চীৱৰক্খন্ধককথাৱণ্ণনা

২৭২৬-৭. চীৱৰং উপ্পজ্জতি এতাসূতি ‘‘উপ্পাদা’’তি জনিকাৱ ৱুচ্চন্তি, চীৱৰৱত্থপৰিলাভক্খেত্তন্তি অত্থো. যথাহ – ‘‘যথাৱুত্তানং চীৱৰানং পটিলাভায খেত্তং দস্সেতুং অট্ঠিমা ভিক্খৱে মাতিকাতিআদিমাহা’’তি (মহাৱ. অট্ঠ. ৩৭৯). চীৱৰমাতিকাতি চীৱৰুপ্পাদহেতুভূতমাতৰো. তেনাহ কথিনক্খন্ধকৱণ্ণনাযং ‘‘মাতিকাতি মাতৰো, জনেত্তিযোতি অত্থো’’তি (মহাৱ. অট্ঠ. ৩১০). মাতিকাতি চেত্থ চীৱৰদানমধিপ্পেতং. যথাহ ‘‘সীমায দানং একা মাতিকা, কতিকায দানং দুতিযা’’তিআদি. সীমায দেতি, কতিকায দেতি, ভিক্খাপঞ্ঞত্তিযা দেতি, সঙ্ঘস্স দেতি, উভতোসঙ্ঘে দেতি, ৱস্সংৱুত্থসঙ্ঘস্স দেতি, আদিস্স দেতি, পুগ্গলস্স দেতি. ‘‘ইমা পন অট্ঠ মাতিকা’’তি ৱুত্তমেৱ নিগমনৱসেন ৱুত্তং.

২৭২৮. তত্থাতি তাসু অট্ঠমাতিকাসু. সীমায দেতীতি ‘‘সীমায দম্মী’’তি এৱং সীমং পৰামসিত্ৱা দেন্তো সীমায দেতি, এৱং দিন্নং অন্তোসীমগতেহি ভিক্খূহি ভাজেতব্বন্তি ৱণ্ণিতন্তি যোজনা. তত্থ অন্তোসীমগতেহীতি দাযকো যং সীমং অপেক্খিত্ৱা এৱমাহ, তস্সা সীমায অন্তোগতেহি সব্বেহি. ভাজেতব্বন্তি তং চীৱৰং ভাজেতব্বং. ৱৰৱণ্ণিনাতি ‘‘ইতিপি সো ভগৱা অৰহ’’ন্তিআদিনা সকললোকব্যাপিগুণাতিসযযুত্তেন ব্যামপ্পভায, ছব্বণ্ণানং ৰংসীনঞ্চ ৱসেন উত্তমপ্পভাতিসযযুত্তেন ৱৰৱণ্ণিনা ৱণ্ণিতং কথিতং. অযমেত্থ পদৱণ্ণনা, অযং পন ৱিনিচ্ছযো – সীমায দেতীতি এত্থ তাৱ খণ্ডসীমা উপচাৰসীমা সমানসংৱাসসীমা অৱিপ্পৱাসসীমা লাভসীমা গামসীমা নিগমসীমা নগৰসীমা অব্ভন্তৰসীমা উদকুক্খেপসীমা জনপদসীমা ৰট্ঠসীমা ৰজ্জসীমা দীপসীমা চক্কৱাড়সীমা ইতি পন্নৰস সীমা ৱেদিতব্বা.

তত্থ খণ্ডসীমা সীমাকথাযং ৱুত্তা. উপচাৰসীমা পৰিক্খিত্তস্স ৱিহাৰস্স পৰিক্খেপেন, অপৰিক্খিত্তস্স ৱিহাৰস্স পৰিক্খেপাৰহট্ঠানেন পৰিচ্ছিন্না হোতি. অপিচ ভিক্খূনং ধুৱসন্নিপাতট্ঠানতো ৱা পৰিযন্তে ঠিতভোজনসালতো ৱা নিবদ্ধৱসনকআৱাসতো ৱা থামমজ্ঝিমস্স পুৰিসস্স দ্ৱিন্নং লেড্ডুপাতানং অন্তো উপচাৰসীমা ৱেদিতব্বা. সা পন আৱাসেসু ৱড্ঢন্তেসু ৱড্ঢতি, পৰিহাযন্তেসু পৰিহাযতি. মহাপচ্চৰিযং পন ‘‘ভিক্খূসুপি ৱড্ঢন্তেসু ৱড্ঢতী’’তি (মহাৱ. অট্ঠ. ৩৭৯) ৱুত্তং. তস্মা সচে ৱিহাৰে সন্নিপতিতভিক্খূহি সদ্ধিং একাবদ্ধা হুত্ৱা যোজনসতম্পি পূৰেত্ৱা নিসীদন্তি, যোজনসতম্পি উপচাৰসীমাৱ হোতি, সব্বেসং লাভো পাপুণাতি. সমানসংৱাসঅৱিপ্পৱাসসীমাদ্ৱযম্পি ৱুত্তমেৱ.

লাভসীমা নাম নেৱ সম্মাসম্বুদ্ধেন অনুঞ্ঞাতা, ন ধম্মসঙ্গাহকত্থেৰেহি ঠপিতা, অপিচ খো ৰাজৰাজমহামত্তা ৱিহাৰং কাৰেত্ৱা গাৱুতং ৱা অড্ঢযোজনং ৱা যোজনং ৱা সমন্ততো পৰিচ্ছিন্দিত্ৱা ‘‘অযং অম্হাকং ৱিহাৰস্স লাভসীমা’’তি নামলিখিতকে থম্ভে নিখণিত্ৱা ‘‘যং এত্থন্তৰে উপ্পজ্জতি, সব্বং তং অম্হাকং ৱিহাৰস্স দেমা’’তি সীমং ঠপেন্তি, অযং লাভসীমা নাম. গামনিগমনগৰঅব্ভন্তৰউদকুক্খেপসীমাপি ৱুত্তা এৱ.

জনপদসীমা নাম কাসিকোসলৰট্ঠাদীনং অন্তো বহূ জনপদা হোন্তি, এত্থ একেকো জনপদপৰিচ্ছেদো জনপদসীমা. ৰট্ঠসীমা নাম কাসিকোসলাদিৰট্ঠপৰিচ্ছেদো. ৰজ্জসীমা নাম মহাচোড়ভোগো কেৰড়ভোগোতি এৱং একেকস্স ৰঞ্ঞো আণাপৱত্তিট্ঠানং. দীপসীমা নাম সমুদ্দন্তেন সমুচ্ছিন্নমহাদীপা চ অন্তৰদীপা চ. চক্কৱাড়সীমা নাম চক্কৱাড়পব্বতেনেৱ পৰিচ্ছিন্না.

