মহাৱগ্গো

মহাখন্ধককথা

পব্বজ্জাকথা

২৪৪৪. সীলক্খন্ধাদিযুত্তেন, সুভক্খন্ধেন দেসিতে;

খন্ধকেপি পৱক্খামি, সমাসেন ৱিনিচ্ছযং.

২৪৪৫. মাতৰা অননুঞ্ঞাতং, পিতৰা ৱাপি ভিক্খুনো;

ভণ্ডুকম্মমপুচ্ছিত্ৱা, পব্বাজেন্তস্স দুক্কটং.

২৪৪৬. উদ্দেসপৰিপুচ্ছায, সযং চে ব্যাৱটো সিযা;

দহৰো আণাপেতব্বো, পব্বাজেত্ৱানযাতি চ.

২৪৪৭. উপজ্ঝাযমথুদ্দিস্স, অৱুত্তো দহৰো পন;

পব্বাজেতি সচে তং সো, সযমেৱাপি ৱট্টতি.

২৪৪৮. সামণেৰোপি ৱত্তব্বো, দহৰো নত্থি তত্থ চে;

‘‘খণ্ডসীমমিমং নেত্ৱা, পব্বাজেত্ৱানযা’’তি চ.

২৪৪৯. সৰণানি পনেতস্স, দাতব্বানেৱ অত্তনা;

এৱম্পি ভিক্খুনাযেৱ, হোতি পব্বাজিতো নৰো.

২৪৫০. পুৰিসং ভিক্খুতো অঞ্ঞো, পব্বাজেতি ন ৱট্টতি;

ইত্থিং ভিক্খুনিতো অঞ্ঞো, পব্বাজেতি ন ৱট্টতি.

২৪৫১. সামণেৰোপি ৱা দাতুং, সামণেৰীপি ৱা তথা;

আণত্তিযা উভিন্নম্পি, কাসাযানি লভন্তি তে.

২৪৫২. সযমেৱ চ যং কিঞ্চি, পব্বাজেন্তেন ভিক্খুনা;

কেসাপনযনং কত্ৱা, পঠমং উদকে পুন.

২৪৫৩. ন্হাপেতব্বো সিযা সুট্ঠু, ঘংসিত্ৱা গোমযাদিনা;

সৰীৰে পীড়কা ৱাপি, কচ্ছু ৱা তস্স হোন্তি চে.

২৪৫৪. মাতা যথা নিযংপুত্তং, ন জিগুচ্ছতি সব্বসো;

ন্হাপেতব্বোৱ যতিনা, তথেৱ অজিগুচ্ছতা.

২৪৫৫. কস্মা? পনেত্তকেনাপি, উপকাৰেন সাসনে;

সো সদা বলৱস্নেহো, হোতুপজ্ঝাযকাদিসু.

২৪৫৬. ৱিনোদেত্ৱা পনুপ্পন্নং, উক্কণ্ঠং কুলপুত্তকা;

সিক্খাযো পৰিপূৰেত্ৱা, নিব্বানং পাপুণন্তি হি.

২৪৫৭. গন্ধচুণ্ণেন ৱা পচ্ছা, চুণ্ণেনপি হলিদ্দিযা;

সৰীৰং তস্স সীসঞ্চ, উব্বট্টেত্ৱা পুনপ্পুনং.

২৪৫৮. গিহিগন্ধং ৱিনোদেত্ৱা, কাসাযানি পনেকতো;

দ্ৱত্তিক্খত্তুং সকিং ৱাপি, দাতব্বানিস্স ভিক্খুনা.

২৪৫৯. অথ হত্থেপি ৱা তস্স, অদত্ৱা সযমেৱ তং;

অচ্ছাদেতি উপজ্ঝাযো, ৱট্টতাচৰিযোপি ৱা.

২৪৬০. নিৱাসেতি অনাণত্তো, সো পাৰুপতি ৱা সযং;

অপনেত্ৱা ততো সব্বং, পুন দাতব্বমেৱ তং.

