৯. ধম্মট্ঠিততাকথাৱণ্ণনা

৬২৭. অৱিজ্জায যা ঠিততাতি অৱিজ্জায সঙ্খাৰানং অনন্তৰপচ্চযভাৱে যা নিযততা ধম্মনিযামতাসঙ্খাতা, যা ঠিতসভাৱতা নিপ্ফন্না, ন ধম্মমত্ততাট্ঠিততায নিপ্ফন্নায ৱসেন, অনন্তৰপচ্চযভাৱসঙ্খাতা ঠিততা পচ্চযতা হোতীতি অত্থো. অঞ্ঞমঞ্ঞপচ্চযভাৱৰহিতস্সাতি ইদং সহজাতনিস্সযাদিপচ্চযানং পটিক্খেপপদং দট্ঠব্বং, ন অঞ্ঞমঞ্ঞপচ্চযতামত্তস্স. সব্বো তাদিসোতি ইমিনা সমনন্তৰঅনন্তৰূপনিস্সযনত্থিৱিগতাসেৱনাদিকং সঙ্গণ্হাতি. অঞ্ঞমঞ্ঞপচ্চযতঞ্চাতি এত্থাপি ৱুত্তনযেন অত্থো ৱেদিতব্বো. এত্থ পন পচ্চযুপ্পন্নস্সপি পচ্চযভাৱতো সঙ্খাৰানম্পি ৱসেন যোজেতব্বং. তেনাহ ‘‘তস্সা চ ইতৰা’’তি.

ধম্মট্ঠিততাকথাৱণ্ণনা নিট্ঠিতা.