১০. ভণ্ডপটিসামনৱিনিচ্ছযকথা

৫৩. ভণ্ডস্স পটিসামনন্তি পৰেসং ভণ্ডস্স গোপনং. পৰেসঞ্হি (পাচি. অট্ঠ. ৫০৬) কপ্পিযৱত্থু ৱা হোতু অকপ্পিযৱত্থু ৱা, অন্তমসো মাতু কণ্ণপিড়ন্ধনং কালপণ্ণম্পি গিহিসন্তকং ভণ্ডাগাৰিকসীসেন পটিসামেন্তস্স পাচিত্তিযং. সচে পন মাতাপিতূনং সন্তকং অৱস্সং পটিসামেতব্বং কপ্পিযভণ্ডং হোতি, অত্তনো অত্থায গহেত্ৱা পটিসামেতব্বং. ‘‘ইদং পটিসামেত্ৱা দেহী’’তি পন ৱুত্তে ‘‘ন ৱট্টতী’’তি পটিক্খিপিতব্বং. সচে ‘‘পটিসামেহী’’তি পাতেত্ৱা গচ্ছন্তি, পলিবোধো নাম হোতি, পটিসামেতুং ৱট্টতি. ৱিহাৰে কম্মং কৰোন্তা ৱড্ঢকীআদযো ৱা ৰাজৱল্লভা ৱা ‘‘অত্তনো উপকৰণভণ্ডং ৱা সযনভণ্ডং ৱা পটিসামেত্ৱা দেথা’’তি ৱদন্তি, ছন্দেনপি ভযেনপি ন কাতব্বমেৱ, গুত্তট্ঠানং পন দস্সেতুং ৱট্টতি, বলক্কাৰেন পাতেত্ৱা গতেসু চ পটিসামেতুং.

সচে (পাৰা. অট্ঠ. ১.১১১) অত্তনো হত্থে পটিসামনত্থায ঠপিতং ভণ্ডং সামিকেন ‘‘দেহি মে ভণ্ড’’ন্তি যাচিতো অদাতুকামো ‘‘নাহং গণ্হামী’’তি ভণতি, সম্পজানমুসাৱাদেপি অদিন্নাদানস্স পযোগত্তা দুক্কটং. ‘‘কিং তুম্হে ভণথ, নেৱিদং ময্হং অনুৰূপং, ন তুম্হাক’’ন্তিআদীনি ৱদন্তস্সপি দুক্কটমেৱ. ‘‘ৰহো মযা এতস্স হত্থে ঠপিতং, ন অঞ্ঞো কোচি জানাতি, দস্সতি নু খো মে, নো’’তি সামিকো ৱিমতিং উপ্পাদেতি, ভিক্খুস্স থুল্লচ্চযং. তস্স ফৰুসাদিভাৱং দিস্ৱা সামিকো ‘‘ন ময্হং দস্সতী’’তি ধুৰং নিক্খিপতি, তত্ৰ সচাযং ভিক্খু ‘‘কিলমেত্ৱা নং দস্সামী’’তি দানে সউস্সাহো, ৰক্খতি তাৱ. সচেপি সো দানে নিৰুস্সাহো, ভণ্ডসামিকো পন গহণে সউস্সাহো, ৰক্খতিযেৱ. যদি পন তস্মিং দানে নিৰুস্সাহো ভণ্ডসামিকো ‘‘ন ময্হং দস্সতী’’তি ধুৰং নিক্খিপতি, এৱং উভিন্নং ধুৰনিক্খেপেন ভিক্খুনো পাৰাজিকং. যদিপি মুখেন ‘‘দস্সামী’’তি ৱদতি, চিত্তেন পন অদাতুকামো, এৱম্পি সামিকস্স ধুৰনিক্খেপে পাৰাজিকং. তং পন সঙ্গোপনত্থায অত্তনো হত্থে পৰেহি ঠপিতং ভণ্ডং অগুত্তদেসতো ঠানা চাৱেত্ৱা গুত্তট্ঠানে ঠপনত্থায হৰতো অনাপত্তি. থেয্যচিত্তেনপি ঠানা চাৱেন্তস্স অৱহাৰো নত্থি. কস্মা? অত্তনো হত্থে নিক্খিত্তত্তা, ভণ্ডদেয্যং পন হোতি. থেয্যচিত্তেন পৰিভুঞ্জতোপি এসেৱ নযো.

