পাটিদেসনীযকথা

১৮৩০. যো চন্তৰঘৰং ভিক্খু, পৱিট্ঠায তু হত্থতো;

অঞ্ঞাতিকায যং কিঞ্চি, তস্স ভিক্খুনিযা পন.

১৮৩১. সহত্থা পটিগ্গণ্হেয্য, খাদনং ভোজনম্পি ৱা;

গহণে দুক্কটং ভোগে, পাটিদেসনিযং সিযা.

১৮৩২. ৰথিকাযপি ৱা ব্যূহে, সন্ধিসিঙ্ঘাটকেসু ৱা;

হত্থিসালাদিকে ঠত্ৱা, গণ্হতোপি অযং নযো.

১৮৩৩. ৰথিকায সচে ঠত্ৱা, দেতি ভিক্খুনি ভোজনং;

আপত্তি অন্তৰাৰামে, ঠত্ৱা গণ্হাতি ভিক্খু চে.

১৮৩৪. এত্থন্তৰঘৰং তস্সা, পৱিট্ঠায হি ৱাক্যতো;

ভিক্খুস্স চ ঠিতট্ঠানং, নপ্পমাণন্তি ৱণ্ণিতং.

১৮৩৫. তস্মা ভিক্খুনিযা ঠত্ৱা, আৰামাদীসু দেন্তিযা;

ৱীথিযাদীসু চে ঠত্ৱা, ন দোসো পটিগণ্হতো.

১৮৩৬. যামকালিকসত্তাহ-কালিকং যাৱজীৱিকং;

আহাৰত্থায গহণে, অজ্ঝোহাৰে চ দুক্কটং.

১৮৩৭. আমিসেন অসম্ভিন্ন-ৰসং সন্ধায ভাসিতং;

পাটিদেসনিযাপত্তি, সম্ভিন্নেকৰসে সিযা.

১৮৩৮. একতোউপসম্পন্ন-হত্থতো পটিগণ্হতো;

কালিকানং চতুন্নম্পি, আহাৰত্থায দুক্কটং.

১৮৩৯. ঞাতিকাযপি অঞ্ঞাতি-সঞ্ঞিনো ৱিমতিস্স ৱা;

দুক্কটং ঞাতিসঞ্ঞিস্স, তথা অঞ্ঞাতিকায ৱা.

১৮৪০. দাপেন্তিযা অনাপত্তি, দদমানায ৱা পন;

নিক্খিপিত্ৱান্তৰাৰামা-দীসু ঠত্ৱাপি দেন্তিযা.

১৮৪১. গামতো নীহৰিত্ৱা ৱা, দেতি চে বহি ৱট্টতি;

‘‘পচ্চযে সতি ভুঞ্জা’’তি, দেতি চে কালিকত্তযং.

১৮৪২. হত্থতো সামণেৰীনং, সিক্খমানায ৱা তথা;

ইদং এড়কলোমেন, সমুট্ঠানং সমং মতং.

পঠমপাটিদেসনীযকথা.

১৮৪৩. অৱুত্তে ‘‘অপসক্কা’’তি, একেনাপি চ ভিক্খুনা;

সচেজ্ঝোহৰণত্থায, আমিসং পটিগণ্হতি.

১৮৪৪. গহণে দুক্কটং ভোগে, পাটিদেসনিযং সিযা;

একতোউপসম্পন্নং, ন ৱাৰেন্তস্স দুক্কটং.

১৮৪৫. তথেৱানুপসম্পন্না-যুপসম্পন্নসঞ্ঞিনো;

তত্থ ৱেমতিকস্সাপি, হোতি আপত্তি দুক্কটং.

১৮৪৬. অনাপত্তিত্তনো ভত্তং, পদাপেতি ন দেতি চে;

তথা অঞ্ঞস্স ভত্তং ৱা, ন দাপেতি পদেতি চে.

১৮৪৭. যং ন দিন্নং তং দাপেতি, ন দিন্নং যত্থ ৱাপি চ;

তত্থ তম্পি চ সব্বেসং, সমং দাপেতি ভিক্খুনী.

১৮৪৮. ৱোসাসন্তী ঠিতা সিক্খ-মানা ৱা সামণেৰিকা;

ভোজনানি চ পঞ্চেৱ, ৱিনা, উম্মত্তকাদিনো.

১৮৪৯. কথিনেন সমুট্ঠানং, সমানন্তি পকাসিতং;

ক্ৰিযাক্ৰিযমিদং ৱুত্তং, তিচিত্তঞ্চ তিৱেদনং.

দুতিযপাটিদেসনীযকথা.