এৱমেতাসু সীমাসু খণ্ডসীমায কেনচি কম্মেন সন্নিপতিতং সঙ্ঘং দিস্ৱা ‘‘এত্থেৱ সীমায সঙ্ঘস্স দেমী’’তি ৱুত্তে যাৱতিকা ভিক্খূ অন্তোখণ্ডসীমগতা, তেহি ভাজেতব্বং. তেসংযেৱ হি তং পাপুণাতি, অঞ্ঞেসং সীমন্তৰিকায ৱা উপচাৰসীমায ৱা ঠিতানম্পি ন পাপুণাতি. খণ্ডসীমায ঠিতে পন ৰুক্খে ৱা পব্বতে ৱা ঠিতস্স হেট্ঠা ৱা পথৱিযা ৱেমজ্ঝং গতস্স পাপুণাতিযেৱ.

‘‘ইমিস্সা উপচাৰসীমায সঙ্ঘস্স দম্মী’’তি দিন্নং পন খণ্ডসীমাসীমন্তৰিকাসু ঠিতানম্পি পাপুণাতি. ‘‘সমানসংৱাসসীমায দম্মী’’তি দিন্নং পন খণ্ডসীমাসীমন্তৰিকাসু ঠিতানং ন পাপুণাতি. অৱিপ্পৱাসসীমালাভসীমাসু দিন্নং তাসু সীমাসু অন্তোগতানংযেৱ পাপুণাতি. গামসীমাদীসু দিন্নং তাসং সীমানং অব্ভন্তৰে বদ্ধসীমায ঠিতানম্পি পাপুণাতি. অব্ভন্তৰসীমাউদকুক্খেপসীমাসু দিন্নং তত্থ অন্তোগতানংযেৱ পাপুণাতি. জনপদৰট্ঠৰজ্জদীপচক্কৱাড়সীমাসুপি গামসীমাদীসু ৱুত্তসদিসোযেৱ ৱিনিচ্ছযো.

সচে পন জম্বুদীপে ঠিতো ‘‘তম্বপণ্ণিদীপে সঙ্ঘস্স দম্মী’’তি ৱদতি, তম্বপণ্ণিদীপতো একোপি গন্ত্ৱা সব্বেসং গণ্হিতুং লভতি. সচেপি তত্ৰেৱ একো সভাগভিক্খু সভাগানং ভাগং গণ্হাতি, ন ৱাৰেতব্বো. এৱং তাৱ যো সীমং পৰামসিত্ৱা দেতি, তস্স দানে ৱিনিচ্ছযো ৱেদিতব্বো.

যো পন ‘‘অসুকসীমাযা’’তি ৱত্তুং ন জানাতি, কেৱলং ‘‘সীমা’’তি ৱচনমত্তমেৱ জানন্তো ৱিহাৰং আগন্ত্ৱা ‘‘সীমায দম্মী’’তি ৱা ‘‘সীমট্ঠকসঙ্ঘস্স দম্মী’’তি ৱা ভণতি, সো পুচ্ছিতব্বো ‘‘সীমা নাম বহুৱিধা, কতৰং সীমং সন্ধায ভণসী’’তি, সচে ৱদতি ‘‘অহং ‘অসুকসীমা’তি ন জানামি, সীমট্ঠকসঙ্ঘো ভাজেত্ৱা গণ্হতূ’’তি, কতৰসীমায ভাজেতব্বং? মহাসীৱত্থেৰো কিৰাহ ‘‘অৱিপ্পৱাসসীমাযা’’তি. ততো নং আহংসু ‘‘অৱিপ্পৱাসসীমা নাম তিযোজনাপি হোতি, এৱং সন্তে তিযোজনে ঠিতা লাভং গণ্হিস্সন্তি, তিযোজনে ঠত্ৱা আগন্তুকৱত্তং পূৰেত্ৱা আৰামং পৱিসিতব্বং ভৱিস্সতি, গমিকো তিযোজনং গন্ত্ৱা সেনাসনং আপুচ্ছিস্সতি, নিস্সযপটিপন্নস্স তিযোজনাতিক্কমে নিস্সযো পটিপ্পস্সম্ভিস্সতি, পাৰিৱাসিকেন তিযোজনং অতিক্কমিত্ৱা অৰুণং উট্ঠাপেতব্বং ভৱিস্সতি, ভিক্খুনিযা তিযোজনে ঠত্ৱা আৰামপ্পৱেসনং আপুচ্ছিতব্বং ভৱিস্সতি, সব্বম্পেতং উপচাৰসীমাপৰিচ্ছেদৱসেনেৱ কত্তুং ৱট্টতি. তস্মা উপচাৰসীমাযমেৱ ভাজেতব্ব’’ন্তি.

২৭২৯. যে ৱিহাৰা সঙ্ঘেন কতিকায একলাভকা সমানলাভকা এত্থ এতেসু ৱিহাৰেসু দিন্নং ‘‘কতিকায দম্মী’’তি দিন্নং সব্বেহি ভিক্খূহি সহ ভাজেতব্বং চীৱৰং কতিকায ৱুচ্চতীতি যোজনা.

অযমেত্থ ৱিনিচ্ছযো – কতিকা নাম সমানলাভকতিকা, তত্ৰেৱং কতিকা কাতব্বা – একস্মিং ৱিহাৰে সন্নিপতিতেহি ভিক্খূহি যং ৱিহাৰং সঙ্গণ্হিতুকামা সমানলাভং কাতুং ইচ্ছন্তি, অস্স নামং গহেত্ৱা ‘‘অসুকো নাম ৱিহাৰো পোৰাণকো’’তি ৱা ‘‘বুদ্ধাধিৱুত্থো’’তি ৱা ‘‘অপ্পলাভো’’তি ৱা যং কিঞ্চি কাৰণং ৱত্ৱা ‘‘তং ৱিহাৰং ইমিনা ৱিহাৰেন সদ্ধিং একলাভং কাতুং সঙ্ঘস্স ৰুচ্চতী’’তি তিক্খত্তুং সাৱেতব্বং. এত্তাৱতা তস্মিং ৱিহাৰে নিসিন্নোপি ইধ নিসিন্নোৱ হোতি. তস্মিং ৱিহাৰেপি সঙ্ঘেন এৱমেৱ কাতব্বং. এত্তাৱতা ইধ নিসিন্নোপি তস্মিং ৱিহাৰে নিসিন্নোৱ হোতি. একস্মিং লাভে ভাজিযমানে ইতৰস্মিং ঠিতস্স ভাগং গহেতুং ৱট্টতি. এৱং একেন ৱিহাৰেন সদ্ধিং বহূপি আৱাসা একলাভা কাতব্বাতি.