৫৪. পঞ্চন্নং সহধম্মিকানং সন্তকং পন যং কিঞ্চি পৰিক্খাৰং পটিসামেতুং ৱট্টতি. সচে আগন্তুকো ভিক্খু আৱাসিকানং চীৱৰকম্মং কৰোন্তানং সমীপে পত্তচীৱৰং ঠপেত্ৱা ‘‘এতে সঙ্গোপেস্সন্তী’’তি মঞ্ঞমানো নহাযিতুং ৱা অঞ্ঞত্ৰ ৱা গচ্ছতি, সচে তং আৱাসিকা সঙ্গোপেন্তি, ইচ্চেতং কুসলং. নো চে, নট্ঠে গীৱা ন হোতি. সচেপি সো ‘‘ইদং, ভন্তে, ঠপেথা’’তি ৱত্ৱা গচ্ছতি, ইতৰে চ কিচ্চপসুতত্তা ন জানন্তি, এসেৱ নযো. অথাপি তে ‘‘ইদং, ভন্তে, ঠপেথা’’তি ৱুত্তা ‘‘মযং ব্যাৱটা’’তি পটিক্খিপন্তি, ইতৰো চ ‘‘অৱস্সং ঠপেস্সন্তী’’তি অনাদিযিত্ৱা গচ্ছতি, এসেৱ নযো. সচে পন তে তেন যাচিতা ৱা অযাচিতা ৱা ‘‘মযং ঠপেস্সাম, ত্ৱং গচ্ছা’’তি ৱদন্তি, তং সঙ্গোপিতব্বং. নো চে সঙ্গোপেন্তি, নট্ঠে গীৱা. কস্মা? সম্পটিচ্ছিতত্তা.

যো ভিক্খু ভণ্ডাগাৰিকো হুত্ৱা পচ্চূসসমযে এৱ ভিক্খূনং পত্তচীৱৰানি হেট্ঠাপাসাদং ওৰোপেত্ৱা দ্ৱাৰং অপিদহিত্ৱা তেসম্পি অনাৰোচেত্ৱাৱ দূৰে ভিক্খাচাৰং গচ্ছতি, তানি চে চোৰা হৰন্তি, তস্সেৱ গীৱা. যো পন ভিক্খু ভিক্খূহি ‘‘ওৰোপেথ, ভন্তে, পত্তচীৱৰানি, কালো সলাকগ্গহণস্সা’’তি ৱুত্তো ‘‘সমাগতাত্থা’’তি পুচ্ছিত্ৱা ‘‘আম সমাগতাম্হা’’তি ৱুত্তে পত্তচীৱৰানি নীহৰিত্ৱা নিক্খিপিত্ৱা ভণ্ডাগাৰদ্ৱাৰং বন্ধিত্ৱা ‘‘তুম্হে পত্তচীৱৰানি গহেত্ৱা হেট্ঠাপাসাদদ্ৱাৰং পটিজগ্গিত্ৱা গচ্ছেয্যাথা’’তি ৱত্ৱা গচ্ছতি. তত্ৰ চেকো অলসজাতিকো ভিক্খু ভিক্খূসু গতেসু পচ্ছা অক্খীনি পুঞ্ছন্তো উট্ঠহিত্ৱা উদকট্ঠানং মুখধোৱনত্থং গচ্ছতি, তং খণং দিস্ৱা চোৰা তস্স পত্তচীৱৰং হৰন্তি, সুহটং, ভণ্ডাগাৰিকস্স গীৱা ন হোতি.

