পাচিত্তিযকথা

৮৮৯. সম্পজানমুসাৱাদে, পাচিত্তিযমুদীৰিতং;

দৱা ৰৱা ভণন্তস্স, ন দোসুম্মত্তকাদিনো.

৮৯০. অঞ্ঞত্থাপত্তিযো পঞ্চ, মুসাৱাদস্স কাৰণা;

সমুট্ঠানাদযো সব্বে, অদিন্নাদানতুল্যকা.

সম্পজানমুসাৱাদকথা.

৮৯১. জাতিআদীসু ৱুত্তেসু, দসস্ৱক্কোসৱত্থুসু;

ভূতেন ৱা অভূতেন, যেন কেনচি ৱত্থুনা.

৮৯২. যায কাযচি ভাসায, হত্থমুদ্দায ৱা পন;

পাৰাজিকমনাপন্নং, ভিক্খুমাপন্নমেৱ ৱা.

৮৯৩. অঞ্ঞত্ৰঞ্ঞাপদেসেন, ওমসন্তস্স ভিক্খুনো;

তত্থ পাচিত্তিযাপত্তি, সম্বুদ্ধেন পকাসিতা.

৮৯৪. তেহেৱঞ্ঞাপদেসেন, পাড়িমুত্তপদেহিপি;

সব্বত্থানুপসম্পন্নং, অক্কোসন্তস্স দুক্কটং.

৮৯৫. অনক্কোসিতুকামস্স, কেৱলং দৱকম্যতা;

ৱদতো পন সব্বত্থ, দুব্ভাসিতমুদীৰিতং.

৮৯৬. পৱিট্ঠানুপসম্পন্ন-ট্ঠানে ইধ চ ভিক্খুনী;

অনাপত্তি পুৰক্খত্ৱা, অত্থধম্মানুসাসনিং.

৮৯৭. ৱদতো পন ভিক্খুস্স, সমুট্ঠানাদযো নযা;

অনন্তৰসমা ৱুত্তা, দুক্খা হোতেত্থ ৱেদনা.

ওমসৱাদকথা.

৮৯৮. আপত্তি ভিক্খুপেসুঞ্ঞে, দুৱিধাকাৰতো সিযা;

অত্তনো পিযকামস্স, পৰভেদত্থিনোপি ৱা.

৮৯৯. অক্কোসন্তস্স পৰিযায-পাড়িমুত্তনযেহি চ;

ৱচনস্সুপসংহাৰে, হোতি আপত্তি দুক্কটং.

৯০০. তথা অনুপসম্পন্ন-অক্কোসং হৰতোপি চ;

ঠিতা অনুপসম্পন্ন-ট্ঠানে ইধ চ ভিক্খুনী.

৯০১. ন চেৱ পিযকামস্স, ন চ ভেদত্থিনোপি ৱা;

পাপানং গৰহত্থায, ৱদন্তস্স চ ভিক্খুনো.

৯০২. তথা উম্মত্তকাদীনং, অনাপত্তীতি দীপিতা;

সমুট্ঠানাদযো সব্বে, অদিন্নাদানসাদিসা.

পেসুঞ্ঞকথা.

৯০৩. ঠপেত্ৱা ভিক্খুনিং ভিক্খুং, অঞ্ঞেন পিটকত্তযং;

ধম্মং সহ ভণন্তস্স, তস্স পাচিত্তিযং সিযা.

৯০৪. ৰাজোৱাদাদযো ৱুত্তা, মহাপচ্চৰিযাদিসু;

অনাৰুড়্হেসু সঙ্গীতিং, আপত্তিজনকাতি হি.

৯০৫. দুক্কটং হোতি ভিক্খুস্মিং, তথা ভিক্খুনিযাপি চ;

ভিক্খুস্সানুপসম্পন্ন-সঞ্ঞিনো ৱিমতিস্স ৱা.

৯০৬. একতো উদ্দিসাপেতি, সজ্ঝাযং ৱা কৰোতি যো;

ভণন্তং পগুণং গন্থং, ওপাতেতি চ যো পন.

