ভিক্খুনীৱিভঙ্গো

১৯৬৪. ভিক্খুনীনং হিতত্থায, ৱিভঙ্গং যং জিনোব্ৰৱি;

তস্মিং অপি সমাসেন, কিঞ্চিমত্তং ভণামহং.

পাৰাজিককথা

১৯৬৫. ছন্দসো মেথুনং ধম্মং, পটিসেৱেয্য যা পন;

হোতি পাৰাজিকা নাম, সমণী সা পৱুচ্চতি.

১৯৬৬. মনুস্সপুৰিসাদীনং, নৱন্নং যস্স কস্সচি;

সজীৱস্সাপ্যজীৱস্স, সন্থতং ৱা অসন্থতং.

১৯৬৭. অত্তনো তিৱিধে মগ্গে, যেভুয্যক্খাযিতাদিকং;

অঙ্গজাতং পৱেসেন্তী, অল্লোকাসে পৰাজিতা.

১৯৬৮. ইতো পৰমৱত্ৱাৱ, সাধাৰণৱিনিচ্ছযং;

অসাধাৰণমেৱাহং, ভণিস্সামি সমাসতো.

১৯৬৯. অধক্খকং সৰীৰকং, যদুব্ভজাণুমণ্ডলং;

সৰীৰকেন চে তেন, ফুসেয্য ভিক্খুনী পন.

১৯৭০. অৱস্সুতস্সাৱস্সুতা, মনুস্সপুগ্গলস্স যা;

সৰীৰমস্স তেন ৱা, ফুট্ঠা পাৰাজিকা সিযা.

১৯৭১. কপ্পৰস্স পনুদ্ধম্পি, গহিতং উব্ভজাণুনা;

যথাৱুত্তপ্পকাৰেন, কাযেনানেন অত্তনো.

১৯৭২. পুৰিসস্স তথা কায- পটিবদ্ধং ফুসন্তিযা;

তথা যথাপৰিচ্ছিন্ন- কাযবদ্ধেন অত্তনো.

১৯৭৩. অৱসেসেন ৱা তস্স, কাযং কাযেন অত্তনো;

হোতি থুল্লচ্চযং তস্সা, পযোগে পুৰিসস্স চ.

১৯৭৪. যক্খপেততিৰচ্ছান- পণ্ডকানং অধক্খকং;

উব্ভজাণুং তথেৱস্সা, উভতোৱস্সৱে সতি.

১৯৭৫. একতোৱস্সৱে চাপি, থুল্লচ্চযমুদীৰিতং;

অৱসেসে চ সব্বত্থ, হোতি আপত্তি দুক্কটং.

১৯৭৬. উব্ভক্খকমধোজাণু-মণ্ডলং পন যং ইধ;

কপ্পৰস্স চ হেট্ঠাপি, গতং এত্থেৱ সঙ্গহং.

১৯৭৭. কেলাযতি সচে ভিক্খু, সদ্ধিং ভিক্খুনিযা পন;

উভিন্নং কাযসংসগ্গ-ৰাগে সতি হি ভিক্খুনো.

১৯৭৮. হোতি সঙ্ঘাদিসেসোৱ, নাসো ভিক্খুনিযা সিযা;

কাযসংসগ্গৰাগো চ, সচে ভিক্খুনিযা সিযা.

১৯৭৯. ভিক্খুনো মেথুনো ৰাগো, গেহপেমম্পি ৱা ভৱে;

তস্সা থুল্লচ্চযং ৱুত্তং, ভিক্খুনো হোতি দুক্কটং.

১৯৮০. উভিন্নং মেথুনে ৰাগে, গেহপেমেপি ৱা সতি;

অৱিসেসেন নিদ্দিট্ঠং, উভিন্নং দুক্কটং পন.

১৯৮১. যস্স যত্থ মনোসুদ্ধং, তস্স তত্থ ন দোসতা;

উভিন্নম্পি অনাপত্তি, উভিন্নং চিত্তসুদ্ধিযা.

