সিক্খাকৰণীযকথাৱণ্ণনা

২৪৩৮. পাটিদেসনীযানন্তৰং উদ্দিট্ঠানি পঞ্চসত্ততি সেখিযানি মহাৱিভঙ্গে ৱুত্তৱিনিচ্ছযানেৱাতি তদেৱ অতিদিসন্তো আহ ‘‘সেখিযা পন যে ধম্মা’’তিআদি. যে পন পঞ্চসত্ততি সেখিযা ধম্মা পাটিদেসনীযানন্তৰং উদ্দিট্ঠা, তেসং অত্থৱিনিচ্ছযো মহাৱিভঙ্গে ৱুত্তোৱাতি যোজনা, অত্থিকেহি ততোৱ গহেতব্বো, ন পুন ইধ দস্সেস্সামীতি অধিপ্পাযো.

ইতি ৱিনযত্থসাৰসন্দীপনিযা ৱিনযৱিনিচ্ছযৱণ্ণনায

সিক্খাকৰণীযকথাৱণ্ণনা নিট্ঠিতা.

২৪৩৯-৪০. সৱিভঙ্গানং উভতোৱিভঙ্গসহিতানং উভতোপাতিমোক্খানং ভিক্খূনং, ভিক্খুনীনঞ্চ পাতিমোক্খানং অট্ঠকথাসাৰো সব্বট্ঠকথানং সাৰভূতো যো সো অত্থো ৱিসেসতো সমন্তপাসাদিকাযং ৱুত্তো. তং সব্বং সাৰভূতং অত্থং সমাদায যো ৱিনযস্সৱিনিচ্ছযো ভিক্খূনং, ভিক্খুনীনঞ্চ হিতত্থায মযা কতো ৱিৰচিতোতি সম্বন্ধো.

২৪৪১. নো অম্হাকং পটিভাণজং পটিভাণতো জাতং ইমং তু ইমং ৱিনযৱিনিচ্ছযং পন যে জন্তুনো সত্তা সুণন্তি, তে জন্তুনো জনস্স সত্তলোকস্স হিতে অধিসীলসিক্খাপকাসকত্তা উপকাৰকে সুমতস্স সোভণন্তি বুদ্ধাদীহি মতস্স, সোভণেহি ৱা বুদ্ধাদীহি মতস্স পটিৱিদ্ধস্স অমতমহানিব্বানস্স অযনে অঞ্জসভূতে জনস্স তাযনে কাযিকৱাচসিকৱীতিক্কমপটিপক্খত্তা অপাযভযনিৱাৰণট্ঠেন তাণভূতে ৱিনযে ৱিনযপিটকে পকতঞ্ঞুনো যথাসভাৱং জানন্তা তঞ্ঞুনো ভৱন্তি তং তং কপ্পিযাকপ্পিযং সেৱিতব্বাসেৱিতব্বং জানন্তা ভৱন্তেৱাতি অত্থো.

২৪৪২. বহৱো সাৰভূতা নযা এত্থাতি বহুসাৰনযো, তস্মিং বহুসাৰনযে. পৰমে উত্তমে ৱিনযে ৱিনযপিটকে ৱিসাৰদতং ৱেসাৰজ্জং অসংহীৰঞাণং অভিপত্থযতা ৱিসেসতো ইচ্ছন্তেন বুদ্ধিমতা ঞাণাতিসযমন্তেন যতিনা সব্বকালং তিৱিধসিক্খাপৰিপূৰণে অসিথিলপৱত্তসম্মাৱাযামেন ভিক্খুনা ইমস্মিং ৱিনযৱিনিচ্ছযে পৰমা উত্তৰিতৰা মহতী আদৰতা কৰণীযতমা ৱিসেসেন কাতব্বাযেৱাতি অত্থো.

২৪৪৩. ইচ্চেৱং সীলৱিসুদ্ধিসাধনে ৱিনযপিটকে ৱেসাৰজ্জহেতুতায ইমস্স ৱিনযৱিনিচ্ছযস্স সীলৱিসুদ্ধিআদিসত্তৱিসুদ্ধিপৰম্পৰায অধিগন্তব্বস্স অমতমহানিব্বানস্স পত্তিযাপি মূলভূততং দস্সেতুমাহ ‘‘অৱগচ্ছতী’’তিআদি.

যো পন ভিক্খু অত্থযুত্তং মহতা পযোজনত্থেন, অভিধেয্যত্থেন চ সমন্নাগতং ইমং ৱিনযস্সৱিনিচ্ছযং অৱগচ্ছতি অৱেচ্চ যাথাৱতো জানাতি, সো অপৰম্পৰং মৰণাভাৱা অমৰং জৰাযাভাৱা অজৰং ৰাগাদিকিলেসৰজপটিপক্খত্তা অৰজং অনেকপ্পকাৰৰোগানং অপ্পৱত্তিহেতুত্তা অৰুজং সন্তিপদং সব্বকিলেসদৰথপৰিড়াহানং ৱূপসমহেতুত্তা সন্তিসঙ্খাতং নিব্বানপদং অধিগচ্ছতি সীলৱিসুদ্ধিআদিসত্তৱিসুদ্ধিপৰম্পৰায গন্ত্ৱা পটিৱিজ্ঝতীতি যোজনা.

ইতি ৱিনযত্থসাৰসন্দীপনিযা ৱিনযৱিনিচ্ছযৱণ্ণনায

ভিক্খুনিৱিভঙ্গকথাৱণ্ণনা নিট্ঠিতা.

খন্ধককথা