সঙ্ঘাদিসেসকথা

৩২৫. মোচেতুকামতাচিত্তং, ৱাযামো সুক্কমোচনং;

অঞ্ঞত্ৰ সুপিনন্তেন, হোতি সঙ্ঘাদিসেসতা.

৩২৬. পৰেনুপক্কমাপেত্ৱা, অঙ্গজাতং পনত্তনো;

সুক্কং যদি ৱিমোচেতি, গৰুকং তস্স নিদ্দিসে.

৩২৭. সঞ্চিচ্চুপক্কমন্তস্স, অঙ্গজাতং পনত্তনো;

থুল্লচ্চযং সমুদ্দিট্ঠং, সচে সুক্কং ন মুচ্চতি.

৩২৮. সঞ্চিচ্চুপক্কমন্তস্স, আকাসে কম্পনেনপি;

হোতি থুল্লচ্চযং তস্স, যদি সুক্কং ন মুচ্চতি.

৩২৯. ৱত্থিং কীড়ায পূৰেত্ৱা, পস্সাৱেতুং ন ৱট্টতি;

নিমিত্তং পন হত্থেন, কীড়াপেন্তস্স দুক্কটং.

৩৩০. তিস্সন্নং পন ইত্থীনং, নিমিত্তং ৰত্তচেতসা;

পুৰতো পচ্ছতো ৱাপি, ওলোকেন্তস্স দুক্কটং.

৩৩১. একেনেকং পযোগেন, দিৱসম্পি চ পস্সতো;

নাপত্তিযা ভৱে অঙ্গং, উম্মীলননিমীলনং.

৩৩২. অমোচনাধিপ্পাযস্স, অনুপক্কমতোপি চ;

সুপিনন্তেন মুত্তস্মিং, অনাপত্তি পকাসিতা.

সুক্কৱিসট্ঠিকথা.

৩৩৩. আমসন্তো মনুস্সিত্থিং, কাযসংসগ্গৰাগতো;

‘‘মনুস্সিত্থী’’তি সঞ্ঞায, হোতি সঙ্ঘাদিসেসিকো.

৩৩৪. লোমেনন্তমসো লোমং, ফুসন্তস্সাপি ইত্থিযা;

কাযসংসগ্গৰাগেন, হোতি আপত্তি ভিক্খুনো.

৩৩৫. ইত্থিযা যদি সম্ফুট্ঠো, ফস্সং সেৱনচেতনো;

ৱাযমিত্ৱাধিৱাসেতি, হোতি সঙ্ঘাদিসেসতা.

৩৩৬. একেন পন হত্থেন, গহেত্ৱা দুতিযেন ৱা;

তত্থ তত্থ ফুসন্তস্স, একাৱাপত্তি দীপিতা.

৩৩৭. অগ্গহেত্ৱা ফুসন্তস্স, যাৱ পাদঞ্চ সীসতো;

কাযা হত্থমমোচেত্ৱা, একাৱ দিৱসম্পি চ.

৩৩৮. অঙ্গুলীনং তু পঞ্চন্নং, গহণে একতো পন;

একাযেৱ সিযাপত্তি, ন হি কোট্ঠাসতো সিযা.

৩৩৯. নানিত্থীনং সচে পঞ্চ, গণ্হাত্যঙ্গুলিযো পন;

একতো পঞ্চ সঙ্ঘাদি-সেসা হোন্তিস্স ভিক্খুনো.

৩৪০. ইত্থিযা ৱিমতিস্সাপি, পণ্ডকাদিকসঞ্ঞিনো;

কাযেন ইত্থিযা কায-সম্বদ্ধং ফুসতোপি ৱা.

৩৪১. পণ্ডকে যক্খিপেতীসু, তস্স থুল্লচ্চযং সিযা;

দুক্কটং কাযসংসগ্গে, তিৰচ্ছানগতিত্থিযা.

৩৪২. ভিক্খুনো পটিবদ্ধেন, কাযেন পন ইত্থিযা;

কাযেন পটিবদ্ধঞ্চ, ফুসন্তস্সপি দুক্কটং.

