ৰূপৱিভত্তি

এককনিদ্দেসৱণ্ণনা

৫৯৪. পথৱীআদীনং ধম্মানং ৰুপ্পনসভাৱো ৱিয ন হেতুআদিভাৱোপি সাধাৰণোতি ন হেতূসু ৱিভজিতব্বোতি ৱুত্তং ‘‘অৱিজ্জমানৱিভাগস্সা’’তি. তস্স পন ৱিভাগাভাৱদস্সনসৰূপদস্সনমেৱ নিদ্দেসো. এৱঞ্চ কত্ৱা নিব্বানস্সপি ৱিভাগৰহিতত্তা ‘‘অসঙ্খতা ধাতূ’’তি এত্তকমেৱ নিদ্দেসৱসেন ৱুত্তং.

যদিপি হিনোতি এতেন পতিট্ঠাতি কুসলাদিকো ধম্মোতি অলোভাদযো কেৱলং হেতুপদৱচনীযা, কাৰণভাৱসামঞ্ঞতো পন মহাভূতাদযোপি হেতু-সদ্দাভিধেয্যাতি মূলট্ঠৱাচিনা দুতিযেন হেতু-সদ্দেন ৱিসেসেত্ৱা আহ ‘‘হেতুহেতূ’’তি. সুপ্পতিট্ঠিতভাৱসাধনতো কুসলাদিধম্মানং মূলত্থেন উপকাৰকধম্মা ‘‘তযো কুসলহেতূ’’তিআদিনা (ধ. স. ১০৫৯-১০৬০) পট্ঠানে চ তেযেৱ ‘‘হেতুপচ্চযো’’তি ৱুত্তাতি আহ ‘‘মূলহেতু পচ্চযহেতূতি ৱা অযমত্থো’’তি. হিনোতি এতেন, এতস্মা ৱা ফলং পৱত্ততীতি হেতু, পটিচ্চ এতস্মা এতি পৱত্ততীতি পচ্চযোতি এৱং হেতুপচ্চয-সদ্দানং অনানত্থতং সন্ধায হেতুসদ্দপৰিযাযভাৱেন পচ্চয-সদ্দো ৱুত্তোতি আহ ‘‘হেতুপচ্চযসদ্দানং সমানত্থত্তা’’তি. ভূতত্তযনিস্সিতানি চ মহাভূতানি চতুমহাভূতনিস্সিতং উপাদাৰূপন্তি সব্বম্পি ৰূপং সব্বদা সব্বত্থ সব্বাকাৰং চতুমহাভূতহেতুকং মহাভূতানি চ অনামট্ঠভেদানি সামঞ্ঞতো গহিতানীতি ৱুত্তং ‘‘ৰূপক্খন্ধস্স হেতূ’’তি.

কম্মসমাদানানন্তি সমাদানানং কম্মানং, সমাদিযিত্ৱা কতকম্মানং ৱা. অঞ্ঞেসু পচ্চযেসু ৱিপাকস্স তণ্হাৱিজ্জাদীসু.

‘‘অট্ঠানমেতং, ভিক্খৱে, অনৱকাসো, যং কাযদুচ্চৰিতস্স ইট্ঠো কন্তো মনাপো ৱিপাকো নিব্বত্তেয্য, নেতং ঠানং ৱিজ্জতি. ঠানঞ্চ খো এতং, ভিক্খৱে, ৱিজ্জতি, যং কাযদুচ্চৰিতস্স অনিট্ঠো অকন্তো অমনাপো ৱিপাকো নিব্বত্তেয্য. ঠানমেতং ৱিজ্জতি. ৱচী…পে… মনো…পে… ৱিজ্জতি…পে… অট্ঠানমেতং, ভিক্খৱে, অনৱকাসো, যং কাযসুচৰিতস্স অনিট্ঠো অকন্তো অমনাপো ৱিপাকো নিব্বত্তেয্যা’’তি (ম. নি. ৩.১৩১; ৱিভ. ৮০৯),

‘‘কম্মং সত্তে ৱিভজতি, যদিদং হীনপণীততাযা’’তি (ম. নি. ৩.২৮৯) – এৱমাদিৱচনতো কম্মং ৱিপাকস্স ইট্ঠানিট্ঠতং নিযমেতীতি আহ ‘‘ইট্ঠানিট্ঠৱিপাকনিযামকত্তা’’তি. গতিউপধিকালপযোগসম্পত্তিৱিপত্তিযোযেৱ ঠানং ৱিপাকস্স ওকাসভাৱতো. ন হি তেহি ৱিনা কোচি ৱিপাকো নিব্বত্ততীতি. যথাৱুত্তট্ঠানে সতি অধিগন্তব্বং ইট্ঠানিট্ঠাৰম্মণং ‘‘গতি…পে… নিপ্ফাদিত’’ন্তি ৱুত্তং. ৱিপাকস্স আৰম্মণেন ৱিনা অভাৱতো আৰম্মণম্পি তস্স পধানং কাৰণং. অনঞ্ঞসভাৱতোতি হেতুআদিসভাৱাভাৱতো.

