চূড়ৱগ্গো

পাৰিৱাসিকক্খন্ধককথা

২৭৪৮. তজ্জনীযং নিযস্সঞ্চ, পব্বাজং পটিসাৰণং;

তিৱিধুক্খেপনঞ্চাতি, সত্ত কম্মানি দীপযে.

২৭৪৯. তেচত্তালীস ৱত্তানি, খন্ধকে কম্মসঞ্ঞিতে;

নৱাধিকানি তিংসেৱ, খন্ধকে তদনন্তৰে.

২৭৫০. এৱং সব্বানি ৱত্তানি, দ্ৱাসীতেৱ মহেসিনা;

হোন্তি খন্ধকৱত্তানি, গহিতাগহণেন তু.

২৭৫১. পাৰিৱাসঞ্চ ৱত্তঞ্চ, সমাদিন্নস্স ভিক্খুনো;

ৰত্তিচ্ছেদো কথং ৱুত্তো, ৱত্তভেদো কথং ভৱে?

২৭৫২. সহৱাসো ৱিনাৱাসো, অনাৰোচনমেৱ চ;

পাৰিৱাসিকভিক্খুস্স, ৰত্তিচ্ছেদো চ দুক্কটং.

২৭৫৩. একচ্ছন্নে পনাৱাসে, পকতত্তেন ভিক্খুনা;

নিৱাসো দকপাতেন, উক্খিত্তস্স নিৱাৰিতো.

২৭৫৪. পাৰিৱাসিকভিক্খুস্স, অন্তোযেৱ ন লব্ভতি;

ইচ্চেৱং পন নিদ্দিট্ঠং, মহাপচ্চৰিযং পন.

২৭৫৫. ‘‘অৱিসেসেন নিদ্দিট্ঠং, মহাঅট্ঠকথাদিসু;

উভিন্নং দকপাতেন, নিৱাসো ৱাৰিতো’’তি হি.

২৭৫৬. অভিক্খুকে পনাৱাসে, অনাৱাসেপি কত্থচি;

ৱিপ্পৱাসং ৱসন্তস্স, ৰত্তিচ্ছেদো চ দুক্কটং.

২৭৫৭. পাৰিৱাসিকভিক্খুস্স, ভিক্খুং দিস্ৱান তঙ্খণে;

নাৰোচেন্তস্স চেতস্স, ৰত্তিচ্ছেদো চ দুক্কটং.

২৭৫৮. পঞ্চেৱ চ যথাৱুড্ঢং, লভতে পাৰিৱাসিকো;

কাতুং তত্থেৱ চ ঠত্ৱা, উপোসথপৱাৰণং.

২৭৫৯. ৱস্সসাটিং যথাৱুড্ঢং, দেন্তি চে সঙ্ঘদাযকা;

ওণোজনং তথা ভত্তং, লভতে পঞ্চিমে পন.

পাৰিৱাসিকক্খন্ধককথা.

সমথক্খন্ধককথা

২৭৬০. ৱিৱাদাধাৰতা চানু-ৱাদাধিকৰণম্পি চ;

আপত্তাধাৰতা চেৱ, কিচ্চাধিকৰণম্পি চ.

২৭৬১. এতানি পন চত্তাৰি, ৱুত্তানি চ মহেসিনা;

ভেদকাৰকৱত্থূনি, ৱিৱাদো তত্থ নিস্সিতো.

২৭৬২. ৱিপত্তিযো চতস্সোৱ, অনুৱাদো উপাগতো;

আপত্তাধাৰতা নাম, সত্ত আপত্তিযো মতা.

২৭৬৩. সঙ্ঘকিচ্চানি নিস্সায, কিচ্চাধিকৰণং সিযা;

এতেসং তু চতুন্নম্পি, সমত্তা সমথা মতা.

২৭৬৪. সম্মুখা সতি চামূড়্হো, পটিঞ্ঞাৱিনযোপি চ;

তস্সপাপিযসী চেৱ, তথা যেভুয্যসীপি চ.

২৭৬৫. তিণৱত্থাৰকো চেৱ, সত্তমো ৱিনযো মতো;

সত্তিমে সমথা ৱুত্তা, বুদ্ধেনাদিচ্চবন্ধুনা.