২৪৬১. ভিক্খুনা তু সহত্থেন, তথা আণত্তিযাপি ৱা;

দিন্নং ৱট্টতি কাসাৱং, নাদিন্নং পন ৱট্টতি.

২৪৬২. তস্সেৱ সন্তকং ৱাপি, কা কথা অত্তসন্তকে;

ৱন্দাপেত্ৱা তত্থ ভিক্খূ, কাৰাপেত্ৱান উক্কুটিং.

২৪৬৩. অঞ্জলিং পগ্গহাপেত্ৱা, দাতব্বং সৰণত্তযং;

পটিপাটিৱসেনেৱ, ন চ উপ্পটিপাটিযা.

২৪৬৪. সচে একপদং ৱাপি, দেতি একক্খৰম্পি ৱা;

পটিপাটিং ৱিৰজ্ঝিত্ৱা, গহিতং চে ন ৱট্টতি.

২৪৬৫. তিক্খত্তুং যদি ৱা দেতি, বুদ্ধং সৰণমেৱ ৱা;

তথা সেসেসু চেৱম্পি, ন দিন্নানেৱ হোন্তি হি.

২৪৬৬. কত্ৱানুনাসিকন্তানি, একাবদ্ধানি ৱা পন;

ৱিচ্ছিন্দিত্ৱাথ ম-ন্তানি, দাতব্বানি ৱিজানতা.

২৪৬৭. উপসম্পদকম্মং তু, একতোসুদ্ধিযা সিযা;

ন হোতি পন পব্বজ্জা, উভতোসুদ্ধিযা ৱিনা.

২৪৬৮. তস্মা আচৰিযেনাপি, তথান্তেৱাসিকেনপি;

বু-দ্ধ-কাৰাদযো ৱণ্ণা, ঠানকৰণসম্পদং.

২৪৬৯. অহাপেন্তেন ৱত্তব্বা, পব্বজ্জাগুণমিচ্ছতা;

একৱণ্ণৱিনাসেন, পব্বজ্জা হি ন ৰূহতি.

২৪৭০. যদি সিদ্ধাপি পব্বজ্জা, সৰণাগমনতোৱ হি;

দাতব্বা দস সীলানি, পূৰণত্থায ভিক্খুনা.

পব্বজ্জাকথা.

২৪৭১. উপজ্ঝাযমথাচৰিযং, নিস্সায ৱসতা পন;

কত্তব্বানেৱ ৱত্তানি, পিযসীলেন ভিক্খুনা.

২৪৭২. আসনং পঞ্ঞপেতব্বং, দন্তকট্ঠং মুখোদকং;

দাতব্বং তস্স কালেন, সচে যাগু ভৱিস্সতি.

২৪৭৩. যাগু তস্সুপনেতব্বা, সঙ্ঘতো কুলতোপি ৱা;

পত্তে ৱত্তঞ্চ কাতব্বং, ৱত্তং গামপ্পৱেসনে.

২৪৭৪. চীৱৰে যানি ৱত্তানি, ৱুত্তানি হি মহেসিনা;

সেনাসনে তথা পাদ-পীঠকথলিকাদিসু.

২৪৭৫. এৱমাদীনি ৱত্তানি, সব্বানি পন ৰোগতো;

ৱুট্ঠানাগমনন্তানি, সত্ততিংসসতং সিযুং.

২৪৭৬. ৱত্তভেদেন সব্বত্থ, দুক্কটং তু পকাসিতং;

অনাদৰৱসেনেৱ, অকৰোন্তস্স ভিক্খুনো.

উপজ্ঝাযাচৰিযৱত্তকথা.

২৪৭৭. উপজ্ঝাযস্স ৱত্তানি, তথা সদ্ধিৱিহাৰিকে;

সতং তেৰস হোন্তেৱ, তথান্তেৱাসিকেপি চ.

সদ্ধিৱিহাৰিকন্তেৱাসিকৱত্তকথা.

২৪৭৮. পক্কন্তে ৱাপি ৱিব্ভন্তে, পক্খসঙ্কন্তকে মতে;

আণত্তিযা উপজ্ঝাযা, পস্সম্ভতি চ নিস্সযো.