৯০৭. তস্স চানুপসম্পন্ন-সন্তিকে গণ্হতোপি চ;

উদ্দেসং তু অনাপত্তি, ভণনে তেন একতো.

৯০৮. ৱাচতো চ সমুট্ঠাতি, ৱাচাচিত্তদ্ৱযাপি চ;

সমুট্ঠানমিদং ৱুত্তং, পদসোধম্মসঞ্ঞিতং.

পদসোধম্মকথা.

৯০৯. সব্বচ্ছন্নপৰিচ্ছন্নে, নিপজ্জেয্য সচে পন;

যেভুয্যেন পৰিচ্ছন্নে, ছন্নে সেনাসনেপি ৱা.

৯১০. তিস্সন্নং পন ৰত্তীনং, উদ্ধং যো পন ৰত্তিযং;

ঠপেত্ৱা ভিক্খুং অঞ্ঞেন, তস্স পাচিত্তিযং সিযা.

৯১১. ৱত্থুং যং পন নিদ্দিট্ঠং, মেথুনস্স পহোনকং;

আপত্যন্তমসো তেন, তিৰচ্ছানগতেনপি.

৯১২. নিপন্নে উপসম্পন্নে, ইতৰো চে নিপজ্জতি;

ইতৰস্মিং নিপন্নে ৱা, সচে ভিক্খু নিপজ্জতি.

৯১৩. উভিন্নং উট্ঠহিত্ৱা ৱা, নিপজ্জনপযোগতো;

আপত্তানুপসম্পন্ন-গণনাযপি ৱা সিযা.

৯১৪. সচে পিধায ৱা গব্ভং, নিপজ্জতিপিধায ৱা;

আপত্তত্থঙ্গতে সূৰিযে, চতুত্থদিৱসে সিযা.

৯১৫. দিযড্ঢহত্থুব্বেধেন, পাকাৰচযনাদিনা;

পৰিক্খিত্তম্পি তং সব্বং, পৰিক্খিত্তন্তি ৱুচ্চতি.

৯১৬. ভিক্খুস্সন্তমসো দুস্স-কুটিযং ৱসতোপি চ;

সহসেয্যায আপত্তি, হোতীতি পৰিদীপিতো.

৯১৭. সব্বচ্ছন্নপৰিচ্ছন্ন-যেভুয্যাদিপ্পভেদতো;

সত্ত পাচিত্তিযানেত্থ, দট্ঠব্বানি সুবুদ্ধিনা.

৯১৮. অড্ঢচ্ছন্নপৰিচ্ছন্নে, দুক্কটং পৰিদীপিতং;

সব্বচূড়পৰিচ্ছন্ন-ছন্নাদীহিপি পঞ্চধা.

৯১৯. অনাপত্তি দিৰত্তং ৱা, তিৰত্তং ৱসতো সহ;

অৰুণস্স পুৰেযেৱ, ততিযায চ ৰত্তিযা.

৯২০. নিক্খমিত্ৱা ৱসন্তস্স, পুন সদ্ধিঞ্চ ভিক্খুনো;

তথা সব্বপৰিচ্ছন্ন-সব্বচ্ছন্নাদিকেপি চ.

৯২১. এৱং অনুপসম্পন্নে, নিপন্নেপি নিসীদতো;

সেসা এড়কলোমেন, সমুট্ঠানাদযো সমা.

সহসেয্যকথা.

৯২২. সচে তদহুজাতায, অপি যো মানুসিত্থিযা;

সহসেয্যং পকপ্পেয্য, তস্স পাচিত্তিযং সিযা.

৯২৩. দিস্সমানকৰূপায, যক্খিযা পেতিযা সহ;

ৰত্তিযং যো নিপজ্জেয্য, দেৱিযা পণ্ডকেন ৱা.

৯২৪. মেথুনৱত্থুভূতায, তিৰচ্ছানগতিত্থিযা;

ৱত্থূনং গণনাযস্স, হোতি আপত্তি দুক্কটং.

