৯. চীৱৰৱিপ্পৱাসৱিনিচ্ছযকথা

৫১. চীৱৰেনৱিনাৱাসোতি তিচীৱৰাধিট্ঠানেন অধিট্ঠিতানং তিণ্ণং চীৱৰানং অঞ্ঞতৰেন ৱিপ্পৱাসো. এৱং অধিট্ঠিতেসু হি তীসু চীৱৰেসু একেনপি ৱিনা ৱসিতুং ন ৱট্টতি, ৱসন্তস্স সহ অৰুণুগ্গমনা চীৱৰং নিস্সগ্গিযং হোতি, তস্মা অৰুণুগ্গমনসমযে চীৱৰং অড্ঢতেয্যৰতনপ্পমাণে হত্থপাসে কত্ৱা ৱসিতব্বং. গামনিৱেসনউদোসিতঅড্ডমাড়পাসাদহম্মিযনাৱাসত্থখেত্তধঞ্ঞকৰণআৰামৱিহাৰৰুক্খমূলঅজ্ঝোকাসেসু পন অযং ৱিসেসো (পাৰা. অট্ঠ. ২.৪৭৭-৮) – সচে একস্স ৰঞ্ঞো গামভোজকস্স ৱা সন্তকো গামো হোতি, যেন কেনচি পাকাৰেন ৱা ৱতিযা ৱা পৰিখায ৱা পৰিক্খিত্তো চ, এৱৰূপে গামে চীৱৰং নিক্খিপিত্ৱা গামব্ভন্তৰে যত্থ কত্থচি যথাৰুচিতট্ঠানে অৰুণং উট্ঠাপেতুং ৱট্টতি. সচে পন অপৰিক্খিত্তো হোতি, এৱৰূপে গামে যস্মিং ঘৰে চীৱৰং নিক্খিত্তং, তস্মিং ৱত্থব্বং, তস্স ৱা ঘৰস্স হত্থপাসে সমন্তা অড্ঢতেয্যৰতনব্ভন্তৰে ৱসিতব্বং. তং পমাণং অতিক্কমিত্ৱা সচেপি ইদ্ধিমা ভিক্খু আকাসে অৰুণং উট্ঠাপেতি, চীৱৰং নিস্সগ্গিযমেৱ হোতি.

সচে নানাৰাজূনং ৱা ভোজকানং ৱা গামো হোতি ৱেসালীকুসিনাৰাদিসদিসো পৰিক্খিত্তো চ, এৱৰূপে গামে যস্মিং ঘৰে চীৱৰং নিক্খিত্তং, তত্থ ৱা ৱত্থব্বং, তত্থ সদ্দসঙ্ঘট্টনেন ৱা জনসম্বাধেন ৱা ৱসিতুং অসক্কোন্তেন সভাযে ৱা ৱত্থব্বং নগৰদ্ৱাৰমূলে ৱা. তত্ৰাপি ৱসিতুং অসক্কোন্তেন যত্থ কত্থচি ফাসুকট্ঠানে ৱসিত্ৱা অন্তোঅৰুণে আগম্ম তেসংযেৱ সভাযনগৰদ্ৱাৰমূলানং হত্থপাসে ৱসিতব্বং. ঘৰস্স পন চীৱৰস্স ৱা হত্থপাসে ৱত্তব্বমেৱ নত্থি.

সচে ঘৰে অট্ঠপেত্ৱা ‘‘সভাযে ঠপেস্সামী’’তি সভাযং গচ্ছন্তো হত্থং পসাৰেত্ৱা ‘‘হন্দিমং চীৱৰং ঠপেহী’’তি এৱং নিক্খেপসুখে হত্থপাসগতে কিস্মিঞ্চি আপণে চীৱৰং নিক্খিপতি, তেন পুৰিমনযেনেৱ সভাযে ৱা ৱত্থব্বং, দ্ৱাৰমূলে ৱা তেসং হত্থপাসে ৱা ৱসিতব্বং.

