পঠমগাথাসঙ্গণিকং

সত্তনগৰেসু পঞ্ঞত্তসিক্খাপদৱণ্ণনা

৩৩৫. অড্ঢুড্ঢসতানীতি তীণি সতানি পঞ্ঞাসঞ্চ সিক্খাপদানি. ৱিগ্গহন্তি মনুস্সৱিগ্গহং. অতিৰেকন্তি দসাহপৰমং অতিৰেকচীৱৰং. কাড়কন্তি ‘‘সুদ্ধকাড়কান’’ন্তি ৱুত্তকাড়কং. ভূতন্তি ভূতাৰোচনং. পৰম্পৰভত্তন্তি পৰম্পৰভোজনং. ভিক্খুনীসু চ অক্কোসোতি ‘‘যা পন ভিক্খুনী ভিক্খুং অক্কোসেয্য ৱা পৰিভাসেয্য ৱা’’তি (পাচি. ১০২৯) ৱুত্তসিক্খাপদং. অন্তৰৱাসকন্তি অঞ্ঞাতিকায ভিক্খুনিযা চীৱৰপটিগ্গণ্হনং. ৰূপিযন্তি ৰূপিযসংৱোহাৰং. সুত্তন্তি ‘‘সামং সুত্তং ৱিঞ্ঞাপেত্ৱা তন্তৱাযেহী’’তি (পাৰা. ৬৩৭) ৱুত্তসিক্খাপদং. উজ্ঝাপনকেতি উজ্ঝাপনকে খিয্যনকে পাচিত্তিযং. পাচিতপিণ্ডন্তি ভিক্খুনীপৰিপাচিতং. চীৱৰং দত্ৱাতি ‘‘সমগ্গেন সঙ্ঘেন চীৱৰং দত্ৱা’’তি (পাচি. ৪৮৫) ৱুত্তসিক্খাপদং. ৱোসাসন্তীতি ‘‘ভিক্খূ পনেৱ কুলেসু নিমন্তিতা ভুঞ্জন্তি, তত্ৰ চেসা ভিক্খুনী’’তি (পাচি. ৫৫৮) ৱুত্তপাটিদেসনীযং. গিৰগ্গন্তি ‘‘যা পন ভিক্খুনী নচ্চং ৱা গীতং ৱা’’তি (পাচি. ৮৩৪) ৱুত্তসিক্খাপদং. চৰিযাতি ‘‘অন্তোৱস্সং চাৰিকং চৰেয্যা’’তি (পাচি. ৯৭০) চ, ‘‘ৱস্সংৱুত্থা চাৰিকং ন পক্কমেয্যা’’তি (পাচি. ৯৭৪) চ ৱুত্তসিক্খাপদদ্ৱযং. ছন্দদানেনাতি পাৰিৱাসিকেন ছন্দদানেন.

পাৰাজিকানি চত্তাৰীতি ভিক্খুনীনং চত্তাৰি পাৰাজিকানি. কুটীতি কুটিকাৰসিক্খাপদং. কোসিযন্তি কোসিযমিস্সকসিক্খাপদং. সেয্যাতি অনুপসম্পন্নেন সহসেয্যসিক্খাপদং. খণনেতি পথৱীখণনং. গচ্ছ দেৱতেতি ভূতগামসিক্খাপদং. সিঞ্চন্তি সপ্পাণকউদকসিঞ্চনং. মহাৱিহাৰোতি মহল্লকৱিহাৰো. অঞ্ঞন্তি অঞ্ঞৱাদকং. দ্ৱাৰন্তি যাৱ দ্ৱাৰকোসা. সহধম্মোতি সহধম্মিকং ৱুচ্চমানো. পযোপানন্তি সুৰুসুৰুকাৰকং. এড়কলোমানীতি এড়কলোমধোৱাপনং. পত্তোতি ঊনপঞ্চবন্ধনপত্তো. ওৱাদোতি ভিক্খুনুপস্সযং উপসঙ্কমিত্ৱা ওৱাদো. ভেসজ্জন্তি তদুত্তৰিভেসজ্জৱিঞ্ঞাপনং. সূচীতি অট্ঠিমযাদিসূচিঘৰং. আৰঞ্ঞিকোতি ‘‘যানি খো পন তানি আৰঞ্ঞকানি সেনাসনানী’’তিআদিনা (পাচি. ৫৭০) ৱুত্তপাটিদেসনীযং. ওৱাদোতি ‘‘যা পন ভিক্খুনী ওৱাদায ৱা সংৱাসায ৱা ন গচ্ছেয্যা’’তি (পাচি. ১০৫৫) ৱুত্তসিক্খাপদং.