৯২৫. ইধেকদিৱসেনেৱ, আপত্তি পৰিদীপিতা;

সেসো অনন্তৰে ৱুত্ত-সদিসোৱ ৱিনিচ্ছযো.

দুতিযসহসেয্যকথা.

৯২৬. উদ্ধং ছপ্পঞ্চৱাচাহি, ৱিঞ্ঞুং পুৰিসৱিগ্গহং;

ৱিনা ধম্মং ভণন্তস্স, হোতি পাচিত্তি ইত্থিযা.

৯২৭. গাথাপাদো পনেকোৱ, একৱাচাতি সঞ্ঞিতো;

পদসোধম্মং নিদ্দিট্ঠং, ধম্মমট্ঠকথম্পি ৱা.

৯২৮. ছন্নং উপৰি ৱাচানং, পদাদীনং ৱসা পন;

দেসেন্তস্স সিযাপত্তি, পদাদিগণনায চ.

৯২৯. নিম্মিনিত্ৱা ঠিতেনাপি, সদ্ধিং পুৰিসৱিগ্গহং;

যক্খেনপি চ পেতেন, তিৰচ্ছানগতেনপি.

৯৩০. ঠিতস্স মাতুগামস্স, ধম্মং যো পন ভাসতি;

ছন্নং উপৰি ৱাচানং, তস্স পাচিত্তিযং সিযা.

৯৩১. পুৰিসে ইত্থিসঞ্ঞিস্স, ৱিমতিস্স চ পণ্ডকে;

উত্তৰি ছহি ৱাচাহি, ৱদতো হোতি দুক্কটং.

৯৩২. ইত্থিৰূপং গহেত্ৱান, ঠিতানং ভাসতোপি চ;

দুক্কটং যক্খিপেতীনং, তিৰচ্ছানগতিত্থিযা.

৯৩৩. পুৰিসে সতি ৱিঞ্ঞুস্মিং, সযং উট্ঠায ৱা পুন;

দেসেন্তস্স নিসীদিত্ৱা, মাতুগামস্স ৱা তথা.

৯৩৪. অঞ্ঞিস্সা পুন অঞ্ঞিস্সা, ইত্থিযা ভণতোপি চ;

ছহি পঞ্চহি ৱাচাহি, অনাপত্তি পকাসিতা.

৯৩৫. পদসোধম্মতুল্যাৱ, সমুট্ঠানাদযো মতা;

অযমেৱ ৱিসেসোতি, ক্ৰিযাক্ৰিযমিদং পন.

ধম্মদেসনাকথা.

৯৩৬. মহগ্গতং পণীতং ৱা, আৰোচেন্তস্স ভিক্খুনো;

ঠপেত্ৱা ভিক্খুনিং ভিক্খুং, ভূতে পাচিত্তিযং সিযা.

৯৩৭. নো চে জানাতি সো ৱুত্তং, আৰোচেন্তস্স ভিক্খুনো;

পৰিযাযৱচনে চস্স, হোতি আপত্তি দুক্কটং.

৯৩৮. অনাপত্তি তথাৰূপে, কাৰণে সতি ভাসতো;

সব্বস্সপি চ সীলাদিং, ৱদতো আদিকম্মিনো.

৯৩৯. উম্মত্তকপদং এত্থ, ন ৱুত্তং তদসম্ভৱা;

ভূতাৰোচনকং নাম, সমুট্ঠানমিদং মতং.

৯৪০. কাযতো ৱাচতো কায-ৱাচতো চ তিধা সিযা;

কুসলাব্যাকতেহেৱ, দ্ৱিচিত্তঞ্চ দ্ৱিৱেদনং.

ভূতাৰোচনকথা.

৯৪১. আপত্তিং পন দুট্ঠুল্লং, আৰোচেন্তস্স ভিক্খুনো;

আপত্তানুপসম্পন্নে, ঠপেত্ৱা ভিক্খুসম্মুতিং.

