৩. খম্ভকতৱগ্গৱণ্ণনা

৬০৩. ততিযৱগ্গে পত্তে সঞ্ঞা পত্তসঞ্ঞা, সা অস্স অত্থীতি পত্তসঞ্ঞী, অত্তনো ভাজনে উপনিবন্ধসঞ্ঞী হুত্ৱাতি অত্থো. ব্যঞ্জনং পন অনাদিযিত্ৱা অত্থমত্তমেৱ দস্সেতুং ‘‘পত্তে সঞ্ঞং কত্ৱা’’তি ৱুত্তং.

৬০৪. ওলোণীতি একা ব্যঞ্জনৱিকতি. ‘‘যো কোচি সুদ্ধো কঞ্জিকতক্কাদিৰসও’’তি কেচি. সাকসূপেয্য-গ্গহণেন যা কাচি সূপেয্যসাকেহি কতা ব্যঞ্জনৱিকতি ৱুত্তা. মংসৰসাদীনীতি আদি-সদ্দেন অৱসেসা সব্বাপি ব্যঞ্জনৱিকতি সঙ্গহিতাতি দট্ঠব্বং. তেনেৱ মাতিকাট্ঠকথাযং (কঙ্খা. অট্ঠ. সমসূপকপটিগ্গহণসিক্খাপদৱণ্ণনা) ৱুত্তং ‘‘ঠপেত্ৱা পন সূপং অৱসেসা সব্বাপি সূপেয্যা ব্যঞ্জনৱিকতি ৰসৰসো নাম হোতী’’তি.

৬০৫. সমপুণ্ণন্তি অধিট্ঠানুপগস্স পত্তস্স অন্তোমুখৱট্টিলেখং অনতিক্কামেত্ৱা ৰচিতং. সমভৰিতন্তি তস্সেৱ ৱেৱচনং. ফলাফলাদীতি আদি-সদ্দেন ওদনাদিম্পি সঙ্গণ্হাতি. হেট্ঠা ওৰোহতীতি সমন্তা ওকাসসব্ভাৱতো চালিযমানং হেট্ঠা ভস্সতি. মত্থকে থূপীকতং পূৱমেৱ ৱটংসকসদিসত্তা ‘‘পূৱৱটংসক’’ন্তি ৱুত্তং. পুপ্ফৱটংসকাদীসুপি এসেৱ নযো.

যস্মা ‘‘সমতিত্তিকো পিণ্ডপাতো পটিগ্গহেতব্বো’’তি ৱচনং পিণ্ডপাতো সম্পুণ্ণো পটিগ্গহেতব্বোতি দীপেতি, তস্মা অত্তনো হত্থগতে পত্তে পিণ্ডপাতো দিয্যমানো থূপীকতোপি চে হোতি, ৱট্টতীতি দীপেতি. ‘‘থূপীকতং পিণ্ডপাতং পটিগ্গণ্হাতি, আপত্তি দুক্কটস্সা’’তি হি ৱচনং পঠমং থূপীকতং পিণ্ডপাতং পচ্ছা পটিগ্গণ্হতো আপত্তীতি দীপেতি. ‘‘পত্তে পটিগ্গণ্হতো চ থূপীকতং হোতি, ৱট্টতি অথূপীকতস্স পটিগ্গহিতত্তা, পযোগো পন নত্থি অঞ্ঞত্ৰ পুব্বদেসা’’তি কেনচি ৱুত্তং, তং ন সাৰতো পচ্চেতব্বং. ‘‘ন থূপীকতং পিণ্ডপাতং পটিগ্গণ্হাতী’’তি ৱচনং পঠমং থূপীকতস্সেৱ পচ্ছা পটিগ্গণ্হনং দীপেতি. ন হি হত্থগতেপি পত্তে দিয্যমানং থূপীকতং গণ্হন্তো থূপীকতং পিণ্ডপাতং পটিগ্গণ্হন্তো নাম ন হোতি, ন চ তেন সমতিত্তিকো পিণ্ডপাতো পটিগ্গহিতোতি সক্কা ৱিঞ্ঞাতুং. ‘‘থূপীকত’’ন্তি চ ভাৱনপুংসকনিদ্দেসে গয্হমানে অযমত্থো সুট্ঠুতৰং পাকটোযেৱাতি.

খম্ভকতৱগ্গৱণ্ণনা নিট্ঠিতা.