২৪৭৯. হোতি আচৰিযম্হাপি, ছধা নিস্সযভেদনং;

পক্কন্তে ৱাপি ৱিব্ভন্তে, পক্খসঙ্কন্তকে মতে.

২৪৮০. আণত্তিযং উভিন্নম্পি, ধুৰনিক্খেপনেপি চ;

একেকস্স উভিন্নং ৱা, নালযে সতি ভিজ্জতি.

২৪৮১. উপজ্ঝাযসমোধান-গতস্সাপি চ ভিজ্জতি;

দস্সনং সৱনঞ্চাতি, সমোধানং দ্ৱিধা মতং.

২৪৮২. অদ্ধিকস্স গিলানস্স, গিলানুপট্ঠকস্স চ;

যাচিতস্স ন দোসোৱ, ৱসিতুং নিস্সযং ৱিনা.

২৪৮৩. জানতা অত্তনো চেৱ, ৱনে ফাসুৱিহাৰতং;

সভাগে দাযকেসন্তে, ৱসিতুম্পি চ ৱট্টতি.

নিস্সযপটিপ্পস্সম্ভনকথা.

২৪৮৪. কুট্ঠিং গণ্ডিং কিলাসিঞ্চ, সোসিঞ্চ অপমাৰিকং;

তথা ৰাজভটং চোৰং, লিখিতং কাৰভেদকং.

২৪৮৫. কসাহতং নৰঞ্চেৱ, পুৰিসং লক্খণাহতং;

ইণাযিকঞ্চ দাসঞ্চ, পব্বাজেন্তস্স দুক্কটং.

২৪৮৬. হত্থচ্ছিন্নমড়চ্ছিন্নং, পাদচ্ছিন্নঞ্চ পুগ্গলং;

কণ্ণনাসঙ্গুলিচ্ছিন্নং, কণ্ডৰচ্ছিন্নমেৱ চ.

২৪৮৭. কাণং কুণিঞ্চ খুজ্জঞ্চ, ৱামনং ফণহত্থকং;

খঞ্জং পক্খহতঞ্চেৱ, সীপদিং পাপৰোগিনং.

২৪৮৮. জৰায দুব্বলং অন্ধং, বধিৰঞ্চেৱ মম্মনং;

পীঠসপ্পিং তথা মূগং, পব্বাজেন্তস্স দুক্কটং.

২৪৮৯. অতিদীঘোতিৰস্সো ৱা, অতিকালোপি ৱা তথা;

অচ্চোদাতোপি ৱা মট্ঠ-তম্বলোহনিদস্সনো.

২৪৯০. অতিথূলো অতিকিস্সো, মহাসীসোপি ৱা তথা;

অতিখুদ্দকসীসেন, সহিতেন যুত্তোপি ৱা.

২৪৯১. কুটকুটকসীসো ৱা, তথা সিখৰসীসকো;

ৱেড়ুনাড়িসমানেন, সীসেন চ যুতো নৰো.

২৪৯২. কপ্পসীসোপি পব্ভাৰ-সীসো ৱা ৱণসীসকো;

তথা কণ্ণিককেসো ৱা, থূলকেসোপি ৱা তথা.

২৪৯৩. পূতিনিল্লোমসীসো ৱা, জাতিপণ্ডৰকেসকো;

জাতিযা তম্বকেসো ৱা, তথেৱাৱট্টসীসকো.

২৪৯৪. সীসলোমেকবদ্ধেহি, ভমুকেহি যুতোপি ৱা;

সম্বদ্ধভমুকো ৱাপি, নিল্লোমভমুকোপি ৱা.

২৪৯৫. মহন্তখুদ্দনেত্তো ৱা, তথা ৱিসমলোচনো;

কেকৰো ৱাপি গম্ভীৰ-নেত্তো ৱিসমচক্কলো.