৩৪৩. ইত্থীনং ইত্থিৰূপঞ্চ, দাৰুলোহমযাদিকং;

তাসং ৱত্থমলঙ্কাৰং, আমসন্তস্স দুক্কটং.

৩৪৪. তত্থজাতফলং খজ্জং, মুগ্গাদিং তত্থজাতকং;

ধঞ্ঞানি পন সব্বানি, আমসন্তস্স দুক্কটং.

৩৪৫. সব্বং ধমনসঙ্খাদিং, পঞ্চঙ্গতুৰিযম্পি চ;

ৰতনানি চ সব্বানি, আমসন্তস্স দুক্কটং.

৩৪৬. সব্বমাৱুধভণ্ডঞ্চ, জিযা চ ধনুদণ্ডকো;

অনামাসমিদং সব্বং, জালঞ্চ সৰৱাৰণং.

৩৪৭. সুৱণ্ণপটিবিম্বাদি, চেতিযং আৰকূটকং;

অনামাসন্তি নিদ্দিট্ঠং, কুৰুন্দট্ঠকথায হি.

৩৪৮. সব্বং ওনহিতুং ৱাপি, ওনহাপেতুমেৱ ৱা;

ৱাদাপেতুঞ্চ ৱাদেতুং, ৱাদিতং ন চ ৱট্টতি.

৩৪৯. ‘‘কৰিস্সামুপহাৰ’’ন্তি, ৱুত্তেন পন ভিক্খুনা;

পূজা বুদ্ধস্স কাতব্বা, ৱত্তব্বাতি চ ৱিঞ্ঞুনা.

৩৫০. সযং ফুসিযমানস্স, ইত্থিযা পন ধুত্তিযা;

অৱাযমিত্ৱা কাযেন, ফস্সং পটিৱিজানতো.

৩৫১. অনাপত্তি অসঞ্চিচ্চ, অজানন্তস্স ভিক্খুনো;

মোক্খাধিপ্পাযিনো চেৱ, তথা উম্মত্তকাদিনো.

৩৫২. পঠমেন সমানাৱ, সমুট্ঠানাদযো পন;

কাযসংসগ্গৰাগস্স, তথা সুক্কৱিসট্ঠিযা.

কাযসংসগ্গকথা.

৩৫৩. দুট্ঠুল্লৱাচস্সাদেন, ইত্থিযা ইত্থিসঞ্ঞিনো;

দ্ৱিন্নঞ্চ পন মগ্গানং, ৱণ্ণাৱণ্ণৱসেন চ.

৩৫৪. মেথুনযাচনাদীহি, ওভাসন্তস্স ভিক্খুনো;

ৱিঞ্ঞুং অন্তমসো হত্থ-মুদ্দাযপি গৰুং সিযা.

৩৫৫. ‘‘সিখৰণীসি, সম্ভিন্না, উভতোব্যঞ্জনা’’তি চ;

অক্কোসৱচনেনাপি, গৰুকং তু সুণন্তিযা.

৩৫৬. পুনপ্পুনোভাসন্তস্স, একৱাচায ৱা বহূ;

গণনায চ ৱাচানং, ইত্থীনং গৰুকা সিযুং.

৩৫৭. সা চে নপ্পটিজানাতি, তস্স থুল্লচ্চযং সিযা;

আদিস্স ভণনে চাপি, উব্ভজাণুমধক্খকং.

৩৫৮. উব্ভক্খকমধোজাণু-মণ্ডলং পন উদ্দিসং;

ৱণ্ণাদিভণনে কায-পটিবদ্ধে চ দুক্কটং.

৩৫৯. থুল্লচ্চযং ভৱে তস্স, পণ্ডকে যক্খিপেতিসু;

অধক্খকোব্ভজাণুম্হি, দুক্কটং পণ্ডকাদিসু.

৩৬০. উব্ভক্খকমধোজাণু-মণ্ডলেপি অযং নযো;

সব্বত্থ দুক্কটং ৱুত্তং, তিৰচ্ছানগতিত্থিযা.

৩৬১. অত্থধম্মপুৰেক্খাৰং, কত্ৱা ওভাসতোপি চ;

ৱদতোপি অনাপত্তি, পুৰক্খত্ৱানুসাসনিং.