ৰুপ্পনং ৰূপং. তং অস্স অত্থীতি এত্থ ‘‘অস্সা’’তি ৱুচ্চমানো পথৱীআদিঅত্থোযেৱ ৰুপ্পতীতিপি ৱুচ্চতীতি আহ ‘‘ৰুপ্পনলক্খণযুত্তস্সেৱ ৰূপীৰূপভাৱতো’’তি. এতং সভাৱন্তি এতং উপ্পন্নভাৱে সতি ছহি ৱিঞ্ঞাণেহি ৱিঞ্ঞেয্যসভাৱং ৰূপে নিযমেতি ৰূপস্সেৱ তংসভাৱত্তা. ন ৰূপং এতস্মিন্তি কালভেদৱসেন অতংসভাৱস্সপি ৰূপস্স অত্থিতায ন ৰূপং তত্থ নিযন্তব্বন্তি দস্সেতি. অত্থি হীতিআদিনা তত্থ ৰূপস্সেৱ নিযন্তব্বতাভাৱংযেৱ ৱিৱৰতি. এতমেৱাতিআদিনা উদ্দেসেন নিদ্দেসং সংসন্দেতি. এত্থ এতমেৱ ৰূপে যথাৱুত্তসভাৱং নিযমেতব্বং নিদ্দেসে এৱ-সদ্দেন নিযমেতি অৱধাৰেতীতি অত্থো. যথাৱুত্তো নিযমোতি উপ্পন্নভাৱে সতি ছহি ৱিঞ্ঞাণেহি ৱিঞ্ঞেয্যভাৱো নিযন্তব্বতায ‘‘নিযমো’’তি ৱুত্তো, সো ৰূপে অত্থি এৱ ৰূপস্সেৱ তংসভাৱত্তা. ৱিসিট্ঠকালস্স ৱুত্তপ্পকাৰং অৱধাৰণংযেৱ ৱা যথাৱুত্তো নিযমো, সো ৰূপে অত্থিযেৱ সম্ভৱতিযেৱ, ন অৰূপে ৱিয ন সম্ভৱতীতি অত্থো দট্ঠব্বো. কালভেদন্তি কালৱিসেসং. অনামসিত্ৱাতি অগ্গহেত্ৱা. তং সব্বন্তি অনামট্ঠকালভেদং ততোযেৱ অৰূপেহি সমানৱিঞ্ঞেয্যসভাৱং সব্বং ৰূপং. উপ্পন্নন্তি এতেন কালভেদামসনেন ৱিসেসেতি ‘‘উপ্পন্নং…পে… মেৱা’’তি.

ৱত্তমানকালিকং সব্বং ৰূপং দিট্ঠসুতমুতৱিঞ্ঞাতসভাৱং, তং যথাসকং ছহি ৱিঞ্ঞাণেহি ৱিঞ্ঞেয্যসভাৱমেৱ, ন তেহি অৱিঞ্ঞেয্যং. নাপি উপ্পন্নমেৱ ছহি ৱিঞ্ঞাণেহি ৱিঞ্ঞেয্যসভাৱং একন্তলক্খণনিযমাভাৱাপত্তিতোতি এৱং অৱিপৰীতে অত্থে ৱিভাৱিতেপি চোদকো অধিপ্পাযং অজানন্তো ‘‘ননু এৱ’’ন্তিআদিনা সব্বস্স সব্বাৰম্মণতাপত্তিং চোদেতি. ইতৰো ‘‘ৰূপং সব্বং সম্পিণ্ডেত্ৱা’’তিআদিনা অত্তনো অধিপ্পাযং ৱিভাৱেতি. এত্থ একীভাৱেন গহেত্ৱাতি ইদং ‘‘সম্পিণ্ডেত্ৱা’’তি এতস্স অত্থৱচনং. একন্তলক্খণং ছহি ৱিঞ্ঞাণেহি ৱিঞ্ঞেয্যসভাৱোযেৱ. ইদং ৱুত্তং হোতি – কিঞ্চাপি পঞ্চন্নং ৱিঞ্ঞাণানং ৱিসযন্তৰে অপ্পৱত্তনতো ন সব্বস্স সব্বাৰম্মণতা, সব্বস্সপি পন ৰূপস্স ছৱিঞ্ঞাণাৰম্মণভাৱতো যথাসকং ছহি ৱিঞ্ঞাণেহি ৱিঞ্ঞেয্যতায ছহি ৱিঞ্ঞাণেহি ৱিঞ্ঞেয্যতাৱ অত্থি, তং একতো সঙ্গহণৱসেন গহেত্ৱা ‘‘উপ্পন্নং সব্বং ৰূপং ছহি ৱিঞ্ঞাণেহি ৱিঞ্ঞেয্য’’ন্তি ৱুত্তং যথা ‘‘অভিঞ্ঞাপ্পত্তং পঞ্চমজ্ঝানং ছড়াৰম্মণং হোতী’’তি. যথা হি দিব্বচক্খুদিব্বসোতাদিঅভিঞ্ঞাপ্পত্তস্স পঞ্চমজ্ঝানস্স ৱিসুং অসব্বাৰম্মণত্তেপি একন্তলক্খণৱসেন একীভাৱেন গহেত্ৱা আৰম্মণৱসেন পঠমজ্ঝানাদিতো ৱিসেসং দস্সেতুং ‘‘অভিঞ্ঞাপ্পত্তং পঞ্চমজ্ঝানং ছড়াৰম্মণং হোতী’’তি ৱুচ্চতি, এৱং অৰূপতো ৰূপস্স ৱিসযৱসেন ৱিসেসং দস্সেতুং ‘‘উপ্প …পে… ৱিঞ্ঞেয্য’’ন্তি ৱুত্তন্তি. ছহি ৱিঞ্ঞাণেহি ৱিঞ্ঞেয্যভাৱো ৰূপে নিযমেতব্বো, ন পন ৰূপং তস্মিং নিযমেতব্বং, অনিযতদেসো চ এৱ-সদ্দোতি অট্ঠকথাযং (ধ. স. অট্ট. ৫৯৪) ‘‘পচ্চুপ্পন্নৰূপমেৱ চক্খুৱিঞ্ঞাণাদীহি ছহি ৱেদিতব্ব’’ন্তি ৱুত্তং. ‘‘পচ্চুপ্পন্নৰূপমেৱা’’তিআদিনা তত্থ দোসমাহ. তস্মাতি যস্মা পাড়িযং ৱিঞ্ঞেয্যমেৱাতি এৱ-সদ্দো ৱুত্তো, ন চ তস্স অট্ঠানযোজনেন কাচি ইট্ঠসিদ্ধি, অথ খো অনিট্ঠসিদ্ধিযেৱ সব্বৰূপস্স একন্তলক্খণনিযমাদস্সনতো, তস্মা. যথাৰুতৱসেনেৱ নিযমে গয্হমানে উপ্প…পে… পত্তি নত্থি, ততো চ সোতপতিততাযপি পযোজনং নত্থীতি. ৱুত্তনযেনাতি ‘‘অৰূপতো ৱিধুৰ’’ন্তিআদিনা ৱুত্তনযেন.