২৭৩০. চীৱৰদাযকেন ধুৱকাৰা পাকৱত্তাদিনিচ্চসক্কাৰা যত্থ সঙ্ঘস্স ক্ৰীযন্তি কৰীযন্তি তত্থ তস্মিং ৱিহাৰে তেনেৱ দাযকেন সঙ্ঘস্স দিন্নং ৱিহাৰং ‘‘ভিক্খাপঞ্ঞত্তিযা দিন্ন’’ন্তি মহেসিনা ৱুত্তন্তি যোজনা.

তত্ৰাযং ৱিনিচ্ছযো – যস্মিং ৱিহাৰে ইমস্স চীৱৰদাযকস্স সন্তকং সঙ্ঘস্স পাকৱত্তং ৱা ৱত্ততি, যস্মিং ৱা ৱিহাৰে ভিক্খূ অত্তনো ভাৰং কত্ৱা সদা গেহে ভোজেতি, যত্থ ৱা তেন আৱাসো কাৰিতো, সলাকভত্তাদীনি ৱা নিবদ্ধানি, যেন পন সকলোপি ৱিহাৰো পতিট্ঠাপিতো, তত্থ ৱত্তব্বমেৱ নত্থি, ইমে ধুৱকাৰা নাম. তস্মা সচে সো ‘‘যত্থ ময্হং ধুৱকাৰা কৰীযন্তি, এত্থ দম্মী’’তি ৱা ‘‘তত্থ দেথা’’তি ৱা ভণতি, বহূসু চেপি ঠানেসু ধুৱকাৰা হোন্তি, সব্বত্থ দিন্নমেৱ হোতি.

সচে পন একস্মিং ৱিহাৰে ভিক্খূ বহুতৰা হোন্তি, তেহি ৱত্তব্বং ‘‘তুম্হাকং ধুৱকাৰে একত্থ ভিক্খূ বহূ, একত্থ অপ্পকা’’তি, সচে ‘‘ভিক্খুগণনায গণ্হথা’’তি ভণতি, তথা ভাজেত্ৱা গণ্হিতুং ৱট্টতি. এত্থ চ ৱত্থভেসজ্জাদি অপ্পকম্পি সুখেন ভাজীযতি, যদি পন মঞ্চো ৱা পীঠকং ৱা একমেৱ হোতি, তং পুচ্ছিত্ৱা যস্স ৱা ৱিহাৰস্স একৱিহাৰেপি ৱা যস্স সেনাসনস্স সো ৱিচাৰেতি, তত্থ দাতব্বং. সচে ‘‘অসুকভিক্খু গণ্হতূ’’তি ৱদতি, ৱট্টতি.

অথ ‘‘ময্হং ধুৱকাৰে দেথা’’তি ৱত্ৱা অৱিচাৰেত্ৱাৱ গচ্ছতি, সঙ্ঘস্সপি ৱিচাৰেতুং ৱট্টতি. এৱং পন ৱিচাৰেতব্বং – ‘‘সঙ্ঘত্থেৰস্স ৱসনট্ঠানে দেথা’’তি ৱত্তব্বং. সচে তত্থ সেনাসনং পৰিপুণ্ণং হোতি. যত্থ নপ্পহোতি, তত্থ দাতব্বং. সচে একো ভিক্খু ‘‘ময্হং ৱসনট্ঠানে সেনাসনপৰিভোগভণ্ডং নত্থী’’তি ৱদতি, তত্থ দাতব্বন্তি.

২৭৩১. সঙ্ঘস্স পন যং দিন্নন্তি ৱিহাৰং পৱিসিত্ৱা ‘‘ইমানি চীৱৰানি সঙ্ঘস্স দম্মী’’তি যং চীৱৰং দিন্নং. ‘‘সম্মুখীভূতেনা’’তি ৱত্তব্বে গাথাবন্ধেন ৰস্সত্তং. সম্মুখিভূতেনাতি চ উপচাৰসীমায ঠিতেন. ভাজেতব্বন্তি ঘণ্টিং পহৰিত্ৱা কালং ঘোসেত্ৱা ভাজেতব্বং. ইদমেত্থ মুখমত্তদস্সনং. ৱিনিচ্ছযো অট্ঠকথায (মহাৱ. অট্ঠ. ৩৭৯) ৱেদিতব্বো. সেয্যথিদং – চীৱৰদাযকেন ৱিহাৰং পৱিসিত্ৱা ‘‘ইমানি চীৱৰানি সঙ্ঘস্স দম্মী’’তি দিন্নেসু ভাজিযমানেসু সীমট্ঠস্স অসম্পত্তস্সপি ভাগং গণ্হন্তো ন ৱাৰেতব্বো. ৱিহাৰো মহা হোতি, থেৰাসনতো পট্ঠায ৱত্থেসু দিয্যমানেসু অলসজাতিকা মহাথেৰা পচ্ছা আগচ্ছন্তি, ‘‘ভন্তে, ৱীসতিৱস্সানং দিয্যতি, তুম্হাকং ঠিতিকা অতিক্কন্তা’’তি ন ৱত্তব্বা, ঠিতিকং ঠপেত্ৱা তেসং দত্ৱা পচ্ছা ঠিতিকায দাতব্বং.

‘‘অসুকৱিহাৰে কিৰ বহুং চীৱৰং উপ্পন্ন’’ন্তি সুত্ৱা যোজনন্তৰিকৱিহাৰতোপি ভিক্খূ আগচ্ছন্তি, সম্পত্তসম্পত্তানং ঠিতট্ঠানতো পট্ঠায দাতব্বং. অসম্পত্তানম্পি উপচাৰসীমং পৱিট্ঠানং অন্তেৱাসিকাদীসু গণ্হন্তেসু দাতব্বমেৱ. ‘‘বহি উপচাৰসীমায ঠিতানং দেথা’’তি ৱদন্তি, ন দাতব্বং. সচে পন উপচাৰসীমং ওক্কন্তেহি একাবদ্ধা হুত্ৱা অত্তনো ৱিহাৰদ্ৱাৰে ৱা অন্তোৱিহাৰেযেৱ ৱা হোন্তি, পৰিসৱসেন ৱড্ঢিতা নাম সীমা হোতি, তস্মা দাতব্বং. সঙ্ঘনৱকস্স দিন্নেপি পচ্ছা আগতানং দাতব্বমেৱ. দুতিযভাগে পন থেৰাসনং আৰুড়্হে আগতানং পঠমভাগো ন পাপুণাতি, দুতিযভাগতো ৱস্সগ্গেন দাতব্বং.

