১০. অনিচ্চতাকথাৱণ্ণনা

৬২৮. ৰূপাদীনং অনিচ্চতা ৰূপাদিকে সতি হোতি, অসতি ন হোতীতি ইমিনা পৰিযাযেন তস্সা তেহি সহ উপ্পাদনিৰোধো ৱুত্তো, উপ্পাদাদীসু তীসু লক্খণেসু অনিচ্চতাৱোহাৰো হোতীতি যথা তযো দণ্ডে উপাদায পৱত্তো তিদণ্ডৱোহাৰো তেসু সব্বেসু হোতি, এৱং জাতিজৰামৰণধম্মো ন নিচ্চো অনিচ্চো, তস্স জাতিআদিপকতিতা অনিচ্চতাসদ্দেন ৱুচ্চতীতি উপ্পাদাদীসু লক্খণেসু অনিচ্চতাৱোহাৰো সম্ভৱতীতি ৱুত্তং ‘‘তীসু…পে… হোতী’’তি. ৱিভাগানুযুঞ্জনৱসেনাতি পভেদানুযুঞ্জনৱসেন. তত্থ যথা জৰাভঙ্গৱসেন অনিচ্চতা পাকটা হোতি, ন তথা জাতিৱসেনাতি পাড়িযং জৰামৰণৱসেনেৱ অনিচ্চতাৱিভাগো দস্সিতোতি দট্ঠব্বং.

অনিচ্চতাকথাৱণ্ণনা নিট্ঠিতা.

একাদসমৱগ্গৱণ্ণনা নিট্ঠিতা.