৯৪২. সঙ্ঘাদিসেসমাপন্নো, মোচেত্ৱা অসুচিং অযং;

ঘটেত্ৱা ৱত্থুনাপত্তিং, ৱদন্তস্সেৱ ৱজ্জতা.

৯৪৩. ইধ সঙ্ঘাদিসেসাৱ, দুট্ঠুল্লাপত্তিযো মতা;

তস্মা সুদ্ধস্স দুট্ঠুল্লং, ৱদং পাচিত্তিযং ফুসে.

৯৪৪. অদুট্ঠুল্লায দুট্ঠুল্ল-সঞ্ঞিনো ৱিমতিস্স ৱা;

আপত্তিযোপি ৱা সেসা, আৰোচেন্তস্স দুক্কটং.

৯৪৫. তথা অনুপসম্পন্নে, দুট্ঠুল্লং পঞ্চধা মতং;

অজ্ঝাচাৰমদুট্ঠুল্লং, আৰোচেতুং ন ৱট্টতি.

৯৪৬. ৱত্থুং ৱা পন আপত্তিং, আৰোচেন্তস্স কেৱলং;

অনাপত্তীতি ঞাতব্বং, ভিক্খুসম্মুতিযা তথা.

৯৪৭. এৱমুম্মত্তকাদীনং, সমুট্ঠানাদযো নযা;

অদিন্নাদানতুল্যাৱ, ৱেদনা দুক্খৱেদনা.

দুট্ঠুল্লাৰোচনকথা.

৯৪৮. খণেয্য ৱা খণাপেয্য, পথৱিং যো অকপ্পিযং;

ভেদাপেয্য চ ভিন্দেয্য, তস্স পাচিত্তিযং সিযা.

৯৪৯. সযমেৱ খণন্তস্স, পথৱিং পন ভিক্খুনো;

পহাৰস্মিং পহাৰস্মিং, পাচিত্তিযমুদীৰিতং.

৯৫০. আণাপেন্তস্স একাৱ, দিৱসং খণতোপি চ;

পুনপ্পুনাণাপেন্তস্স, ৱাচতো ৱাচতো সিযা.

৯৫১. ‘‘খণ পোক্খৰণিং ৱাপিং, আৱাটং খণ কূপকং’’;

ইচ্চেৱং তু ৱদন্তস্স, কোচি দোসো ন ৱিজ্জতি.

৯৫২. ‘‘ইমং খণ চ ওকাসং, ইধ পোক্খৰণিং খণ;

ইমস্মিং খণ ওকাসে’’, ৱত্তুমেৱং ন ৱট্টতি.

৯৫৩. ‘‘কন্দং খণ কুৰুন্দং ৱা, থূণং খণ চ খাণুকং;

মূলং খণ চ তালং ৱা’’, এৱং ৱদতি ৱট্টতি.

৯৫৪. ‘‘ইমং মূলং ইমং ৱল্লিং, ইমং তালং ইমং নড়ং;

খণা’’তি নিযমেত্ৱান, ৱত্তুং পন ন ৱট্টতি.

৯৫৫. উস্সিঞ্চিতুং সচে সক্কা, ঘটেহি তনুকদ্দমো;

ভিক্খুনা অপনেতব্বো, বহলং ন চ ৱট্টতি.

৯৫৬. ভিজ্জিত্ৱা নদিযাদীনং, পতিতং তোযসন্তিকে;

তটং ৱট্ঠং ৱিকোপেতুং, চাতুমাসম্পি ৱট্টতি.

৯৫৭. সচে পততি তোযস্মিং, দেৱে ৱুট্ঠেপি ৱট্টতি;

চাতুমাসমতিক্কন্তে, তোযে দেৱো হি ৱস্সতি.

৯৫৮. পাসাণপিট্ঠিযং সোণ্ডিং, খণন্তি যদি তত্থ তু;

ৰজং পততি চে পুব্বং, পচ্ছা দেৱোভিৱস্সতি.