১৯৮২. কাযসংসগ্গৰাগেন, ভিন্দিত্ৱা পঠমং পন;

পচ্ছা দূসেতি চে নেৱ, হোতি ভিক্খুনিদূসকো.

১৯৮৩. অথ ভিক্খুনিযা ফুট্ঠো, সাদিযন্তোৱ চেতসা;

নিচ্চলো হোতি চে ভিক্খু, ন হোতাপত্তি ভিক্খুনো.

১৯৮৪. ভিক্খুনী ভিক্খুনা ফুট্ঠা, সচে হোতিপি নিচ্চলা;

অধিৱাসেতি সম্ফস্সং, তস্সা পাৰাজিকং সিযা.

১৯৮৫. তথা থুল্লচ্চযং খেত্তে, দুক্কটঞ্চ ৱিনিদ্দিসে;

ৱুত্তত্তা ‘‘কাযসংসগ্গং, সাদিযেয্যা’’তি সত্থুনা.

১৯৮৬. তস্সা ক্ৰিযসমুট্ঠানং, এৱং সতি ন দিস্সতি;

ইদং তব্বহুলেনেৱ, নযেন পৰিদীপিতং.

১৯৮৭. অনাপত্তি অসঞ্চিচ্চ, অজানিত্ৱামসন্তিযা;

সতি আমসনে তস্সা, ফস্সং ৱাসাদিযন্তিযা.

১৯৮৮. ৱেদনট্টায ৱা খিত্ত-চিত্তাযুম্মত্তিকায ৱা;

সমুট্ঠানাদযো তুল্যা, পঠমন্তিমৱত্থুনা.

উব্ভজাণুমণ্ডলকথা.

১৯৮৯. পাৰাজিকত্তং জানন্তি, সলিঙ্গে তু ঠিতায হি;

‘‘ন কস্সচি পৰস্সাহং, আৰোচেস্সামি দানি’’তি.

১৯৯০. ধুৰে নিক্খিত্তমত্তস্মিং, সা চ পাৰাজিকা সিযা;

অযং ৱজ্জপটিচ্ছাদি- নামিকা পন নামতো.

১৯৯১. সেসং সপ্পাণৱগ্গস্মিং, দুট্ঠুল্লেন সমং নযে;

ৱিসেসো তত্ৰ পাচিত্তি, ইধ পাৰাজিকং সিযা.

ৱজ্জপটিচ্ছাদিকথা.

১৯৯২. সঙ্ঘেনুক্খিত্তকো ভিক্খু, ঠিতো উক্খেপনে পন;

যংদিট্ঠিকো চ সো তস্সা, দিট্ঠিযা গহণেন তং.

১৯৯৩. অনুৱত্তেয্য যা ভিক্খুং, ভিক্খুনী সা ৱিসুম্পি চ;

সঙ্ঘমজ্ঝেপি অঞ্ঞাহি, ৱুচ্চমানা তথেৱ চ.

১৯৯৪. অচজন্তীৱ তং ৱত্থুং, গহেত্ৱা যদি তিট্ঠতি;

তস্স কম্মস্স ওসানে, উক্খিত্তস্সানুৱত্তিকা.

১৯৯৫. হোতি পাৰাজিকাপন্না, হোতাসাকিযধীতৰা;

পুন অপ্পটিসন্ধেযা, দ্ৱিধা ভিন্না সিলা ৱিয.

১৯৯৬. অধম্মে পন কম্মস্মিং, নিদ্দিট্ঠং তিকদুক্কটং;

সমুট্ঠানাদযো সব্বে, ৱুত্তা সমনুভাসনে.

উক্খিত্তানুৱত্তিককথা.

১৯৯৭. অপাৰাজিকখেত্তস্স, গহণং যস্স কস্সচি;

অঙ্গস্স পন তং হত্থ-গ্গহণন্তি পৱুচ্চতি.

১৯৯৮. পাৰুতস্স নিৱত্থস্স, গহণং যস্স কস্সচি;

এতং সঙ্ঘাটিযা কণ্ণ-গ্গহণন্তি পৱুচ্চতি.

