ্জতি ঠানাঠানভূতে সঙ্খাৰে ৱুত্তনযেন সুঞ্ঞতং মনসি কৰোন্তস্সাতি অধিপ্পাযো. যথাৱুত্তনযেনাতি ‘‘দিট্ঠিযা পৰিকপ্পিতেন সত্তেন সুঞ্ঞা পঞ্চক্খন্ধা’’তি পকাৰেন নযেন. অথ ৱা যথাৱুত্তনযেনাতি ‘‘ঠানাঠানমনসিকাৰো সঙ্খাৰাৰম্মণো, সুঞ্ঞতামনসিকাৰো নিব্বানাৰম্মণো’’তি এৱং ৱুত্তনযেন. ‘‘সঙ্খাৰে সন্ধায পটিজানন্তস্সা’’তি ৱুত্তত্তা ‘‘দ্ৱিন্নং ফস্সানং সমোধানং কথং আপজ্জতী’’তি আহ. সত্তসুঞ্ঞতায সুঞ্ঞত্তেপি সঙ্খাৰানং অঞ্ঞোৱ ঠানাঠানমনসিকাৰো, অঞ্ঞো সুঞ্ঞতামনসিকাৰোতি যুজ্জতেৱ দ্ৱিন্নং ফস্সানং সমোধানাপত্তিচোদনা, সঙ্খাৰে সন্ধায পটিজানন্তস্স পন কথং অৰিযভাৱসিদ্ধি ঠানাঠানঞাণাদীনন্তি ৱিচাৰেতব্বং. কিং ৱা এতায যুত্তিচিন্তায. উম্মত্তকপচ্ছিসদিসো হি পৰৱাদিৱাদো. অঞ্ঞেসুপি ঠানেসু ঈদিসেসু এসেৱ নযো. আৰোপেত্ৱাতি ইত্থিপুৰিসাদিআকাৰং, সত্তাকাৰমেৱ ৱা অসন্তং ৰূপাদিউপাদানে আৰোপেত্ৱা. অভূতাৰোপনঞ্হেত্থ পণিদহনন্তি অধিপ্পেতং. তেনাহ ‘‘পৰিকপ্পনৱসেনা’’তি. সোতি যথাৱুত্তো পণিধি. একস্মিম্পি খন্ধে.

অৰিযন্তিকথাৱণ্ণনা নিট্ঠিতা.