৫. অচেলকৱগ্গো

১. অচেলকসিক্খাপদৱণ্ণনা

২৭৩. অচেলকৱগ্গস্স পঠমসিক্খাপদে তেসন্তি তিত্থিযানং. তত্থাতি ভাজনে. ইতোতি পত্ততো. সচে তিত্থিযো ৱদতীতি ‘‘পঠমমেৱ মং সন্ধায অভিহৰিত্ৱা ঠপিতং ময্হং সন্তকং হোতি, ইমস্মিং ভাজনে আকিৰথা’’তি ৱদতি, ৱট্টতি. সেসমেত্থ উত্তানমেৱ. অঞ্ঞতিত্থিযতা, অজ্ঝোহৰণীযতা, অজ্ঝোহৰণত্থায সহত্থা অনিক্খিত্তভাজনে দানন্তি ইমানি পনেত্থ তীণি অঙ্গানি.

অচেলকসিক্খাপদৱণ্ণনা নিট্ঠিতা.

২. উয্যোজনসিক্খাপদৱণ্ণনা

২৭৪. দুতিযং উত্তানত্থমেৱ. অনাচাৰং আচৰিতুকামতা, তদত্থমেৱ উপসম্পন্নস্স উয্যোজনা, এৱং উয্যোজেন্তস্স উপচাৰাতিক্কমোতি ইমানি পনেত্থ তীণি অঙ্গানি.

উয্যোজনসিক্খাপদৱণ্ণনা নিট্ঠিতা.

৩. সভোজনসিক্খাপদৱণ্ণনা

২৮০. ততিযে পিট্ঠসঙ্ঘাটোতি দ্ৱাৰবাহাযেতং অধিৱচনং. খুদ্দকং নাম সযনিঘৰং ৱিত্থাৰতো পঞ্চহত্থপ্পমাণং হোতি, তস্স চ মজ্ঝিমট্ঠানং পিট্ঠসঙ্ঘাটতো অড্ঢতেয্যহত্থপ্পমাণমেৱ হোতি, তস্মা তাদিসে সযনিঘৰে পিট্ঠসঙ্ঘাটতো হত্থপাসং ৱিজহিত্ৱা নিসিন্নো পিট্ঠিৱংসং অতিক্কমিত্ৱা নিসিন্নো নাম হোতি. এৱং নিসিন্নো চ মজ্ঝং অতিক্কমিত্ৱা নিসিন্নো নাম হোতীতি আহ ‘‘ইমিনা মজ্ঝাতিক্কমং দস্সেতী’’তি. যথা ৱা তথা ৱা কতস্সাতি পিট্ঠিৱংসং আৰোপেত্ৱা ৱা অনাৰোপেত্ৱা ৱা কতস্স. সচিত্তকন্তি অনুপৱিসিত্ৱা নিসীদনচিত্তেন সচিত্তকং. সেসমেত্থ উত্তানমেৱ. পৰিযুট্ঠিতৰাগজাযম্পতিকানং সন্নিহিততা, সযনিঘৰতা, দুতিযস্স ভিক্খুনো অভাৱো, অনুপখজ্জ নিসীদনন্তি ইমানি পনেত্থ চত্তাৰি অঙ্গানি.

সভোজনসিক্খাপদৱণ্ণনা নিট্ঠিতা.

২৮৪-২৮৯. চতুত্থপঞ্চমেসু নত্থি কিঞ্চি ৱত্তব্বং.

৬. চাৰিত্তসিক্খাপদৱণ্ণনা

২৯৮. ছট্ঠে পকতিৱচনেনাতি এত্থ যং দ্ৱাদসহত্থব্ভন্তৰে ঠিতেন সোতুং সক্কা ভৱেয্য, তং পকতিৱচনং নাম. আপুচ্ছিতব্বোতি ‘‘অহং ইত্থন্নামস্স ঘৰং গচ্ছামী’’তি ৱা ‘‘চাৰিত্তং আপজ্জামী’’তি ৱা ঈদিসেন ৱচনেন আপুচ্ছিতব্বো. সেসমেত্থ উত্তানমেৱ. পঞ্চন্নং ভোজনানং অঞ্ঞতৰেন নিমন্তনসাদিযনং, সন্তং ভিক্খুং অনাপুচ্ছনা, ভত্তিযঘৰতো অঞ্ঞঘৰপ্পৱেসনং, মজ্ঝন্হিকানতিক্কমো, সমযস্স ৱা আপদানং ৱা অভাৱোতি ইমানি পনেত্থ পঞ্চ অঙ্গানি.

চাৰিত্তসিক্খাপদৱণ্ণনা নিট্ঠিতা.