একস্মিং ৱিহাৰে দস ভিক্খূ হোন্তি, দস ৱত্থানি ‘‘সঙ্ঘস্স দেমা’’তি দেন্তি, পাটেক্কং ভাজেতব্বানি. সচে ‘‘সব্বানেৱ অম্হাকং পাপুণন্তী’’তি গহেত্ৱা গচ্ছন্তি, দুপ্পাপিতানি চেৱ দুগ্গহিতানি চ, গতগতট্ঠানে সঙ্ঘিকানেৱ হোন্তি. একং পন উদ্ধৰিত্ৱা ‘‘ইদং তুম্হাকং পাপুণাতী’’তি সঙ্ঘত্থেৰস্স দত্ৱা সেসানি ‘‘ইমানি অম্হাকং পাপুণন্তী’’তি গহেতুং ৱট্টতি.

একমেৱ ৱত্থং ‘‘সঙ্ঘস্স দেমা’’তি আহৰন্তি, অভাজেত্ৱাৱ ‘‘অম্হাকং পাপুণাতী’’তি গণ্হন্তি, দুপ্পাপিতঞ্চেৱ দুগ্গহিতঞ্চ, সত্থকেন, পন হলিদ্দিআদিনা ৱা লেখং কত্ৱা একং কোট্ঠাসং ‘‘ইমং ঠানং তুম্হাকং পাপুণাতী’’তি সঙ্ঘত্থেৰস্স পাপেত্ৱা সেসং ‘‘অম্হাকং পাপুণাতী’’তি গহেতুং ৱট্টতি. যং পন ৱত্থস্সেৱ পুপ্ফং ৱা ৱলি ৱা, তেন পৰিচ্ছেদং কাতুং ন ৱট্টতি. সচে একং তন্তং উদ্ধৰিত্ৱা ‘‘ইদং ঠানং তুম্হাকং পাপুণাতী’’তি সঙ্ঘত্থেৰস্স দত্ৱা সেসং ‘‘অম্হাকং পাপুণাতী’’তি গণ্হন্তি, ৱট্টতি. খণ্ডং খণ্ডং ছিন্দিত্ৱা ভাজিযমানং ৱট্টতিযেৱ.

একভিক্খুকে ৱিহাৰে সঙ্ঘস্স চীৱৰেসু উপ্পন্নেসু সচে পুব্বে ৱুত্তনযেনেৱ সো ভিক্খু ‘‘সব্বানি ময্হং পাপুণন্তী’’তি গণ্হাতি, সুগ্গহিতানি, ঠিতিকা পন ন তিট্ঠতি. সচে একেকং উদ্ধৰিত্ৱা ‘‘ইদং ময্হং পাপুণাতী’’তি গণ্হাতি, ঠিতিকা তিট্ঠতি. তত্থ ঠিতিকায অট্ঠিতায পুন অঞ্ঞস্মিং চীৱৰে উপ্পন্নে সচে একো ভিক্খু আগচ্ছতি, মজ্ঝে ছিন্দিত্ৱা দ্ৱীহিপি গহেতব্বং. ঠিতায ঠিতিকায পুন অঞ্ঞস্মিং চীৱৰে উপ্পন্নে সচে নৱকতৰো আগচ্ছতি, ঠিতিকা হেট্ঠা ওৰোহতি. সচে ৱুড্ঢতৰো আগচ্ছতি, ঠিতিকা উদ্ধং আৰোহতি. অথ অঞ্ঞো নত্থি, পুন অত্তনো পাপেত্ৱা গহেতব্বং.

‘‘সঙ্ঘস্স দেমা’’তি ৱা ‘‘ভিক্খুসঙ্ঘস্স দেমা’’তি ৱা যেন কেনচি আকাৰেন সঙ্ঘং আমসিত্ৱা দিন্নং পন পংসুকূলিকানং ন ৱট্টতি ‘‘গহপতিচীৱৰং পটিক্খিপামি, পংসুকূলিকঙ্গং সমাদিযামী’’তি ৱুত্তত্তা, ন পন অকপ্পিযত্তা. ভিক্খুসঙ্ঘেন অপলোকেত্ৱা দিন্নম্পি ন গহেতব্বং. যং পন ভিক্খু অত্তনো সন্তকং দেতি, তং ভিক্খুদত্তিযং নাম ৱট্টতি. পংসুকূলং পন ন হোতি. এৱং সন্তেপি ধুতঙ্গং ন ভিজ্জতি. ‘‘ভিক্খূনং দেম, থেৰানং দেমা’’তি ৱুত্তে পন পংসুকূলিকানম্পি ৱট্টতি. ‘‘ইদং ৱত্থং সঙ্ঘস্স দেম, ইমিনা উপাহনত্থৱিকপত্তত্থৱিকআযোগঅংসবদ্ধকাদীনি কৰোথা’’তি দিন্নম্পি ৱট্টতি.

পত্তত্থৱিকাদীনং অত্থায দিন্নানি বহূনিপি হোন্তি, চীৱৰত্থাযপি পহোন্তি, ততো চীৱৰং কত্ৱা পাৰুপিতুং ৱট্টতি. সচে পন সঙ্ঘো ভাজিতাতিৰিত্তানি ৱত্থানি ছিন্দিত্ৱা উপাহনত্থৱিকাদীনং অত্থায ভাজেতি, ততো গহেতুং ন ৱট্টতি. সামিকেহি ৱিচাৰিতমেৱ হি ৱট্টতি, ন ইতৰং.

‘‘পংসুকূলিকসঙ্ঘস্স ধম্মকৰণঅংসবদ্ধাদীনং অত্থায দেমা’’তি ৱুত্তেপি গহেতুং ৱট্টতি. পৰিক্খাৰো নাম পংসুকূলিকানম্পি ইচ্ছিতব্বো. যং তত্থ অতিৰেকং হোতি, তং চীৱৰেপি উপনেতুং ৱট্টতি. সুত্তং সঙ্ঘস্স দেন্তি, পংসুকূলিকেহিপি গহেতব্বং. অযং তাৱ ৱিহাৰং পৱিসিত্ৱা ‘‘ইমানি চীৱৰানি সঙ্ঘস্স দম্মী’’তি দিন্নেসু ৱিনিচ্ছযো.

সচে পন বহি উপচাৰসীমায অদ্ধানপটিপন্নে ভিক্খূ দিস্ৱা ‘‘সঙ্ঘস্স দম্মী’’তি সঙ্ঘত্থেৰস্স ৱা সঙ্ঘনৱকস্স ৱা আৰোচেতি, সচেপি যোজনং ফৰিত্ৱা পৰিসা ঠিতা হোতি, একাবদ্ধা চে, সব্বেসং পাপুণাতি. যে পন দ্ৱাদসহি হত্থেহি পৰিসং অসম্পত্তা, তেসং ন পাপুণাতীতি.