পাৰাজিকানি চত্তাৰীতিআদিনা ছসু নগৰেসু পঞ্ঞত্তং একতো সম্পিণ্ডিত্ৱা সাৱত্থিযা পঞ্ঞত্তং ৱিসুং গণেত্ৱা সব্বানেৱ সিক্খাপদানি দ্ৱীহি ৰাসীহি সঙ্গণ্হাতি.

সত্তনগৰেসু পঞ্ঞত্তসিক্খাপদৱণ্ণনা নিট্ঠিতা.

চতুৱিপত্তিৱণ্ণনা

৩৩৬. একতিংস গৰুকা নাম উভতো অট্ঠ পাৰাজিকা, ভিক্খূনং তেৰস, ভিক্খুনীনং দস সঙ্ঘাদিসেসা. অট্ঠেত্থ অনৱসেসাতি এতেসু যথাৱুত্তগৰুকেসু সাধাৰণাসাধাৰণৱসেন অট্ঠ পাৰাজিকা অনৱসেসা নাম.

অসাধাৰণাদিৱণ্ণনা

৩৩৮. ‘‘ধোৱনঞ্চ পটিগ্গহো’’তি গাথা অট্ঠকথাচৰিযানং. তত্থ ধোৱনঞ্চ পটিগ্গহোতি অঞ্ঞাতিকায ভিক্খুনিযা চীৱৰধোৱাপনং চীৱৰপটিগ্গহণঞ্চ. কোসেয্য…পে… দ্ৱে লোমাতি এড়কলোমৱগ্গে আদিতো সত্ত সিক্খাপদানি ৱুত্তানি. ৱস্সিকাতি ৱস্সিকসাটিকসিক্খাপদং. আৰঞ্ঞকেন চাতি সাসঙ্কসিক্খাপদং ৱুত্তং. পণীতন্তি পণীতভোজনৱিঞ্ঞত্তি. ঊনন্তি ঊনৱীসতিৱস্সসিক্খাপদং. নিসীদনে চ যা সিক্খা, ৱস্সিকা যা চ সাটিকাতি নিসীদনৱস্সিকসাটিকানং পমাণাতিক্কমো.

আপত্তিক্খন্ধা চেৱ উপোসথাদীনি চ ‘‘পাৰাজিকসঙ্ঘাদিসেসা’’তিআদিনা ৱিভত্তত্তা ‘‘ৱিভত্তিযো’’তি ৱুত্তানি. তেৱীসতি সঙ্ঘাদিসেসাতি ভিক্খুনীনং আগতানি দস, ভিক্খূনং তেৰসাতি তেৱীসতি. দ্ৱেচত্তালীস নিস্সগ্গিযাতিআদীসুপি এসেৱ নযো. দ্ৱীহি…পে… কিচ্চং একেন সম্মতীতি দ্ৱীহি ৱিৱাদাধিকৰণং, চতূহি অনুৱাদাধিকৰণং, তীহি আপত্তাধিকৰণং, একেন কিচ্চাধিকৰণং সম্মতীতি অত্থো.

৩৩৯. নিৰঙ্কতোতি সঙ্ঘম্হা অপসাৰিতো.