৭. মহানামসিক্খাপদৱণ্ণনা

৩০৩. সত্তমে মহানামো নামাতি অনুৰুদ্ধত্থেৰস্স ভাতা ভগৱতো চূড়পিতু পুত্তো. সুদ্ধোদনো সক্কোদনো সুক্কোদনো ধোতোদনো অমিতোদনোতি ইমে হি পঞ্চ জনা ভাতৰো. অমিতা নাম দেৱী তেসং ভগিনী, তিস্সত্থেৰো তস্সা পুত্তো. তথাগতো চ নন্দত্থেৰো চ সুদ্ধোদনস্স পুত্তা, মহানামো চ অনুৰুদ্ধত্থেৰো চ সুক্কোদনস্স, আনন্দত্থেৰো অমিতোদনস্স. সো ভগৱতো কনিট্ঠো, মহানামো মহল্লকতৰো সকদাগামী অৰিযসাৱকো. তেন ৱুত্তং ‘‘মহানামো নাম…পে… অৰিযসাৱকো’’তি.

৩০৫-৩০৬. পাড়িযং অজ্জণ্হোতি অজ্জ একদিৱসন্তি অত্থো, ‘‘অজ্জনো’’তি ৱা অত্থো গহেতব্বো, নো অম্হাকং. কালং আহৰিস্সথাতি স্ৱে হৰিস্সথ. ততো চে উত্তৰি সাদিযেয্যাতি সচে তত্থ ৰত্তীহি ৱা ভেসজ্জেহি ৱা পৰিচ্ছেদো কতো হোতি ‘‘এত্তকাযেৱ ৱা ৰত্তিযো এত্তকানি ৱা ভেসজ্জানি ৱিঞ্ঞাপেতব্বানী’’তি, ততো ৰত্তিপৰিযন্ততো ৱা ভেসজ্জপৰিযন্ততো ৱা উত্তৰি ৱিঞ্ঞাপেন্তো সাদিযেয্য. ‘‘ইমেহি তযা ভেসজ্জেহি পৱাৰিতম্হ, অম্হাকঞ্চ ইমিনাৱ ভেসজ্জেন অত্থো’’তি আচিক্খিত্ৱা ৱিঞ্ঞাপেতুম্পি গিলানোৱ লভতি.

৩১০. যস্মা সঙ্ঘপৱাৰণাযমেৱাযং ৱিধি, তস্মা ‘‘যে অত্তনো পুগ্গলিকায পৱাৰণায পৱাৰিতা’’তি ৱুত্তং. সেসং উত্তানমেৱ. সঙ্ঘপৱাৰণতা, ভেসজ্জৱিঞ্ঞত্তি, অগিলানতা, পৰিযন্তাতিক্কমোতি ইমানি পনেত্থ চত্তাৰি অঙ্গানি.

মহানামসিক্খাপদৱণ্ণনা নিট্ঠিতা.

৮. উয্যুত্তসেনাসিক্খাপদৱণ্ণনা

৩১১. অট্ঠমং উত্তানত্থমেৱ. উয্যুত্তসেনা, দস্সনত্থায গমনং, অনুঞ্ঞাতোকাসতো অঞ্ঞত্ৰ দস্সনং, তথাৰূপপচ্চযস্স আপদায ৱা অভাৱোতি ইমানি পনেত্থ চত্তাৰি অঙ্গানি.

উয্যুত্তসেনাসিক্খাপদৱণ্ণনা নিট্ঠিতা.

৯. সেনাৱাসসিক্খাপদৱণ্ণনা

৩১৭. নৱমসিক্খাপদম্পি উত্তানমেৱ. তিৰত্তাতিক্কমো, সেনায সূৰিযস্স অত্থঙ্গমো, গিলানতাদীনং অভাৱোতি ইমানি পনেত্থ তীণি অঙ্গানি.

সেনাৱাসসিক্খাপদৱণ্ণনা নিট্ঠিতা.

১০. উয্যোধিকসিক্খাপদৱণ্ণনা

৩২২. দসমে কতি তে লক্খানি লদ্ধানীতি তৱ সৰপ্পহাৰস্স লক্খণভূতা কিত্তকা জনা তযা লদ্ধাতি অত্থো, কিত্তকা তযা ৱিদ্ধাতি ৱুত্তং হোতি. সেসমেত্থ উত্তানমেৱ. উয্যোধিকাদিদস্সনত্থায গমনং, অনুঞ্ঞাতোকাসতো অঞ্ঞত্ৰ দস্সনং, তথাৰূপপচ্চযস্স আপদায ৱা অভাৱোতি ইমানি পনেত্থ তীণি অঙ্গানি.

উয্যোধিকসিক্খাপদৱণ্ণনা নিট্ঠিতা.

নিট্ঠিতো অচেলকৱগ্গো পঞ্চমো.