৪. সক্কচ্চৱগ্গৱণ্ণনা

৬০৮. চতুত্থৱগ্গে সপদানন্তি এত্থ দানং ৱুচ্চতি অৱখণ্ডনং, অপেতং দানতো অপদানং, অনৱখণ্ডনন্তি অত্থো. সহ অপদানেন সপদানং, অৱখণ্ডনৱিৰহিতং, অনুপটিপাটিযাতি ৱুত্তং হোতি. তেনাহ ‘‘তত্থ তত্থ ওধিং অকত্ৱা অনুপটিপাটিযা’’তি.

৬১১. যস্মিং সমযে ‘‘পাণো ন হন্তব্বো’’তি ৰাজানো ভেৰিং চৰাপেন্তি, অযং মাঘাতসমযো নাম. ইধ অনাপত্তিযং গিলানো ন আগতো, তস্মা গিলানস্সপি আপত্তি. সূপোদনৱিঞ্ঞত্তিসিক্খাপদে অসঞ্চিচ্চ অস্সতিযাতি এত্থ ‘‘মুখে পক্খিপিত্ৱা পুন ৱিপ্পটিসাৰী হুত্ৱা ছড্ডেন্তস্স অৰুচিযা পৱিসন্তে ‘অসঞ্চিচ্চা’তি ৱুচ্চতি, ৱিঞ্ঞত্তিম্পি অৱিঞ্ঞত্তিম্পি এতস্মিং ঠানে ঠিতং সহসা গহেত্ৱা ভুঞ্জন্তে ‘অস্সতিযা’তি ৱুচ্চতী’’তি তীসুপি গণ্ঠিপদেসু ৱুত্তং.

৬১৪-৬১৫. উজ্ঝানে সঞ্ঞা উজ্ঝানসঞ্ঞা, সা অস্স অত্থীতি উজ্ঝানসঞ্ঞী. ‘‘মযূৰণ্ডং অতিমহন্ত’’ন্তি ৱচনতো মযূৰণ্ডপ্পমাণো কবড়ো ন ৱট্টতি. কেচি পন ‘‘মযূৰণ্ডতো মহন্তো ন ৱট্টতী’’তি ৱদন্তি, তং ন গহেতব্বং, ‘‘নাতিমহন্ত’’ন্তি চ অতিমহন্তস্সেৱ পটিক্খিত্তত্তা খুদ্দকে আপত্তি ন দিস্সতি. ‘‘মযূৰণ্ডং অতিমহন্তং, কুক্কুটণ্ডং অতিখুদ্দকং, তেসং ৱেমজ্ঝপ্পমাণো’’তি ইমিনা পন সাৰুপ্পৱসেন খুদ্দকম্পি পটিক্খিপিত্ৱা পৰিচ্ছেদো ন দস্সিতোতি ৱেদিতব্বং.

সক্কচ্চৱগ্গৱণ্ণনা নিট্ঠিতা.