১৯৯৯. কাযসংসগ্গসঙ্খাত-অসদ্ধম্মস্স কাৰণা;

ভিক্খুনী হত্থপাসস্মিং, তিট্ঠেয্য পুৰিসস্স ৱা.

২০০০. সল্লপেয্য তথা তত্থ, ঠত্ৱা তু পুৰিসেন ৱা;

সঙ্কেতং ৱাপি গচ্ছেয্য, ইচ্ছেয্যা গমনস্স ৱা.

২০০১. তদত্থায পটিচ্ছন্ন-ট্ঠানঞ্চ পৱিসেয্য ৱা;

উপসংহৰেয্য কাযং ৱা, হত্থপাসে ঠিতা পন.

২০০২. অযমস্সমণী হোতি, ৱিনট্ঠা অট্ঠৱত্থুকা;

অভব্বা পুনৰুড়্হায, ছিন্নো তালোৱ মত্থকে.

২০০৩. অনুলোমেন ৱা ৱত্থুং, পটিলোমেন ৱা চুতা;

অট্ঠমং পৰিপূৰেন্তী, তথেকন্তৰিকায ৱা.

২০০৪. অথাদিতো পনেকং ৱা, দ্ৱে ৱা তীণিপি সত্ত ৱা;

সতক্খত্তুম্পি পূৰেন্তী, নেৱ পাৰাজিকা সিযা.

২০০৫. আপত্তিযো পনাপন্না, দেসেত্ৱা তাহি মুচ্চতি;

ধুৰনিক্খেপনং কত্ৱা, দেসিতা গণনূপিকা.

২০০৬. ন হোতাপত্তিযা অঙ্গং, সউস্সাহায দেসিতা;

দেসনাগণনং নেতি, দেসিতাপি অদেসিতা.

২০০৭. অনাপত্তি অসঞ্চিচ্চ, অজানিত্ৱা কৰোন্তিযা;

সমুট্ঠানাদযো সব্বে, অনন্তৰসমা মতা.

২০০৮. ‘‘অসদ্ধম্মো’’তি নামেত্থ, কাযসংসগ্গনামকো;

অযমুদ্দিসিতো অত্থো, সব্বঅট্ঠকথাসুপি.

২০০৯. ৱিঞ্ঞূ পটিবলো কায-সংসগ্গং পটিপজ্জিতুং;

কাযসংসগ্গভাৱে তু, সাধকং ৱচনং ইদং.

অট্ঠৱত্থুককথা.

২০১০. অৱস্সুতা পটিচ্ছাদী, উক্খিত্তা অট্ঠৱত্থুকা;

অসাধাৰণপঞ্ঞত্তা, চতস্সোৱ মহেসিনা.

পাৰাজিককথা নিট্ঠিতা.

সঙ্ঘাদিসেসকথা

২০১১. যা পন ভিক্খুনী উস্সযৱাদা;

অট্টকৰী মুখৰী ৱিহৰেয্য;

যেন কেনচি নৰেনিধ সদ্ধিং;

সা গৰুকং কিৰ দোসমুপেতি.

২০১২. সক্খিং ৱাপি সহাযং ৱা, পৰিযেসতি দুক্কটং;

পদে পদে তথা অট্টং, কাতুং গচ্ছন্তিযাপি চ.

২০১৩. আৰোচেতি সচে পুব্বং, ভিক্খুনী অত্তনো কথং;

দিস্ৱা ৱোহাৰিকং তস্সা, হোতি আপত্তি দুক্কটং.

২০১৪. আৰোচেতি সচে পচ্ছা, ইতৰো অত্তনো কথং;

হোতি ভিক্খুনিযা তস্সা, থুল্লচ্চযমনন্তৰং.

২০১৫. আৰোচেতিতৰো পুব্বং, সচে সো অত্তনো কথং;

পচ্ছা ভিক্খুনী চে পুব্ব-সদিসোৱ ৱিনিচ্ছযো.