২৭৬৬. ৱিৱাদো সম্মতি দ্ৱীহি, অনুৱাদো চতূহি চ;

আপত্তি পন তীহেৱ, কিচ্চমেকেন সম্মতি.

২৭৬৭. ছট্ঠেন পঠমেনাপি, ৱিৱাদো এত্থ সম্মতি;

সম্মুখাৱিনযাদীহি, অনুপুব্বেন তীহিপি.

২৭৬৮. তথেৱ পঞ্চমেনাপি, অনুৱাদো হি সম্মতি;

সম্মুখেন পটিঞ্ঞায, তিণৱত্থাৰকেন চ.

২৭৬৯. আপত্তূপসমং যাতি, তীহেৱ সমথেহি সা;

সম্মুখাৱিনযেনেৱ, কিচ্চমেকেন সম্মতি.

২৭৭০. যেভুয্যসিককম্মে তু, সলাকং গাহযে বুধো;

গূড়্হেন ৱিৱটেনাপি, কণ্ণজপ্পেন ৱা পন.

২৭৭১. অলজ্জুস্সদে গূড়্হেন, ৱিৱটেনেৱ লজ্জিসু;

বালেসু কণ্ণজপ্পেন, সলাকং গাহযে বুধো.

২৭৭২. লজ্জী অলজ্জী বালোতি, কেন সক্কা ৱিজানিতুং?

সকেন কম্মুনাযেৱ, তেন সক্কা ৱিজানিতুং.

২৭৭৩. আপজ্জতি চ সঞ্চিচ্চ, আপত্তিং পৰিগূহতি;

ছন্দাদিঅগতিং যাতি, অলজ্জী এদিসো সিযা.

২৭৭৪. নাপজ্জতি চ সঞ্চিচ্চ, আপত্তিং ন চ গূহতি;

ন গচ্ছতিগতিঞ্চাপি, এদিসো লজ্জি পুগ্গলো.

২৭৭৫. দুচ্চিন্তিতো চ দুব্ভাসী, তথা দুক্কটকাৰিকো;

এদিসো পন ‘‘বালো’’তি, লক্খণেনেৱ ঞাযতি.

২৭৭৬. তিধা সলাকগাহেন, বহুকা ধম্মৱাদিনো;

যেভুয্যসিককম্মেন, কত্তব্বন্তি জিনোব্ৰৱি.

২৭৭৭. অলজ্জী সানুৱাদো চ, অসুচী কম্মতো চ যো;

তস্সপাপিযসীকম্ম-যোগ্গো সো হোতি পুগ্গলো.

২৭৭৮. ভণ্ডনে কলহে জাতে, ৱিৱাদস্মিং অনপ্পকে;

বহুঅস্সামণে চিণ্ণে, অনগ্গেপি চ ভস্সকে.

২৭৭৯. মূলমূলং গৱেসন্তং, হোতি ৱাড়ঞ্চ কক্খড়ং;

তিণৱত্থাৰকেনেৱ, কাতব্বন্তি পকাসিতং.

২৭৮০. যথা চ তিণপণ্ণেন, ছন্নং গূথঞ্চ মুত্তকং;

ন চ ৱাযতি দুগ্গন্ধং, ৱূপসম্মতি তঙ্খণে.

২৭৮১. ঠপেত্ৱা থুল্লৱজ্জঞ্চ, গিহীহি পটিসংযুতং;

দিট্ঠাৱিকম্মিকঞ্চেৱ, যো চ তত্থ ন হোতি তং.

২৭৮২. সেসাযাপত্তিযা যাৱ, উপসম্পদমাড়তো;

সুদ্ধো হোতি নিৰাপত্তি, তিণৱত্থাৰকে তথা.

সমথক্খন্ধককথা.

খুদ্দকৱত্থুক্খন্ধককথা

২৭৮৩. ৰুক্খে ৱা পন কুট্টেৱা, অট্টানে থম্ভকেসু ৱা;

ন্হাযমানো সকং কাযং, উগ্ঘংসেয্যস্স দুক্কটং.