ঞাণস্স ৱা উত্তৰস্স পুৰিমঞাণং ৱত্থুকাৰণন্তি ঞাণৱত্থু. ‘‘সজাতী’’তি এত্থ স-কাৰো সমানসদ্দত্থোতি দস্সেতুং ‘‘সমানজাতিকান’’ন্তি ৱুত্তং. সমানজাতিতা চ সম্মাৱাচাদীনং সীলনত্থো এৱ. এতেন সমানসভাৱতা সজাতিসঙ্গহোতি ৱেদিতব্বো. আৰম্মণে চেতসো অৱিক্খেপপ্পৱত্তিযা উপট্ঠানুস্সাহনানি ৱিয তেসং অৱিক্খেপোপি অতিসযেন উপকাৰকোতি ‘‘অঞ্ঞমঞ্ঞোপকাৰৱসেনা’’তি ৱুত্তং. তেনেৱ ৱিজ্জমানেসুপি অঞ্ঞেসু সহজাতধম্মেসু এতেসংযেৱ সমাধিক্খন্ধসঙ্গহো দস্সিতো. যং পন সচ্চৱিভঙ্গৱণ্ণনাযং (ৱিভ. অট্ঠ. ১৮৯) ৱিসুদ্ধিমগ্গাদীসু (ৱিসুদ্ধি. ২.৫৬৮) চ ‘‘ৱাযামসতিযো কিৰিযতো সঙ্গহিতা’’তি ৱুত্তং, তং অসমাধিসভাৱতং তেসং সমাধিস্স উপকাৰকত্তঞ্চ সন্ধায ৱুত্তং. তেনেৱ চ তত্থ ‘‘সমাধিযেৱেত্থ সজাতিতো সমাধিক্খন্ধেন সঙ্গহিতো’’তি (ৱিসুদ্ধি. ২.৫৬৮; ৱিভ. অট্ঠ. ১৮৯) ৱুত্তং. ইধ পন সজাতিসঙ্গহোতি সমাধিতদুপকাৰকধম্মানং উপ্পত্তিদেসৱসেন সঙ্গহো ৱুত্তোতি. অৱিৰাধেত্ৱা ৱিসযসভাৱাৱগ্গহণং পটিৱেধো, অপ্পনা চ আৰম্মণে দড়্হনিপাতো তদৱগাহোযেৱাতি ‘‘পটিৱেধসদিসং কিচ্চ’’ন্তি ৱুত্তং. অথ ৱা আৰম্মণপটিৱেধস্স তদাহননপৰিযাহননমনুগুণতায সমানন্তি পঞ্ঞাৱিতক্কানং কিচ্চসৰিক্খতা ৱুত্তা.

এককনিদ্দেসৱণ্ণনা নিট্ঠিতা.