২০১৬. ‘‘আৰোচেহী’’তি ৱুত্তা চে, ‘‘কথং তৱ মমাপি চ’’;

আৰোচেতু যথাকামং, পঠমে দুক্কটং সিযা.

২০১৭. দুতিযাৰোচনে তস্সা, থুল্লচ্চযমুদীৰিতং;

উপাসকেন ৱুত্তেপি, অযমেৱ ৱিনিচ্ছযো.

২০১৮. আৰোচিতকথং সুত্ৱা, উভিন্নম্পি যথা তথা;

ৱিনিচ্ছযে কতে তেহি, অট্টে পন চ নিট্ঠিতে.

২০১৯. অট্টস্স পৰিযোসানে, জযে ভিক্খুনিযা পন;

পৰাজযেপি ৱা তস্সা, হোতি সঙ্ঘাদিসেসতা.

২০২০. দূতং ৱাপি পহিণিত্ৱা, আগন্ত্ৱান সযম্পি ৱা;

পচ্চত্থিকমনুস্সেহি, আকড্ঢীযতি যা পন.

২০২১. আৰামে পন অঞ্ঞেহি, অনাচাৰং কতং সচে;

অনোদিস্স পৰং কিঞ্চি, ৰক্খং যাচতি তত্থ যা.

২০২২. যায কিঞ্চি অৱুত্তাৱ, ধম্মট্ঠা সযমেৱ তু;

সুত্ৱা তং অঞ্ঞতো অট্টং, নিট্ঠাপেন্তি সচে পন.

২০২৩. তস্সা, উম্মত্তিকাদীন-মনাপত্তি পকাসিতা;

কথিনেন সমুট্ঠানং, তুল্যং সকিৰিযং ইদং.

অট্টকাৰিকথা.

২০২৪. জানন্তী ভিক্খুনী চোৰিং, ৱজ্ঝং ৱিদিতমেৱ যা;

সঙ্ঘং অনপলোকেত্ৱা, ৰাজানং গণমেৱ ৱা.

২০২৫. ৱুট্ঠাপেয্য ৱিনা কপ্পং, চোৰিৱুট্ঠাপনং পন;

সঙ্ঘাদিসেসমাপত্তি-মাপন্না নাম হোতি সা.

২০২৬. পঞ্চমাসগ্ঘনং যায, হৰিতং পৰসন্তকং;

অতিৰেকগ্ঘনং ৱাপি, অযং ‘‘চোৰী’’তি ৱুচ্চতি.

২০২৭. ভিক্খুনীসু পনঞ্ঞাসু, তিত্থিযেসুপি ৱা তথা;

যা পব্বজিতপুব্বা সা, অযং ‘‘কপ্পা’’তি ৱুচ্চতি.

২০২৮. ৱুট্ঠাপেতি চ যা চোৰিং, ঠপেত্ৱা কপ্পমেৱিদং;

সচে আচৰিনিং পত্তং, চীৱৰং পৰিযেসতি.

২০২৯. সম্মন্নতি চ সীমং ৱা, তস্সা আপত্তি দুক্কটং;

ঞত্তিযা দুক্কটং দ্ৱীহি, কম্মৱাচাহি চ দ্ৱযং.

২০৩০. থুল্লচ্চযস্স, কম্মন্তে, গৰুকং নিদ্দিসে বুধো;

গণো আচৰিনী চেৱ, ন চ মুচ্চতি দুক্কটং.

২০৩১. অনাপত্তি অজানন্তী, ৱুট্ঠাপেতি, তথেৱ চ;

কপ্পং ৱা অপলোকেত্ৱা, তস্সা উম্মত্তিকায ৱা.

২০৩২. চোৰিৱুট্ঠাপনং নাম, জাযতে ৱাচচিত্ততো;

কাযৱাচাদিতো চেৱ, সচিত্তঞ্চ ক্ৰিযাক্ৰিযং.

চোৰিৱুট্ঠাপনকথা.