৭. চিত্তট্ঠিতিকথাৱণ্ণনা

৩৩৫. এৱন্তি ‘‘একচিত্তং যাৱতাযুকং তিট্ঠতী’’তি ৱুত্তাকাৰেন. অঞ্ঞত্থাতি অৰূপভৱতো অঞ্ঞস্মিং. এতেনাতি ‘‘একমেৱ চিত্তং আৰুপ্পে তিট্ঠতি, যাৱতাযুকং তিট্ঠতী’’তি এৱংৱাদিনা দুতিযাপি অড্ঢকথা পস্সিতব্বা পঠমকথায চিৰকালাৱট্ঠানৱচনস্স অঞ্ঞদত্থু ভাৱৱিভাৱনতোতি অধিপ্পাযো. পুৰিমাযাতি ‘‘যাৱতাযুকং তিট্ঠতী’’তি পঞ্হতো পুৰিমায. তত্থ হি ‘‘ৱস্সসতং তিট্ঠতী’’তি পুচ্ছায ‘‘আমন্তা’’তি অনুঞ্ঞা কতা, পচ্ছিমাযং পন ‘‘মনুস্সানং একং চিত্তং যাৱতাযুকং তিট্ঠতী’’তি ‘‘ন হেৱং ৱত্তব্বে’’তি পটিক্খেপো কতো. অৱিৰোধো ৱিভাৱেতব্বো, যতো তত্থেৱ অনুঞ্ঞা কতা, ন পচ্ছাতি অধিপ্পাযো. ৱস্সসতাদীতি চ আদি-সদ্দেন ন কেৱলং ‘‘দ্ৱে ৱস্সসতানী’’তি এৱমাদিযেৱ সঙ্গহিতং, অথ খো ‘‘একং চিত্তং দিৱসং তিট্ঠতী’’তি এৱমাদিপীতি দট্ঠব্বং. ‘‘মুহুত্তং মুহুত্তং উপ্পজ্জতীতি পঞ্হো সকৱাদিনা পুচ্ছিতো ৱিয ৱুত্তো’’তি ইদং ৱিচাৰেতব্বং. ‘‘মুহুত্তং মুহুত্তং উপ্পজ্জতী’’তি পঞ্হো পৰৱাদিস্স. ‘‘উপ্পাদৱযধম্মিনো’’তিআদিসুত্তত্থৱসেন পটিঞ্ঞা সকৱাদিস্সাতি হি ৱুত্তং.

চিত্তট্ঠিতিকথাৱণ্ণনা নিট্ঠিতা.