সচেপি কোচি ভণ্ডাগাৰিকস্স অনাৰোচেত্ৱাৱ ভণ্ডাগাৰে অত্তনো পৰিক্খাৰং ঠপেতি, তস্মিম্পি নট্ঠে ভণ্ডাগাৰিকস্স গীৱা ন হোতি. সচে পন ভণ্ডাগাৰিকো তং দিস্ৱা ‘‘অট্ঠানে ঠপিত’’ন্তি গহেত্ৱা ঠপেতি, নট্ঠে তস্সেৱ গীৱা. সচেপি ঠপিতভিক্খুনা ‘‘মযা, ভন্তে, ঈদিসো নাম পৰিক্খাৰো ঠপিতো, উপধাৰেয্যাথা’’তি ৱুত্তো ‘‘সাধূ’’তি সম্পটিচ্ছতি, দুন্নিক্খিত্তং ৱা মঞ্ঞমানো অঞ্ঞস্মিং ঠানে ঠপেতি, নট্ঠে তস্সেৱ গীৱা. ‘‘নাহং জানামী’’তি পটিক্খিপন্তস্স পন নত্থি গীৱা. যোপি তস্স পস্সন্তস্সেৱ ঠপেতি, ভণ্ডাগাৰিকঞ্চ ন সম্পটিচ্ছাপেতি, নট্ঠং সুনট্ঠমেৱ. সচে পন নং ভণ্ডাগাৰিকো অঞ্ঞত্ৰ ঠপেতি, নট্ঠে গীৱা. সচে ভণ্ডাগাৰং সুগুত্তং, সব্বো সঙ্ঘস্স চেতিযস্স চ পৰিক্খাৰো তত্থেৱ ঠপীযতি, ভণ্ডাগাৰিকো চ বালো অব্যত্তো দ্ৱাৰং ৱিৱৰিত্ৱা ধম্মকথং ৱা সোতুং অঞ্ঞং ৱা কিঞ্চি কাতুং কত্থচি গচ্ছতি, তং খণং দিস্ৱা যত্তকং চোৰা হৰন্তি, সব্বং তস্স গীৱা. ভণ্ডাগাৰতো নিক্খমিত্ৱা বহি চঙ্কমন্তস্স ৱা দ্ৱাৰং ৱিৱৰিত্ৱা সৰীৰং উতুং গাহাপেন্তস্স ৱা তত্থেৱ সমণধম্মানুযোগেন নিসিন্নস্স ৱা তত্থেৱ নিসীদিত্ৱা কেনচি কম্মেন ব্যাৱটস্স ৱা উচ্চাৰপস্সাৱপীড়িতস্সপি সতো তত্থেৱ উপচাৰে ৱিজ্জমানে বহি গচ্ছতো ৱা অঞ্ঞেন ৱা কেনচি আকাৰেন পমত্তস্স সতো দ্ৱাৰং ৱিৱৰিত্ৱা ৱা ৱিৱটমেৱ পৱিসিত্ৱা ৱা সন্ধিং ছিন্দিত্ৱা ৱা যত্তকং তস্স পমাদপচ্চযা চোৰা হৰন্তি, সব্বং তস্সেৱ গীৱা. ‘‘উণ্হসমযে পন ৱাতপানং ৱিৱৰিত্ৱা নিপজ্জিতুং ৱট্টতী’’তি ৱদন্তি. উচ্চাৰপীড়িতস্স পন তস্মিং উপচাৰে অসতি অঞ্ঞত্থ গচ্ছন্তস্স গিলানপক্খে ঠিতত্তা অৱিসযো, তস্মা গীৱা ন হোতি.