২৭৩২. ইদানি ‘‘উভতোসঙ্ঘে দেতী’’তি মাতিকং ৱিৱৰন্তো আহ ‘‘উভতোসঙ্ঘমুদ্দিস্সা’’তিআদি. উভতোসঙ্ঘমুদ্দিস্সাতি ভিক্খুসঙ্ঘং, ভিক্খুনিসঙ্ঘঞ্চ উদ্দিসিত্ৱা. দেতীতি ‘‘উভতোসঙ্ঘস্স দেমী’’তি দেতি. ‘‘বহু ৱা’’তি এত্থ ‘‘বহূ ৱা’’তি ৱত্তব্বে গাথাবন্ধৱসেন ৰস্সত্তং. ভিক্খুনীনং ভিক্খূ থোকা ৱা হোন্তু বহূ ৱা, পুগ্গলগ্গেন অকত্ৱা উভতোসঙ্ঘৱসেন সমভাগোৱ কাতুং ৱট্টতীতি যোজনা.

তত্ৰাযং ৱিনিচ্ছযো – ‘‘উভতোসঙ্ঘস্স দম্মী’’তি ৱুত্তেপি ‘‘দ্ৱেধাসঙ্ঘস্স দম্মি, দ্ৱিন্নং সঙ্ঘানং দম্মি, ভিক্খুসঙ্ঘস্স চ ভিক্খুনিসঙ্ঘস্স চ দম্মী’’তি ৱুত্তেপি উভতোসঙ্ঘস্স দিন্নমেৱ হোতি, দ্ৱে ভাগে সমে কত্ৱা একো দাতব্বো.

‘‘উভতোসঙ্ঘস্স চ তুয্হঞ্চ দম্মী’’তি ৱুত্তে সচে দস দস ভিক্খূ, ভিক্খুনিযো চ হোন্তি, একৱীসতি পটিৱীসে কত্ৱা একো পুগ্গলস্স দাতব্বো, দস ভিক্খুসঙ্ঘস্স, দস ভিক্খুনিসঙ্ঘস্স. যেন পুগ্গলিকো লদ্ধো, সো সঙ্ঘতোপি অত্তনো ৱস্সগ্গেন গহেতুং লভতি. কস্মা? উভতোসঙ্ঘগ্গহণেন গহিতত্তা.

‘‘উভতোসঙ্ঘস্স চ চেতিযস্স চ দম্মী’’তি ৱুত্তেপি এসেৱ নযো. ইধ পন চেতিযস্স সঙ্ঘতো পাপুণনকোট্ঠাসো নাম নত্থি, একপুগ্গলস্স পত্তকোট্ঠাসসমোৱ কোট্ঠাসো হোতি.

‘‘উভতোসঙ্ঘস্স চ তুয্হঞ্চ চেতিযস্স চা’’তি ৱুত্তে পন দ্ৱাৱীসতি কোট্ঠাসে কত্ৱা দস ভিক্খূনং, দস ভিক্খুনীনং, একো পুগ্গলস্স, একো চেতিযস্স দাতব্বো. তত্থ পুগ্গলো সঙ্ঘতোপি অত্তনো ৱস্সগ্গেন পুন গহেতুং লভতি. চেতিযস্স একোযেৱ.

‘‘ভিক্খুসঙ্ঘস্স চ ভিক্খুনীনঞ্চ দম্মী’’তি ৱুত্তে পন মজ্ঝে ভিন্দিত্ৱা ন দাতব্বং, ভিক্খূ চ ভিক্খুনিযো চ গণেত্ৱা দাতব্বং.

‘‘ভিক্খুসঙ্ঘস্স চ ভিক্খুনীনঞ্চ তুয্হঞ্চা’’তি ৱুত্তে পন পুগ্গলো ৱিসুং ন লভতি, পাপুণনট্ঠানতো একমেৱ লভতি. কস্মা? ভিক্খুসঙ্ঘগ্গহণেন গহিতত্তা.

‘‘ভিক্খুসঙ্ঘস্স চ ভিক্খুনীনঞ্চ তুয্হঞ্চ চেতিযস্স চা’’তি ৱুত্তেপি চেতিযস্স একপুগ্গলপটিৱীসো লব্ভতি, পুগ্গলস্স ৱিসুং ন লব্ভতি. তস্মা একং চেতিযস্স দত্ৱা অৱসেসং ভিক্খূ চ ভিক্খুনিযো চ গণেত্ৱা ভাজেতব্বং.

‘‘ভিক্খূনঞ্চ ভিক্খুনীনঞ্চ দম্মী’’তি ৱুত্তেপি ন মজ্ঝে ভিন্দিত্ৱা দাতব্বং, পুগ্গলগণনায এৱ ৱিভজিতব্বং.

‘‘ভিক্খূনঞ্চ ভিক্খুনীনঞ্চ তুয্হঞ্চ চেতিযস্স চা’’তি এৱং ৱুত্তেপি চেতিযস্স একপুগ্গলপটিৱীসো লব্ভতি, পুগ্গলস্স ৱিসুং নত্থি, ভিক্খূ চ ভিক্খুনিযো চ গণেত্ৱা এৱ ভাজেতব্বং. যথা চ ভিক্খুসঙ্ঘং আদিং কত্ৱা নযো নীতো, এৱং ভিক্খুনিসঙ্ঘং আদিং কত্ৱাপি নেতব্বো.

‘‘ভিক্খুসঙ্ঘস্স চ তুয্হঞ্চা’’তি ৱুত্তে পুগ্গলস্স ৱিসুং ন লব্ভতি, ৱস্সগ্গেনেৱ গহেতব্বং.

‘‘ভিক্খুসঙ্ঘস্স চ চেতিযস্স চা’’তি ৱুত্তে পন চেতিযস্স ৱিসুং পটিৱীসো লব্ভতি.

‘‘ভিক্খুসঙ্ঘস্স চ তুয্হঞ্চ চেতিযস্স চা’’তি ৱুত্তেপি চেতিযস্সেৱ লব্ভতি, ন পুগ্গলস্স.

‘‘ভিক্খূনঞ্চ তুয্হঞ্চা’’তি ৱুত্তেপি ৱিসুং ন লব্ভতি.

‘‘ভিক্খূনঞ্চ চেতিযস্স চা’’তি ৱুত্তে পন চেতিযস্স লব্ভতি.

‘‘ভিক্খূনঞ্চ তুয্হঞ্চ চেতিযস্স চা’’তি ৱুত্তেপি চেতিযস্সেৱ ৱিসুং লব্ভতি, ন পুগ্গলস্স. ভিক্খুনিসঙ্ঘং আদিং কত্ৱাপি এৱমেৱ যোজেতব্বং.

