অনিযতকথা

৫৪২. ৰহো নিসজ্জস্সাদেন, মাতুগামস্স সন্তিকং;

গন্তুকামো নিৱাসেতি, অক্খিং অঞ্জেতি ভুঞ্জতি.

৫৪৩. পযোগে চ পযোগে চ, হোতি সব্বত্থ দুক্কটং;

গচ্ছতো পদৱাৰেন, গন্ত্ৱা চস্স নিসীদতো.

৫৪৪. নিসজ্জায উভিন্নম্পি, পযোগগণনায চ;

হোতি পাচিত্তিযং তস্স, বহুকানি বহূস্ৱপি.

৫৪৫. সমীপেপি ঠিতো অন্ধো, অন্তোদ্ৱাদসহত্থকে;

ন কৰোতি অনাপত্তিং, ইত্থীনং তু সতম্পি চ.

৫৪৬. চক্খুমাপি নিপজ্জিত্ৱা, নিদ্দাযন্তোপি কেৱলং;

দ্ৱাৰে পিহিতগব্ভস্স, নিসিন্নোপি ন ৰক্খতি.

৫৪৭. অনন্ধে সতি ৱিঞ্ঞুস্মিং, ঠিতস্সাৰহসঞ্ঞিনো;

নিসজ্জপচ্চযা দোসো, নত্থি ৱিক্খিত্তচেতসো.

৫৪৮. ন দোসুম্মত্তকাদীনং, আপত্তীহিপি তীহিপি;

সমুট্ঠানাদযো তুল্যা, পঠমন্তিমৱত্থুনা.

পঠমানিযতকথা.

৫৪৯. অনন্ধাবধিৰো ৱিঞ্ঞূ, ইত্থী ৱা পুৰিসোপি ৱা;

অন্তোদ্ৱাদসহত্থট্ঠো, অনাপত্তিকৰো সিযা.

৫৫০. অন্ধো অবধিৰো ৱাপি, বধিৰো ৱাপি চক্খুমা;

ন কৰোতি অনাপত্তিং, তিসমুট্ঠানমেৱিদং.

দুতিযানিযতকথা.

ইতি ৱিনযৱিনিচ্ছযে অনিযতকথা নিট্ঠিতা.