২৪৯৬. জতুমূসিককণ্ণো ৱা, হত্থিকণ্ণোপি ৱা পন;

ছিদ্দমত্তককণ্ণো ৱা, তথেৱাৱিদ্ধকণ্ণকো.

২৪৯৭. তথা টঙ্কিতকণ্ণো ৱা, পূতিকণ্ণোপি ৱা পন;

যোনকাদিপ্পভেদোপি, নাযং পৰিসদূসকো.

২৪৯৮. অতিপিঙ্গলনেত্তো ৱা, তথা নিপ্পখুমক্খি ৱা;

অস্সুপগ্ঘৰনেত্তো ৱা, পক্কপুপ্ফিতলোচনো.

২৪৯৯. তথেৱ চ মহানাসো, অতিখুদ্দকনাসিকো;

তথা চিপিটনাসো ৱা, নৰো কুটিলনাসিকো.

২৫০০. নিচ্চৱিস্সৱনাসো ৱা, যো ৱা পন মহামুখো;

ৱঙ্কভিন্নমুখো ৱাপি, মহাওট্ঠোপি ৱা পন.

২৫০১. তথা তনুকওট্ঠো ৱা, ৱিপুলুত্তৰওট্ঠকো;

ওট্ঠছিন্নোপি উপ্পক্ক-মুখো এড়মুখোপি ৱা.

২৫০২. সঙ্খতুণ্ডোপি দুগ্গন্ধ-মুখো ৱা পন পুগ্গলো;

মহাদন্তোপি অচ্চন্তং, তথা অসুৰদন্তকো.

২৫০৩. হেট্ঠা উপৰিতো ৱাপি, বহিনিক্খন্তদন্তকো;

অদন্তো পূতিদন্তো ৱা, অতিখুদ্দকদন্তকো.

২৫০৪. যস্স দন্তন্তৰে দন্তো, কাড়কদন্তসন্নিভো;

সুখুমোৱ ঠিতো, তং চে, পব্বাজেতুম্পি ৱট্টতি.

২৫০৫. যো মহাহনুকো পোসো;

দীঘেন হনুনা যুতো;

চিপিটহনুকো ৱাপি;

ৰস্সেন হনুনা যুতো.

২৫০৬. নিম্মস্সুদাঠিকো ৱাপি, অতিদীঘগলোপি ৱা;

অতিৰস্সগলোপি ৱা, ভিন্নগণ্ঠিগলোপি ৱা.

২৫০৭. তথা ভট্ঠংসকূটো ৱা, ভিন্নপিট্ঠিউৰোপি ৱা;

সুদীঘৰস্সহত্থো ৱা, কচ্ছুকণ্ডুসমাযুতো.

২৫০৮. মহানিসদমংসো ৱা, উদ্ধনগ্গুপমাযুতো;

ৱাতণ্ডিকো মহাঊৰু, সঙ্ঘট্টনকজাণুকো.

২৫০৯. ভিন্নজাণু মহাজাণু, দীঘজঙ্ঘো ৱিজঙ্ঘকো;

ৱিকটো ৱাপি পণ্হো ৱা, তথা উব্বদ্ধপিণ্ডিকো.

২৫১০. যট্ঠিজঙ্ঘো মহাজঙ্ঘো, মহাপাদোপি যো নৰো;

তথা পিট্ঠিকপাদো ৱা, মহাপণ্হিপি ৱা পন.

২৫১১. ৱঙ্কপাদো নৰো যো ৱা, গণ্ঠিকঙ্গুলিকোপি ৱা;

যো পনন্ধনখো ৱাপি, কাড়পূতিনখোপি চ.

২৫১২. ইচ্চেৱমাদিকং কঞ্চি, নৰং পৰিসদূসকং;

পব্বাজেন্তস্স ভিক্খুস্স, হোতি আপত্তি দুক্কটং.

পৰিসদূসককথা.

২৫১৩. ‘‘সামণেৰজ্জ মা খাদ, মা ভুঞ্জ চ পিৱা’’তি চ;

নিৱাৰেন্তস্স আহাৰং, হোতি আপত্তি দুক্কটং.