উপোসথাদিপুচ্ছাৱিস্সজ্জনাৱণ্ণনা

৩৩২. ‘‘সঙ্ঘং, ভন্তে, পৱাৰেমীতিআদি পৱাৰণাকথা নামা’’তি গণ্ঠিপদেসু ৱুত্তং.

অত্থৱসপকৰণৱণ্ণনা

৩৩৪. পঠমপাৰাজিকৱণ্ণনাযমেৱ ৱুত্তন্তি ‘‘সঙ্ঘসুট্ঠুতাযা’’তিআদীনং অত্থৱণ্ণনং সন্ধায ৱুত্তং. দসক্খত্তুং যোজনায পদসতং ৱুত্তন্তি একমূলকনযে দসক্খত্তুং যোজনায কতায সঙ্খলিকনযে ৱুত্তপদেহি সদ্ধিং পদসতং ৱুত্তন্তি এৱমত্থো গহেতব্বো. অঞ্ঞথা একমূলকে এৱ নযে ন সক্কা পদসতং লদ্ধুং. একমূলকনযেহি পুৰিমপচ্ছিমপদানি একতো কত্ৱা একেকস্মিং ৱাৰে নৱ নৱ পদানি ৱুত্তানীতি দসক্খত্তুং যোজনায নৱুতি পদানিযেৱ লব্ভন্তি. তস্মা তানি নৱুতি পদানি সঙ্খলিকনযে বদ্ধচক্কৱসেন যোজিতে দস পদানি লব্ভন্তীতি তেহি সদ্ধিং পদসতন্তি সক্কা ৱত্তুং. ইতো অঞ্ঞথা পন উভোসুপি নযেসু ৱিসুং ৱিসুং অত্থসতং ধম্মসতঞ্চ যথা লব্ভতি, তথা পঠমপাৰাজিকসংৱণ্ণনাযমেৱ অম্হেহি দস্সিতং, তং তত্থ ৱুত্তনযেনেৱ গহেতব্বং. পুৰিমপচ্ছিমপদানি একত্তেন গহেত্ৱা ‘‘পদসত’’ন্তি ৱুত্তত্তা ‘‘তত্থ পচ্ছিমস্স পচ্ছিমস্স পদস্স ৱসেন অত্থসতং, পুৰিমস্স পুৰিমস্স ৱসেন ধম্মসত’’ন্তি ৱুত্তং. তস্মিং পদসতে ‘‘সঙ্ঘসুট্ঠূ’’তিআদিনা ৱুত্তপুৰিমপদানং ৱসেন ধম্মসতং, ‘‘সঙ্ঘফাসূ’’তিআদিনা ৱুত্তপচ্ছিমপদানং ৱসেন অত্থসতন্তি অধিপ্পাযো.

মহাৱগ্গৱণ্ণনা নিট্ঠিতা.