৫৫. যো পন অন্তো উণ্হপীড়িতো দ্ৱাৰং সুগুত্তং কত্ৱা বহি নিক্খমতি, চোৰা তং গহেত্ৱা ‘‘দ্ৱাৰং ৱিৱৰা’’তি ৱদন্তি, যাৱততিযং ন ৱিৱৰিতব্বং. যদি পন তে চোৰা ‘‘সচে ন ৱিৱৰসি, তঞ্চ মাৰেস্সাম, দ্ৱাৰঞ্চ ভিন্দিত্ৱা পৰিক্খাৰং হৰিস্সামা’’তি ফৰসুআদীনি উক্খিপন্তি, ‘‘মযি চ মতে সঙ্ঘস্স চ সেনাসনে ৱিনট্ঠে গুণো নত্থী’’তি ৱিৱৰিতুং ৱট্টতি. ইধাপি ‘‘অৱিসযত্তা গীৱা নত্থী’’তি ৱদন্তি. সচে কোচি আগন্তুকো কুঞ্চিকং ৱা দেতি, দ্ৱাৰং ৱা ৱিৱৰতি, যত্তকং চোৰা হৰন্তি, সব্বং তস্স গীৱা. সঙ্ঘেন ভণ্ডাগাৰং গুত্তত্থায সূচিযন্তকঞ্চ কুঞ্চিকমুদ্দিকা চ যোজেত্ৱা দিন্না হোতি, ভণ্ডাগাৰিকো ঘটিকমত্তং দত্ৱা নিপজ্জতি, চোৰা ৱিৱৰিত্ৱা পৰিক্খাৰং হৰন্তি, তস্সেৱ গীৱা. সূচিযন্তকঞ্চ কুঞ্চিকমুদ্দিকঞ্চ যোজেত্ৱা নিপন্নং পনেতং সচে চোৰা আগন্ত্ৱা ‘‘দ্ৱাৰং ৱিৱৰাহী’’তি ৱদন্তি, তত্থ পুৰিমনযেনেৱ পটিপজ্জিতব্বং. এৱং সুগুত্তং কত্ৱা নিপন্নে পন সচে ভিত্তিং ৱা ছদনং ৱা ভিন্দিত্ৱা উমঙ্গেন ৱা পৱিসিত্ৱা হৰন্তি, ন তস্স গীৱা.

সচে ভণ্ডাগাৰে অঞ্ঞেপি থেৰা ৱসন্তি, ৱিৱটে দ্ৱাৰে অত্তনো অত্তনো পৰিক্খাৰং গহেত্ৱা গচ্ছন্তি, ভণ্ডাগাৰিকো তেসু গতেসু দ্ৱাৰং ন জগ্গতি, সচে তত্থ কিঞ্চি অৱহৰীযতি, ভণ্ডাগাৰিকস্স ইস্সৰৱতায ভণ্ডাগাৰিকস্সেৱ গীৱা, থেৰেহি পন সহাযেহি ভৱিতব্বং. অযঞ্হি সামীচি. যদি ভণ্ডাগাৰিকো ‘‘তুম্হে বহি ঠত্ৱা তুম্হাকং পৰিক্খাৰং গণ্হথ, মা পৱিসিত্থা’’তি ৱদতি, তেসঞ্চ একো লোলমহাথেৰো সামণেৰেহি চেৱ উপট্ঠাকেহি চ সদ্ধিং ভণ্ডাগাৰং পৱিসিত্ৱা নিসীদতি চেৱ নিপজ্জতি চ, যত্তকং ভণ্ডং নস্সতি, সব্বং তস্স গীৱা, ভণ্ডাগাৰিকেন পন অৱসেসথেৰেহি চ সহাযেহি ভৱিতব্বং. অথ ভণ্ডাগাৰিকোৱ লোলসামণেৰে চ উপট্ঠাকে চ গহেত্ৱা ভণ্ডাগাৰে নিসীদতি চেৱ নিপজ্জতি চ, যত্তকং নস্সতি, সব্বং তস্সেৱ গীৱা. তস্মা ভণ্ডাগাৰিকেনেৱ তত্থ ৱসিতব্বং, অৱসেসেহি অপ্পেৱ ৰুক্খমূলে ৱসিতব্বং, ন চ ভণ্ডাগাৰেতি.