সচে নগৰস্স বহূনিপি দ্ৱাৰানি হোন্তি বহূনি চ সভাযানি, সব্বত্থ ৱসিতুং ন ৱট্টতি. যস্সা পন ৱীথিযা চীৱৰং ঠপিতং, যং তস্সা সম্মুখট্ঠানে সভাযঞ্চ দ্ৱাৰঞ্চ, তস্স সভাযস্স চ দ্ৱাৰস্স চ হত্থপাসে ৱসিতব্বং. এৱঞ্হি সতি সক্কা চীৱৰস্স পৱত্তিং জানিতুং. সভাযং পন গচ্ছন্তেন যস্স আপণিকস্স হত্থে নিক্খিত্তং, সচে সো তং চীৱৰং অতিহৰিত্ৱা ঘৰে নিক্খিপতি, ৱীথিহত্থপাসো ন ৰক্খতি, ঘৰস্স হত্থপাসে ৱত্থব্বং. সচে মহন্তং ঘৰং হোতি দ্ৱে ৱীথিযো ফৰিত্ৱা ঠিতং, পুৰতো ৱা পচ্ছতো ৱা হত্থপাসেযেৱ অৰুণং উট্ঠাপেতব্বং. সভাযে নিক্খিপিত্ৱা পন সভাযে ৱা তস্স সম্মুখে নগৰদ্ৱাৰমূলে ৱা তেসংযেৱ হত্থপাসে ৱা অৰুণং উট্ঠাপেতব্বং. সচে পন গামো অপৰিক্খিত্তো হোতি, যস্মিং ঘৰে চীৱৰং নিক্খিত্তং, তস্মিং ঘৰে তস্স ঘৰস্স ৱা হত্থপাসে ৱত্থব্বং.

সচে (পাৰা. ৪৮০) এককুলস্স সন্তকং নিৱেসনং হোতি পৰিক্খিত্তঞ্চ নানাগব্ভং নানাওৱৰকং, অন্তোনিৱেসনে চীৱৰং নিক্খিপিত্ৱা অন্তোনিৱেসনে ৱত্থব্বং. সচে অপৰিক্খিত্তং, যস্মিং গব্ভে চীৱৰং নিক্খিত্তং হোতি, তস্মিং গব্ভে ৱত্থব্বং গব্ভস্স হত্থপাসে ৱা. সচে নানাকুলস্স নিৱেসনং হোতি পৰিক্খিত্তঞ্চ নানাগব্ভং নানাওৱৰকং, যস্মিং গব্ভে চীৱৰং নিক্খিত্তং হোতি, তস্মিং গব্ভে ৱত্থব্বং, সব্বেসং সাধাৰণে ঘৰদ্ৱাৰমূলে ৱা গব্ভস্স ৱা ঘৰদ্ৱাৰমূলস্স ৱা হত্থপাসে. সচে অপৰিক্খিত্তং হোতি, যস্মিং গব্ভে চীৱৰং নিক্খিত্তং, তস্মিং গব্ভে ৱত্থব্বং গব্ভস্স ৱা হত্থপাসে. উদোসিতঅড্ডমাড়পাসাদহম্মিযেসুপি নিৱেসনে ৱুত্তনযেনেৱ ৱিনিচ্ছযো ৱেদিতব্বো.

সচে এককুলস্স নাৱা হোতি, অন্তোনাৱাযং চীৱৰং নিক্খিপিত্ৱা অন্তোনাৱাযং ৱত্থব্বং. সচে নানাকুলস্স নাৱা হোতি নানাগব্ভা নানাওৱৰকা, যস্মিং ওৱৰকে চীৱৰং নিক্খিত্তং হোতি, তস্মিং ওৱৰকে ৱত্থব্বং ওৱৰকস্স হত্থপাসে ৱা.

সচে এককুলস্স সত্থো হোতি, তস্মিং সত্থে চীৱৰং নিক্খিপিত্ৱা পুৰতো ৱা পচ্ছতো ৱা সত্তব্ভন্তৰা ন ৱিজহিতব্বা, পস্সতো অব্ভন্তৰং ন ৱিজহিতব্বং. একং অব্ভন্তৰং অট্ঠৱীসতিহত্থং হোতি. সচে নানাকুলস্স সত্থো হোতি, সত্থে চীৱৰং নিক্খিপিত্ৱা চীৱৰস্স হত্থপাসে ৱসিতব্বং. সচে সত্থো গচ্ছন্তো গামং ৱা নদিং ৱা পৰিযাদিযিত্ৱা তিট্ঠতি, অন্তোপৱিট্ঠেন সদ্ধিং একাবদ্ধো হুত্ৱা ওৰঞ্চ পাৰঞ্চ ফৰিত্ৱা ঠিতো হোতি, সত্থপৰিহাৰো লব্ভতি. অথ গামে ৱা নদিযা ৱা পৰিযাপন্নো হোতি, গামপৰিহাৰো চেৱ নদীপৰিহাৰো চ লব্ভতি. সচে ৱিহাৰসীমং অতিক্কমিত্ৱা তিট্ঠতি, অন্তোসীমায চ চীৱৰং হোতি, ৱিহাৰং গন্ত্ৱা ৱসিতব্বং. সচে বহিসীমায চীৱৰং হোতি, সত্থসমীপেযেৱ ৱসিতব্বং. সচে গচ্ছন্তো সত্থো সকটে ৱা ভগ্গে গোণে ৱা নট্ঠে অন্তৰা ছিজ্জতি, যস্মিং কোট্ঠাসে চীৱৰং নিক্খিত্তং, তত্থ ৱসিতব্বং.