৩৬২. তথা উম্মত্তকাদীনং, সমুট্ঠানাদযো নযা;

অদিন্নাদানতুল্যাৱ, ৱেদনেত্থ দ্ৱিধা মতা.

দুট্ঠুল্লৱাচাকথা.

৩৬৩. ৱণ্ণং পনত্তনো কাম-পাৰিচৰিযায ভাসতো;

তস্মিংযেৱ খণে সা চে, জানাতি গৰুকং সিযা.

৩৬৪. নো চে জানাতি সা যক্খি-পেতিদেৱীসু পণ্ডকে;

হোতি থুল্লচ্চযং তস্স, সেসে আপত্তি দুক্কটং.

৩৬৫. চীৱৰাদীহি অঞ্ঞেহি, ৱত্থুকামেহি অত্তনো;

নত্থি দোসো ভণন্তস্স, পাৰিচৰিযায ৱণ্ণনং.

৩৬৬. ইত্থিসঞ্ঞা মনুস্সিত্থী, পাৰিচৰিযায ৰাগিতা;

ওভাসো তেন ৰাগেন, খণে তস্মিং ৱিজাননং.

৩৬৭. পঞ্চঙ্গানি ইমানেত্থ, ৱেদিতব্বানি ৱিঞ্ঞুনা;

সমুট্ঠানাদযোপ্যস্স, অনন্তৰসমা মতা.

অত্তকামপাৰিচৰিযকথা.

৩৬৮. পটিগ্গণ্হাতি সন্দেসং, পুৰিসস্সিত্থিযাপি ৱা;

ৱীমংসতি গৰু হোতি, পচ্চাহৰতি চে পন.

৩৬৯. ‘‘যস্সা হি সন্তিকং গন্ত্ৱা, আৰোচেহী’’তি পেসিতো;

তমদিস্ৱা তদঞ্ঞস্স, অৱস্সাৰোচকস্স সো.

৩৭০. ‘‘আৰোচেহী’’তি ৱত্ৱা তং, পচ্চাহৰতি চে পন;

ভিক্খু সঙ্ঘাদিসেসম্হা, সঞ্চৰিত্তা ন মুচ্চতি.

৩৭১. ‘‘মাতৰা ৰক্খিতং ইত্থিং, গচ্ছ ব্ৰূহী’’তি পেসিতো;

পিতুৰক্খিতমঞ্ঞং ৱা, ৱিসঙ্কেতোৱ ভাসতো.

৩৭২. পটিগ্গণ্হনতাদীহি, তীহি অঙ্গেহি সংযুতে;

সঞ্চৰিত্তে সমাপন্নে, গৰুকাপত্তিমাদিসে.

৩৭৩. দ্ৱীহি থুল্লচ্চযং ৱুত্তং, পণ্ডকাদীসু তীহিপি;

একেনেৱ চ সব্বত্থ, হোতি আপত্তি দুক্কটং.

৩৭৪. চেতিযস্স চ সঙ্ঘস্স, গিলানস্স চ ভিক্খুনো;

গচ্ছতো পন কিচ্চেন, অনাপত্তি পকাসিতা.

৩৭৫. মনুস্সত্তং তথা তস্সা, ননালংৱচনীযতা;

পটিগ্গণ্হনতাদীনং, ৱসা পঞ্চঙ্গিকং মতং.

৩৭৬. ইদঞ্হি ছসমুট্ঠানং, অচিত্তকমুদীৰিতং;

অলংৱচনীযত্তং ৱা, পণ্ণত্তিং ৱা অজানতো.

৩৭৭. গহেত্ৱা সাসনং কায-ৱিকাৰেনূপগম্ম তং;

ৱীমংসিত্ৱা হৰন্তস্স, গৰুকং কাযতো সিযা.

৩৭৮. সুত্ৱা যথানিসিন্নোৱ, ৱচনং ইত্থিযা পুন;

তং তত্থেৱাগতস্সেৱ, আৰোচেন্তস্স ৱাচতো.