পুব্বে বুদ্ধপ্পমুখস্স উভতোসঙ্ঘস্স দানং দেন্তি, ভগৱা মজ্ঝে নিসীদতি, দক্খিণতো ভিক্খূ, ৱামতো ভিক্খুনিযো নিসীদন্তি, ভগৱা উভিন্নং সঙ্ঘত্থেৰো, তদা ভগৱা অত্তনো লদ্ধপচ্চযে অত্তনাপি পৰিভুঞ্জতি, ভিক্খূনম্পি দাপেতি. এতৰহি পন পণ্ডিতমনুস্সা সধাতুকং পটিমং ৱা চেতিযং ৱা ঠপেত্ৱা বুদ্ধপ্পমুখস্স উভতোসঙ্ঘস্স দানং দেন্তি, পটিমায ৱা চেতিযস্স ৱা পুৰতো আধাৰকে পত্তং ঠপেত্ৱা দক্খিণোদকং দত্ৱা ‘‘বুদ্ধানং দেমা’’তি তত্থ যং পঠমং খাদনীযং ভোজনীযং দেন্তি, ৱিহাৰং ৱা আহৰিত্ৱা ‘‘ইদং চেতিযস্স দেমা’’তি পিণ্ডপাতঞ্চ মালাগন্ধাদীনি চ দেন্তি, তত্থ কথং পটিপজ্জিতব্বন্তি? মালাগন্ধাদীনি তাৱ চেতিযে আৰোপেতব্বানি, ৱত্থেহি পটাকা, তেলেন পদীপা কাতব্বা. পিণ্ডপাতমধুফাণিতাদীনি পন যো নিবদ্ধং চেতিযস্স জগ্গকো হোতি পব্বজিতো ৱা গহট্ঠো ৱা, তস্স দাতব্বানি. নিবদ্ধজগ্গকে অসতি আহটপত্তং ঠপেত্ৱা ৱত্তং কত্ৱা পৰিভুঞ্জিতুং ৱট্টতি. উপকট্ঠে কালে ভুঞ্জিত্ৱা পচ্ছাপি ৱত্তং কাতুং ৱট্টতিযেৱ.

মালাগন্ধাদীসু চ যং কিঞ্চি ‘‘ইদং হৰিত্ৱা চেতিযস্স পূজং কৰোথা’’তি ৱুত্তে দূৰম্পি হৰিত্ৱা পূজেতব্বং. ‘‘ভিক্খং সঙ্ঘস্স হৰা’’তি ৱুত্তেপি হৰিতব্বং. সচে পন ‘‘অহং পিণ্ডায চৰামি, আসনসালায ভিক্খূ অত্থি, তে হৰিস্সন্তী’’তি ৱুত্তে ‘‘ভন্তে, তুয্হংযেৱ দম্মী’’তি ৱদতি, ভুঞ্জিতুং ৱট্টতি. অথ পন ‘‘ভিক্খুসঙ্ঘস্স দস্সামী’’তি হৰন্তস্স গচ্ছতো অন্তৰাৱ কালো উপকট্ঠো হোতি, অত্তনো পাপেত্ৱা ভুঞ্জিতুং ৱট্টতি.

২৭৩৩. যং পন চীৱৰং ‘‘যস্মিং আৱাসে ৱস্সংৱুত্থস্স সঙ্ঘস্স দম্মী’’তি দেতি, তস্মিংযেৱ আৱাসে ৱুত্থৱস্সেন সঙ্ঘেন ৱা গণেন ৱা পুগ্গলেন ৱা তং চীৱৰং ভাজেতব্বন্তি ৱণ্ণিতং দেসিতন্তি যোজনা.

তত্ৰাযং ৱিনিচ্ছযো – ৱিহাৰং পৱিসিত্ৱা ‘‘ইমানি চীৱৰানি ৱস্সংৱুত্থসঙ্ঘস্স দম্মী’’তি দেতি, যাৱতিকা ভিক্খূ তস্মিং আৱাসে ৱস্সংৱুত্থা, যত্তকা ৱস্সচ্ছেদং অকত্ৱা পুৰিমৱস্সংৱুত্থা, তেহি ভাজেতব্বং, অঞ্ঞেসং ন পাপুণাতি. দিসাপক্কন্তস্সাপি সতি গাহকে যাৱ কথিনস্স উব্ভাৰা দাতব্বং. অনত্থতে পন কথিনে অন্তোহেমন্তে এৱঞ্চ ৱত্ৱা দিন্নং পচ্ছিমৱস্সংৱুত্থানম্পি পাপুণাতীতি লক্খণঞ্ঞূ ৱদন্তি. অট্ঠকথাসু পনেতং অৱিচাৰিতং.

সচে পন বহি উপচাৰসীমাযং ঠিতো ‘‘ৱস্সংৱুত্থসঙ্ঘস্স দম্মী’’তি ৱদতি, সম্পত্তানং সব্বেসং পাপুণাতি. অথ ‘‘অসুকৱিহাৰে ৱস্সংৱুত্থসঙ্ঘস্সা’’তি ৱদতি, তত্ৰ ৱস্সংৱুত্থানমেৱ যাৱ কথিনস্সুব্ভাৰা পাপুণাতি. সচে পন গিম্হানং পঠমদিৱসতো পট্ঠায এৱং ৱদতি, তত্ৰ সম্মুখীভূতানংযেৱ সব্বেসং পাপুণাতি. কস্মা? পিট্ঠিসমযে উপ্পন্নত্তা. অন্তোৱস্সেযেৱ ‘‘ৱস্সং ৱসন্তানং দম্মী’’তি ৱুত্তে ছিন্নৱস্সা ন লভন্তি, ৱস্সং ৱসন্তাৱ লভন্তি. চীৱৰমাসে পন ‘‘ৱস্সং ৱসন্তানং দম্মী’’তি ৱুত্তে পচ্ছিমিকায ৱস্সূপগতানংযেৱ পাপুণাতি, পুৰিমিকায ৱস্সূপগতানঞ্চ ছিন্নৱস্সানঞ্চ ন পাপুণাতি.

চীৱৰমাসতো পট্ঠায যাৱ হেমন্তস্স পচ্ছিমো দিৱসো, তাৱ ‘‘ৱস্সাৱাসিকং দেমা’’তি ৱুত্তে কথিনং অত্থতং ৱা হোতু অনত্থতং ৱা, অতীতৱস্সংৱুত্থানমেৱ পাপুণাতি. গিম্হানং পঠমদিৱসতো পট্ঠায ৱুত্তে পন মাতিকা আৰোপেতব্বা ‘‘অতীতৱস্সাৱাসস্স পঞ্চ মাসা অভিক্কন্তা, অনাগতে চাতুমাসচ্চযেন ভৱিস্সতি, কতৰৱস্সাৱাসস্স দেসী’’তি. সচে ‘‘অতীতৱস্সংৱুত্থানং দম্মী’’তি ৱদতি, তং অন্তোৱস্সং ৱুত্থানমেৱ পাপুণাতি. দিসাপক্কন্তানম্পি সভাগা গণ্হিতুং লভন্তি.