সচে এককুলস্স খেত্তং হোতি পৰিক্খিত্তঞ্চ, অন্তোখেত্তে চীৱৰং নিক্খিপিত্ৱা অন্তোখেত্তে ৱত্থব্বং. সচে অপৰিক্খিত্তং হোতি, চীৱৰস্স হত্থপাসে ৱসিতব্বং. সচে নানাকুলস্স খেত্তং হোতি পৰিক্খিত্তঞ্চ, অন্তোখেত্তে চীৱৰং নিক্খিপিত্ৱা দ্ৱাৰমূলে ৱত্থব্বং দ্ৱাৰমূলস্স হত্থপাসে ৱা. সচে অপৰিক্খিত্তং হোতি, চীৱৰস্স হত্থপাসে ৱসিতব্বং.

সচে এককুলস্স ধঞ্ঞকৰণং হোতি পৰিক্খিত্তঞ্চ, অন্তোধঞ্ঞকৰণে চীৱৰং নিক্খিপিত্ৱা অন্তোধঞ্ঞকৰণে ৱত্থব্বং. সচে অপৰিক্খিত্তং হোতি, চীৱৰস্স হত্থপাসে ৱসিতব্বং. সচে নানাকুলস্স ধঞ্ঞকৰণং হোতি পৰিক্খিত্তঞ্চ, অন্তোধঞ্ঞকৰণে চীৱৰং নিক্খিপিত্ৱা দ্ৱাৰমূলে ৱা ৱত্থব্বং দ্ৱাৰমূলস্স ৱা হত্থপাসে. সচে অপৰিক্খিত্তং হোতি, চীৱৰস্স হত্থপাসে ৱসিতব্বং. পুপ্ফাৰামফলাৰামেসুপি খেত্তে ৱুত্তনযেনেৱ ৱিনিচ্ছযো ৱেদিতব্বো.

সচে এককুলস্স ৱিহাৰো হোতি পৰিক্খিত্তো চ, অন্তোৱিহাৰে চীৱৰং নিক্খিপিত্ৱা অন্তোৱিহাৰে ৱত্থব্বং. সচে অপৰিক্খিত্তো হোতি, যস্মিং ৱিহাৰে চীৱৰং নিক্খিত্তং, তস্মিং ৱত্থব্বং তস্স ৱিহাৰস্স ৱা হত্থপাসে.

সচে এককুলস্স ৰুক্খমূলং হোতি, যং মজ্ঝন্হিকে কালে সমন্তা ছাযা ফৰতি, অন্তোছাযায চীৱৰং নিক্খিপিত্ৱা অন্তোছাযায ৱত্থব্বং. ৱিৰড়সাখস্স পন ৰুক্খস্স আতপেন ফুট্ঠোকাসে ঠপিতং নিস্সগ্গিযমেৱ হোতি, তস্মা তাদিসস্স ৰুক্খস্স সাখচ্ছাযায ৱা খন্ধচ্ছাযায ৱা ঠপেতব্বং. সচে সাখায ৱা ৱিটপে ৱা ঠপেতি, উপৰি অঞ্ঞসাখচ্ছাযায ফুট্ঠোকাসেযেৱ ঠপেতব্বং. খুজ্জৰুক্খস্স ছাযা দূৰং গচ্ছতি, ছাযায গতট্ঠানে ঠপেতুং ৱট্টতিযেৱ. সচে নানাকুলস্স ৰুক্খমূলং হোতি, চীৱৰস্স হত্থপাসে ৱসিতব্বং.

