অধিকৰণভেদৱণ্ণনা

৩৪০. যস্মা অধিকৰণং উক্কোটেন্তো সমথপ্পত্তমেৱ উক্কোটেতি, তস্মা ‘‘ৱিৱাদাধিকৰণং উক্কোটেন্তো কতি সমথে উক্কোটেতী’’তিআদি ৱুত্তং.

৩৪১. পাড়িমুত্তকৱিনিচ্ছযেনেৱাতি ৱিনযলক্খণং ৱিনা কেৱলং ধম্মদেসনামত্তৱসেনেৱাতি অত্থো. যেনাপি ৱিনিচ্ছযেনাতি পাড়িমুত্তকৱিনিচ্ছযমেৱ সন্ধায ৱুত্তং. খন্ধকতো চ পৰিৱাৰতো চ সুত্তেনাতি খন্ধকপৰিৱাৰতো আনীতসুত্তেন. নিজ্ঝাপেন্তীতি পঞ্ঞাপেন্তি.

৩৪২. কিচ্চং নিস্সায উপ্পজ্জনককিচ্চানন্তি পুব্বে কতউক্খেপনীযাদিকিচ্চং নিস্সায উপ্পজ্জনককিচ্চানং. কীদিসানং? যাৱততিযসমনুভাসনাদীনং.

৩৪৩. তং হীতি তং ৱিৱাদাধিকৰণং.

৩৪৪. অধিকৰণেসু যেন অধিকৰণেন সম্মন্তি, তং দস্সেতুং ৱুত্তন্তি যদা অধিকৰণেহি সম্মন্তি, তদা কিচ্চাধিকৰণেনেৱ সম্মন্তি, ন অঞ্ঞেহি অধিকৰণেহীতি দস্সনত্থং ৱুত্তন্তি অধিপ্পাযো.

৩৫৩. ‘‘সত্তন্নং সমথানং কতমে ছত্তিংস সমুট্ঠানা’’তি পুচ্ছিত্ৱাপি ‘‘কম্মস্স কিৰিযা কৰণ’’ন্তিআদিনা সম্মুখাৱিনযস্স সমুট্ঠানানি অৱিভজিত্ৱাৱ সতিৱিনযাদীনং ছন্নঞ্ঞেৱ ছ সমুট্ঠানানি ৱিভত্তানি, তং কস্মাতি আহ ‘‘কিঞ্চাপি সত্তন্নং সমথান’’ন্তিআদি. সতিৱিনযাদীনং ৱিয সঙ্ঘসম্মুখতাদীনং কিচ্চযতা নাম নত্থীতি আহ ‘‘কম্মসঙ্গহাভাৱেনা’’তি.