৫৬. যে পন অত্তনো অত্তনো সভাগভিক্খূনং ৱসনগব্ভেসু পৰিক্খাৰং ঠপেন্তি, পৰিক্খাৰে নট্ঠে যেহি ঠপিতো, তেসংযেৱ গীৱা, ইতৰেহি পন সহাযেহি ভৱিতব্বং. যদি পন সঙ্ঘো ভণ্ডাগাৰিকস্স ৱিহাৰেযেৱ যাগুভত্তং দাপেতি, সো চ ভিক্খাচাৰত্থায গামং গচ্ছতি, নট্ঠং তস্সেৱ গীৱা. ভিক্খাচাৰং পৱিসন্তেহি অতিৰেকচীৱৰং ৰক্খণত্থায ঠপিতৱিহাৰৱাৰিকস্সপি যাগুভত্তং ৱা নিৱাপং ৱা লভমানস্সেৱ ভিক্খাচাৰং গচ্ছতো যং তত্থ নস্সতি, সব্বং গীৱা. ন কেৱলঞ্চ এত্তকমেৱ, ভণ্ডাগাৰিকস্স ৱিয যং তস্স পমাদপচ্চযা নস্সতি, সব্বং গীৱা.

সচে ৱিহাৰো মহা হোতি, অঞ্ঞং পদেসং ৰক্খিতুং গচ্ছন্তস্স অঞ্ঞস্মিং পদেসে নিক্খিত্তং হৰন্তি, অৱিসযত্তা গীৱা ন হোতি. ঈদিসে পন ৱিহাৰে ৱেমজ্ঝে সব্বেসং ওসৰণট্ঠানে পৰিক্খাৰে ঠপেত্ৱা নিসীদিতব্বং, ৱিহাৰৱাৰিকা ৱা দ্ৱে তযো ঠপেতব্বা. সচে তেসম্পি অপ্পমত্তানং ইতো চিতো চ ৰক্খতংযেৱ কিঞ্চি নস্সতি, গীৱা ন হোতি. ৱিহাৰৱাৰিকে বন্ধিত্ৱা হৰিতভণ্ডম্পি চোৰানং পটিপথং গতেসু অঞ্ঞেন মগ্গেন হৰিতভণ্ডম্পি ন তেসং গীৱা. সচে ৱিহাৰৱাৰিকানং ৱিহাৰে দাতব্বং যাগুভত্তং ৱা নিৱাপো ৱা ন হোতি, তেহি পত্তব্বলাভতো অতিৰেকা দ্ৱে তিস্সো যাগুসলাকা তেসং পহোনকভত্তসলাকা চ ঠপেতুং ৱট্টতি, নিবদ্ধং কত্ৱা পন ন ঠপেতব্বা. মনুস্সা হি ৱিপ্পটিসাৰিনো হোন্তি ‘‘ৱিহাৰৱাৰিকাযেৱ অম্হাকং ভত্তং ভুঞ্জন্তী’’তি, তস্মা পৰিৱত্তেত্ৱা পৰিৱত্তেত্ৱা ঠপেতব্বা. সচে তেসং সভাগা সলাকভত্তাদীনি আহৰিত্ৱা দেন্তি, ইচ্চেতং কুসলং. নো চে দেন্তি, ৱাৰং গাহাপেত্ৱা নীহৰাপেতব্বানি. সচে ৱিহাৰৱাৰিকো দ্ৱে তিস্সো যাগুসলাকা চ চত্তাৰি পঞ্চ সলাকভত্তানি চ লভমানো ভিক্খাচাৰং গচ্ছতি, ভণ্ডাগাৰিকস্স ৱিয সব্বং নট্ঠং গীৱা হোতি. সচে সঙ্ঘস্স ৱিহাৰপালানং দাতব্বং ভত্তং ৱা নিৱাপো ৱা নত্থি, ভিক্খূ ৱিহাৰৱাৰং গহেত্ৱা অত্তনো অত্তনো নিস্সিতকে ৱিহাৰং জগ্গাপেন্তি, সম্পত্তৱাৰং অগ্গহেতুং ন লভতি. যথা অঞ্ঞে ভিক্খূ কৰোন্তি, তথেৱ কাতব্বং. ভিক্খূহি পন অসহাযস্স ৱা অদুতিযস্স ৱা যস্স সভাগো ভিক্খু ভত্তং আনেত্ৱা দাতা নত্থি, এৱৰূপস্স ৱাৰো ন পাপেতব্বো.