সচে ‘‘অনাগতে ৱস্সাৱাসিকং দম্মী’’তি ৱদতি, তং ঠপেত্ৱা ৱস্সূপনাযিকদিৱসে গহেতব্বং. অথ ‘‘অগুত্তো ৱিহাৰো, চোৰভযং অত্থি, ন সক্কা ঠপেতুং, গণ্হিত্ৱা ৱা আহিণ্ডিতু’’ন্তি ৱুত্তে ‘‘সম্পত্তানং দম্মী’’তি ৱদতি, ভাজেত্ৱা গহেতব্বং. সচে ৱদতি ‘‘ইতো মে, ভন্তে, ততিযে ৱস্সে ৱস্সাৱাসিকং ন দিন্নং, তং দম্মী’’তি, তস্মিং অন্তোৱস্সে ৱুত্থভিক্খূনং পাপুণাতি. সচে তে দিসাপক্কন্তা, অঞ্ঞো ৱিস্সাসিকো গণ্হাতি, দাতব্বং. অথ একোযেৱ অৱসিট্ঠো, সেসা কালকতা, সব্বং একস্সেৱ পাপুণাতি. সচে একোপি নত্থি, সঙ্ঘিকং হোতি, সম্মুখীভূতেহি ভাজেতব্বন্তি.

২৭৩৪. যাগুযা পন পীতায ৱা ভত্তে ৱা ভুত্তে সচে পন আদিস্স ‘‘যেন মে যাগু পীতা, তস্স দম্মি, যেন মে ভত্তং ভুত্তং, তস্স দম্মী’’তি পৰিচ্ছিন্দিত্ৱা চীৱৰং দেতি, ৱিনযধৰেন তত্থ তত্থেৱ দানং দাতব্বন্তি যোজনা. এস নযো খাদনীযচীৱৰসেনাসনভেসজ্জাদীসু.

তত্ৰাযং ৱিনিচ্ছযো – ভিক্খূ অজ্জতনায ৱা স্ৱাতনায ৱা যাগুযা নিমন্তেত্ৱা তেসং ঘৰং পৱিট্ঠানং যাগুং দেতি, যাগুং দত্ৱা পীতায যাগুযা ‘‘ইমানি চীৱৰানি যেহি ময্হং যাগু পীতা, তেসং দম্মী’’তি দেতি, যেহি নিমন্তিতেহি যাগু পীতা, তেসংযেৱ পাপুণন্তি, যেহি পন ভিক্খাচাৰৱত্তেন ঘৰদ্ৱাৰেন গচ্ছন্তেহি ৱা ঘৰং পৱিট্ঠেহি ৱা যাগু লদ্ধা, যেসং ৱা আসনসালতো পত্তং আহৰিত্ৱা মনুস্সেহি নীতা, যে ৱা থেৰেহি পেসিতা, তেসং ন পাপুণন্তি.

সচে পন নিমন্তিতভিক্খূহি সদ্ধিং অঞ্ঞেপি বহূ আগন্ত্ৱা অন্তোগেহঞ্চ বহিগেহঞ্চ পূৰেত্ৱা নিসিন্না, দাযকো চ এৱং ৱদতি ‘‘নিমন্তিতা ৱা হোন্তু অনিমন্তিতা ৱা, যেসং মযা যাগু দিন্না, সব্বেসং ইমানি ৱত্থানি হোন্তূ’’তি, সব্বেসং পাপুণন্তি. যেহি পন থেৰানং হত্থতো যাগু লদ্ধা, তেসং ন পাপুণন্তি. অথ সো ‘‘যেহি ময্হং যাগু পীতা, সব্বেসং হোন্তূ’’তি ৱদতি, সব্বেসং পাপুণন্তি. ভত্তখাদনীযেসুপি এসেৱ নযো.

চীৱৰে ৱাতি পুব্বেপি যেন ৱস্সং ৱাসেত্ৱা ভিক্খূনং চীৱৰং দিন্নপুব্বং হোতি, সো চে ভিক্খূ ভোজেত্ৱা ৱদতি ‘‘যেসং মযা পুব্বে চীৱৰং দিন্নং, তেসংযেৱ ইমং চীৱৰং ৱা সুত্তং ৱা সপ্পিমধুফাণিতাদীনি ৱা হোন্তূ’’তি, সব্বং তেসংযেৱ পাপুণাতি.

সেনাসনে ৱাতি ‘‘যো মযা কাৰিতে ৱিহাৰে ৱা পৰিৱেণে ৱা ৱসতি, তস্সিদং হোতূ’’তি ৱুত্তে তস্সেৱ হোতি.

ভেসজ্জে ৱাতি ‘‘মযং কালেন কালং থেৰানং সপ্পিআদীনি ভেসজ্জানি দেম, যেহি তানি লদ্ধানি, তেসংযেৱিদং হোতূ’’তি ৱুত্তে তেসংযেৱ হোতীতি.

২৭৩৫. দীযতেতি দানন্তি কম্মসাধনেন চীৱৰং ৱুচ্চতি. যং-সদ্দেন চীৱৰস্স পৰামট্ঠত্তা তং-সদ্দেনাপি তদেৱ পৰামসিতব্বন্তি.

তত্ৰাযং ৱিনিচ্ছযো – ‘‘ইমং চীৱৰং ইত্থন্নামস্স দম্মী’’তি এৱং পৰম্মুখা ৱা ‘‘ইদং মে, ভন্তে, তুম্হাকং দম্মী’’তি এৱং সম্মুখা ৱা পাদমূলে ঠপেত্ৱা ৱা দেতি, তং তস্সেৱ হোতি. সচে পন ‘‘ইদং তুম্হাকঞ্চ তুম্হাকং অন্তেৱাসিকানঞ্চ দম্মী’’তি এৱং ৱদতি, থেৰস্স চ অন্তেৱাসিকানঞ্চ পাপুণাতি. উদ্দেসং গহেতুং আগতো গহেত্ৱা গচ্ছন্তো চ অত্থি, তস্সাপি পাপুণাতি. ‘‘তুম্হেহি সদ্ধিং নিবদ্ধচাৰিকভিক্খূনং দম্মী’’তি ৱুত্তে উদ্দেসন্তেৱাসিকানং ৱত্তং কত্ৱা উদ্দেসপৰিপুচ্ছাদীনি গহেত্ৱা ৱিচৰন্তানং সব্বেসং পাপুণাতীতি.

২৭৩৭. ৱদতিচ্চেৱমেৱ চেতি ইচ্চেৱং যথাৱুত্তনযেন ৱদতি চে. তন্তি তং পৰিক্খাৰং. তেসন্তি মাতুআদীনং. সঙ্ঘস্সেৱ সন্তকং হোতীতি যোজনা.