২৭৮৪. কাযং গন্ধব্বহত্থেন, কুৰুৱিন্দকসুত্তিযা;

মল্লকেন ন ঘংসেয্য, নাঞ্ঞমঞ্ঞঞ্চ কাযতো.

২৭৮৫. অকতং মল্লকং নাম, গিলানস্সেৱ ৱট্টতি;

কতং তং মল্লকং নাম, সব্বেসম্পি ন ৱট্টতি.

২৭৮৬. কপালিট্ঠকখণ্ডানি, সব্বস্স পুথুপাণিকং;

গিলানস্সাগিলানস্স, ৱত্থৱট্টি চ ৱট্টতি.

২৭৮৭. ৱুত্তা ফেণকপাসাণ-কথলা পাদঘংসনে;

ৱট্টং ৱা চতুৰস্সং ৱা, কতকং ন চ ৱট্টতি.

২৭৮৮. যং কিঞ্চিপি অলঙ্কাৰং, ধাৰেন্তস্সপি দুক্কটং;

হোতি অন্তমসো তাল-পণ্ণমত্তম্পি ভিক্খুনো.

২৭৮৯. ওসণ্হেয্য সকে কেসে, যো হত্থফণকেন ৱা;

ফণকেনপি কোচ্ছেন, দুক্কটং তস্স নিদ্দিসে.

২৭৯০. সিত্থতেলোদতেলেহি, মণ্ডনত্থং ন ৱট্টতি;

অনুলোমনিপাতত্থং, উদ্ধংলোমেন ভিক্খুনা.

২৭৯১. হত্থং তেলেন তেমেত্ৱা, পুঞ্ছিতব্বা সিৰোৰুহা;

ৱট্টতুণ্হাভিতত্তস্স, অল্লহত্থেন পুঞ্ছিতুং.

২৭৯২. আদাসে উদপত্তে ৱা, যত্থ কত্থচি অত্তনো;

মুখবিম্বং ৱিনা হেতুং, ওলোকেন্তস্স দুক্কটং.

২৭৯৩. ‘‘সঞ্ছৱিং তু মুখং, নো’’তি, দট্ঠুমাবাধপচ্চযা;

‘‘জিণ্ণো নো’’তাযুসঙ্খাৰ-জাননত্থঞ্চ ৱট্টতি.

২৭৯৪. নচ্চং ৱা পন গীতং ৱা, ৱাদিতং ৱাপি ভিক্খুনো;

দট্ঠুং ৱা পন সোতুং ৱা, গচ্ছতো হোতি দুক্কটং.

২৭৯৫. দট্ঠুমন্তমসো মোৰ-নচ্চম্পি চ ন ৱট্টতি;

সোতুমন্তমসো দন্ত-গীতম্পি চ ন ৱট্টতি.

২৭৯৬. নচ্চন্তস্স সযং ৱাপি, নচ্চাপেন্তস্স দুক্কটং;

অনাপত্তন্তৰাৰামে, ঠত্ৱা সুণাতি পস্সতি.

২৭৯৭. ‘‘পস্সিস্সামী’’তি নচ্চং ৱা, গীতং ৱা পন ৱাদিতং;

ৱিহাৰতো ৱিহাৰং ৱা, গচ্ছতো হোতি দুক্কটং.

২৭৯৮. আপত্তন্তোৱিহাৰেপি, উট্ঠহিত্ৱান গচ্ছতো;

ঠত্ৱা গীৱং পসাৰেত্ৱা, পস্সতোপি চ ৱীথিযং.

২৭৯৯. কেসা দীঘা ন ধাৰেয্যা, যো ধাৰেয্যস্স দুক্কটং;

দ্ৱঙ্গুলং ৱা দুমাসং ৱা, ততো উদ্ধং ন ৱট্টতি.

২৮০০. নখে নাসিকলোমানি, দীঘানি ন তু ধাৰযে;

ন চ ৱীসতিমট্ঠং ৱা, কাতুং ৱট্টতি ভিক্খুনো.

২৮০১. কপ্পাপেয্য ৱিসুং মস্সুং, দাঠিকং ৱা ঠপেয্য যো;

সংহৰাপেয্য ৱা লোমং, সম্বাধে তস্স দুক্কটং.