১৮৫০. সেক্খন্তি সম্মতে ভিক্খু, লদ্ধসম্মুতিকে কুলে;

ঘৰূপচাৰোক্কমনা, পুব্বেৱ অনিমন্তিতো.

১৮৫১. অগিলানো গহেত্ৱা চে, পৰিভুঞ্জেয্য আমিসং;

গহণে দুক্কটং ভোগে, পাটিদেসনিযং সিযা.

১৮৫২. যামকালিকসত্তাহ-কালিকে যাৱজীৱিকে;

গহণে পৰিভোগে চ, হোতি আপত্তি দুক্কটং.

১৮৫৩. অসেক্খসম্মতে সেক্খ-সম্মতন্তি চ সঞ্ঞিনো;

তত্থ ৱেমতিকস্সাপি, তথেৱ পৰিদীপিতং.

১৮৫৪. অনাপত্তি গিলানস্স, গিলানস্সাৱসেসকে;

নিমন্তিতস্স ৱা ভিক্খা, অঞ্ঞেসং তত্থ দীযতি.

১৮৫৫. ঘৰতো নীহৰিত্ৱা ৱা, দেন্তি চে যত্থ কত্থচি;

নিচ্চভত্তাদিকে ৱাপি, তথা উম্মত্তকাদিনো.

১৮৫৬. অনাগতে হি ভিক্খুম্হি, ঘৰতো পঠমং পন;

নীহৰিত্ৱা সচে দ্ৱাৰে, সম্পত্তে দেন্তি ৱট্টতি.

১৮৫৭. ভিক্খুং পন চ দিস্ৱাৱ, নীহৰিত্ৱান গেহতো;

ন ৱট্টতি সচে দেন্তি, সমুট্ঠানেড়কূপমং.

ততিযপাটিদেসনীযকথা.

১৮৫৮. গহট্ঠেনাগহট্ঠেন, ইত্থিযা পুৰিসেন ৱা;

আৰামং উপচাৰং ৱা, পৱিসিত্ৱা সচে পন.

১৮৫৯. ‘‘ইত্থন্নামস্স তে ভত্তং, যাগু ৱা আহৰীযতি’’;

এৱমাৰোচিতং ৱুত্তং, পটিসংৱিদিতন্তি হি.

১৮৬০. আহৰীযতু তং পচ্ছা, যথাৰোচিতমেৱ ৱা;

তস্স ৱা পৰিৱাৰম্পি, অঞ্ঞং কত্ৱা বহুং পন.

১৮৬১. যাগুযা ৱিদিতং কত্ৱা, পূৱং ভত্তং হৰন্তি চে;

ইদম্পি ৱিদিতং ৱুত্তং, ৱট্টতীতি কুৰুন্দিযং.

১৮৬২. কুলানি পন অঞ্ঞানি, দেয্যধম্মং পনত্তনো;

হৰন্তি তেন সদ্ধিং চে, সব্বং ৱট্টতি তম্পি চ.

১৮৬৩. অনাৰোচিতমেৱং যং, যং আৰামমনাভতং;

তং অসংৱিদিতং নাম, সহধম্মিকঞাপিতং.

১৮৬৪. যং অসংৱিদিতং কত্ৱা, আভতং পন তং বহি;

আৰামং পন পেসেত্ৱা, কাৰাপেত্ৱা তমাহৰে.

১৮৬৫. গন্ত্ৱা ৱা অন্তৰামগ্গে, গহেতব্বং তু ভিক্খুনা;

সচে এৱমকত্ৱা তং, আৰামে উপচাৰতো.

১৮৬৬. গহেত্ৱাজ্ঝোহৰন্তস্স, গহণে দুক্কটং সিযা;

অজ্ঝোহাৰপযোগেসু, পাটিদেসনিযং মতং.

১৮৬৭. পটিসংৱিদিতেযেৱ, অসংৱিদিতসঞ্ঞিনো;

তত্থ ৱেমতিকস্সাপি, হোতি আপত্তি দুক্কটং.

১৮৬৮. পটিসংৱিদিতে তস্স, গিলানস্সাৱসেসকে;

বহাৰামে গহেত্ৱা ৱা, অন্তোযেৱস্স ভুঞ্জতো.

১৮৬৯. তত্থজাতফলাদীনি, অনাপত্তেৱ খাদতো;

সমুট্ঠানাদযো সব্বে, কথিনেন সমা মতা.

চতুত্থপাটিদেসনীযকথা.

ইতি ৱিনযৱিনিচ্ছযে পাটিদেসনীযকথা নিট্ঠিতা.