২৭৩৮. ‘‘পঞ্চন্নং…পে… হোতী’’তি ইমিনা পুৰিমগাথাদ্ৱযেন ৱিত্থাৰিতমেৱত্থং সংখিপিত্ৱা দস্সেতি. পঞ্চন্নং সহধম্মিকানং. অচ্চযেতি কালকিৰিযায. দানন্তি ‘‘মযি কালকতে ইমং পৰিক্খাৰং তুয্হং হোতু, তৱ সন্তকং কৰোহী’’তিআদিনা পৰিচ্চজনং. কিঞ্চিপীতি অন্তমসো দন্তকট্ঠম্পি. গিহীনং পন দানং তথা দাযকানং গিহীনমেৱ অচ্চযে ৰূহতীতি যোজনা.

২৭৩৯. ভিক্খু ৱা সামণেৰো ৱা ভিক্খুনিউপস্সযে কালং কৰোতি, অস্স ভিক্খুস্স ৱা সামণেৰস্স ৱা পৰিক্খাৰা ভিক্খূনংযেৱ সন্তকা ভিক্খুসঙ্ঘস্সেৱ সন্তকাতি যোজনা. ভিক্খুসঙ্ঘস্সেৱ সন্তকা কালকতস্স ভিক্খুসঙ্ঘপৰিযাপন্নত্তা.

২৭৪০. সামণেৰী ৱাতি এত্থ ৱা-সদ্দেন ‘‘সিক্খমানা ৱা’’তি ইদং সঙ্গণ্হাতি. ৱিহাৰস্মিং ভিক্খূনং নিৱাসনট্ঠানে. তস্সাতি ভিক্খুনিযা ৱা সামণেৰিযা ৱা সিক্খমানায ৱা পৰিক্খাৰা ভিক্খুনীনং সন্তকা হোন্তীতি যোজনা. সন্তকাতি এত্থাপি ভিক্খূসু ৱুত্তনযেনেৱত্থো গহেতব্বো.

২৭৪১. দেহি নেত্ৱাতি এত্থ ‘‘ইমং চীৱৰ’’ন্তি পকৰণতো লব্ভতি. ‘‘ইমং চীৱৰং নেত্ৱা অসুকস্স দেহী’’তি যং চীৱৰং দিন্নং, তং তস্স পুৰিমস্সেৱ সন্তকং হোতি. ‘‘ইদং চীৱৰং অসুকস্স দম্মী’’তি যং চীৱৰং দিন্নং, তং যস্স পহিয্যতি, তস্স পচ্ছিমস্সেৱ সন্তকং হোতীতি যোজনা.

২৭৪২. যথাৱুত্তৱচনপ্পকাৰানুৰূপেন সামিকে ঞত্ৱা সামিকেসু ৱিস্সাসেন ৱা তেসু মতেসু মতকচীৱৰম্পি গণ্হিতুং ৱট্টতীতি দস্সেতুং আহ ‘‘এৱ’’ন্তিআদি. ‘‘মতস্স ৱা অমতস্স ৱা’’তি পদচ্ছেদো. ৱিস্সাসং ৱাপি গণ্হেয্যাতি জীৱন্তস্স সন্তকং ৱিস্সাসগ্গাহং গণ্হেয্য. গণ্হে মতকচীৱৰন্তি মতস্স চীৱৰং মতকপৰিক্খাৰনীহাৰেন পাপেত্ৱা গণ্হেয্য.

২৭৪৩. ৰজতে অনেনাতি ৰজনন্তি মূলাদিসব্বমাহ. ৱন্তদোসেনাতি সৱাসনসমুচ্ছিন্নৰাগাদিদোসেন. তাদিনাতি ৰূপাদীসু ছড়াৰম্মণেসু ৰাগাদীনং অনুপ্পত্তিযা অট্ঠসু লোকধম্মেসু নিব্বিকাৰতায একসদিসেন.

২৭৪৪-৫. ‘‘মূলে’’তিআদীসু নিদ্ধাৰণে ভুম্মং. মূলৰজনে হলিদ্দিং ঠপেত্ৱা সব্বং মূলৰজনং ৱট্টতি. খন্ধেসু ৰজনেসু মঞ্জেট্ঠঞ্চ তুঙ্গহাৰকঞ্চ ঠপেত্ৱা সব্বং খন্ধৰজনং ৱট্টতি. পত্তেসু ৰজনেসু অল্লিযা পত্তং তথা নীলিযা পত্তঞ্চ ঠপেত্ৱা সব্বং পত্তৰজনং ৱট্টতি. পুপ্ফৰজনেসু কুসুম্ভঞ্চ কিংসুকঞ্চ ঠপেত্ৱা সব্বং পুপ্ফৰজনং ৱট্টতি. তচৰজনে লোদ্দঞ্চ কণ্ডুলঞ্চ ঠপেত্ৱা সব্বং তচৰজনং ৱট্টতি. ফলৰজনং সব্বম্পি ৱট্টতীতি যোজনা.

মঞ্জেট্ঠন্তি একো সকণ্টকৰুক্খো, ৱল্লিৱিসেসো চ, যস্স ৰজনং মঞ্জেট্ঠবীজৱণ্ণং হোতি. মঞ্জেট্ঠৰুক্খস্স খন্ধো সেতৱণ্ণোতি সো ইধ ন গহেতব্বো ৰজনাধিকাৰত্তা. তুঙ্গহাৰকো নাম একো সকণ্টকৰুক্খো, যস্স ৰজনং হৰিতালৱণ্ণং হোতি. অল্লীতি চুল্লতাপিঞ্ছৰুক্খো, যস্স পণ্ণৰজনং হলিদ্দিৱণ্ণং হোতি. নীলীতি গচ্ছৱিসেসো, যস্স পন ৰজনং নীলৱণ্ণং হোতি. কিংসুকং নাম ৱল্লিকিংসুকপুপ্ফং, যস্স ৰজনং লোহিতৱণ্ণং হোতি.

২৭৪৬. কিলিট্ঠসাটকন্তি মলীনসাটকং. ধোৱিতুন্তি একৱাৰং ধোৱিতুং. অল্লিযা ধোতং কিৰ সম্মদেৱ ৰজনং পটিগ্গণ্হাতি.

২৭৪৭. চীৱৰানং কথা সেসাতি ভেদকাৰণপ্পকাৰকথাদিকা ইধ অৱুত্তকথা. পঠমে কথিনে ৱুত্তাতি সেসো. ৱিভাৱিনাতি খন্ধকভাণকেন.

চীৱৰক্খন্ধককথাৱণ্ণনা.

ইতি ৱিনযত্থসাৰসন্দীপনিযা ৱিনযৱিনিচ্ছযৱণ্ণনায

মহাৱগ্গৱিনিচ্ছযৱণ্ণনা নিট্ঠিতা.