অজ্ঝোকাসে পন অগামকে অৰঞ্ঞে চীৱৰং ঠপেত্ৱা তস্স সমন্তা সত্তব্ভন্তৰে ৱসিতব্বং. অগামকং নাম অৰঞ্ঞং ৱিঞ্ঝাটৱীআদীসু ৱা সমুদ্দমজ্ঝে ৱা মচ্ছবন্ধানং অগমনপথে দীপকেসু লব্ভতি. তাদিসে অৰঞ্ঞে মজ্ঝে ঠিতস্স সমন্তা সত্তব্ভন্তৰপৰিচ্ছেদো, ৱিনিব্বেধেন চুদ্দস হোন্তি. মজ্ঝে নিসিন্নো পুৰত্থিমায ৱা পচ্ছিমায ৱা দিসায পৰিযন্তে ঠপিতচীৱৰং ৰক্খতি. সচে পন অৰুণুগ্গমনসমযে কেসগ্গমত্তম্পি পুৰত্থিমং দিসং গচ্ছতি, পচ্ছিমায দিসায চীৱৰং নিস্সগ্গিযং হোতি. এস নযো ইতৰস্মিং. নিস্সগ্গিযং পন চীৱৰং অনিস্সজ্জিত্ৱা পৰিভুঞ্জন্তো দুক্কটং আপজ্জতি.

৫২. সচে পধানিকো ভিক্খু সব্বৰত্তিং পধানমনুযুঞ্জিত্ৱা পচ্চূসসমযে ‘‘নহাযিস্সামী’’তি তীণি চীৱৰানি তীৰে ঠপেত্ৱা নদিং ওতৰতি, নহাযন্তস্সেৱ চস্স অৰুণং উট্ঠহতি, কিং কাতব্বং? সো হি যদি উত্তৰিত্ৱা চীৱৰং নিৱাসেতি, নিস্সগ্গিযং চীৱৰং, অনিস্সজ্জিত্ৱা পৰিভুঞ্জনপচ্চযা দুক্কটং আপজ্জতি. অথ নগ্গো গচ্ছতি, এৱম্পি দুক্কটং আপজ্জতীতি? নাপজ্জতি. সো হি যাৱ অঞ্ঞং ভিক্খুং দিস্ৱা ৱিনযকম্মং ন কৰোতি, তাৱ তেসং চীৱৰানং অপৰিভোগাৰহত্তা নট্ঠচীৱৰট্ঠানে ঠিতো হোতি, নট্ঠচীৱৰস্স চ অকপ্পিযং নাম নত্থি, তস্মা একং নিৱাসেত্ৱা দ্ৱে হত্থেন গহেত্ৱা ৱিহাৰং গন্ত্ৱা ৱিনযকম্মং কাতব্বং. সচে দূৰে ৱিহাৰো হোতি, অন্তৰামগ্গে মনুস্সা সঞ্চৰন্তি, একং নিৱাসেত্ৱা একং পাৰুপিত্ৱা একং অংসকূটে ঠপেত্ৱা গন্তব্বং. সচে ৱিহাৰে সভাগং ভিক্খুং ন পস্সতি, ভিক্খাচাৰং গতা হোন্তি, সঙ্ঘাটিং বহিগামে ঠপেত্ৱা সন্তৰুত্তৰেন আসনসালং গন্ত্ৱা ৱিনযকম্মং কাতব্বং. সচে বহিগামে চোৰভযং হোতি, পাৰুপিত্ৱা গন্তব্বং. সচে আসনসালা সম্বাধা হোতি, জনাকিণ্ণা ন সক্কা একমন্তে চীৱৰং অপনেত্ৱা ৱিনযকম্মং কাতুং, একং ভিক্খুং আদায বহিগামং গন্ত্ৱা ৱিনযকম্মং কত্ৱা চীৱৰানি পৰিভুঞ্জিতব্বানি.