যম্পি পাকৱট্টত্থায ৱিহাৰে ঠপেন্তি, তং গহেত্ৱা উপজীৱন্তেন ঠাতব্বং. যো তং ন উপজীৱতি, সো ৱাৰং ন গাহাপেতব্বো. ফলাফলত্থাযপি ৱিহাৰে ভিক্খুং ঠপেন্তি, জগ্গিত্ৱা গোপেত্ৱা ফলৱাৰেন ভাজেত্ৱা খাদন্তি. যো তানি খাদতি, তেন ঠাতব্বং, অনুপজীৱন্তো ন গাহাপেতব্বো. সেনাসনমঞ্চপীঠপচ্চত্থৰণৰক্খণত্থাযপি ঠপেন্তি, আৱাসে ৱসন্তেন ঠাতব্বং, অব্ভোকাসিকো পন ৰুক্খমূলিকো ৱা ন গাহাপেতব্বো. একো নৱকো হোতি, বহুস্সুতো পন বহূনং ধম্মং ৱাচেতি, পৰিপুচ্ছং দেতি, পাড়িং ৱণ্ণেতি, ধম্মকথং কথেতি, সঙ্ঘস্স ভাৰং নিত্থৰতি, অযং লাভং পৰিভুঞ্জন্তোপি আৱাসে ৱসন্তোপি ৱাৰং ন গাহাপেতব্বো. ‘‘পুৰিসৱিসেসো নাম ঞাতব্বো’’তি ৱদন্তি. উপোসথাগাৰপটিমাঘৰজগ্গনকস্স পন দিগুণং যাগুভত্তং, দেৱসিকং তণ্ডুলনাড়ি, সংৱচ্ছৰে তিচীৱৰং দসৱীসগ্ঘনকং কপ্পিযভণ্ডঞ্চ দাতব্বং. সচে পন তস্স তং লভমানস্সেৱ পমাদেন তত্থ কিঞ্চি নস্সতি, সব্বং গীৱা. বন্ধিত্ৱা বলক্কাৰেন অচ্ছিন্নং, ন গীৱা. তত্থ চেতিযস্স ৱা সঙ্ঘস্স ৱা সন্তকেন চেতিযস্স সন্তকং ৰক্খাপেতুং ৱট্টতি, চেতিযস্স সন্তকেন সঙ্ঘস্স সন্তকং ৰক্খাপেতুং ন ৱট্টতি. যং পন চেতিযস্স সন্তকেন সদ্ধিং সঙ্ঘস্স সন্তকং ঠপিতং হোতি, তং চেতিযসন্তকে ৰক্খাপিতে ৰক্খিতমেৱ হোতীতি এৱং ৱট্টতি. পক্খৱাৰেন উপোসথাগাৰাদীনি ৰক্খতোপি পমাদৱসেন নট্ঠং গীৱাযেৱাতি.

ইতি পাড়িমুত্তকৱিনযৱিনিচ্ছযসঙ্গহে

ভণ্ডপটিসামনৱিনিচ্ছযকথা সমত্তা.