২৮০২. ছিন্দতো দুক্কটং ৱুত্তং, কেসে কত্তৰিকায ৱা;

অগিলানস্স অঞ্ঞেন, ছিন্দাপেন্তস্স ৱা তথা.

২৮০৩. ছিন্দতো অত্তনো অঙ্গ-জাতং থুল্লচ্চযং সিযা;

সেসঙ্গছেদনে অত্ত-ৱধে আপত্তি দুক্কটং.

২৮০৪. অহিকীটাদিদট্ঠস্স, তাদিসাবাধপচ্চযা;

ন দোসো ছিন্দতো অঙ্গং, মোচেন্তস্স চ লোহিতং.

২৮০৫. অপৰিস্সাৱনো মগ্গং, সচে গচ্ছতি দুক্কটং;

যাচমানস্স ৱা মগ্গে, তথেৱাদদতোপি তং.

২৮০৬. ন ভুঞ্জে ন পিৱে নগ্গো, ন খাদে ন চ সাযযে;

ন দদে ন চ গণ্হেয্য, ন গচ্ছেয্যপি অঞ্জসং.

২৮০৭. ৱন্দিতব্বং ন নগ্গেন, ৱন্দাপেতব্বমেৱ ৱা;

পৰিকম্মং ন কাতব্বং, ন নগ্গেন চ কাৰযে.

২৮০৮. পৰিকম্মে পটিচ্ছাদী, তিস্সো জন্তাঘৰাদিকা;

ৱুত্তা, ৱত্থপটিচ্ছাদী, সব্বত্থ পন ৱট্টতি.

২৮০৯. যত্থ কত্থচি পেড়াযং, ভুঞ্জিতুং ন চ ৱট্টতি;

একতো ভুঞ্জতো হোতি, দুক্কটং একভাজনে.

২৮১০. একপাৱুৰণা এক-ত্থৰণা ৱা নিপজ্জৰে;

একমঞ্চেপি ৱা তেসং, হোতি আপত্তি দুক্কটং.

২৮১১. ন নিসীদেয্য সঙ্ঘাটি-পল্লত্থিকমুপাগতো;

কিঞ্চি কীড়ং ন কীড়েয্য, পলিতং ন চ গাহযে.

২৮১২. ভমুকায নলাটে ৱা, দাঠিকাযপি উগ্গতং;

তাদিসং পলিতং চঞ্ঞং, গাহাপেতুম্পি ৱট্টতি.

২৮১৩. অগিলানো সচে ভিক্খু, ছত্তং ধাৰেয্য দুক্কটং;

অত্তনো চীৱৰাদীনং, গুত্তত্থং পন ৱট্টতি.

২৮১৪. হত্থিসোণ্ডং চতুক্কণ্ণং, ৱসনং মচ্ছৱাড়কং;

ৱেল্লিযং তালৱণ্টঞ্চ, নিৱাসেন্তস্স দুক্কটং.

২৮১৫. গহিপাৰুপনং ৱাপি, পাৰুপন্তস্স দুক্কটং;

নিৱাসনে পাৰুপনে, পৰিমণ্ডলতা মতা.

২৮১৬. লোকাযতং ন ৱাচেয্য, ন চ তং পৰিযাপুণে;

ন তিৰচ্ছানৱিজ্জা ৱা, ৱাচেতব্বাৱ ভিক্খুনা.

২৮১৭. ন চ ৱট্টতি ধাৰেতুং, সব্বা চামৰিবীজনী;

ন চালিম্পেয্য দাযং ৱা, ন চ লঞ্জে মুখম্পি চ.

২৮১৮. ন ৱহে উভতোকাজং, ৱট্টতন্তৰকাজকং;

সীসক্খন্ধকটোলম্ব-ভাৰে দোসো ন ৱিজ্জতি.

২৮১৯. অট্ঠঙ্গুলাদিকং ভিক্খু, পচ্ছিমং চতুৰঙ্গুলা;

খাদতো দন্তকট্ঠঞ্চ, হোতি আপত্তি দুক্কটং.