সচে থেৰা ভিক্খূ দহৰানং হত্থে পত্তচীৱৰং দত্ৱা মগ্গং গচ্ছন্তা পচ্ছিমযামে সযিতুকামা হোন্তি, অত্তনো অত্তনো চীৱৰং হত্থপাসে কত্ৱাৱ সযিতব্বং. সচে গচ্ছন্তানংযেৱ অসম্পত্তেসু দহৰেসু অৰুণং উগ্গচ্ছতি, চীৱৰং নিস্সগ্গিযং হোতি, নিস্সযো পন ন পটিপ্পস্সম্ভতি. দহৰানম্পি পুৰতো গচ্ছন্তানং থেৰেসু অসম্পত্তেসু এসেৱ নযো. মগ্গং ৱিৰজ্ঝিত্ৱা অৰঞ্ঞে অঞ্ঞমঞ্ঞং অপস্সন্তেসুপি এসেৱ নযো. সচে পন দহৰা ‘‘মযং, ভন্তে, মুহুত্তং সযিত্ৱা অসুকস্মিং নাম ওকাসে তুম্হে সম্পাপুণিস্সামা’’তি ৱত্ৱা যাৱ অৰুণুগ্গমনা সযন্তি, চীৱৰঞ্চ নিস্সগ্গিযং হোতি, নিস্সযো চ পটিপ্পস্সম্ভতি. দহৰে উয্যোজেত্ৱা থেৰেসু সযন্তেসুপি এসেৱ নযো. দ্ৱেধাপথং দিস্ৱা থেৰা ‘‘অযং মগ্গো’’, দহৰা ‘‘অযং মগ্গো’’তি ৱত্ৱা অঞ্ঞমঞ্ঞস্স ৱচনং অগ্গহেত্ৱা গতা, সহ অৰুণস্স উগ্গমনা চীৱৰানি চ নিস্সগ্গিযানি হোন্তি, নিস্সযো চ পটিপ্পস্সম্ভতি. সচে দহৰা মগ্গতো ওক্কম্ম ‘‘অন্তোঅৰুণেযেৱ নিৱত্তিস্সামা’’তি ভেসজ্জত্থায গামং পৱিসিত্ৱা আগচ্ছন্তি, অসম্পত্তানংযেৱ চ নেসং অৰুণো উগ্গচ্ছতি, চীৱৰানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে পন ধেনুভযেন ৱা সুনখভযেন ৱা মুহুত্তং ঠত্ৱা ‘‘গমিস্সামা’’তি ঠত্ৱা ৱা নিসীদিত্ৱা ৱা গচ্ছন্তি, অন্তৰা অৰুণে উগ্গতে চীৱৰানি চ নিস্সগ্গিযানি হোন্তি, নিস্সযো চ পটিপ্পস্সম্ভতি.

সচে ‘‘অন্তোঅৰুণেযেৱ আগমিস্সামা’’তি অন্তোসীমাযং গামং পৱিট্ঠানং অন্তৰা অৰুণো উগ্গচ্ছতি, নেৱ চীৱৰানি নিস্সগ্গিযানি হোন্তি, ন নিস্সযো পটিপ্পস্সম্ভতি. সচে পন ‘‘ৱিভাযতু তাৱা’’তি নিসীদন্তি, অৰুণে উগ্গতে ন চীৱৰানি নিস্সগ্গিযানি হোন্তি, নিস্সযো পন পটিপ্পস্সম্ভতি. সচে যেপি ‘‘অন্তোঅৰুণেযেৱ আগমিস্সামা’’তি সামন্তৱিহাৰং ধম্মস্সৱনত্থায সউস্সাহা গচ্ছন্তি, অন্তৰামগ্গেযেৱ চ নেসং অৰুণো উগ্গচ্ছতি, চীৱৰানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে ধম্মগাৰৱেন ‘‘যাৱপৰিযোসানং সুত্ৱাৱ গমিস্সামা’’তি নিসীদন্তি, সহ অৰুণস্স উগ্গমনা চীৱৰানিপি নিস্সগ্গিযানি হোন্তি, নিস্সযো চ পটিপ্পস্সম্ভতি. থেৰেন দহৰং চীৱৰধোৱনত্থায গামকং পেসেন্তেন অত্তনো চীৱৰং পচ্চুদ্ধৰিত্ৱাৱ দাতব্বং, দহৰস্সপি চীৱৰং পচ্চুদ্ধৰাপেত্ৱাৱ ঠপেতব্বং. সচে অসতিযা গচ্ছতি, অত্তনো চীৱৰং পচ্চুদ্ধৰিত্ৱা দহৰস্স চীৱৰং ৱিস্সাসেন গহেত্ৱা ঠপেতব্বং. সচে থেৰো ন সৰতি, দহৰোৱ সৰতি, দহৰেন অত্তনো চীৱৰং পচ্চুদ্ধৰিত্ৱা থেৰস্স চীৱৰং ৱিস্সাসেন গহেত্ৱা গন্ত্ৱা ৱত্তব্বং ‘‘ভন্তে, তুম্হাকং চীৱৰং অধিট্ঠহিত্ৱা পৰিভুঞ্জথা’’তি. অত্তনোপি চীৱৰং অধিট্ঠাতব্বং. এৱং একস্স সতিযাপি আপত্তিমোক্খো হোতি.

ইতি পাড়িমুত্তকৱিনযৱিনিচ্ছযসঙ্গহে

চীৱৰৱিপ্পৱাসৱিনিচ্ছযকথা সমত্তা.