৩৭৯. অজানন্তস্স পণ্ণত্তিং, কাযৱাচাহি তং ৱিধিং;

কৰোতো হৰতো ৱাপি, গৰুকং কাযৱাচতো.

৩৮০. জানিত্ৱাপি কৰোন্তস্স, গৰুকাপত্তিযো তথা;

সচিত্তকেহি তীহেৱ, সমুট্ঠানেহি জাযৰে.

সঞ্চৰিত্তকথা.

৩৮১. সযংযাচিতকেহেৱ, কুটিকং অপ্পমাণিকং;

অত্তুদ্দেসং কৰোন্তস্স, তথাদেসিতৱত্থুকং.

৩৮২. হোন্তি সঙ্ঘাদিসেসা দ্ৱে, সাৰম্ভাদীসু দুক্কটং;

সচে একৱিপন্না সা, গৰুকং এককং সিযা.

৩৮৩. পুৰিসং যাচিতুং কম্ম-সহাযত্থায ৱট্টতি;

মূলচ্ছেজ্জৱসেনেৱ, যাচমানস্স দুক্কটং.

৩৮৪. অৱজ্জং হত্থকম্মম্পি, যাচিতুং পন ৱট্টতি;

হত্থকম্মম্পি নামেতং, কিঞ্চি ৱত্থু ন হোতি হি.

৩৮৫. গোণমাযাচমানস্স, ঠপেত্ৱা ঞাতকাদিকে;

দুক্কটং তস্স নিদ্দিট্ঠং, মূলচ্ছেজ্জেন তেসুপি.

৩৮৬. ‘‘গোণং দেমা’’তি ৱুত্তেপি, গহেতুং ন চ ৱট্টতি;

সকটং দাৰুভণ্ডত্তা, গহেতুং পন ৱট্টতি.

৩৮৭. ৱাসিফৰসুকুদ্দাল-কুঠাৰাদীস্ৱযং নযো;

অনজ্ঝাৱুত্থকং সব্বং, হৰাপেতুম্পি ৱট্টতি.

৩৮৮. ৱল্লিআদিম্হি সব্বস্মিং, গৰুভণ্ডপ্পহোনকে;

পৰেসং সন্তকেযেৱ, হোতি আপত্তি দুক্কটং.

৩৮৯. পচ্চযেসু হি তীস্ৱেৱ, ৱিঞ্ঞত্তি ন চ ৱট্টতি;

ততিযে পৰিকথোভাস-নিমিত্তানি চ লব্ভৰে.

৩৯০. ‘‘অদেসিতে চ ৱত্থুস্মিং, পমাণেনাধিকং কুটিং;

কৰিস্সামী’’তি চিন্তেত্ৱা, অৰঞ্ঞং গচ্ছতোপি চ.

৩৯১. ফৰসুং ৱাপি ৱাসিং ৱা, নিসেন্তস্সাপি দুক্কটং;

ছিন্দতো দুক্কটং ৰুক্খং, তস্স পাচিত্তিযা সহ.

৩৯২. এৱং পুব্বপযোগস্মিং, কুটিকাৰকভিক্খুনো;

যথাপযোগমাপত্তিং, ৱিনযঞ্ঞূ ৱিনিদ্দিসে.

৩৯৩. যা পন দ্ৱীহি পিণ্ডেহি, নিট্ঠানং তু গমিস্সতি;

হোতি থুল্লচ্চযং তেসু, পঠমে দুতিযে গৰু.

৩৯৪. অনাপত্তি সচঞ্ঞস্স, দেতি ৱিপ্পকতং কুটিং;

তথা ভূমিং সমং কত্ৱা, ভিন্দতোপি চ তং কুটিং.

৩৯৫. গুহং লেণং কৰোন্তস্স, তিণপণ্ণচ্ছদম্পি ৱা;

ৱাসাগাৰং ঠপেত্ৱান, অঞ্ঞস্সত্থায ৱা তথা.

৩৯৬. দেসাপেত্ৱাৱ ভিক্খূহি, ৱত্থুং পন চ ভিক্খুনো;

ক্ৰিযতোৱ সমুট্ঠাতি, কৰোতো অপ্পমাণিকং.