৯. অনুপুব্বাভিসমযকথাৱণ্ণনা

৩৩৯. ‘‘তানি ৱা চত্তাৰিপি ঞাণানি একো সোতাপত্তিমগ্গোযেৱাতি পটিজানাতী’’তি ইমং সন্ধাযাহ ‘‘অথ ৱা’’তিআদি. চতুন্নং ঞাণানন্তি দুক্খেঞাণাদীনং চতুন্নং ঞাণানং. একমগ্গভাৱতোতি সোতাপত্তিআদিএকমগ্গভাৱতো. কমেন পৱত্তমানানিপি হি তানি ঞাণানি তংতংমগ্গকিচ্চস্স সাধনতো একোযেৱ মগ্গো হোতীতি অধিপ্পাযো. তেনাহ ‘‘একমগ্গস্স…পে… পটিজানাতী’’তি.

৩৪৪. দস্সনেতি মগ্গদস্সনে.

৩৪৫. ধম্মত্থানং হেতুফলভাৱতো ধম্মত্থপটিসম্ভিদানং সিযা সোতাপত্তিফলহেতুতা, তদভাৱতো ন ইতৰপটিসম্ভিদানন্তি আহ ‘‘নিৰুত্তি…পে… ৱিচাৰেতব্ব’’ন্তি. সব্বাসম্পি পন পটিসম্ভিদানং পঠমফলসচ্ছিকিৰিযাহেতুতা ৱিচাৰেতব্বা মগ্গাধিগমেনেৱ লদ্ধব্বত্তা ফলানং ৱিয, তস্মা ‘‘অট্ঠহি ঞাণেহী’’তি এত্থ নিক্খেপকণ্ডে আগতনযেন দুক্খাদিঞাণানং পুব্বন্তাদিঞাণানঞ্চ ৱসেন ‘‘অট্ঠহি ঞাণেহী’’তি যুত্তং ৱিয দিস্সতি.

অনুপুব্বাভিসমযকথাৱণ্ণনা নিট্ঠিতা.